Сидяӈг: М. Окотэтто’ ӈэдабтавы

<div class="content-lead">Ты пэртя хасава хубтахана нимда сярыбабта вэнекоцяда хэвхананда ӈоб’ тарем’ ӈэсоӈода вэнта, тэвамда вадаӈэ сюртеӈгу, хавода мэйраӈгу, мандараха ӈэӈгу: «Мань хамедыдм’». Ерванда пин’ тарпава’ сер’, ӈани’ хэвувнанда сакадаӈгу, я’’амна’’ сырта, тэдамда пюрта. Ерванда ханяри’ ялап’’, еӈган’ ни хаюрт’’. Таняӈы яханата, тэхэ’’ тэв’’махад, ӈуда’ манзхана вэнекор тёркосавэй пулэй’’. Сава танырць’ хой’ илаӈгана мирта — ты.</div><p>Хада’ сея’ пахаӈгана вэн’’ соявы’’, няхар’’ — париденя, ӈоб’’ — няръяна. Сидя вэно’’ небя, сидя хора вэн. Пухуця нись сянакурць сидя не’ тэнз вэнм’ вандако’ хармыкана я’ ед’ пили’’ талвэдаӈахаюда. Сидя хора’ вэнм’ ту’ морюкохана нибти’’ӈахаюда, париденя — Налто, няръяна — Пуру. Налто — пасана, Пуру — немам’ мэ’’ӈа. Ӈоб’’ иры’ пеляхана Хутю небянди’ лыдымда ӈамаха’. Нарэй хаеракохона сидя вэн’ хани пин’ тарпъяха’. Пухуця ӈавка яхадей’ нюм’ — тай сэр’’ суюм’ пыди’ манэ’’ӈаха’, ябтако тёрхана ӈасиле’’ пяди’. Тёр’’ мунд’ ӈэда нюракута, ӈэва сэр’’ ӈацекы, ярёда пивана сырако’ нимня памгабтырць то. Ханерцяда ӈацекы, ханерцяда сую, тадтикахад ханерцяда вэнеко’’ нито’ пыя’ мал тинаръядо’. Хуна мальӈгана вадё’’махадандо’ харе’’ тарабцудо’ пыдо’ мэ’’мандидо’.</p><p>Луца вада’ харахана тарем’ манзеты’’: «Тарцяни юӈго ӈудасядарахадм’». Тикаханандо’ ма’’ним’’: «Саць тарана ӈавэсипой’’ манзара я’’мадо’». Ёнар’’ ты ӈэбта, ю’’ ты ӈэбта, тохолавдавэй вэнекосипой’’ мят’ нид танаӈгу’’. Вэнеко’ таром’ хой’ няна саць мэнедо’.</p><p>Автор: Макар Окотэтто’ падвы</p>

Вэнеко’ таром’ мэнедо’

Сидяӈг: Ю. Талеева’ тадтавы

<div class="content-lead">Тюку по’ Харута ӈэсыхына ты пэртя’’ хэбидя ялямдо’ хэвы ирий’ няхар’’ юдимдей толыркана мэ’’манзь тасламбидонзь. Валакада ӈарка яханана’’ вэвако сер’’ хадкэй’’, ӈока хибяри’’ яӈгумаць. Ӈадьбянда ты пэрти’’ ӈарка ялям’ Харутахана нерняна тованда ирий’ сибимдей яляхана мэ’’ӈадонзь.</div><p>Тюку си’’ив нябимдей яляхана СПК «Рассвет Севера» правление мале ваерась. Таняна ерводо’ тарем’ тасладонзь: «Хусувэй по’ ӈарка ялямдо’ сие ниць ирий’ сибимдей толыркана мэтадо’».</p><p>Харутахана нюртей тарця ӈарка ныланавадо’ 2019 по’ ты’’ саполана ирийхана ӈэвы. Тамальӈгана ненэця’’ хойхад тоць, помнандо’ пирдырӈаць, тэхэна ӈэдалёрӈаць, хано санарпиць, ярколаць, сюрберӈаць. Хыноти, тарани маниець, мирдаӈгуртахат таранадамдо’ тэмдабиць. Тарем’ мале самляӈг по’ ямбан’ «Ӈэрм ялумд» ныланава’ ялямдо’ мэцеты’’.</p><p>Тикы’ нерцюна «Рассвет Севера» колхозхана серодо’ тоенаць, ты пэртя’’ маяндорць илець. 2018 похона колхозхана манзарана’’ едэй ӈуданданадамдо’ тэраць. По’ ваерась серодо’ тю’’у’ минзь пядонзь. Ӈацембой ервотадо’ Алёна Басманова пявы манзаяхананда вырамда манэ’’лабта. Тамальӈгана ханзер’’ нерня’ ӈэвамдо’ хойхад товы’’ ненэцяӈга’’на тасламбидась. Нидо’ нядаба янамбовна ӈобкана нерняри’ миӈа’’. Самляӈг по’’ ваерась, серодо’ тидхалэйдаць. Ӈэто’ ни’ нулъяд’’, есьдо’ ӈадимя’’, недбидо’ ёльцяӈгана ня’’марпидо’. Тюку ялян’ ӈатебидо’ яӈгу’’, манзаяханандо’ таранадамдо’ тэмдаба есьдо’ тэворӈа’’. Алёна Басманова предприятий мэёвна ӈудаханата ня’’амбида.</p><p>— Самляӈг по’’ тяхана яни’ тер’’ си’’ми ервӈэ тэраць, серона’’ ӈобкана тасламбина’’. Тюку ирийхана сянакова’ яляхана по’ ямбан’ манзаравина’’ таславаць. Пова’’ савась, манзаява’’ тидхалысь. Ненэциена’’ илаӈгато’ ивъер’ сырӈа’’, тяхасовна тыдо’ мание’’, сава вадина’’ няндо’ тэврэйна’’ Няби яляхана ӈарка ялява’’ мэ’’манзь ма’’лываць, хусувэй ӈэсыхыт ненэця’’ турӈаць, мядондина’’ таняць. Харута’ хибяри’’ паӈгодо’ хойхад пере’’, пыдо’ нисянадо’ «Рассвет Севера» колхозхана манзараць, — тарця вади СПК нерм’ пэртя хэтась.</p><p>Тикы’ хавна округна’’ еркы маркад мядонди ӈатець. Ӈэсыхына илена’’ артист’’ программамдо’ хамадамбиць, хойхад мел’’ не’’ паской, падтавы паныдо’, пибидо’ мэць турӈаць. Мел’’мана сэдвы ембдяродо’ манэ’’лабтаць, нюдо’ нянандо’ турӈаць, пыдо’ ваднандо’ тэхэ’’на мэванда ӈэ’’ним’’.</p><p>Паскойвана ембадёда мюсерта ненэцие мание харад’ тер’’ маямби’’! Нидо’ ядабтась перенито’ няю’ лаханоро’’мидо’ тянё’’ ниць ӈа’’, хусувэй хибяри сава юнхат сёнзяда хыно’’ӈась.</p><p>Автор: Юлия Талеева’ падвы</p>

Сава юнхат сёнзями хыно’’ӈая

Таттама: Л. Айваседо таттамы

<div class="content-lead">Чуки диԓиӈ шевимты дяԓяхана вахандя капи’’ «Ваԓныӈ дяԓям’’ мэшту». «Ваԓны тоӈа — нума дюпа няӈ шатхаԓтай» — таԓям понантоӈ маньштомай’’. Вахандя капи’’ диԓивсохона ваԓнэ — кайвюча халаку. Ванԓхана чики халако нум кяхя’ ни ӈаймай, ӈашкиуди’’, ни’’ ԓэтпёта. Таԓям чуки диԓихина вахандя’’ ваԓныӈ дяԓям мэшту’’.</div><p>Кайвюча халакуӈ Ӈэԓм’ дян тэвма дюнь дятынԓаш, чики дяԓяхана нятуӈ мят мячидёԓьш кяшту’’, каӈуԓонташту’’, кайвюча халоконтуӈ маймаӈ мэты. Ваԓныӈ дяԓяхана ӈашкиуде’’ майпё пя’’ помна дяԓяӈ миԓ тооԓа пcшку няньтатуӈ пюԓьшту’’. Кимя ӈука нянь ӈомтаӈа — чике дилта, вяпта пон хома ӈайты, таԓям шиниӈкуна маньштомай’’. Ваԓныӈ пичат ӈашкиуде шеԓташту’’, поӈкнатуӈ шанакошту’’, кукинтуӈ нюӈк’ ӈаймям, мэмямам’ конуԓпёш мянаԓьшту’’. Чуки ноптухуна ӈупчики таԓьша ваԓныӈ дяԓям шанат каԓтыхина мэшту’’.</p><p>Таԓкахана ваԓны дяԓям дёԓьше хомана мэӈатоньш. Чики мероприятим’ шанат тэмс нешади’’ культураӈ дет тонԓюта центрхана мансԓанна’’ шеԓтаӈатоньш. Ваԓныӈ дяԓян томы’’ хыниԓмаӈ, дюньшиԓемаӈ мэты вильта праздник’ мэӈаш’’. Вахандя капиди’’ ванԓмана шеԓтамайтуӈ ваԓныӈ де’эмня ӈайта сценкам’ ӈычимчеӈаш’’, шанат тэмс нешади’’ ватамана кынуӈаш’’, таԓаӈаш’’. Чики праздникхана мэна’’ нетуӈ таамна дяԓяӈ миԓас тооԓха нянь -кэляш’’ миӈаш’’. Ваԓныӈ дяԓяхана ӈука конкурс’’ шеԓтаӈаш. Чуки похона чикитоӈ чупей’ мят’ чеԓ’’ дет тунԓы’’.</p><div class="content-new-image"><img alt="pic" src="https://854220.selcdn.ru/yamalnews/058ff226-690.webp" style="width:100%" height="709" width="1260"/><div class="content-image_child">Таттама: Л. Айваседо таттамы</div></div><p>Праздникан томы’’ неӈи’’ ӈашкиӈ ӈупум чеӈкапёш мянаԓяш’’, поляну’’ пайпёш нэхэмтуӈ конуԓпиш’’. Чикиӈ камна кимя меԓ тум’ чудимам манысаԓяш’’, таньдет ӈайта конкурсхана хятмайтуӈ паныдётуӈ ӈычимчимпиш’’. Паныдю’’ конкурсхана ӈашкиуди’’ поӈкат ӈайвахай местам Ксения Суздальцева канаӈа, пыта панымта жюри пиԓи патмыӈэ тонԓа. Ӈаԓка мянаԓта’’ нешади’’ поӈкна Елена Родямова ӈайвахай местан ка’май. Елена Семёновна шиниӈкуй дилым’ ништута дюԓ, вахандя капиди’’ культурам пон ӈаԓтана’’ ӈашкехеэ’’ вачаштута. Ӈашкиуде’’ праздникан томантуӈ неԓьня немянатуӈ няш ваԓныӈ миԓас шеԓтамай’’ — кукинтуӈ ваԓны пиԓи хома, чике’’ мячисы’’ няамӈаш’’.</p><p>Ваԓныӈ дяԓяхана мянаԓмы’’ ни’’, ӈашкиуди’’ ӈупчики тотуӈ мячисы’’ няамӈаш’’. Чикиӈ камна праздникхана мэмы’’ ӈашки’’ нюӈк’ӈаймямтуӈ, мэмямамтуӈ нэхэԓумпёш, вяԓкуԓоԓьш конуԓпиш’’. «Северный очаг» нимита паркхана мансԓанна’’ куԓкаԓи’’ шана’ку’’ ӈычимчеӈаш’’. Ваԓныӈ дяԓяхана шанкмян тэмс неша’’ ӈопт ӈомаш’’. Праздникхана мэна’’ хомана ныптакуш’’, майпёш куԓкаԓи’’ конкурсхана’’ поӈкнатуӈ мянаԓяш’’.</p><div class="content-new-image"><img alt="pic" src="https://854220.selcdn.ru/yamalnews/a6faf528-46d.webp" style="width:100%" height="1440" width="2559"/><div class="content-image_child">Таттама: Л. Айваседо таттамы</div></div><p>Евгения Зернова чики праздникан путахана тошту’’, маньшту, шиниӈкуна петаԓахана диԓина ненэй неша’’ ӈупчики таԓьша дяԓятоӈ тадяӈаймай. Евгения Шотлевна маньшту, ӈыԓи понанта та’дя чедипата ӈаԓка пуша’’ манаӈа: нита’’ ӈупухана мэмы посама’’ куйкуӈ пахант камтсоӈата’’, ваԓны ӈайта чикен дютамаӈ мэт, няньудитата таньняӈ мышчеӈата. Ӈаԓка неша’’ шиниӈкуй шеԓу’’ хомана чедидятуӈ, таньдёԓьшкай дилым ӈашкехеэ вачамантуӈ мэт путахана таԓьша праздникхи’’ тошту’’. Ваԓныӈ дяԓям шеԓтамы центрхана мансԓанна’’ маньшту’’, ӈаԓтана’’ ӈашкиуди’’ хыниԓмаӈ мэт шиниӈкуй шеԓу’’, дилм ӈычимчештутуӈ. Вахандя капи’’ дилхана таԓьша: неԓьчеэй томы ваԓны дямп пян ӈамтап — нум меԓ ни’ дюпямт, ԓамту пян ӈамтпата -меԓ таӈичумты.</p><p>Лариса Айваседо патмы</p>

Ваԓны тоӈа – нум дюпямты

Сидяӈг: Ю. Талеева’ ӈэдабтавы

<div class="content-lead">Ты’’ саполана ирийхана «Илебц» нюбета театр хэбидя яляханандо’ ӈани’ ненэцие ма’’лась. Тодо’’ тэнз’’ ила саирм’ харвабтана хибяри’’ «Предание тундры» спектакльм’ манэ’’ӈаць.</div><p>Маня’’ нина’’ сянаковамдо’ ёльце пон минредо’. Тикава’’ Прокопий Явтысойхад миӈа, пыда няданда манзаямдо’ нерня’ тидхалембидо’. Паднана нява’’ нердена нерм’ пэртяӈэ тарась. Театр’ ӈадимдева — ӈопой сер’’, тикым нерня’ лэтрась тара нив’’. Тюку яля’ Прокопий Андреевич’ ӈадимдевы тенад иле.</p><p>Ӈока по’’ тяхана паднана нямдо’ нядабавы’’ тянё ниць ӈа’’, вадамдо’, иландо’ саирм, хой’ илм’ теневанаць. Тарця ва’’лёй ненэця’’ театрхана сянакодаӈэ тоць. Прокопий Явтысой’ пьесавна «Пензер» спектакльм’ нюртей мэва’ сертаць. Ненэця’’ ханзер’’ ӈэрм’ яхана советской власть’ товам’ манэ’’ӈаць. Хурка несэй иланд’ хойхана мюсерта’’ ха’’амвыд’’, ханзер’’ иландо’ несэймы, мал’ манэ’’мыдо’. Нердена режиссёрӈэ Любовь Лебедева таравысь. Тарем’, янамбовна нерняри’ миӈаць. Тикахад ненэцие’’ вадако’’мана хамадавы «Тундровые были» пьеса ӈадимясь. «Илебц» театр’ тер’’ вадава’’ лэтрамба ёльце ӈарка серм’ минре. Сиддо’ няд’’мяць ӈацекы’’ вадамдо’ намдорӈа’’.</p><div class="content-new-image"><img alt="pic" src="https://854220.selcdn.ru/yamalnews/8f3b9ce0-0a6.webp" style="width:100%" height="708" width="1260"/><div class="content-image_child">Сидяӈг: Ю. Талеева’ ӈэдабтавы</div></div><p>«Илебц» мале сидя ю’’ сиднтет по’’ ямбан’ манзара. Сянакода не’’, хасава’’ ненэй артист’’ тотрев’ тара’’, хыноӈа’’, вадидо’ мэ’’ӈа’’. Пыдо’ хамадавыдо’ сянмэвна маниеӈгуд, тарем’ ӈод’’ несэйраха’’ ӈэсеты’’. Сяхаринда ил’ ватом’ манэ’’лабтамби’’, тикыдо’ ненэй илаӈгад миӈа’’. Таняна сянакода’’ хибяри’’ хусувэй мэва’ несэймдана’’. Нертейӈэ сянаковы’’ ню’’, нюто’ ню’’ теда’ таняна сянаку’’.</p><p>Серото’ поӈгана сём’ ханасеты’’, вадаком’ вадецеты’’, нюдо’ вадабасеты’’. Хой’ тер’’ ненэця’’ поӈгнандо’ сававна илесеты’’, тоенана по’’ мальӈгана нидо’ нядабасеты’’.</p><p>Нина’’ сертавэдо’ ӈока, сянаковамдо’ ӈатенадо’ ӈани’ ӈока. Таӈок по’’ ямбан’ маня’’ артистана’’’ хуркари ё’’ сюртець, ханярина мэць — округманана’’ ӈэдалёрӈаць, ӈарка март’ тэворӈаць. Финляндияхана, Голландияхана, Норвегияхана мэць, хуркари’’ фестивалька’’ тэворӈаць. Ярославль маркана «Охочие комедианты» фольклорм’ минрена’’ театр’ фестивалькана мэць, сидя ненадумда’’мам’ тэвраць.</p><p>Пудана’’ похо’’на няндо’ едэй хибяри’’ сянакованзь тэворӈа’’’. Манзаядо’ пили’’ савумдана’’.</p><p>Автор: Юлия Талеева’ падвы</p>

Ӈани’ сянакуць

<div class="content-lead">Пыда харта индя сер’ иле, хибярихи’’ ӈока савам’ сертаби, мюняд ялкадарӈа. Тарця ӈэвамда сян’ по’’ тяхана ядабтабнани’ хамедавась.</div><p>Анна Фёдоровна Ардеева — иӈудота, сядота вындер некоця, тенад тамна пирибцядарев’ хусувэй серкана мерецеты. Ӈопой яхана хасенавам’ ехэра, пили’’ ӈамгэхэвм’ пэрӈа. Пудана няхар’’ по’’ вэсаконда ня’ Несьхана илеӈаха’. Хой’ якоцянди’ нямна иди’ няркна. Тев’ ёльцяӈгана таӈы ялэ ӈатенаӈаха’, хоян’ хантаӈаха’. Лимбика якоцяхана та’ ямбан мяд’ терсавэй илеӈгуху’.</p><h2>Харе’’ ныхыхына’’ енась нерня’ миӈава’’</h2><p>— Илевава’’ вэва ни ӈа’’, ӈопой яхана нива’’ ӈамдю’’, — ванерабтёсь Анна лахана. — Хуркари’’ сер’’ танясеты’’, ханяна маймбаӈгун’, ханяна сацьри’’ сава ни ӈэӈгу’’. Тарем’ ӈэб’’нанда ӈод’’ хусувэй ӈамгэ тасламбада. Нина’’ нядаба, нясъюмба илева’’, хусувэй серт’ ивъер’ сырӈава’’. Ӈопой мяд’ тер’’ сава’’ ӈэя’’, мал’’ нина’’, перенина’’ сенз’’ ӈэя’’. Не нюхуюни’ — сава нядаӈгодини’. Тедари’ пыди’ тоходанаӈаха’, вэсакон’ ня не нюкцини’ нядабини’.</p><p>Анна харта еркарада — Латышева, Канинской выӈгана соявы. Нисяда, небяда илеванди’ ямбан’ «Северный полюс» колхозхана тэхэ’’на манзаравэхэнзь. Нисядо’ хусувэй серт’ мэёвна сырта ненэць’. Матдомдэй ӈэсым’ ӈудахананда ня’’амбидась, ӈока хасава ӈацекым’ хой’ манзаяха’’ тохолавысь. Пухуцянда ня мат’’ нюмди’ вадаӈаханзь, ханяӈыдо’ тенад харто’ явнандо’ мюсерӈа’’. Канин’ выӈгана Латышев’ хасава ню Михаил’ мяд’ терсавэй тыдо’ лэтамби’’, нюдяко не нюда Екатерина Шубина ӈани’ тэхэ’’на мэ.</p><h2>Мята тер’’ нямна лахана</h2><div class="content-new-image"><img alt="pic" src="https://854220.selcdn.ru/yamalnews/936a6380-096.webp" style="width:100%" height="709" width="1260"/><div class="content-image_child">Сидяӈг: М. Яр’ тадтавы</div></div><p>— Мани’ сидя нюми’, сидя не ӈацекэхэ’. Ӈаркаюм’ Архангельскхана тоходана, нюдякоми’ Няръяна маркана. Пыди’ мале нисянди’, небянди’ мякад хаяханзь, — нями лахана. — Нюхуюни’ вадэйни’, хардахана илени’, таӈгаркани’, тарем’ ӈод’’ тэри нини’ ӈамдю’’. Сырэй ёльцяӈгана сэдорасетыдм’, ӈэрёйӈэ хэсь надорцетыдм’, пени, ты’’ хоб напаӈгудм’. Сэдорава’ е’’эмня хусувэй таранадами хамедабасетыдм’. Выӈгана илена хибяри хусувэй серкана харта ёльцяда таня. Не тикым’ сававна теневада.</p><p>Нюдя ӈэвани мальӈгэхэд небяни хэвхана сэдора тухудамзь. Сырцетыдм’, ханзер’’ небякоми манзара. Сэвни’’ мэцетыдм’, тарцям’ маниесь, ихинани манзетыдм’, ёльцянда тэвась мань ӈод’’ тамбир’ паской ӈавэ сэдыбаӈгудм’. Сэдорава — сямян харвабтана серми. Хусувэй яля’ сэдорасетыдм’.</p><p>Мяд’ тер’’ нини’’ ембапидм’, ӈани ненэцие’’ е’’эмня ӈани’ манзарасетыдм’. Сава’’, ӈоба’’, мальця’’, тобак’’, пива’’, бурка’’, тапка’’ ӈэсеты’’, хибяхана ӈамгэ’’ тара’’, тикыдо’ сертасетыдм’.</p><p>Вэсакоми ӈока по’’ ямбан’ ты пэртяӈэ тарась, хойхана мюсерӈанинзь, теда’ няхаромдэй по’ хардахана илени’. Вэсакоми нита хорови пэрӈа. Хардахана иленаха’’ молока’ ӈаварм’ тэврамби. Пыда нида нядаби, хасенавам’ ехэрана хибяри, пили’’ манзаядамда хоӈгу. Ханяӈэхэна хоян’ тэворцетыни’, ты пэртя’’ нини’’ няда тарабнанда, хэсетыни’. Тэри нини’’ хэвхана мюсерцетыни’, ихина ёльце сава ӈэсеты. Ӈопой яхана сидни’ ӈамгэхэрт ни ня’’амбю’’, тарана ӈаворини’ ма’’лаӈгуни’, ӈэдалаӈгуни’. Тарця серкана таӈгани’, — Анна Федоровна мась.</p><h2>Хойхана илева — ивнанда ӈэда ил’</h2><div class="content-new-image"><img alt="pic" src="https://854220.selcdn.ru/yamalnews/cb714452-55d.webp" style="width:100%" height="709" width="1260"/><div class="content-image_child">Сидяӈг: М. Яр’ тадтавы</div></div><p>Школамда ёльце’’махаданда Анна Санкт-Петербурган’ Герцен’ нювм’ нюбета институтан’ тоходанаванзь хэвы, тохолкодаӈэ таняна тет по’’ ямбан’ тохолковы. Ӈоб’ мальӈгана каникулка’’ мяканда тэвы’’, небяюта, нисяюта хэван’ мяканда товы. Таняна сава нямда ядабта, Фёдор Ардеев армияхад товы, мале ты пэртяӈэ манзаравы. Ниди’ таняна ховэхэ’, тюнди’ ваерась, ӈобкана илелъяханзь… Тикахад саварка нянанда яӈгударха. Тев’ ёльцянд’ сян юд’ мян по’’ ваера’’. Анна Фёдоровна, Фёдор Егорович Ардеевха’ сававна илеӈаха’. Тад’ нерня’ ӈод’’ тарем’ ӈэя! Тамна ӈока по’’ ямбан’ маймбась, ябда илеяха’!</p><p>Автор: Юлия Талеева’ падвы</p>

Ябда илева - ӈарка сер’’

Сидяӈг: Анна Яптик’ тадтавы

<div class="content-lead">Ты пэртя’’, харад’’ тер’’ сяхаринда нарам’ саць ӈатесетыдо’. По’ ямбан’ Сянакова’ ялян’ хамекосеты’’. Хасава’’ ӈэсоӈодо’ высылпаӈгу’’, не’’ едэй паныдамдо’ сэдыбаӈгу’’, ӈацекы’’ нисянадо’, небянадо’ нядабаӈгу’’. Сямян манзаямдо’ мэ’’марихидандо’ хардан’ ӈэдалаӈгуд’’. Тюку по’ Яр Саляхана 63 мэва’ ма’’люрӈа’’. Саць ӈока’’ пирдырта’’ ныхыдо’ манэ’’лабтаванзь товы’’. Ӈадьбята пирдырмидо’ няхар’’ яля’ ямбан’ мимы’’.</div><div class="content-new-image"><img alt="pic" src="https://854220.selcdn.ru/yamalnews/397ab88e-34d.webp" style="width:100%" height="1440" width="2558"/><div class="content-image_child">Сидяӈг: Анна Яптик’ тадтавы</div></div><p>Сянакова’ ялям’ Ямальской район’ ӈэвахана мэна Андрей Кугаевский нэмбидась. Пыда тарця вади мэ’’ӈась: «Мат’’ ю’’ няхар’’ по’’ ямбан’ ӈарка хэбидя ялява’’ мэ’’ӈава’’. Мале ӈахакуй’’ похот нёдана серма’’ ӈоб’’ нерняри’ минрева’’. Яляна’’ падаркана сямянхат ненадо яляӈэ тасламбива’’. Ты пэрти’’ е’’эмня савари вади мэ’’ӈадм’. Минрена серто’ ненэся тоена, тикахад саць ӈарка таром’ яхана’’ ха’’аврамби. Пыдо’ мэбета’’, ӈамгэхэртм’ ниня пилюта’’, сейдо’ мэё’’ ненэця’’. Иландо’ нензел’’ нибта ӈод’’ ӈа’’, невхы иринато’ табеку нёда’’. Хусувэй по’ тыдо’ вадаби’’, ты’ илам’ нерня’ минре’’. Пилибт’’ ӈобанзер’’ ӈада’’, ӈопой им’ мэць иледа’’, ӈацекыда’’ тохоламбида’’. Мядонзэй хамэдамбадаха’’ ӈобтикы ӈарка вадам’ мэ’’ӈадм’. Сензда’’ ӈада’’, илра’’ сава ӈэя».</p><p>Мядонда’’ яна’’ ханярид товыць. Е’’эмняндо’ хуркари сава серо ӈадимдембиць. «Ӈудини тарама», «Харбё хасава», «Колыбель Ямала», «Сава хан», «Мядо’ ил’» пирдырма’’ миӈаць. Тикы’’ хавна концерт, выставка сертабиць. Ямальской район’ серо минрени’’ харад’ хэвхана ярмарка танясь. Ненэця’’ хуркари тэнз ӈаво мирдапиць. Хано мирдапада’’ хасава’’ таняць. Тамна’ тяхакуна паны’ мадавы, пиби мирдапада’’ не’’ нуць. Хэвханандо’ халэ есьпада мэсь. Ядэрта’’ сидя хэвхандо’ нулаӈгаць. Тэмдортадо’ ӈока ӈэва’ сер’ ӈась. Нюдяко лавкаця’’ ядувна мимб’’, сямян таранам’ хось пирыць.</p><h2>Хасев’’ пирдырма</h2><div class="content-new-image"><img alt="pic" src="https://854220.selcdn.ru/yamalnews/09139478-de5.webp" style="width:100%" height="1440" width="2557"/><div class="content-image_child">Сидяӈг: Анна Яптик’ тадтавы</div></div><p>Пирдырта’’ ӈани’ ӈоб’’ хэвхана мэць. Яркуланаха’’, хано санарпадаха’’, няхар’’ мэва ӈопой яхад санартаха’’, ныхыдыртаха’’, таротаха’’ ӈоб’’ ёльцяӈгана сырӈаваць. Харад’ тяхана, салмуй я’ няна этнобитлон ӈась. Таддикахад ӈацекы’’ пям’ ня’’амба сюрберӈаць. Ламбитана’’ ӈобтикы таняна мэць. Нумда хадӈэ, мерцяӈэ еремясь, ханяӈэрихина хаер’’ ӈадиберӈась.</p><p>Мале ӈока пирдырма ӈоб’’ ирсу’’ ӈаць. Ӈадьбята хусувэйм’ манэ’’ма’ пир нись ӈа’’. Едэйвана ӈадимы этнобиатлонм’ няби ламбита сюрбермам’ манэ’’манзь хан’’ӈадамзь. Тикэхэ’ ӈобтолсаркаха’. Нюртейхана ламбита няби яркула тара. Ӈопой’’, нябихина ямб няда яӈгацярхам’ ня’’амба тара. Няра мальцята’’, сибёцяко пибита’’, нянзико пя ламбита’’. Хэвхандо’ ӈока сыртам’ ма’’лаць. Ӈопой серм’ минренаха’’ сырап’’, сяхаринда илека. Хусувэдо’ няхаданда пере, хибяхавадо’ янопата мал’’ пуня’ ха’’морӈа’’. Этнобиатлонм’ нюртейӈэ Панаевск-1 команда пирдаледась. Пуданда ТСО «Я’ ерв» тер’’ тоць. Новой Портхад ӈэда ТСО «Ханибэй»‘ тер’’ няхаромдэй’’. Ламбитахава ӈобтикы Панаевск-1 команда мере’’ӈась. МОП «Ярсалинское» нябимдей ян’ ха’’мыд’’. ТСО «Я’ ерв» няхаромдэян’ еремя’’.</p><div class="content-new-image"><img alt="pic" src="https://854220.selcdn.ru/yamalnews/f0e41a2e-03f.webp" style="width:100%" height="1440" width="2558"/><div class="content-image_child">Сидяӈг: Анна Яптик’ тадтавы</div></div><p>Ӈани’’ тэнз’’ пирдырмаха’’на мэбете’’э’’ ӈани’ ӈока’’. Вячеслав Худи няхар’’ мэва ӈопой яхад ӈаха санавы’’ . Виктор Вануйто яркулабта ва’’лёй ӈэвы. Сергей Лаптандер ӈока ханм’ санавы. Лев Езынги Новый Порт’ ед’ сянаковы. Пыда ныхыдырмахана пир’’мэда. Сёяха’ тер Яков Яптик таро’’махана ва’’мы. Максим Салиндер ӈэдалёбта тоенавы, лабкамда сидя минута 36 секунда сюртембавэда. Тамна сидя ӈэдалёдам’ ненадумдаць: Павел Худим’, Хасавако Яптикм’. Тюку по’ сямянхат ва’’лёй’’ ти’’: МОП «Ярсалинское», ТСО КМНС «Харп», ТСО «Ханибэй». Пирдырта’’ снегоход няби еси ня’’амвы’’. Е’’эмняндо’ ӈадя сава ӈуда’ тер хамэдавы’’.</p><p>Автор: А.Яптик’ падвы</p>

Тецьдахад мэбе’’ӈа’’

<div class="content-lead">Ни ӈашкиуди’’ мянаԓьш ваԓымтуӈ мэна’’. Пуровский’ районхана нюча ӈашкиуди’’ дет ӈайта этно-конкурс’ «Мисс Северяночка 2024» мэӈаш’’. Чики мероприятим’ шанат тэмс нешади’’ дет тонԓюта центрхана мансԓани’’ шеԓтамы. Манԓе Таԓкахана мат’ты мэмаӈ шеԓтаматуӈ.</div><p>Поӈкнантуӈ мянаԓмантуӈ мэты садикан канта’’ Таԓкахат, Ханымейхат мэна’’ хампԓяӈк ни ӈашкиуди’’ конкурсан ӈомаш’’. Мянаԓта’’ чет’ номинацихина пытатуӈ конуԓпиш’’. Ни ӈашкиуде’’ кунят тумамтуӈ, куше, ӈамэхэна диԓимамтуӈ вачаӈаш’’, каԓьтуӈ дян туӈ чеԓ’’ диԓивсум, паныдю’’ ӈычимчеӈаш’’, творческий’ номер’’ шеԓтаӈаш’’. Чикиӈ камна деты дяԓнасутуӈ шеԓхадя миԓсатуӈ ӈычимчемпиш’’.</p><p>Ни ӈашкиуде’’ дёԓьше пимши’’, шодюӈа’’. Кукитоӈ ӈаԓка сценан неԓьчеэй нуԓматуӈ, чикехана ӈотнаӈ ӈашкиуде’’ делымпёвтамыӈ хомана мянаԓяш’’. Нитуӈ выступленим’ манымантуӈ мэты немянатуӈ, нешанатуӈ тоӈаш’’. Ӈашкиуди’’ поӈкнатуӈ мянаԓмам таньдет тасԓамы жюри’’ маныдеӈатоньш. Чикидю поӈкна «Шатута ни» нимита конкурсхана нэхэԓмы Елизавета Калиничева тадямэӈаш.</p><div class="content-new-image"><img alt="pic" src="https://854220.selcdn.ru/yamalnews/8d1a1105-ba3.webp" style="width:100%" height="494" width="878"/><div class="content-image_child">Таттама: Л. Айваседо таттамы</div></div><p>Жюрихана мэна’’ маньшту’’, ни ӈашкиуде’’ дёԓьше пимши’’, тотуӈ хомана мянаԓя’’, выступленитоӈ ӈука нешаӈ вин ка’амдят. Конкурстуӈ хитамахаты мянаԓмы’’ ни ӈашкиуде’’ тотуӈ детуӈ тасԓамы мячисы’’, диплому’’ няамӈа’’.</p><p>Пиԓи шатута «Мисс Красота» Екатерина Макарова, ни ӈашкиуде Таԓкахана диԓе, «Гнездышко» нимита садикихит мэна. «Мисс Очарование» Мария Пяк, пыта Ханымейхат томы, «Улыбка» садикан дятыԓя. «Мисс Умница» София Айваседо, ни ӈашкиуде Таԓкахай школа-интернатхат мэна. «Приз зрительских симпатий и Вице-мисс» Таԓкахай «Ёлочка» садикан канта Олеся Ермакова няамӈата. «Мисс Северяночка 2024» ӈайши Амелия Сафарова кадя, ни ӈашкиуде Таԓкахана диԓе, «Радуга» нимита садикан дятыԓя.</p><p>Чики мероприятим’ шанат тэмс нешади’’ дет тонԓюта центрхана мансԓана’’ ӈаԓтана’’ ӈашкиуди’’ хома шоньшахана нетуӈ няштомаӈ мэт шеԓташтутуӈ. Таԓьша конкурс’ ӈаԓтана’’ ӈашкехена’’ таԓаӈа. Мянаԓмы’’ ни ӈашкиуде’’ навэт хома шоньшахана наӈича тэмс’’ нетоӈ няштондятуӈ. Чикиӈ камна ӈамыԓи’’ конкурсхана ӈука нешаӈ поӈкна мянаԓпатоӈ, ниш’тоны пинан.</p><p>Автор: Лариса Айваседо патмы</p>

Ваԓымтуӈ мэна’’

<div class="content-lead">Си’’ив я’ тер’’ мэ’’мы ныланава’ яляхана Тасу’ яв’ няна ма’’лыць. Таняна яха’ салаба’ ниня тодо яхат товы’’ ты пэртя’’ пирдырма’ ялямдо’ мэ’’ӈаць. Пяку’’ яхат, Ензя’ тер’’, Пэ’’ няд тэвавы’’ ӈани’ танявыць. По’ тяхамбавы нидо’ едтеванзь хубтахана, ӈодь ялянда сэв тю’’у’ тана’’махаданда мальцятна’’, панытана’’ нито’ пуд мядо’’ няю’ вэрнаць. Хусувэй таня’ туртам’ палытана’’ лаха манэ’’сарӈадонзь. Пудана хадкэӈгана серкана сидна’’ лэтё тохоламби’’. Хибяхарт пуня’ нись ӈа’’.</div><p>Сяхаринда ты пэртя’’ сянакова’ яляхана пили’’ нерде’ вы’ тер’’ ерво’’ нямна ядэрцеты’’. Ӈамгэ тасла я’’амна серото’ таняб’’, ӈобт’ ма’’лёвы ерво ӈопой яхад хосетыдо’. Сян яӈорэй’ тикыдо’ пюсь харад’’ помна ядэрць ни тарасету’’. Ты’ лекар’’ табеко, тохолкова’ серо, тамна ӈани тарана ӈавэ намдавандо’ е’’эмня ӈопой яхана едтесетыдо’. Тамальӈгана ӈока хибя’’ райондо’ ервхад иле харад’’, мерета еся’ хан «снегоход»‘’ нямна хонаркурӈаць. Тикадо’ хусувэй по’ тарця ӈэсеты. Ханяӈыдо’ тарана ӈавэ (пардон’’, парасин’’, ной’’, тамна ӈани’ яёло’’) ня’’марпаванзь ядэрцеты’’.</p><p>Пили’’ нюрте’’э’ турта’’ мирдаӈгурти’’ няю’ нэкалпидонзь. Нито’ еркана вы’ илаӈгана тарана ӈавэ тэмдарамбиць. Хусувэй хибяри нянанда таранам’ хоӈгусь. Паӈгалмы ни’’, мивы сян’’, толь’’ хуркариць. Ненэцие’’ поӈгана Павре Марюйм’ торомдадамзь, пыда Салехард’ няд товы Петр Худим’ пюрмы. Тикы няхаданда тынзядамда тэмдаван’ харвавы: «Тюку яхана тарця тынзяӈо мирдапада яӈгу, Петрм’ етри’ сянакова яляхана ӈатесетыва’’. Няданда тарана ӈамгэдава’’ хосетыва’’. Теда’ нява’’ нивы ту’’».</p><div class="content-new-image"><img alt="pic" src="https://854220.selcdn.ru/yamalnews/514e6507-8d9.webp" style="width:100%" height="709" width="1260"/><div class="content-image_child">Сидяӈг: М.Яр’ тадтавы</div></div><h2>Пирдырма’’</h2><p>Тароти сахамламбада’’ тёр’’ ӈаха’’ со’’. Тикари нёракуць ханяна мэвамдо’ таминд хоӈгур’’. Тадӈо’’ сырта’’ ненэця’’ сюребтявӈэ пирмдад’ ниня ӈамдыць. Мальцятна нидо’ нерняку пэрта’’ ненэй вадаримдо’ мэ’’ӈаць. «Мэёвна ня’’мад’’! Нёр ӈэдарамбю’’! Сеяр нёя пин’’! Маханя’! Сятаня’ нэкалт’’! Хэя’’, няна вэвананё!», — тарця вади намдорць ханяӈэхэна письӈэ ӈадартасетыдо’, та ёльцяӈгана ӈамгэм’ писедавамдо’ ёльце намдаван’ харвасетыдо’, намдбато’ пись’ тамна ӈокамзеты. Сидя яля’ сер’ таро’’мам’ мэ’’ӈадонзь, няби яляхана ситна мерця, явна ӈэда хад хибяхартм’ нись табла’’.</p><p>Нито’ хэвнякуна ярколана’’, хано санарпада’’ пирдырма’’ нито’ ирмня миӈаць. Ӈынхана енертахарт’’ танявыць. Тикыдо’ хойхана ӈацекэхэ’’ мимбада ӈын’ то’’олха нивыць ӈа’’, яӈгавыць. Пирдырман’ харвана’’ ӈока ӈэвыць, ханяӈы’’ тарця пирдырмахана нюртей мэвы’’.</p><div class="content-new-image"><img alt="pic" src="https://854220.selcdn.ru/yamalnews/53501f32-a62.webp" style="width:100%" height="709" width="1260"/><div class="content-image_child">Сидяӈг: М.Яр’ тадтавы</div></div><h2>Тасу’ яв’ тер’’ ва’’лёй</h2><p>Ялянда сэв’ тю’’уна хэ’’мяхад мал’ ӈэбато’ ненэця’’ сцена’ няю’ вэрналыдаць. Таняна ехэрана ӈоб’’ мэкад сер’’ пэӈгуць, харо ня’’амбада’’ ненэця’’ ма’’лыць. Пыдо’ ӈаябад халям’ ясьпа Россияна’’ рекордм’ сертавандаць. Тикы серм’ Станислав Яр тидхалембавы: «Пирдырмахана ясьпаванда халэ ӈахакуд хар’’на’’ хобанъянаць. Тарем’ ниб’’на’’ серта ӈокам’ ни’’ ясят’’, ӈадьбята ӈахакуд нядэйнаць. Ненэця’’ харе’’ хародо’ мэта’’. Хусувэдо’ тасламбида сяӈокм’ серта пирта, ӈокам’ ясьпата ханяцей сава ӈэӈгу. Нерня’ ха’’амвы ӈуда’ терм’ ня’’маӈгу. Пуна’ хонаркода яӈгова’ е’’эмня халэна’’ падарцавэй ненэцяӈгат тэмдэйнаць».</p><p>Ненэсяри халэ ясьпа пявандо’ мальӈгана ӈамгэ’ пиркана нёхоӈгана ненэцяӈгат хал’’ я’’авлысь. Ненэйвана панытана’’, мальцятна’’ тыхынана’’ то’’олхаць. Хэвханандо’ ӈэда халэ ӈани няхато’ мипа нидонзь ӈэдарамбю’’. Ясьтанаха’’на тамна индё харвабцовна нядаӈгода’’ манзараць. Пыдо’ мале ясьмы халэ нензо пад’ мю’ ма’’ламбидонзь, ӈокдамда тасламбиць, пуна техэ ӈока нито’ понд’ салаба толь’ ни’ вабтпидонзь. Тяхасовна манзара’’махадандо’ ӈокханда юр’’ тет ю’’ кила халям’ ясьмы’’. Нерцюбт’ хибяхарт таӈок ӈаябад халям’ нивы ясьпю’’. Тикыдо’ няхар’’ юр’’ кыла халяхад сертавыдо’. Сямянхат ӈока халям’ (16,5 килам’) Татьяна Марьик ясьмысь. Пыда тарем’ мась: «Мань илни саиркана етри’ яля’ няю’ ӈэда серк’’ енана ненэцяндм’. Си’’ми хонравандо’ мальӈгана пуня’ нидамзь ӈа’. Вэсакоми хардами тэрась, харта силӈадась. Тадтикахад си’’ми нерня’ мяни тер’’ сахамламбиць. Ня’’амвы ӈудани тер харе’’ манзаяханани ёльце тараӈгу».</p><p>Пуна’ Тасу’ яв’ тер’’ ва’’лёй ӈэвамдо’ манэ’’лабта’’махадандо’ ясьмы халэдо’ сянакова’ ялян’ товы ненэцие’’ помна тяръядонзь.</p><div class="content-new-image"><img alt="pic" src="https://854220.selcdn.ru/yamalnews/6de49226-4ea.webp" style="width:100%" height="709" width="1260"/><div class="content-image_child">Сидяӈг: М.Яр’ тадтавы</div></div><h2>Тыдо’ мере’’ӈа’’</h2><p>Ненэйвана ты’’ ӈэхэна ӈэдалёрмам’ ӈатець. Тюку по’ сидя сер’ ӈэдалё пирдырӈаць. Нюрте’’э’ мал’ ӈобкана харад’ няю’ мандалӈэ нито’ ирмня ӈэдалэйдаць. Хасава’’ юр’’ мян ӈэдалёда нидо’ нертемба няваталаӈго мандалӈэ нуна ненэцие’’ няю’ выркадаць. Ханяӈы’’ ӈылекавна тыдо’ харебидонзь. Сававна тасла’’махад тикы сэбинена’’, нидо’ нертемба товы’’ ненэцие ӈэдалевам’ нивэдо’ тола’’, нерденадо’ ёльцянда таль’’ мер’ ӈэдалавы’’, няхандо’ сыраць ӈани нида пунда нэкалмэдо’. Пуна’ яӈорэй’ пырдари’ танета пядонзь. Нито’ нерня Кирилл Лапсуй ӈадимясь. Нянда пуд Прокопий Яр ӈэвысь. Няхаромдэйдо’ Василий Вануйто ӈэвысь.</p><p>Тикы нито’ пуд няби яляхана сидлад’’мана ӈэдалёрӈаць. Ты’’ ӈэхэ’’на пирдырманда’’ тыдо’ ӈобт ма’’ла’’махадандо’ мандалӈэ наволпа тэврамбидо’. Хахая’ ӈэда мяд’ ядхана яркыбидо’. Ханяӈы’’ ӈэдалё мэ’’манда тыдо’ буран’ ханхана пэмба тэврамбидо’. Ханото’ тёндер’’ ёльце пирця’’, тыто’ ӈардан’ мивы’’.</p><div class="content-new-image"><img alt="pic" src="https://854220.selcdn.ru/yamalnews/03ec6f24-45d.webp" style="width:100%" height="708" width="1260"/><div class="content-image_child">Сидяӈг: М.Яр’ тадтавы</div></div><p>Автор: М.Яр’ падвы </p>

Сидя сава яля

<div class="content-lead">Таԓкахай школа-интернатхана тохоԓкота» ӈашки» хайму» нятапи». Таньше нятакома хома шеԓ. Урокатуӈ пут тохоԓкота» ӈашки» школантуӈ музейхана кататат — окопные свечи» шеԓтапёшту». Хадям няна хайноԓта» таԓьша кататато» такԓаш мэчитуӈ мякнатуӈ мэштутуӈ. Мятуӈ дяԓымтампюмантуӈ камна, кэԓтуӈ мюӈ тавсташтуӈ. Тай”ня чикинтуӈ дямохат хынюй паныдётуӈ касташту», шайтатуӈ пиԓешту».</div><p>Таԓям кататат шеԓтапёш ӈашкиуде» школа-интернат музейхана мансԓана Нина Топоева тохоԓымпита. Веша банка», картон’ патаԓ, парафин’ — таԓьшахат кататат шеԓташту». Ӈашкиуде» манԓе шанат дюԓ свечки» хайму» няӈ ӈайтаптаӈаш. Четаӈ ӈупмэмахана чет’ дюкат ва’та кататат» шеԓтаӈа».</p><div class="content-new-image"><img alt="pic" src="https://854220.selcdn.ru/yamalnews/98924859-9d9.webp" style="width:100%" height="1080" width="1920"/><div class="content-image_child"></div></div><p>Чикиӈ камна тохоԓкота» ӈашкиуде» музейханантоӈ дяԓнас пускохот маскировочный’ шентми» паӈкаԓпи». Поӈкан дяԓнас пуску» шаԓашту», тай”ня чикитоӈ хайму» такԓаш мээвтат шентмат паӈкаԓьштутуӈ. Таԓьша шентми», ӈай ӈыди ӈамыдю» ӈашкиуде» технологии кабинетхана ӈупчики шеԓтапёшту». Непоӈ нятакота движеним’ «Шьём Победу» найӈаш. Хайтуԓаш ӈашки» тохоԓампюта ԓушинетуӈ Раиля Миндиярова шичитоӈ няташту. Ӈашки» камна, немянатуӈ -нешанатуӈ нятакошку», школахана мансԓана». Хайму» панэт хайтуԓашту», хаймыхина мэни» ӈамԓат ӈомташту». Таньше нятакош манԓе куптана чепьӈаш». Неԓьчеэй няна шат’ тамтампёш мэта» балаклав» шеԓташтуш, дюпа пюмя», мякна мэта дяԓнас» — таԓьша ӈамыку» хайму» панэт хайташтуш». Чикиӈ камна лекԓу» мякна мэна», дятаԓёй хадям» панэт шеԓташту». Пунԓыдю» дёԓьшат ӈайта пюмя”- шорты, пюмяӈ таӈка», ниньшику дяԓнасыхит хятмы» мякна мэта» паны». Чики хятмайтуӈ ӈамыдётоӈ каныԓчи» неньшаԓмана шеԓаштомаӈ мэты, шиш’татоӈ таткана» видяку» хайташту». Хаймыхи» ӈамы таԓамам ӈашки» тохоԓампюта ԓушинетоӈ неԓьшут намташтута.</p><div class="content-new-image"><img alt="pic" src="https://854220.selcdn.ru/yamalnews/df32f0ce-689.webp" style="width:100%" height="1440" width="2559"/><div class="content-image_child"></div></div><p>Четаӈ ӈашкиуде» паныдю» хятпёмантуӈ камна, ненатумтма повязки», ныптакош мэта» пуԓтат» шеԓтапи». Паныдю» хайтуԓамантуӈ камна ӈамԓу» пиԓипёш мэта кабинетханантоӈ матуԓкадяш няню» касташту». Тай”ня пускуӈэ матоԓьш кастамытуӈ нянютоӈ ӈаԓка пӭйӈ копан хапхадя хайму» ӈамԓат ӈайтапташтутуӈ. Таԓьша» ӈамыку» хайноԓта”хана» ӈупчики таԓаӈа». Таԓкахай школа-интернатхана нятакоман ха’читоӈ «Добро.ру» нимита платформан’ пытатуӈ патӈаш». Тохоԓкота» ӈашки» маньшту», пытоӈ каԓьтуӈ вимнянтуӈ нятакоман хаш’, хайму» панэт хайтуԓаӈа».</p><div class="content-new-image"><img alt="pic" src="https://854220.selcdn.ru/yamalnews/424d96fe-76a.webp" style="width:100%" height="1440" width="2559"/><div class="content-image_child"></div></div><p>Таньше мэма хома шеԓ, ӈяхядя таԓям нятапётан хайноԓта» нена» меԓ нэхэԓты». Шеԓтамайтуӈ, хятмайтуӈ ӈамыдётоӈ Пюԓ дяханана ӈайта штабан #МыВместе миштутуӈ, таньдет тасԓамы «Мы Едины», «Зов Добрых Сердец» няӈ канаштутуӈ. Таньнят Пюԓ дяӈ чеԓ» нятакош ӈомтамы» ӈамыдё» хаймыхи» ӈайтапташтутуӈ. Ӈашкиуде» маньшту», хаймыхина мэна» нена» ӈопшеԓ хома шоньшахана нятапётдяна», чикехена хома ӈайты.  Четаӈ ӈука тэмс неша» хадям няна мэӈа». Меԓ нэхэԓтаӈа, меԓ мяктуӈ туты». Хадям няна хайноԓта» дянтуӈ чеԓ» нятакош ӈайтаптамы» ӈамыку» няампатоӈ майпёшту».</p><p>Лариса Айваседо патмы</p><p>Таттама:  Л.Айваседо таттамы</p>

Хайму” нятапи”

Сидяӈг: Е. Ямкина’ тадтавы

<div class="content-lead">Хусувэй ненэцяӈгана мята тер’’ сямянхат таранида. Небянана’’, нисянана’’ сидна’’ сава иланд’ тидхалемби’’: илна’’ ямбан’ нина’’ хэвхана ядъиваць, няд’’маӈэ тараиваць. Ӈадьбяна’’ мяна’’ тер’’ лэтрамбина’’, поёна’’ мэйрамбина’’.</div><p>«Маня’’ ӈэрм’ ненэцяӈэ, хардахана иленаӈэ паӈгона’’, вадина’’ янамбовна юрыбина’’. Неноховавна вадёдана’’ ненэця’’ тарем’ хая’’. Хой’ няна илена’’ нюкцидо’ паднавандо’ ёльцяӈгана мято’ хэвняна мэ’’, тохолку’’. Мято’ терхат ныклё иле’’, тикы ӈацекэхэ’’на вэнзер’ ха’’морӈа. Сидто’ нядаба, нерня’, сава иланд’ табедамба серо’’ӈа», — тарця вади мяд’ тер’’ е’’эмня нэвы клуб’ яляхана районна’’ ерв марцьхы Николай Маймаго хэтась. Тикадо’ яна’’ нямна ӈэда музей’ хэвхана ӈэӈгу. Нюмда «Яляко».</p><p>Клубан’, маркана илена’’ мяд’ тер’’, интернатхана илена’’, мякна вадёдана’’ евако ӈацекы’’ ядэрта’’. Таняна ӈэрм’ тер’’ вади, ила’ саирм’ тохоламбаӈгу’’, таддикахад ӈани илека серо тидхалембаӈгу’’. Ензяӈгана юнета’’ ненэця’’ мядоманзь турта’’, няндо’ мэкад ӈавэ вадета, манэ’’лабтамбаӈгу’’.</p><p>Клубм’ нэмбавандо’ маляӈгана ӈока мядонда’’ турӈаць. Мяк’’ туртаха’’ ӈацекы’’ стихотворения ваде’’ӈаць, лаханаком’ манэ’’лабтаць. Тикы’ хавна «Я’ ва’’ал», «Таймыр» ансамбльха’ тараӈаханзь.</p><p>«Яляко» теда’ ӈарка ялян’ хамекурӈа, ӈацекы’’ е’’эмня Ты пэртя’’ сянакова’ ялям’ сертаӈгу’’. Таӈы ныланава’ иры’’ нерцюна ӈобанзер’ мэтадо’. Варӈэ’ ирыхына Ензя’ тер’’ Ты пэртя’’ ялядо’ ӈэсеты. Тикы иры’ пуданахана нисянадо’, небянадо’ ныланаванзь ханаӈгудо’.</p><p>Автор: Е. Ямкина’ падвы</p>

«Яляко» сидна’’ ма’’ламби

<div class="content-lead">Хэвы сиˮив яляхана Тазовской районхана ты пэрмаʼ нямна хуркариˮ тарана серо минрець. Сянаковаʼ яляʼ хавна Россиянаˮ тиӈгы яхат товыˮ ӈарка тасалковамʼ мэˮӈаць. Таняна тэхэˮна мэнаˮ Национальной Союзʼ терˮ ӈобтʼ маˮлюрӈаць. Ӈарка лахарёдоʼ ты пэрмаʼ хавна халядаваʼ нямна ӈась. Ӈокханда юкад вата тет яхад серо теневанаˮ, хареˮ яханандоʼ тыʼ иламʼ нерняʼ пэртяˮ товыць.</div><div class="content-new-image"><img alt="pic" src="https://854220.selcdn.ru/yamalnews/9e35cc5f-ee1.webp" style="width:100%" height="1440" width="2560"/><div class="content-image_child">Ӈока вадамʼ округхананаˮ ты пэрти нядабавамдоʼ, вакна ты пэрмамʼ, ӈаниˮ ӈэрмʼ яхаˮна тыдоʼ лэтрамбавамдоʼ тасламбиць.</div></div><p>Ты пэртиˮ Национальной союзʼ ӈэвахана мэна Михаил Яр таремʼ мась: «Вакна ты пэрмахана хусувэй поʼ тэнд хэва суворӈа, нябтипой хурка ӈэвахаданда маниер. Ямалваˮ сяхаринда ӈаниˮ ёˮ терˮ поӈгана ӈадьсеты. Тамна тяхаʼ илнаˮ саирмʼ лэтраванаˮ, минреванаˮ еˮэмня илебей ненэциенаˮ тэхэˮна мэбатоʼ сероˮӈа. Пыдоʼ сава иландамдоʼ вуни ӈатеӈгуˮ, хартоʼ нерняку ӈэбатоʼ тара, хареˮ яндоʼ едʼ ӈарка таромʼ хаˮаврамбабатоʼ, тикахана таравамдоʼ хамедаӈгудоʼ. Ханзерˮ яхананаˮ ты пэртинаˮ нядабававаˮ ӈаниˮ яхаˮна иленаˮ ты пэртяˮ теневабтоʼ тара, масиˮ пыдоʼ яханандоʼ ӈаниʼ таремʼ сертаӈгудоʼ. Маняˮ, ты пэртяӈэ, ханзерˮ нерняʼ миˮмахаданаˮ теневаваˮ, ненэциенаˮ таняˮ».</p><div class="content-new-image"><img alt="pic" src="https://854220.selcdn.ru/yamalnews/0135184f-6b8.webp" style="width:100%" height="1440" width="2560"/><div class="content-image_child">Якутияхана, Забайбальской крайхана, Магаданской областьхана, Тываʼ няна ханзерˮ ты пэрмамдоʼ ӈаниʼ вадеˮӈадонзь. </div></div><p>Ямалхананаˮ выӈгана иленаˮ иламʼ тидхалемба хуркари едэй мутры нядˮмяӈаˮ. Ты пэртинаˮ, халяданинаˮ тасла яˮамна серотоʼ танябˮ, хуркари луца мутры мэць падна пирӈаˮ. Ӈэдабтавы вадидоʼ минхаˮ тидпойʼ тасламбидоʼ. Тикыʼ хавна сидя поʼ тяхана округхананаˮ «дорожная карта» нюбета падармʼ ты пэртиˮ ватовна яӈгамдадонзь, едэй нядˮми ӈадимдець. Таремʼ сертаˮмахадандоʼ тыʼ ӈамзаʼ мирˮ яӈгамась. Илебей ненэциеˮ мядʼ терˮ няхаромдэй нюдоʼ хоˮмахадандоʼ ея мядʼ капиталмʼ няˮмарпиˮ. Тюку яляʼ пиркана мале 268 мюсертаˮ капиталмʼ еˮэйӈаць. 2017 поход тамна ӈаниˮ хуркариˮ яёло мюсертаˮ ненэцяˮ няˮмарпиˮ, ирыхына самляӈг ёнарˮ есямʼ тамбиˮ.</p><h3 style="font-size:19px;font-weight:500;margin-bottom:12px">Ты пэртиˮ Союзʼ манзая</h3><p>Няби яляхана Союзандоʼ терˮ ӈобтʼ маˮлюрӈаць. Таняна пяванда манзаямдоʼ тасламбиць. Союзханандоʼ Россиянаˮ тиӈгы 20 ты пэртяˮ яхат ненэцяˮ мэˮ.</p><div class="content-new-image"><img alt="pic" src="https://854220.selcdn.ru/yamalnews/36fc1b8c-b11.webp" style="width:100%" height="1440" width="2560"/><div class="content-image_child"></div></div><p>Михаил Погодаев, Якутияхана ӈэрмʼ терˮ серо тидхалембада министрʼ марцьхэӈэ тарана, мась: «Союзваˮ тодо яхана иленаӈэ сиднаˮ ӈобтʼ пэрпата тара. Яхатанаˮ хаˮморта иӈудонаˮ яляʼ няюʼ ӈэда законʼ саирӈэ, ныхыӈэ ханˮӈаяˮ. Таремриˮ ты пэртинаˮ илаʼ саирмʼ лэтра пиртаваˮ».</p><p>Нерняӈы манзаитоʼ нямна Михаил Яр таремʼ мась: «Союзваˮ тодо яхана иленаˮ ты пэртяӈэ сиднаˮ ӈопой неданʼ хаˮаврабата тара. Ты пэрмаʼ иламʼ нерняʼ минреванʼ харванаˮ ненэциенаˮ ӈобкана мэбатоʼ сероˮӈаˮ. Манзаяваˮ тяхасовна ӈадимдембабанаˮ тара. Хусувэй хибяри хареˮ яхананда ты пэртита еˮэмня варемда мэˮӈаяˮ. Ӈобкана хареˮ яхананаˮ таславы серонаˮ тидхалемба пиртынаˮ. Хибямдоʼ ӈамгэхэна няда тарабата, ӈаниʼ таслаӈгуваˮ».</p><p>Алексей Лиманзо Сахалинʼ няд товы вадада тарцясь: «Союзваˮ сиднаˮ ӈобт маˮлаванда хавна илаӈгана таранаˮ иӈуд тэврамби. Яхананаˮ тедаʼ манэˮмынаˮ, намдавынаˮ манзаяхананаˮ таромʼ хаˮавраӈгуˮ».</p><p>Тикыʼ хавна союзхандоʼ едэй ненэцие няˮмаць. Правленияхана мэвандадамдоʼ таслаць. Анадырь маркана ӈэвы Съездхана ӈамгэʼ тоˮолха серо ӈадимдевамʼ хэтаць. Тад нерняʼ ӈамгэмʼ пэрмамдоʼ вадеˮӈаць. Таремʼ ты пэртяˮ Тасу явʼ няна тасалкурӈаць.</p><p>Марина Ярʼ падвы</p><p>Сидяӈгˮ: М. Ярʼ тадтавыˮ</p>

Ты - илнаˮ саирˮ

Сидяӈг: Э. Яунгад’ тадтавы

<div class="content-lead">Хэвы си’’ив яляхана «Ямал-нюна’’ я!» Ассоциация саць ненадо серм’ ӈадимдесь. Таняна манзарана ненэця’’ нюдяко харда’’мна ӈэдалёрӈаць. Тикы’ нямна Ассоциацияна’’ ӈэвахана мэна Эдуард Яунгад тарем’ мась:</div><p>— Ӈэрм’ терӈэ таром’ ха’’авравы нина’’ нивана’’ юрыбавана’’ е’’эмня тарця серм’ минрева’’. ООО «Ачим Девелопмент» няд’’мяць тидхалембива’’. Няхар’’ ӈарка няна’’ Семён Николаевич Няруй’, Леонид Васильевич Лапцуй’, Николай Лачевич Окотэтто’ сидяӈго сертаваць. Тикына’’ мел’ ненэцянд’ Эдуард Тользинан’ ваторъянаць. Теда’ ӈэдалёро’’маханана’’ сидя нюдяко ӈэсын’ нултаӈгаваць. Нюрте’’э’ Сюнай Салян’ тэворӈаваць. Округна’’ тиӈгывна школаха’’ ненадо ненэциена’’ нюбе мипива’’. Сюнай Саляхана школам’ Семен Николаевич’ нюмгана нюмдеваць. Пыда харта соя’’ма яда, ӈавнанда таняна тохолкусь. Ненэй ненэцяӈэ поӈганана’’ нерденаӈэ музыкам’ ваде’’лась. Тарця ненэцям’ таняна тохолкода’’ ӈацекы’’ теневабто’ тара. Новой Портхана школадо’ Леонид Васильевич Лапцуй’ нюмам’ мэта. Нара’ няна ты пэрти’’ сянакова’ яляхана Сёяха’ няю’ пяӈгува’’. Таняна школадо’ Николай Лачевич’ нюмам’ нюбета.</p><p>Сюнай Саляханана тамальӈгана хардандо’ тер’’ хавна Няруй’’ мяд’ тер’’ ӈани’ невхы иринато’ соя’’ма’ ян’ турмыць. Семен Николаевичм’ сававна теневавы’’ ненэця’’ юнета нямдо’ тензебтембиць. Нядма Трофимович Вануйта Анна Ильинична пухуцянда ня’ тарем’ маӈаханзь: «Семен Николаевич таӈоцяӈгана’’ турцеты. Турпата баянм’ мэць хыноцеты. Тудако ма’’ламба сидна’’ тохоламбасеты, тикахат хуркари’’ ӈавыдота’’ ӈавар сертасеты». Евгений Иванович Хороля, Сюнай Саля харад’ ӈэвахана мэна тамальӈгана концерт сертаба нядаӈгурмы. Зинаида Айбаевна Худи КПУхана тохолкованда мальӈгана Семен Николаевич Сюнай Саляхад ӈэвамда намда’’махаданда баянхана сянакурманзь хамэда.</p><p>Ӈока по’’ хэбато’ ӈод’’ Сюнай Саля’ тер’’ юнета нямдо’ сававна тензебтембидо’. Ӈадьбято’ теда’ школадо’ юнета няндо’ нюмам’ мэта. Хусувэй хубтахана школан’ тюӈгана ӈацекы’’ ириндо’ нюмам’ толабаӈгу’’.</p><p>Автор: М. Яр’ падвы</p>

Ненадо ненэциена’’

Сидяӈг: Н. Худи’ тадтавы

<div class="content-lead">Маня’’ яханана’’, Ямал’ няна ва’’лёй ненэця’’ таня’’, хусувэйдо’ ӈамгэхэв ненадо серм’ минресь. Теда’ ӈод’’ нюто’ ню’’ иринато’ вади тамна нерня’ нёдэйдо’. Ӈоб’’ тарця нява’’ Леонид Васильевич Лупцуй. Тюку по’ 95 поданда хандась. Хахаяда яля’ Ямальской районхы Новый Портхана саць ненадо сер’’ ӈась. Школава’’ нюмнанда нюмдедонзь. Пыда ӈавнанда ӈобтикы яханана’’ тохолкусь.</div><p>Тикы’ нямна «Ямал-нюна’’ я!» Ассоциация’ ӈэвахана мэна Эдуард Яунгад тарем’ лахана:</p><p>— Тюку по’ Ассоциациява’’, ООО «Ачим девелопмент» няд’’мяць ненадо ӈарка таром’ ха’’авра, иринана’’ ед’ сидяӈго сертаваць. Тикы’’: Леонид Васильевич Лапцуй, Семен Николаевич Няруй, Леонид Лачевич Окотэтто. Пыдо’ тюку яля’ таӈга илевана’’ няю’ саць ӈарка серо минрець. Теда’ Новой Портан’ Леонид Васильевич сидяӈгм’ тэвраваць. Мел’ хаби нява’’, Москвахана еся сертабади’’ мякана манзарана Эдуард Тользин’ падтавы сидяӈг. Пыда харта ӈобтикы яна’’ тер.</p><div class="content-new-image"><img alt="pic" src="https://854220.selcdn.ru/yamalnews/32ae81a1-02c.webp" style="width:100%" height="679" width="1207"/><div class="content-image_child">Сидяӈг: Н. Худи’ тадтавы</div></div><p>Леонид Лапцуй’ сидяӈгм’ школа’ нё’ ядан’’ маниевандо’ е’’эмня тебарӈадонзь. Тикы ӈарка манзаям’ ӈэрм’ нумгана сертадонзь. Ӈацекы’’ мал’ пинякуна ма’’лыць.</p><p>Тад пуна’ Эдуард Хабэчевич ненэцяӈга’’на, ӈацекы тохоламбадаха’’на лаханакурӈась. Савовна манзарани, ӈацекы тидхалембади ненадумдэйдась. Семен Николаевич Няруй’ хасава ню, Нядма Масне’ ня хыно’’ӈаханзь. Мэ’’мы сёнди’ вада’’, музыкада Леонид Васильевич няби Семен Николаевич падвы’’ ӈэвы’’. Сёди’ сейха’’ лимбикавна ха’’морӈась. Пензер’’ хумна сей’ минӈэ хан’’ӈась. Ӈарка ненэця’’ иле’’мидо’ ихиндо’ ха’’морӈаць, ханяӈы’’ сэвато’ хаял’’ тэсаць.</p><p>Тикы яля яханана’’ саць ненадовна хаясь. Тохолкода’’ ӈацекы’’ мядондахато’ харто’ сертавыдо’ ӈуда’ терӈэ миӈаць. Ӈармы ненэця’’ помнандо’ маймба лаханакурӈаць, невхы иламдо’ тензебтембиць, нюто’ ню нерня’ тидхалембавам’ ваде’’ӈаць. Хой’ тер’’ ма’’лёвахана, тикы нина’’ ӈани’ мядо’’манзь тута’’.</p><p>Автор: Наца Худи’ падвы</p>

Сава сер’’

Сидяӈг: Н. Худи’ ӈэдабтавы

<div class="content-lead">Не ӈацекы саля яд’ нимна танаӈга. Тандая’ нултадась, тёняӈы ненэцяӈгана мотор’ ӈанохона тось. Шкохолана тохолко мале’’махаданда мяканда паромби. Сидя ӈудахананда минренада: ӈопой сумкада, няби нянз пад’ мюня хадаханда минрена ӈавракуда. Ӈыльняна, я’ сяд’ нина нянь’’ падм’ хаесь, пуна’ хосаяӈгуда.</div><p>Хаданда мя’’ пирця яхана ӈа. Пэдаванда сер’ нылана мята няю’ сырӈа. Хадада пин’ тарпы’’. Хадамда тёрдеда, сюрамба нянанда хая. Я’ тяхамба’’махаданда хакэмда севолӈада, ёльце маймбихи’. Хадада ма:</p><p>— Каникулан’ тон? Тохолковамд ма’’лер? Ӈани’ нин хант’’?</p><p>Не ӈацекы ма:</p><p>— Та’ ямбан’ нянанд мэӈгудм’. Ӈэрё’ няна ӈани’ хантадм’. Ӈарка хардахана лекараӈэ тохолкованзь си’’ми тасламби. Ханданакэдм’, мань хабцяӈод савумдамбаӈгудм’. Ӈыльняна ӈано’ няна нянёни падм’ хаедамзь…</p><p>— Тикыяхав хосояӈгуни’’ма… — хадада манма.</p><p>Не ӈацекы хаданда ӈули’’ тэя, хусувэй та’ турцеты, та’ ямбан’ нядабасетыда. Тедахарт хадацянда ӈэва’ тар нямзилембида. Небяхаюда, несяхаюда хардахана илеӈаха’, манзараӈаха’. Хада хардан’ ха’’амван’ ни харва’’. Хой’ няна ханя ханзококо! Манзеты: «Хой илми тябибтабни, тикарихина хардан’ ха’’амсакэв». Сыра’ ямбан’ харта иле. Няхабида сидта вэдепасеты’’: ӈаврадамда, пядамда тэврасеты. Хардахана илеван’ ни харва’’. Хадахавада — лэда пирця, сята паридена не, ӈэвада ялне, сэр’’. Ӈудахабида хусувэй манзаям’ пэрць тохобэй’’.</p><p>Не ӈацекы хаданда маймбабцод тэвравы: нярьяна ӈокась, ладкоця. Сер’’махаданда ӈули’’ тамась ӈэвы. Хадада ӈобтикы нюнда маймбабцод ӈадимде, сея’ пахаӈгад падкоцям’ тюхулӈа. Ма:</p><p>— Тора панэкоцям’ суюхут сэдадамзь. Яндада тора, сербат ӈули’’ сава ӈэӈгу.</p><p>Не ӈацекы ёльце маймби таминда серада. Ханя, тэри сава! Сянӈганя’ хакэнда ядхана паныта сюра. Пухуця нюхунда сырць маймби.</p><p>Пирибтяко хадамда нядабаӈгу. Та’ манзая ӈока. Неняӈг’’ тива нерцюна ханода тырабтаӈгуху’, тэвравы нянёди’ яхалӈэ матортаӈаха’, тырабтаӈгуди’. Нерма, поёрма пирибтяхана манзая ни ӈа’’. Ӈэнда минри соӈгу.</p><p>Ӈобаӈгуна хадада ма’’нив:</p><p>— Синякуй нермя’ тоход, хоркы’ еӈгахалма’ ӈар’’ яӈганя пэбтёда яхакоця миӈа. То’ сё’ ядхана вэвако пя’’ таня’’. Таня’ нён ханас’’. Вэвако пя тантан’’, ӈули’’ невхы ӈамгэ’’. Нё’ няна поёр’’, таняна пюӈг’’, неро’’ ӈока’’.</p><p>Не нюда ма’’нив:</p><p>— Ӈэё, таня’ нидм’ ханат. Сейми пина.</p><p>Сяны ӈэбта ӈод’’ не ӈацекы поёрманзь хая. Тубкакомда хана, ихицям’ сода. Хаданда ма’’нив:</p><p>— Ӈокомбовна сапбани ӈонерм’ сертаӈгудм’, неняӈг’’ ёльцяӈгана тэри тэвабаӈгун.</p><p>Хадада ма:</p><p>— Пон нён мы’’. Тёня’ мядо’’манзь хандани’. Сит хаӈаць.</p><p>— Ӈэё, — нид яда пирибцяко ма’’нив.</p><p>Яляда ханя савакоко. Яд’ сяд’ ӈыл’ ха’’мы’’. Нёнякуна, ид’ някуна, неро’’ ӈока ӈэвы’’. Поӈганандо’ хуркари лэ’’мор’’ мун’’ со’’. Хэвнякуна неро’’ поӈгана, ид’ някуна хохорэй’’ мунабцоко’’ со’’. Ямб ӈувоця’’ тяхад ни’’ ӈадю’’. Некоця нером’ ня’’амбахая, икамда ямбумдахая таняку сылаӈга. Ӈамгэрхэтм’ ни манэс’’. Пидяндо’ нина ни’’ ӈамдю’’. Нюкцидо’ ӈарво’’махад харто’ то’ ня’ ӈадимда’’, тикахана савовна манэбцакын. Мараӈга’ паӈг’’ ӈули’’ ӈока’’. Неро’ вэба’’ мале ӈаркако’’, ӈабтадо’ ханя ейкапты’’. Яранзя’ ӈамдэд’ ӈабт пыяси лядпи. Хадами масе’’: «Пон нён мы’’! Пэта пэхэдэм’». Хорецямда екахая пэта пэй’’. Тэри саппида, ӈопой ян’ ӈонабида. Пям’ сапбата пыянанда, ӈудананда тэмъи ӈабт со. Манзаяда минӈа. Ёльце варемда мэ’’ӈа, хаця ныласяты, пуна ӈани’ пэсеты’’. Ида тэри ядэрӈа, неняӈг’’, нибярю’’ ельцяӈгана вэва ӈэсеты, тэри сят’ лабцеӈгаӈгу’’. Тедахарт таня’’, сабе ни’’ сятор’’. Ӈокахавм’ маторӈа’’. Манзаранаханда синюӈэ хая. Тамна поёрць лабцеӈга. «Тюкукоцями мэхэрцядм’» — пирибця манзеты. Тарем’ мэнаханда ӈоб’ синюмя. Синю’ поӈгана панэцямда сера, нимда сяра. Тасламбида: «Мят’ хэсь тара». Саць синюмя, ихицямда марцянда ни мо, мяканда ядалъй’’. Нултасетыда, ӈани’ ялцеты. Синю’ япда сяканда лапцеӈга.</p><p>Ёхоболха — ӈамгэхэрт ни ӈадю’’. Ид’ садаха’’ ха’морцеты, ихинанда ӈопой манзеты: «Ит’ нёхов мандэ’’. Ёльце пэдэйв’’, ихицейми хаерцяв. Пуна хосаябцакэв».</p><p>Не ӈацекы ихицямда ян’ мода, тиканда нерня’ пяда. Индя ӈыламна тасалкурӈа: «Тюрыпани сава ӈэб’’нанда. Ӈани’ сяткабты, ӈацекэдм’ вунидм’ ӈа’’. Ненэця’’ ни мант’’: «Мята хэвхана ёховы!»</p><p>Мунзи’’ ет’ яда. Синю’ помна ваертась, пон ядэрӈа. Синю халӈэ тосеты. Не ӈацекы сейда пина нултасетыда, сейнда лабна’’ма табласетыда. Хал’ хэ’’мяхад нерняку пэрӈада. Нерохо’’ тебсеты, ихинанда тасламбида: «Тяха’ хэсь вэва, тамна тяхана — и’’».</p><p>Ӈани’ пуня’ салцеты’’. Тарем’ сюрнаханда ханя’ тэвнакы? Ӈамгэхэван’ тапхалъй’’. Ӈамгэн’ тебы’’? Тет ёӈготана пя. Хамедада, ханяна мэ, вэвако пя’’… Невхы ӈамгэ’’, яӈэ хэвы’’, поёдо’ нероӈэ вадёвы’’. Пирибця сейнда хэсь, хэвняку сюрамба таслада. Ханяна мэ?! Тяхакуна нерма’ то ӈа, мята синякуна мэ. Вэвако пя’’ маханяна хаеб’’, нерняри’ мимб’’, ярэй’ ядувна тю’’у’ танаб’’нанда — мяканда тэваӈгу.</p><p>Хорецяда яптава, ӈэванда тар’’ саневы то’’олаха’’. Не ӈацекы ханимя, яля’ ямбан’ синю’ помна ядэрць ӈорман харбилы’’ма, ит’ харвава. Нимда екахая, хэвняку’ ваӈган’ хая. Тадахав ида таӈга, таслада ханяна мэ, ханя’ яда тара. Нисипой хая, таӈга ялъй’’. Синю’ хал’ поӈгана сеӈга’ мунм’ намда. Васадарць хэвнякумна сырӈа. Синю’ хал илена ӈамгэдарев’ халцана. Синю хал’ поӈгад ты ӈэтна ӈадимя. Тяханандов!!! Ябткуен!!! Ӈамгэкуей!!! Тэкоцяндов: сэвандо’ хоркадёри’’ тэри хортена’’, лы’ няӈури пялы’’, хобадо’ нялирпэй’’, нямдахадандо’ лэбта’’. Пыхыдаханандо’ наскабта хобандо’ пеля’’ ляӈгабты’’, ӈэхибидо’ — лэкоцяри’’, нерняхав миӈа’’. Хан’ нина не ӈамды, ӈэва’ иням’ ня’’амби. Тюрхана тыда танаби. Не сэванда сири’’ хортена’’, лы тибярида ӈади’’. Савацяхавм’ мэ’’ӈа, сёбянда вар наскабта тэса, поркабты. Невхы тибей паныцида ӈарханда хэнсуй’’. Тикы не хоремда вэ ӈуданхананда ня’’мада, маханяю’ пыхыдамда мэхэя, ненэй ӈудананда хан’ лата’ ед’ тоебтамбида. Ӈудахабида лэкоцяри’’ма, ханда латахав пурӈэ табцавы. Мандараха ӈы’’нив: «Тюкон ӈамдад’’, ӈобкана хэхэни’». Ты ӈэтна силяӈг’ то’’олха, ӈодь варета ӈади.</p><p>Не ӈацекы ельце сейда хая: индада табалъй’’, сейнда хумнахарт ни су’’, тебкадаварида хаи. Тад ӈапванда! Тад сюрбванда, тад пидеванда! Сейхавада пендван харвава, пяталъяма, сейнда мун ӈэванда мюна со. Тад тапалманда, пындена ха’’мы’’. Сита ня’’амвари то’’олха. Сейнда хэсь тебкаданакы, хонаравы. Юркванда сер’, лохортаковна хайнана идм’ намда. Ёльце ит’ харбилавы, ид’ няку’ тэвы’’. Пеӈгана итамта сахалӈа, идарӈа, няби со’’махананда — сята халта. Хонёдаханда синю’ хал хэвы, ӈодь ид’ някуна, мята ирня мэвы. Мята няхав сюрмбавы. Мята хэвхана хадада нувы, ӈудахананда не нюмда хаӈада. Тэв’’махаданда хадада ма’’нив:</p><p>— Ханяна мэсан? Пыдар нё’ няна пэтанаси’’, ханзер’’ си’ нямна ӈадимян?</p><p>Не ӈацекы серта сер’ хаданда ваде’’ӈада. Хадада ма’’нив:</p><p>— Хацян ня’’амлара’’, вэвако сер’’. Нянда ӈамдавы ӈэб’’нанд — яӈгумданась. Сит ниваць хоӈгу’’. Ӈопойӈэ нен ядэр’’. Хакцямд нянанд пармаӈэ ханавы ӈэбат сава ӈэӈгусь!</p><p>— Ӈодяко ними хаевэв, ханяна мандэданакэв.</p><p>— Хаё’’яӈаё! Ейданд хаёдакы, манэ’’пат нёр ня’’марпю’’. — Ненюмда севолпахая хадада ма’’нив. Тамна вадамда пэрӈада. — Теда’ сит нибтеӈгудм’. Пуна сяйини’. Вэвако ӈамгэм’ танвакэн, сит парнэ хадепаӈгу’’.</p><p>Хадада не нюмда нибтеда, серта сер’ мэда, мяд пухуця’ ной нихина ӈэвамда сярада. Нюда нёрва хансосялав’’, ваде’’мэда тайкабты. Тад хуняна ямдаяха’. То’ тяха’ мяти’ мяради’. Пон тэвана’’ӈаханзь. Ид’ тяха’, вэвако пя’’ ӈахаку хаейди’. Не ӈацекы пухуця’ тотрев’ ӈэванда нина сэр’’ ӈэва’ тар’’ ӈадимя’’, сеянда хэ’’мякуи ӈэрха.</p><p>Та’ малда.</p><p>Автор: Наца Худи’ падвы</p>

Хацявы ня’’амлара’’

Татма:Лариса Айваседо таттамы

<div class="content-lead">Дюԓкат ва’та ты’’ кан’’, шича’дюкат ва’та ненэй мя’’. Пуровский районхана тэхэна’’ мансԓани’’ дяԓям мэӈаш’’. Поӈкнантуӈ мянаԓмантуӈ мэт Таԓкан шанат дяхат мэна’’ неша’’ ӈомаш’’. Шича дяԓяӈ дямпан праздник’ миндяш.</div><p>Таԓкахана ты’’ падеԓьш мансԓани’’ дяԓям Пякупур нимита дяхаӈ няна, Пуровск’ няӈ ӈайта пуԓ ӈыԓна мэӈатоньш’’. Праздникан томы’’ хомана ныптакомаӈ мэты таняӈ ненэй мяту’’ меӈаш’’, куԓкаԓи’’ ӈамыдю’’ шеԓтаӈаш’’. Ӈэԓм’ чеԓ’’ нешаӈкна’’ ты’’ падеԓьш мансԓани’’ дяԓя — пиԓи хома праздник. Чики дяԓяхана неша’’ куптат ниня манымайтуӈ нетуӈ, диԓюнатуӈ кошту’’, няханатуӈ дёԓимяшошту’’, поӈкнатуӈ шанако мянаԓьшту’’.</p><p>Праздник’ мээԓмантуӈ неԓьня культурахана мансԓана’’ ванԓат, нешади’’ дилыӈ нямна ӈайта, ӈычимчеӈаш’’. Чикиӈ пут праздникан томы’’ неша’’ кан’ну’’ дет ӈайта парад маныдеӈаш’’. Чуки похона ӈопшеԓы парадхана шича дю’’ шеcв’ тыӈ кан’наш’’. Канутуӈ ӈычимчемпюта’’ мюшинатԓям ӈуп пумна миньдяш’’. Тытуӈ топдяма’’, канутуӈ чеԓ’’ дёԓьше мэкат’’. Чикиӈ пут, праздникан томы’’ веԓв’’ нешади’’ поздравийпёш мунуӈаш’’. Чикидю поӈкна Ямална ӈаԓка тэта тадямэӈаш. Куԓкаԓи’’ хома вачи’’ выӈкан мэна’’ нешаӈк мэӈаш’’.</p><div class="content-new-image"><img alt="pic" src="https://854220.selcdn.ru/yamalnews/072854b4-a5f.webp" style="width:100%" height="569" width="1011"/><div class="content-image_child">Тат’’ма: Лариса Айваседо таттамы</div></div><p>Няматаԓакуԓма дяԓяхана мат’ командам шеԓтаӈаш’’. Поӈкнатуӈ мянаԓмантуӈ мэт Каԓпюԓкат, Каԓясамэхэт, Самбуԓкахат, Ханымейхат, Таԓкахат, Сугмуто-Пякутинская общинахат мэна’’ тоӈаш’’. Шича дяԓяӈ поӈкнатуӈ мянаԓяш’’. Чуки похона дюԓкат ва’та тыӈкан няматаԓакуԓяш’’. Неԓьчеэй дяԓяханантуӈ няматаԓакуԓта’’ масс-стартан ӈомаш’’. Нуп диԓьшуӈ мансхаԓяш’’. Таньше ӈуп диԓьшуӈ ӈайтаԓёма неньшаԓ ниӈа, куки ты’’, ӈука нешади’’ маныдеш, шехеԓэхэт шуԓхаԓьштут. Хомана ӈайтаԓёмантуӈ мэты неша’’ тытоӈ неԓьшут кан’ видян тохоԓаштутуӈ. Таньше ӈайтаԓёш мянаԓчи’’ поӈкна ӈайвахай местам Таԓкахат мэна Филипп Пяк канаӈата. Пыта неԓьня финишан тоӈа. Ӈопумана ӈайтаԓёта’’ касами’’ поӈкты Алексей Киприн меԓ тоӈа. Ни’’ поӈкат тыӈ кан’хана ӈайтаԓёш ӈайвахай местам Алена Киприна канаӈата. Шича дяԓяӈ дямпан мянаԓта’’ шана’куш’’: няхаԓ ха’мхана ха’муԓяш’’, нэхэԓумпиш’’, шалди’’ ӈыԓна нюмкупёԓьш нетуӈ конуԓпиш’’, кан’ну’’ нимня ха’муԓяш’’, няԓяӈ паӈк вяԓкуԓпиш’’, этно-биатлонхана шуԓьвиш мянаԓяш’’. Мянаԓта’’ командный соревнованихина пытатуӈ конуԓпёмантуӈ камна, каԓьтуӈ детуӈ мянаԓя’’. Чикиӈ камна нешади’’, капиди’’, ӈысми’’ мят чеԓ’’ ненэй паныдётуӈ конкурсхана ӈычимчимпиш’’. Куԓкаԓи’’ матамэй’’, меԓьмана шеԓтамы’’ паны’’, пема тадяӈаш’’. Ӈалка нетуӈ мянаԓтан ӈашки’’ ӈупчики нэхэмтуӈ, нюӈк ӈаймямтуӈ конуԓпиш’’. Кану’’ ха’муԓпиш’’, няхаԓ ха’амхана ха’муԓяш’’, нэхэԓумпиш’’, вяԓкуԓоԓяш’’.</p><div class="content-new-image"><img alt="pic" src="https://854220.selcdn.ru/yamalnews/bb50fadd-e9b.webp" style="width:100%" height="708" width="1260"/><div class="content-image_child">Тат’’ма: Лариса Айваседо таттамы</div></div><p>Ныптакош томы’’ хыниԓмаӈ мэт культурахана, спортхана мансԓана’’ куԓкаԓи’’ мероприятии’’ шеԓтаӈаш’’. Праздникхана Пуровский районхат мэна’’ артисту’’ камна Бурятихит мэна национальный ансамбль «Ангара» тадямэӈаш. Нешади’’ дет тонԓюта центрхана мансԓана’’ кынучи’’, таԓани’’ дет ӈайта вильта мероприятии’’ — «Танцует Север», «Напевы тундры» шеԓтаӈаш’’. Ӈэԓм’ чеԓ’’ нешади’’ ӈамԓу’’ дет ӈайта «Вкусное наследие» нимита мят меӈаш’’. Таньняӈ чуниԓта’’ куԓкаԓи’’ ӈамԓу’’ конуԓяш’’.</p><p>Чикиӈ камна «Шатута ни» нимита конкурс шеԓтаӈаш’’. Хампԓяӈк ни’’ мянаԓяш’’. Ты’’ падеԓьш мансԓани’’ праздникхана чет’ нешаӈ мят чеԓ’’ ӈопт каймямтуӈ дяԓямтуӈ мэӈаш’’. Чуки похона праздник’ хомана вильӈаш. Шанат вильта спортивный мероприятии’’ тадяӈаш. Хыԓаӈ ниня мэта волейбол шеԓтаӈаш, парашютхат хамуԓта нумна чиԓяш, мотоцикл мэта вильта шоум шеԓтаӈаш’’.</p><div class="content-new-image"><img alt="pic" src="https://854220.selcdn.ru/yamalnews/518f5da8-fc2.webp" style="width:100%" height="709" width="1260"/><div class="content-image_child">Тат’’ма: Лариса Айваседо таттамы</div></div><p>Тыӈ канхана ӈайтаԓё ӈайвахай местам’ канамы’’, шана’ко мянаԓьш нэхэԓмы’’ тотуӈ миԓита’’ мячисы’’ ня’амӈа’’. Чуки похона мянаԓмы поӈкат ӈайвахай местам ӈай Самбуԓкахат мэна команда канаӈата. Нимимты местан Каԓпюԓкат томы’’ ка’амдят, няхамты места Каԓясамыӈ чеԓ ӈутахана’’ кадя. Чики дяԓяхана Пуровский район’ чеԓ’’ куптаӈ мансԓамы нянтуӈ Мария Леонидовна Климова медаль «За вклад развитие Ямала» няаммаӈ дет майпиш. Мария Леонидовна дилта дямпан, чет’ дюкат ӈука пуӈ Ӈэлм’ чеԓ’’ нешади’’ дилм чуув падеԓьш мансԓаӈаш. Четаӈ тамна Пуровский район чеԓ нета’’ нятапита.</p><p>Чики дяԓяхана праздикан томы’’ хомана ныптакуш’’. Кимя праздникан ниша кай’’, чики неша’’ няматаԓакуԓма дяԓям ӈупчики маныдеӈатоньш. Пуровская медиагруппа шича дяԓяӈ дямпан трансляцим’ минԓеӈаш. Куше чики праздник’ мэсумам Пурмедиа эфирхананта, соцсетьманата ӈычимчеӈаташ. Няматаԓакуԓма дяԓям «Народы Арктики» нимита региональный проект’мана минԓеӈатоньш.</p><p>Автор: Лариса Айваседо патмы.</p>

Тэхэна’’ мансԓани’’ дяԓя

Сидяӈг: Л.Вануйто’ тадтавы

<div class="content-lead">Ӈэрё’ няна ӈацекы’’ ненэцие’’ е’’эмня «Коммуникативная площадка» нюбита проект миӈась. Тамальӈгана мале сян ненэць’ «Ямальские молодежные инициативы» грант’ еси’’ няд’’ми ня’’маць. Тикы’’ поӈгана Сёяха’ тер Софья Салиндер мэсь. Пыда «Этно-фестиваль ненецких сказок» проектм’ серта таслась.</div><p>Софья няхаромдэй по’ Саляӈгардахана «Социальная культурная деятельность» манзая’ няю’ тохолку. Нямэхэна минреванда серта нямна тарця вади хэтась:</p><p>— Мань хар’’н хардаханани практикам’ мэтадм’. Таминда интернатхана илена ӈацекы сё мэти’’ няби тарани’’ мят’ ма’’лаван’ харвадм’. Хусувэй группа’ тер лаханаком’ вадета. Сиддо’ нянандо’ манзаранидо’, культура’ мякана манзарана’’ нядабаӈгу’’. Ӈацекы’’ пыхыдадо’ манэ’’лабтаӈгу’’, вадавнандо’ лаханаӈгу’’, теневабцодо’ ӈокамдаӈгу’’, спектакль сертаба тохода’’.</p><div class="content-new-image"><img alt="pic" src="https://854220.selcdn.ru/yamalnews/e3da3b6a-cf9.webp" style="width:100%" height="1440" width="2560"/><div class="content-image_child">Сидяӈг: Л.Вануйто’ тадтавы</div></div><p>Ненэся вадада мин’’ӈась, сита нядаць, нянда еси’’ няд’’ми ми’’ӈаць. Есида няд’’мяць фестивальмдо’ ӈули’’ сававна мэ’’ӈадонзь. Тохолкода’’ ӈацекы’’ ёльце варемдо’ мэ’’мыць. Хибяхавадо’ тёнякоӈэ таравы. Ӈани’ хибяхав лакамбой’ тэваси, харад хоркы, вэнеко, ӈэвы. Пыдо’ манэ’’лабтамбавы’’ лахакудо’ ти’’: «Теняку няби тэваси», «Харад хоркэця», «Вэнеко нядамда пю», «Писяко». Тидхалеӈгода’’ поӈганандо’ сямянхат сававна лаханавы не ӈацекым’, хасава ӈацекым’ тэрабавы’’. Лаханакомдо’ тид’’ манэлабтавы ненадумдавы’’. Саць тарана серм’ ӈобанзер’ пирдале’’.</p><p>Ӈарка таром’ ха’’авравы ӈока. Софья’ мяд’ тер’’, Сёяха’ тер’’ ӈэдакы’’, мал’’ нядаӈговы’’. Таддикахад ненадовна небяда табековы. «Лабтэйко» нюбите театрм’ минрена тарця серка’’на мале торомбэй.</p><p>Автор: Анна Яптик’ падвы</p>

Лаханако ваде’’мы’’

Сидяӈг’’: Лариса Вануйто’ ӈэдабтавы’’

<div class="content-lead">Ямальской районхы Сёяха’ вымна мюсерта ненэця’’ не’’ хэбидя яляхана ма’’люрӈаць. Сидя пебяс Вануйто’ ӈэсыхына ӈобт’ тэворӈаць. Евгений’ няби Константин’ мят’ таславы яляхана ӈэдалёда’’ тодо выӈгат няваталаӈго ӈадимяць. Пыдо’ помнандо’ сянаковам’ мэ’’мандаць. Тарця я’ тер’’: Сэр’’ яха, Мотю’’ яха, Вэнуева, Тамбей, Ясавэй яха, Турма яха. Тивтей’’ яха’ няд юрмян ненэця’’ тоць.</div><p>Нердена вадам’ Пэвко Маймович Окотэтто мэ’’ӈась. Пыда яханандо’ юнета, ӈавнанда ва’’лёй сёбар’’ ненэць’. Ӈаркамбой нидо’ илебей ненэцие поӈгат ненадовна ӈадиць. Мале ӈахакуй похона ныхыдо’ мэмы’’ Павел Париденевич Вануйто, Вячеслав Ябтакович Окотэтто, Борис Лапчивич Худи, Алексей Парикувич Вануйто, Анатолий Нюдякович Сэрпиво. Ӈавнандо’ ӈэдалёрпанандо’ сидто’ пир’’ яӈгусь.</p><p>Товы’’ ненэйвана ты’’ ӈэхэ’’на ӈэдалёрмам’ ӈатець. Сёяха’ выӈгана нявоталаӈгурпато’ ӈули’’ мерецеты’’. Тикы яляхана Артем Александрович Вануйто’ пирувна ӈэдалёрта юр’’ ненэця’ поӈгана ӈобкарт яӈговы. Нянда пуд Тада Николаевич Лаптандер ӈадимясь. Артем Вячеславович Окотэтто тыда ӈодь’’ варкаць.</p><p>Ярколавдавэй’’ ӈобкарт сянакова’ ялям’ ни’’ мэцету’’. Теда’ ӈод’’ хасава’’ ӈэдаравандадо’ яӈговы. Константин Иванович Окотэтто нита поӈгад ва’’лёй ӈэвы. Тыма’ ёльцяӈгана хэхэдана хора яркыбабнандо’ ненэй ненэця’’ пир’’ мэбета яӈгосеты. Ӈадьбята ӈод’’ ныхыдырмахана хусувэй ӈэсоӈодо’ вэнпа вы’ тер’’ хасава’’ мэнедо’. Константин Иванович Сэротэтто Артем Викторовичм’ нэкалмысь. Пудана няхар’’ няндо’ ныхыдырмахана тёр’’ саць я’’авлахамаць.</p><div class="content-new-image"><img alt="pic" src="https://854220.selcdn.ru/yamalnews/5439b2a2-f34.webp" style="width:100%" height="709" width="1260"/><div class="content-image_child">Сидяӈг’’: Лариса Вануйто’ ӈэдабтавы’’</div></div><p>Не’’ ӈани’ тэри ниць ну’’. «Лэё» организациядо’ мел’ нем’ тэрабавы. Конкурсхана мэна’’ мел’ ӈэвамдо’ манэ’’лабтамбавандо’ хавна сё мэпато’ тарась, стихотворений ваде’’пато’ серо’’ӈась. Таӈок паской панытана мел’ не’’ поӈгат жюрихина мэна’’ няхар’’ нем’ тэраць. Анжелика Вануйто — ӈудикода не ӈэвысь, нябимдей — Елена Сэрпиво, няхаромдэйдо’ — Мерета Вануйто, сэдоӈода ва’’лёйӈэ манэ’’мыць. Тикы яля’ ӈацекыдо’ ӈани’ нидонзь юр’’. Пыдо’ ӈобтикы паныдо’ манэ’’лабтамбиць.</p><p>Яля’ ямбан’ Сэрне Алексеевна, Алена Пойкивна ӈока сяй’ хыдям’ пандаӈаханзь. Сидти’ сянакова ялям’ сертабавы’’ ниць юр’’, нянди’ ӈуда’ тер миӈаць. Сянаковам’ сертаба «Ямал» нюбета организациядо’ нядаӈговы. Соё’’ма Яха’ малхана мэ’’мы ялямдо’ пон тензебтембаӈгудо’.</p><p>Автор: Марина Ярой’ падвы</p><p></p>

Соё’’ма Яха’ малхана тёр’’ я’’авлыць

Сидяӈг: Е. Окотэтто’ тавы

<div class="content-lead">Семён Михайлович Окотэтто ӈока по’’ тяхана Ямалхана’’ юнета ненэцянзь. Сёбар’’ серо нерня’ минресь. Салехардахана ӈацекы ламбита варемда мэць тохоламбись. Тикы’ нямна вадёдана илебей ненэця’’ ӈамгэхэртм’ ехэра’’. Илевы ӈэбта, небо’ 85 поданда хантась.</div><p>Ӈавнанда Тамбей’ няд ӈэвы. 1936 по’ ӈарка пэвдей иры’ 28 яляхана ты пэртя’ мякана соявы. Тамаляӈгана совет’’ илам’ минре пяць, ненэй ненэцие’’ ӈобт’ ма’’ламбидонзь, яна’’ тиӈгэвна колхоз сертаць. Ненэця’’ ӈобкана манзара тебаць, Семён тамна нюдя ӈэвы. Нисяда Харючи Ӈокдэттам’ нюбе’’мы, луца нюмда, пэрабцада — Михаил. Тамбей’ няд Новой Порт’ няю’ мюсе тэвавыд’’. «Россия» колхозм’ сертавы’’, Михаил’ мяд’ тер таня’ манзараванзь падвыдо’. Пухуцянда ня мале сян ӈацекэди’ ӈэвы, ӈарка хасава нюди’ Пыданам’ нюбе’’мы, ёнэйдо’ — Сал, нюдядо’ — Лавосама, не нюди’ — Хадне. Ёнэй Сал маня’’ теневана Семён Михайловичва’’. Нюдя няда Лавосама, луца нюмда — Владимир, ӈавнанда ты’’ лекараӈэ Антипаютахана тарась, ненэця’’ сававна теневадонзь.</p><h2>Нюдя ӈэванда маляӈгы по’’</h2><p>Вадёдавандо’ маляӈгана иландо’ хуркари ӈэвы. Тыдо’ тянёмбой танявы’’, халям’ пэрмы’’, ханевы’’. Яля’ сэв’ тябибтаина ни ӈа’’, ӈадьбято’ нерня’ выктормы’’. Ӈарка яна’’ ни’ сайнорма’ това’ маляӈгана нисядо’ ӈока нита ня’’ ямда ӈэдаба хэвы. Хэванда нерня’ тосавы, пырдари’ тованда ӈэбта, ни. Ӈарка хасава нюмда, Пыданам’, мято’ ерваӈэ таславэда. Ӈота ӈод’’ няхатата ӈаркамбойва, небямда сававна нядабаӈгуда. Сал — самляӈгм’ потна ӈэвы. Нисясипой’’ хаёвы ӈацекы’’ ӈока маяӈо’’ мадавы’’, ярм’ ӈэдаравы’’. Хурка тарця ӈэб’’нанда ӈод’’, вэва по мадавыдо’, мято’ нивы хав’’. Небяедо’ варемда мэць нюда вадабавыда, табедамбавыда. Сайнормахана нисяедо’ ӈоб’’ нерня’ ӈэвы, ӈока нямда саюхат ӈэдавы. Туни’ муӈг’’ нянда еребермы’’, лекар’’ мякана юсидавы. Сайнорма’ пуданахана 1944 похона пырдари’ яханда товы. Хадёсавэй’’ ӈэвы, етри’ хаӈгурмы, хурка тарця ӈэбта ӈод’’ мяканда тэва’ пухуцямда, нюда манэць майвы’’.</p><h2>Ӈацекы’’ евакоӈэ хаёвы’’</h2><p>Я’ сяр’ ниня пон нивэхэ’ иле’, 1949 похона пухуцянда ня яӈгумэхэ’. Ӈацекы’’ евакоӈэ хаёвы’’. Ӈарка хасава нюмда Пыданам’ ӈани нидо’ вадаванзь ханавэдо’, нядаӈгодаӈэ таравы. Тыдо’ нидо’ танавыдо’. Нюдя няхавахаюдо’ Сал няби Лавосама евако ӈацекэӈэ таславыдо’. Хаднем’ Салехардыхы нюдя ӈацекы’’ мят’ ханавэдо’, пыдо’ нито’ хэвняна вадёвы’’. Семёнм’ — Шурышкарской районхы Кушеват таӈоцяӈгана евако ӈацекы’’ мят’ ханавэдо’. Тодо яхат товы ӈока ӈэвы’’. Ӈани харад’’ хавна сэр’’ хэхэ’ мя’’ танявы, Сал ӈули’’ сававна тохолковы. Нидо’ сававна ня’’мыдо’, нидо’ нядаба вадёдавы’’. Тохолковандо’ ирмня манзарани нядабавы’’: идм’ тэвабавы’’, пям’ пэпавы’’… Семен сёбар серо’’ тохолавы, нида табедамбавы. Неноховавна ламбитавам’ харвобтавы. Ламбита ӈоб’ ядэрмы, ханяӈэхэна носи, тэваси нёракумы. Теда’ Кушеват няна мале сян посаваӈэ хэвы хардакори’’ хаёвыць. Сэр’’ хэхэ’ мя’’ ӈомахартада яӈгу. Таняна хаби’’ харто’ индо’ сер’ сисьда пэдари’’ поӈгана иле’’.</p><h2>Тохолкомида</h2><p>Школахана си’’ив классм’ ёльце’’махаданда тамна’ тяха’ тохолкованзь А.И. Герцен’ нюмам’ нюбета институтан’ ӈэдабтавэдо’. Техэ яхананда сёбар’’ серо’’ иртари’’ пявыда, таро’’ма тохолавы. Нердена ӈарка пирдыр’’махананда нябимдей ян’ еремы. Самбохона ва’’лёй ӈэвы. Ненэй ненэцие’’ поӈгат нерденаӈэ «мастер спорта» ненадумда’’мам’ ня’’амвы.</p><p>1957 похона подготовительной отделениехэна тохолковамда ёльцевэда, таминда географической факультетан’ тохолко тебвы, хуркари ё, падро тохолавы.</p><h2>Мэбетада’’, меретада’’!</h2><p>Тохолко’’мида ёльце’’махаданда яханда пырдари’ товы, сидя дипломам’ тавы. Нердена географиям’ минрена няби сёбар’’ серо нерня’ пэртя. Салехардыхы матдомдэй школахана манзаралмы’’. Ӈамгэ’ пиркана сёбар’’ ӈацекы’’ школахана манзаранаӈэ таславэдо’. Ламбитани тохоламбавы. Пирдырми’’ ёльцяӈгана ӈацекыда ӈоб’ нерня’ еребермы’’.</p><p>Семён Михайлович Ӈэрм’ тер’’ сёбар сянакубц округханана’’ нерденаӈэ пяйдась. Тарця сёбар’’ ӈобт’ ма’’ла’’махадандо’ округна’’ команда’ капитанӈэ тарасеты. Пэдари’’ помна ламбитава, енерма, ярколава, тубкам’ моёпава, сюрамба ядава — мал’ тохоламбавыдо’. Пыда тохолкода’’ илебей ненэцие ӈобт’ ма’’лэйдась, етри’ табедамбасетыда. Тохолавэда ӈокась, ханяӈыда индо’ ядан’ тикы серто’ минрейдонзь, юнета сёбарӈэ хаяць.</p><p>Ӈацекыда ӈоб’ нерня’ табедамбасетыда, няндо’ манзеты:</p><p>— Ӈоб’ тохолкуда’’, пиртара’’! Неранда няна хуркари пирдырма’’ ӈэӈгу’’. Теневада’’, ламбитава хусувэй сёбар’’ серкана сидда нерня’ пэрта, мэбетада’’, меретада’’, хусувэй манзая нянанда сибё ӈэӈгу. Тикамда’’ сяхаӈгарт нёра’’ хаебю’’, илаӈгананда’’ хуркари серкана сидда’’ ӈэдабаӈгу!»</p><p>Тарця сава, иӈудота вади ӈацекэхэта вадецеты. Нерняна илаӈганандо’ таравандаӈэ тасламбидась. Ӈацекы тохоламбавы, сава иланд’ табедамбавы, Ямал’ яна’’ ӈоб’’ хасава ню — Сал Ӈокдэтта.</p><p>Автор: Анна Ламдо’ падвы</p>

Ва’’лёй сёбар’’ ненэця’

Сидяӈг: А. Яптик’ тадтавы

<div class="content-lead">Саляӈгардахана ӈацекы тохоламбада’’ ма’’люрмы’’, помнандо’ пирдырмы’’. Мале сян’ яля’ маркана мэвы’’.</div><p>Ямальской многопрофильной колледжхана тохолкода’’ ӈацекы’’ е’’эмня хуркари тохолкова ӈадимдембавы’’. Лакамбой’ тохоламбавы’’ ӈацекыдо’ вадам’ ехэрана’’ ӈэвы’’. Ненэй ненэцие’’, хаби’’, ӈысми’’ хусувэй яля’ мэта вади няндо’ ваде’’мы’’.</p><p>Таддикахад вадам’ ханзер’’ лэтра ханзер’’ сава ӈэва’ нямна ибедормы’’. Хар’’на’’ вадавнана’’ ӈэда сё няби стихотворения тохоламба, едэй проект падыба таравам’ хэтвы’’. Вадам’ минрени’’, ӈацекы тохоламбади’’ сообществом’ сертаван’, по’ ямбан’ мале сян диктантм’ падыбаван’, вадам’ минреванда илебей ненэцие ӈахакуд хамадамбаван’ харвавы’’. Пирдырмахана мэвы’’ тарем’ лаханавы’’: «Харто’ яханато’ илена’’ ненэця’’ вадамдо’, иландо’ саирм’ теневаб’’нандо’, ӈацекэхэто’ вадепато’ тара».</p><div class="content-new-image"><img alt="pic" src="https://854220.selcdn.ru/yamalnews/0b03c70e-07f.webp" style="width:100%" height="709" width="1260"/><div class="content-image_child">Сидяӈг: А. Яптик’ тадтавы</div></div><p>Пирдырмадо’ сававна малей’’. Хусувэдо’ варемда мэ’’манда няю’ ненадо ӈуда’ терм’ ня’’ма. Ӈэрм’ тер’’ вади минрена’’ нина’’ ӈули’’ пэдава’’, манзаямдо’ тид’’ минредо’. Няхар’’ нядо’ ӈани яляхана тамна’ тяха’ пирдырта’’. «Учитель родного языка Ямала» пирдырмахана нерня’ ха’’амвыдо’ ти’’: Шурышкарской районхана манзаранаха’ Антон Максаров няби Наталья Вокуева, Приуральской район’ тер Ольга Пандо’. Антипаюта’ няд товы Антонина Яптик няби Сюнай-Саляхана манзарана Любовь Хороля призёрӈэ хаяханзь. «Воспитатель детского сада, реализующий программы на родном языке Ямала» пирдырмахана нерня’ мэвэндо’ нюм’ — Клавдия Филиппова. Пыда Белоярскхана иле. Мужи хардахад ӈэда Лариса Жаринова няби Антипаюта’ тер Екатерина Яр призёрӈэ хаяханзь.</p><p>Автор: Анна Яптик’ падвы</p>

Вадам’ лэтрамбада’’

<div class="content-lead">Ӈарка классаха’’на тохолкода’’ Ямальской район’ тер’’ ӈацекы’’ харто’ вадавнандо’ ӈэда олимпиадам’ падвы’’, теневабцодо’ манэ’’мы’’.</div><p>Панаевскхана юдимдей классахана мэна не ӈацекым’ хонрамбидамзь. Ольга Яптик тарця вади мэ’’ӈась:</p><p>— Сертабада манзаява’’ мале ӈокась. Школахана тохоламбавына’’ тензебтембиваць. 10-11 классаха’’на мэнаӈэ ю’’ манзаям’ пирдалембиваць. Лексикам’, словообразованиям’, грамматикам’, стилистикам’, фонетикам’ теневабна’’ таравысь. Вадаха’’на ударения ӈабтамбива’’, междометия пюрӈава’’. Паднана’’ ненэцие’’ стихотворения, лахарё толабиваць. Луца’ вадавна ӈэда лахарём’ ненэця’ вадавна падыбиваць. Ӈопой иле’’мя’ нямна ина’’ ядэрабцо хэтыбиваць.</p><div class="content-new-image"><img alt="pic" src="https://854220.selcdn.ru/yamalnews/aa59897d-194.webp" style="width:100%" height="621" width="1103"/><div class="content-image_child">Сидяӈг: О.Яптик’ тавы</div></div><p>Тикы пирдырмахана Россияна’’ тиӈгэвна илена’’ мэвы’’. Якутия’ няна манзарана’’ М.К. Аммосов’ нюмам’ мэта университет’ тер’’ нябимдей по’ серта таславэдо’. Нюртей пелямда интернет’ мутравна сертабавэдо’. Нямэхэна сидя ю’’ няхар’’ ӈацекы Ямальской районхад паднавы’’. Теда’ тикэхэт нерня’ хэвыдо’ пирдырмы’’. Ӈокханда 19 тохолкода ӈэвы.</p><p>Пирдырмам’ сававна падвы’’ яӈга ненадумда’’ми ня’’маӈгу’’. Тикахад тамна’ тяха’ тохолкованзь хэбто’ олимпиадахана мэ’’мадо’ сиддо’ ӈарковна нядаӈгу.</p><p>Автор: Анна Яптик’ падвы</p>

Няръяна Ӈэрм