Ной паны сэдыбаӈгу’’

Лимбя’ ирий’ пудана яляхана ӈэрм’ тер’’ центрхана «Паской ной паны» нюбета несэй проект манзара пэяць. Проектхана мэванда’’ не’’ едэй серм’ хамедавы’’. Ӈобкана «Мел’’ манзарана» сэдорани’’ ня нюртей мэва ма’’люрӈаць.

Время для чтения ~ 3 минуты

Ной паным’ сэдыба нидо’ тохоламбаӈгудо’. Сэдоравандо’ ёльцяӈгана машинкам’ мэць теневабто’ тара. Ӈокханда проектхана мэванзь хасава ю’’ хибяри’’ товыць. Наӈэдя тет ирий’ ямбан’ хусувэй не серм’ теневана нянда хэвхана манзаямда минреӈгуда — ной панэмда сэдыбаӈгу. Нида мел’’ не Светлана Попова тохоламбаӈгу.

— Не’’ хуркари хой’ паны сэдыбаӈгу’’: тикы’’ Канин’, Ӈарка я’, Нюдя я’ тер’’ паны’’ ӈэӈгу’’, — Светлана Попова мась. — Тены’’ похо’’на хари’’ паны танява тарана серӈэ хая. Ӈани’’ тэнз’’ ненэй паным’ мэ’’ман’ харвабцодо’ таня. Маня’’ хонаркосетыва’’: «Пыдара’’ нянанда’’ ӈамгэ’ е’’эмня тара?» Пыдо’ манзеты’’: «Паской».

Проектхана мэвамдо’ есяхана нидо’ салдамбаӈгу’’. Валакада нойдамдо’, тамна таранадамдо’ харто’ тэмдабато’ тараӈгу. Тет ирий’ ямбан’ не’’ ма’’люрта’’.

Ульяна Латышева округна’’ музейхана манзара. Пыда харта панэдамда сэдыбаӈгу, илаӈгананда мэ’’мандада. Вадада тарцясь:

— Мань ненэй недм’, нини’’ Канин’ хой’ тер’’. Хари’’ ной панэни нямна ими пили’’ ядэрцеты, ихинани манзетыдм’: «Ӈоб’’ сяхари’ панэдами сэдаӈгудм’». Теда’ ёльцяда хадри’ тэвнакы? Нюртей панэми хар’’н сэдаӈгудм’. Маня’’ мякнана’’ мал’ мел’ не’’. Мань ӈод’’ тарцяӈэ ӈэван’ харвадм’.

Галина Ануфриева — ӈацекы падтаӈго тохоламбада. Пыдо’ сяхари’ хуркари’’ тэнз’’ ненэцие’’ паны падтамбасеты’’. Падтаӈговандо’ ёльцяӈгана харто’ яханандо’ илена’’ ненэцие’’ ембдяро маниебто’ тара. Ханзер’’ сэдыбада’’, тодо’’ тэнз’’ мэта’’ паны теневаӈгу’’. Теда’ сэдораӈгудм’, хари’’ сэдвэми’ ёльце тараӈгу. Округна’’ ӈарка яляхана серыбаӈгув.

Светлана Попова’ вадавна, тованда яляхана хасава ю’’ не’’ сэдора лапцеӈгуд’’. Нерняна сидто’ ӈарка, мэкад манзая ӈате.

«Паской ной паны» проект манзаямда 2025 по’ саво’’ ирийхана ёльцеӈгуда. Сэдвыдо’ сэдорана не’’ ненэцие’’ центр’ мякана манэ’’лабтаӈгудо’. Таняна ӈарка выставка ваераӈгу.

Автор: Юлия Талеева’ падвы

Авторы

Няръяна Нгэрм

05:54, 24 февраля 2025

Темы