<div class="content-lead">Ямал’ тиӈгэвна нарэй ханева’ ёльцьм’ таславэдо’. Харад’ тер’’, пэдара’ тер’’, вы’ тер’’ тикы закон’ вато’ сер’ ханеӈгу’’.</div>Ӈопой ханена нара’ ямбан’ ханесэйданда ю’’ ябтом’, няхар’’ ю’’ нябым’, няхар’’ лукм’, самляӈг варӈэм’ хада пирӈа. Ӈанонда таняб’’, ядавы ханесэйда ма’’ламба мэпата серо’’ӈа. Хане вэно мэць ӈани’ вэва.Тодо’’ яха’’на таславы’’ ялэ’’ пиркана хане серо’’ӈа:— ты’’ ниць иры’ 16 яляхад 25 яля’ ёльцянд’ — 65° с. ш. няюд ядембада’’ ё’’ няна (Шурышкарской няби Приуральской районхана, Надымской, Пуровской, Красноселькупской район’ няна),— ты’’ ниць иры’ 23 яляхад маӈгты’’ иры’ 1 яля’ ёльцянд’ — 65° няд 67° с. ш. ёльцянд’,‒ ты’’ ниць иры’ 27 яляхад маӈгты’’ иры’ 5 яля’ ёльцянд’ — 67° с. ш. няд ӈэрм’ няю’ (Ямальской, Тазовской районхана, Надымской няби Пуровской районха’ ӈэрм’ няюна).Ханеван’ харвана’’ падродо’ яӈга таславы яха’’на ня’’ма пиръядо’. Тикыдо’ Департамент природных ресурсов сайтхана пады’’.Автор: Галина Окотэтто’ падвы

Ханевам’ ӈате’’

<div class="content-lead">Россия’ терӈэ сававна нина’’ няць илева’’. Тодо’’ тэнз’’ хибяриӈэ яна’’ мэёмла’’маӈэ, сахамла’’маӈэ тарава’’. Явкабтада сайнорма серм’ пирдалевы’’ иринана’’, хаданана’’ тотрев’ сяхаринда ӈопой ныхым’ мэ’’ӈава’’. Теда’ ӈод’’ ты’’ ниць иры’ хасаваюдимдей ялям’ мал’ ӈобнзер’’ маймба ядабтаваць.</div>Победа’ Яляхана ханярина иленаӈэ лэюмбада’’, ӈобӈгэв’’ тута’’ ту’’ хэвхана саю пидебавы’’ няха’’на сямянхат сава вади хэтыбиваць. Хусувэва’’ хамэдамбидась: хаерна’’ ява’’ пилибт’’ юдабавада пыдо’ нива выдараӈгаварихидандо’, са’’марихидандо’, вырэй ӈэвахадандо’ пере.Ӈавна саць ӈока ныхым’ нина’’ мэ’’мыць. Сейдо’ ёльце мэё’’ ӈэвыць. Ӈамгэхэртахад нись пин’’ ӈани я’ саю мардамбавыць. Сюдбяко маям’ мал’ ӈобнзер’’ таб’’ламбвэдонзь, нидо’ нядабари пирдалевэдонзь. Тамальӈгана нюдяко’’ ӈацекэхэрт’’ ява’’ ӈэдаба варемдо’ мэ’’мэць, нисянадо’ небянадо’ нядаба пэдём’ ехэра манзаравыць.Теда’ Ӈарка Сайнорма саць ӈока по’’ тяхама. Тюку по’ солдатна’’ Победам’ яхана’’ тэвра’’махадандо’ сидндет ю’’ по’’ хая’’. По’’ тяхари’ мимб’’ ӈод’’ ява’’ ӈэдавамдо’ маня’’ теда’ вацяндана’’ мэ’’ӈава’’. Хусувэй яна’’ тер Победа’ Ялям’ ненадо серӈэ тасламбида.Хэбидя ялям’ ханярина мэ’’ӈадонзь. Маня’’ округна’’ тиӈгэвна ӈокханда тет юр’’ пир’’ сава серо ӈадимдець. Ямална’’ хусувэй хардахана няби маркана ненэця’’ пин’ тарпыдаць. Ханярина парад сертабиць, невхы сё мэ’’ӈаць, тараць, маймбиць. Сайнорма’ по’’ тензибтемба «Георгиевская ленточка», «Окна Победы», «Письмо Победы», «Песни Победы», «Свеча памяти», «Мы помним», «Бессмертный полк» акцияха’’на мэць.Саляӈгардахана «Победный марш» ӈась. Етри’ тута ту’ хэван’ ӈамдэдо’ тэвраваць. «Геолог» нюбета мяд’ хэвхана «Майский вальс» миӈась, 1945 похона ханзер’’ тараса’’ марна’’ тер’’ тарем’ тараць. Культура’ мякана манзарана’’ е’’эмняна’’ концерт хамэдавыць, невхы фильм, сидяӈг манэ’’лабтамбиць. Тарця’’ ненадо’’ сер’’ ӈа’’и хэвы ила’ саирм’ лэтрамби’’. Таремли’ иринана’’ няна’’ тэвравы таром’ нива’’ юрыбю’’, ӈацекэхэ’’на’’ вадець пир’’ӈава’’. Мал’ ӈобнзер’’ хэбидя ялям’ мэ’’маханана’’ ява’’ мэневава’’ тамна ханяцей’ ӈарамдамбива’’.Автор: Анна Яптик’ падвы

Победа’ Яля

Сидяӈг’’: М.Яр’  тадтавы’’

<div class="content-lead">Ӈэрм’ терӈэ нюна’’, нюна’’ ню’’ ӈобтикы сайнорма’ ялэ нидо’ юрыбю’’, тензибтембидо’. Пыдо’ иринато’ сайнормахана, манзаравахана мэвахад тенева’’. Тарця сер’’ ихиня пои. Салехард’ школахана нябимдей по тохолкода Эдуард Вануйто иринда иле’’мям’ ӈани’ няна’’ ваде’’ӈадась.</div>Мань ирими нивась манэс’’. Тэри сидяӈгавнанда торомдавась. Нябакоховами иримда теневавэда. Небями нисянда нямна хуркари’’ иле’’ми вадецеты. Ӈока ӈамгэм’ ехэравэдм’, ханяӈэхэна нив хамедамбю’’. Теда’ тасла иландо’ саць тоенавысь. Мань тарем’ иле нивась пират’’.Ирина’’ нюм’ — Яр Тэтакуча Мяӈгчавич. Сайнорма’ по сававна теневавыда. Мале ӈацекыдана хасава ӈэвысь. Тамальӈгана школахана нюртей по тохолкурмысь, сидто’ тохоламбадамдо’ ӈани’ сайнорманзь ханавэдонзь. Пырдари’ ӈадиво’’мада яӈгу.Ириеми ӈарка ненэцяндарев’ ёраць пэвыць. Поӈга’ ервӈэ таравысь. Лабита пэрмыда — мотор’ ӈанохортахана хубта’’ я’’ ӈэвы’’. Ямбу тоход Ӈэдя ямд’ лабитари’’ тэворцетвы’’. Ӈани илам’ ехэра тоенавадо’ нянандо’ нивы со’’. Поӈганда тер’’ нерняри’ ха’’морцетвы’’. Пуня’ ӈэдадо’ яӈговы. Хадабавы’’ халэдо’ сайнортаха’’ ӈэдарамбавыдо’. Сайнорць тыхынана’’ нидо’ сахаребтамба варемдо’ мэ’’мыць. Салабавна падир’’мидо’ вэсэймзь хабцяӈэ хэвыць. Маня’’ теда’ илевана’’ е’’эмня таром’ ха’’аврамбавыць.Мань ирими тарця ненадо ненэця’ ӈэвысь. Ихинани сяхаринда ӈарка ненэцяӈэ хэ’’мяхадани ириени тотрев’ тарця вырам’ мэ’’ман’ харвадм’.Автор: Марина Яр’ падвы

Ириеми ӈарка таром’ ха’’авравысь

Сидяӈг: Руфина Окотэтто’ тадтавы

<div class="content-lead">Ӈарка Победа’ яляхана ӈавхы сайнормахана мэвы’’ иринана’’ тензебтембасетыва’’. Маня’’ тюку яля’ илевана’’ е’’эмня ява’’ саюхат лэтрамбавы’’. Тикы’’ по’’ юрнана’’ ни’’ ӈа’’. Яна’’ тер’’ мал’ Победам’ ӈатевэдо’’.</div>Та маляӈгы’’ тоенана’’ похо’’на мяк’’нато’ ӈаромбой’’ ненэця’’, ӈацекы’’ нидо’ ӈатевыць. Танянана мэна’’ няха’’нато’ хусувэй ӈамгэ таравысь. Сайнормахана мэна’’ нидо’ ханзели’ нядабавыдонзь. Ӈэрм тер’’ ненэця ӈани’ таром’ ха’’молавыць. Марка’’на, нюдяко хардаха’’на ӈаромбой’’ ненэця’’, юкад вата’’ пота’’ ӈацекы’’ манзаравыць. Тарем’ манзаравы’’ Ямал’ тер’’ ӈока’’ ӈэвыць. Тенкана хусувэй хибямдо’ нива’’ тене’’. Мань ӈод’ иреими — Окотэтто Лелей Хасаваркович нисяни ваде’’мя’ сер’’ ӈани’ нядаӈговысь.Тикы’’ похо’’на юкад вата потна ӈацекы ӈэвысь. Сита ӈар’’ нита ня’ ӈамгэри манзаям’ пэрмыць. Пыда хардахана мэваханда, небяхаюда нисяхаюда хой’ няна ӈэсынди’ тер’’ ня’ ханевыць. Носи’’ хоб, ӈамзи, халэ хардан’ тэволавыць. Панта’’ хано нято’ пуд мюдӈэ подерпавыдонзь. Таддикахад манзарана’’ пэндаи Саляӈгарад’ ӈэсонд’ тэхэна тэволавыдонзь. Тобольск март’ ӈани’ тэвормыць. Тиртя, ту ӈано’’ нюдяко хардаха’’ нисетвы’’ тэвор’’. Тарем’ нивы ерибер’’. Тикы’ сер’ март’ тэхэна тэвормыць. Теда’ тасла ими хебилеӈга: «Ханзер’’ та’ хун ян’ тэхэна тэвормы’’?». Ӈаромбой’’ ненэцяӈгат намдорцетыдм. Ӈавхы похо’’на тыдо’ мэбе’’мыць. Лыдо’ ӈарка’’ ӈэвыць. Я’ ниня нядада ёря ӈэвысь. Тарем’ тоянана по иринана’’, хаданана’’ пирдалевыдонзь. Мал’ ӈобнзер’’ таром’ минревыць. Нисяни нисяи сайнороми’’ ты пэртяӈэ, ханенаӈэ манзаравысь.Мань школахана тохолковани маляӈгана хой мякни тэворцетыдм’. Нисяхаюни-небяхаюни’ нябакони ня’ сидни’ интернатхад ханасетыхы’. Та’ ямбан’ ты’’ни’’ мякана мэсетыни’. Сыра’ ханона’’ тырабтамбавана’’ ёльцяӈгана, ириени манзара’’ма’’ падро, медаль та’ хомбасетын. Нисями хонрамбасетыдм’. Та’ маляӈгана нисяни нисяи’ сайноро’’ма похо’’на таром’ ха’’моламанда нямна намдадамзь. Сита лаханако няць нидм’ тов’’. Няхар’’ пони ӈэб’’ 1996 похона иреева’’ сюрӈаваць. Ихиняни хаця’’ тенев.Тенкана иринана’’ иле’’ми нина’’ юрыбю’’. Тамна’ тяха’ нюху’’на’’, ню’’на’’ нюху’’ вадетына’’.Автор: Руфина Окотэтто’ падвы

Таром’ минревы

<div class="content-lead">Яляна’’ сэв’ ӈахана тю’’уна хаясь. Яля’ иня лимбикавна пайдына’’ ни’ теберӈа. Пивня ядэрп’’, тэри сава. Ханя тарця ӈа’’, мале сие ниць ирыӈэ хая. Ханярина ӈэрм’ тер’’ варӈэм’ манэ’’ӈаць. Тикахананда нараӈэ хая. Та’ ёльцяӈгана тэхэ’’на мэна’’ ненэциена’’ ӈод’’ ӈобтикы тэтнавандо’ паӈоӈэ хэсеты.</div>Хо’ Саля’ няю’ машинахана ӈэдалёб’’нана’’ талбэй сехэры’ сидя ядувна ты’’ хадырцеты’’. Теда’ Пэ’ тер’’ мюдадо’ пырдари’ сюрхалэйдо’. Тарем’ ӈо’’ ни’’ паромбю’’. Нум’ ирива’’ ханзели’’ сюрхале пиртада. Ты’’ саполана иры’ пудана’’ яляха’’на лакри’ саць ядемясь. Харад’’ поӈгы’’ сыра’’ ӈоб’’ мальӈгана мырыӈэ хаяць. Ханяӈы’’ ты пэртя’’ индё’ ӈылмна яв’ тяха’ паромда’’ то’’олхаць. Илева’ мюсерта’’ ненэцяӈгав’’ хамедамбидо’, нерняна тамна сидя сыв иры таняӈаха’. Сие ниць, ты’’ ниць ирыхына хуркари’’ тецьда’’ лада пирӈадо’. Яв’ тяхана ӈод’’ мерри сырада ни холкаӈгу’’. Тамна сую’ хад’’ ӈобтикы я’’авласеты’’. Сие ниць иры’ еркана Полуй яха’ няна (Пуz ёхан — хаби вадавна) сывандавы’’ ӈобтикы нито’ ирмня пуня’ пяӈгудо’. Тедари’ тамна таӈга’’. Харад’’ ядан’ тэв’’махадандо’ сидя сян сехэры’ ядхана мэӈгу’’. Ненэця’’ ӈыхы ян’ хэвандо’ нерня тарана ӈамгэдамдо’ тэмдабаӈгу’’.Нерденаӈэ явм’ Иван Николаевич Окотэтто мадавэдась. Пыда ӈобтикы Полуй’ тяхана сырамда мадавэдась. Техэ яхаданда сидя мюӈэ сертавэдась. Пыда вадада тарцясь:— Хуняӈы яля пунда яӈгу, ӈадьбята мерарка явм’ мада тасламинзь. Мань ӈопой мя’’ми, мюсеб’’, сяни’’ ненэцяӈгат нидм’ пере’’. Нарэй’ ӈэб’’, ямб мюхуна ёльце сава. Тадӈо’’ тюку илаӈгана мюсеб’’нана’’ тына’’ нива’’ мэс’’, ханона’’ еся ханхана мюселембина’’, тарем’ таныртари’’ тараӈгу’’. Ӈыхы ян’ мимб’’, ӈани’ сава, хубта яда яӈгу. Тэхэ’’нана’’ мимы’’ ӈэб’’на’’, сидя мюхуна я’ пойм’ ниваць мадабаӈгу’’. Тедахав’ явм’ мада’’махад таӈгамдына’’. Пудна’’ явм’ мадабада’’ тикаривна яӈгода’’. Суюндаӈго ядва’’ ӈани’ лаха тасламбаӈгува’’. Ёльце сава ӈэбта тара. Неноховавна нядэй я серо’’ӈа. Сяхаринда тарця ӈэсеты: явм’ мадаӈгур’’ — несэй илам’ пянарахан’ ӈэӈгун’. Ӈамгэ вэвамд тяхана хаеӈгур’’. Теда’ ӈод’’ ӈани’ мянувнана’’ таӈгамдына’’».Тадри’ ты пэртя’’ мыры’’ нюрцю нито’ пуд яв’ тяха’ вэрналтыд’’. Ёнар’’ тыдо’ ӈопой недан’ ха’’маӈгуд’’. Ты’’ туро’’, ханото’ ханзад’’ хэрна’’, вэно’’ мад’’ ӈопой хумнаӈэ ханта’’.Автор: Марина Ярой’ падвы

Явм’ мадаби’’

<div class="content-lead">Мария Яковлевна Бармич’ нюмам’, хурка ненэць’ ӈэвамда ненэй’’ ненэця’’, ненэй вадам’, ненэй ненэцие’’ ила’ саирм’ тохоламбада’’ сававна, Г.Н. Прокофьев’, Н.М. Терещенко’ пирувна теневадо’. Илебей’’ ненэцяӈгав’’ Тамна Матиас Кастрен’, Григорий Вербов’, Юху Янхунен’, пили’’ нерденаӈэ ӈэрм’ тер’’ вади тохоламбавы’’ юнета’’ ненэцие’’ нямна, минревы’’ серото’ нямна тянём’ намдормакы’’. Ӈарка нябакондо’ минревы манзаяхавм’ сямянхат саву’’ӈадо’. Пыда сита сава няӈэ тасламбавы’’, тохоламбавыда — толава’ техэ’’. Вадамда лэтрава’ няю’ варемда мэ’’ӈась. «Сердце, отданное ненецким детям» нюбета толаӈгобцьӈгана Нина Ядне ты пэрти’’ ӈэсыхы’’на, ёрти’’ таӈоцяӈга’’на ханзер’’ Мария Яковлевнам’ маймба ядабтамбавамдо’ ваде’’ӈась.</div>Маня’’ ӈани’ сита тензебтеӈгува’’. Соя’’махаданда 1934 по’ сие ниць иры’ 26 яляхад 91 поӈэ ханда. Пыда Нюдя я’ выӈгана, Канин Ӈо’ няна ялям’ манэ’’мы. Ябсавэйӈэ соявы ӈэӈгу. Ханя тарем’ ӈа’’, пудана харта нямнанда падвэда «Под Поярной звездой» нюбе’’ӈа. Иланда сехэры сита Ленинград март’ тэвравы, таняна А.М. Щербакова’, З.Н. Куприянова’, Л.В. Хомич’ няд тохолковы. Борис вэсаконда ня’ ниди’ ӈобтикы таняна ховыди’. Пухуцямда сертабада манзаяхаданда сяхаӈгарт’ нивэда табламбю’’, ханяцей падна табедамбавэда. Тюкона Мария Яковлевна ненэй ненэцяӈгат нюртейӈэ вадамдо’ тохоламбада учёнойӈэ хаясь.Ӈарка маркана невхы иланда саирм’ нёда илевы. Мякананда тохолкода’’, ӈыхы’’ похо’’на тохоламбавыда, ӈэрм янда тер’’ мядомы’’. Ненадовна хусувэй мядондаханда табекодамда хосеты. Тараванда мальӈгана тэри вадам’ мэта, ханяӈэхэна ненэцям’ тидхалеӈгуда, нядаӈгодадамдо’ хоӈгу, вынд’ хэвандаха’’ панэдамдо’ хамедаӈгу.2000 по’’ нердена пеляхана аудиоразговорник нюбета мутрам’ падыбавана’’ мальӈгана Мария Яковлевна’ табековна сидна’’ няхар’’ ненэй вадавна лаханана’’ пирибтя’’ нядабиць. Манзаява’’ ӈули’’ тяхасовна сертаваць. Пыда’ ивнанда ненэй вадам’ ӈарка нито’ хавна нёлёко’’ ӈацекы’’ тохоламбабато’ тара. Ӈадьбята е ‘’эмнандо’ падта’’масавэй’’ словарьм’ падвы. «Ебцотако тохолку» нюбета манзаямда вадандо’, иландо’ саирм’ хамедамба мэ’’ӈадо’.Манзаяхананда ёльце ӈарка таром’ минресь. Вы’ тер’’ ӈацекы’’ Ленинградан’, Санкт-Петербурган’ е’’эмнанда тохолкованзь турӈаць. Тарця ламдикако некоця сейда ёльце мэёсь. Ӈобаӈгуна ӈэмда, ӈудамда малясь, нюрте’’э’ ихинанда тарем’ ибедормы: «Мале сяхаӈгарт’ нидм’ ядэрт’’». Тикы’ пуд телевизоркана параолимпиадам’ маниевы, харта нянда табекурмы: «Маша, пыдо’ хаӈгурӈа’’, тарем’ ӈод’’ пирӈадо’, пыдар ӈани’ ныхыр таня!» Ти, ӈэта ни’ нулй’’, ядэлы’’!Мария Яковлевна — ӈули’’ ненадо ненэць’. Техэ’’ похо’’на ӈарка март’ тохолкованзь товы’’ ӈэрм’ тер’’ сер’ тяхасовна манзарась, харта иланда пили’’ минрена серкаданда пересь.Ӈани’ ӈопой иле’’мяхаданда намдавэва’’ — ненэй вадахана «Спасибо» вада’ то’’олха яӈгу. Ӈэрм’ тер’’ Институтхана тохолкода’’ студент’’ Мария Яковлевна’ ня’ «Ӈарка вадам’» мэць таславы’’. Теда’ маня’’ ӈобтикы нянда Ӈарка вадам’ мэ’’ӈава’’. Пыда ненэй вада’ е’’эмня, ненэй ненэцяӈг’’, вадамдо’ тохоламбадаха’’ сертавэда ӈока.Автор: М.Д. Люблинская’ падвэвна Галина Окотэтто’ ненэй вадан’ тэвравы

Ӈарка вадам’ мэ’’ӈава’’

Сидяӈг: Галина Окотэтто’ тадтавы

<div class="content-lead"> Еръяха’ тер’’ ӈобт’ тэвормы’’. Ты пэртя’’ мерета’’ еся ханодо’ мэць товы’’. Тыдо’ хардан’ нивыдо’ тэвра’’. Няваталаӈго пирдыртадо’ яӈговы. Ненэцие’’ вадавна ӈэдалёсь сехэрэдо’ ӈарханда салабаӈэ хэвы. Ӈадьбято’ тэхэ’’на пирдырмандо’ е’’эйӈэ этнобиатлонхана ныхыдо’ хорпавы’’.</div>Тарем’ ӈод’’ ныланава’ ялямдо’ ёльце сававна мэ’’мэдо’. Ненадовна сямянхат илека пирдырмадо’ танявы. Панытана’’, пибитана’’ не’’ ламбита сюрбермы’’. Харад’ тер’’ сиддо’ ӈули’’ саву’’мы’’.Ӈокханда юкад вата сидндет не’’ ламбитавы’’. Хусувэндо’ няд’’маӈэ мэ’’манда пя ядцянда танявы. Ханзер’’ сюрбермамдо’ нядандо’ хонрамбивась.Елена Сергеевна Неркагы нюдя ӈэванда мальӈгэхэд ламбита тенева. Тедахарт’ ныланава’ ялэта таняб’’, ханяӈэхэна ӈани’ ламбиторцеты. Няхар’’ по’’ тяхана тамна хоркы’’ ес ӈабтамбасетавы. Пирдырмандо’ нерцюна теневабцуда мэйрамба Алёна меяконда ня’ ламбиди’ серхая харад’ варувна пэдара’ някумна ламбита сюрбермэхэ’. Ихинанди’ таславэди’: «Пиртади’».— Хубтахана ю’’ час’ пиркана ӈобт’ ма’’лываць. Мал’’ сомбовна ембдываць. Хибяхав хорецямда сервы, сюрамбаб’’ сибё ӈэӈгу. Мань сырэй панэми мэ’’ӈадамзь, ӈобтикы нись саӈговос’’. Ламбини’’ саваць, нидамзь монэр’’. Салаба сехэрэхэвава’’ ёльце насадарӈась. Пили’’ нерде’ ӈули’’ пуняна хаидамзь. Пуна янамбовна нерняри’ пяв. Ӈока нем’ пудни хаедм’. Матумдейӈэ, сибимдейӈэ тэввакэдм’. Ихинани ёльце маймбидм’.Теда’ поӈганандо’ ӈопойри выӈгад ха’’амвы нядо’ Светлана Лялевна Поронгуй сюрберӈась. Няхатата нись хаюр’’. Нюртей ям’ ханавы илебей не — Тибичи Виктория. Пуданда Мария Кузнецова (Того) тэвыць.Пирдырмы’’ не’’ мал’ сяхаӈгав ненэй илам’ минревы’’, тэнзувнандо’ мал’ ненэй не’’. Ӈадьбято’ ламбитавам’, выӈгы илам’ ӈахат теневадо’.Автор: Галина Окотэтто’ падвы

Ламбитана’’ не’’ пирдырмы’’

Сидяӈг: Лариса Вануйто’ тавы

<div class="content-lead">Ямальской районхана Сёяха’ хардахана «Пясик» нюбета проектм’ минрець. Тет яля’ ямбан’ миӈась. Манзаямдо’ «Лэё» мяд’ тер’’ тидхалембидонзь. Мел’’мана мирць теневана ненэць’ — Никита Львович Хороля таняна мэвысь.</div>Пыда округна’’ мелад’’ ненэцие’’ хардахана манзара. Харда па’’мя. Хуркари’’ выставкаха’’на, конкурсха’’на пирдырцеты. Выӈгы иланда саирм’ мивы ӈамгэрихи’’ната манэ’’лабтамбида.Сёяха’ терха’’ «Дом культуры» мякана мирмам’ ӈадимдембавы. Теневабцота сер’ ненэцие тохоламбавы. Мирць ӈамгэри’’ танявам’, ханзер’’ мэць таравамдо’ ваде’’мы. Ненэця’’ лэхэд хуркари’’ ӈавэ сертабавы’’. Ханяӈы’’ мяд’ терсавэй’’ турмы’’. Ӈацекы ӈани’ тохоламбавыда. Етя школаханандо’ мастер-классам’ манэ’’лабтамбавы.<div class="content-new-image"><img alt="pic" src="https://storage.yandexcloud.net/ym-sites-static/c36332ea-8ff.webp" style="width:100%" height="709" width="1260"/><div class="content-image_child">Сидяӈг: Лариса Вануйто’ тавы</div></div>Тикы проектандо’ нямна Лариса Николаевна Вануйтим’ хонрамбидамзь. Пыда тарем’ лаханась:— Хахаяда похо’’на Сёяхана’’ ӈэрм’ тер’’ ӈацекы’’ школам’ мале’’мяхадандо’ ӈопойхартадо’ ЯМКан’ мел’’мана миртяӈэ тохолко хэвы ӈэбта сава ӈэӈгусь. Илебей’’ ненэциена’’ ӈобкартадо’ миртяӈэ ни тохолку’’. Теда’ е’’эмнандо’ тюку серм’ ӈадимде идейваць. Грант’ еся мэць проектм’ серта таславаць. Нюрте’’э’ мирць тараванда’’ ӈамгэридава’’ тэмдаваць. Тад пуна тарця манзаям’ сававна теневана ненэцям’ ханзь тарась. Саляӈгарад’ мелад’’ ненэцие’’ манзаралаван’ вадам’ ӈэдараваць. Мирць теневана ненэцяндава’’ пюрӈаваць. Тарем’ Никита Хоролям’ хаӈаваць. Пыда ненэй ненэць’, выӈгы илам’ сававна теневада. Тет яля’ ямбан’ ненэцие, ӈацекы тохоламбись. Тоходаванзь турта ӈокась. Тикы манзаям’ ӈули’’ саву’’ӈадонзь. Школахана тохолкодина’’ поӈгана маси’’ мирмам’ мэнена ӈадимда. Ва’’лёй, пэдава ӈэӈгу. Ӈани похона тамна несэй манзаядва’’ тасламбаӈгува’’.Мирманзь турмы Алексадр Ӈокдэтта инда ядэрабцо’’ тарця’’:— Мань ӈацекы ӈэвани мальӈгэхэд мирць теневадм’. Хой’ няна тухудамзь. Па’’мя хархана мирцетыдм’. Теда’ «Пясик» проект’ сер’ едэй ӈавэ, машинкам’ тохоладм’. Тикахана лоӈгэйм’ падтадамзь. Падта’’мада — ты’ ӈэва. Ӈули’’ нензел’’ ӈэвы. Ехэрана мутрам’ няд’’мяць нини лоӈгэяд, масерт хар’’ни сертаӈгудм’. Тикан’ ма’’лёвэӈэ ялява’’ сававна мэ’’ӈаваць.Тиканда выӈгана илени’’ поӈгана харто’ ихиндо’’ мел’’мана манзара теневана’’ ӈока’’. Ты’’ нямдахат, я’ хора’ лэхэт хуркари’’ масеро, сяр’ лы, пясик, халцо’’лэ мимбасеты’’. Маниеб’’, ихиня сава’’ ӈэсеты’’. Хардахана илени’’ поӈгана ва’’лёйвана мирць теневана’’ ӈани’ танясеты’’.Автор: Руфина Окотэтто’ падвы

Мирць тоховы’’

Сидяӈг: В.Вануйто’ тавы

<div class="content-lead">Ямал’ тер’’ ӈацекы’’ пудана сидя иры тохолку’’. Тадри’ ныланава’ ялэдо’ пэӈгуд’’. Юдимдей няби’’ юкад вата нюртей классаха’’на мэна’’ мале ӈахакуд школа’ пуд ханяна тохолковамдо’ тасламби’’. Ханяӈы’’ мале тенева’’. Ӈанидо’ тамна ибедорӈа’’.</div>Тохолкось ядамдо’ тэраба #Путешествие89 проектм’ минрена’’ сиддо’ тидхалемби’’. Тикы’ е’’эмня мале сян по’’ ямбан’ ӈарка марк’’ ӈэдабтамбидо’. Ӈацекы’’ таняна тодо’’ институт’’мана ядэрӈа’’. Ӈарка харад’’ илам’ торомдамби’’.Тандая’ мат’’ юкад вата ӈацекы’’ Санкт-Петербург март’ тэвавыд’’. Сиддо’ тодо’’ институт’ тер’’ ядабтамбавы’’. А.И. Герцен’ нюмам’ мэта Университетхад Валенкова (Вануйто) Виктория Васильевнам’ хонрамбиваць. Вадавнанда, сие ниць иры’ сидндетимдей яля’ Ӈэрм’ тер’’ институтхандо’ мядондидо’ мале ӈатевыдо’. Сиддо’ няхар’’ яӈорэй’ ӈэда тохолко хардандо’ мюмня ядэлавы’’. Студент’’ е’’эмнандо’ тохоламбада’’ манзаидо’ ваде’’мы’’.Виктория Васильевна няндо’ тарем’ лаханавы: «Ӈока по’’ ямбан’ сян илебей’’ ненэця’’ ӈэ’’ тюку харад’ танцие’’мана танвакы’’. Сяӈок Ӈэрм’ тер’’ илаӈганандо’ тараванда манзаядамдо’ тохолавакы’’. Поӈганандо’ юнета’’ нина’’ ӈока’’. Теда’ харто’ яханато’ иландо’ саирм’, харе’’ вадидо’ нерня’ минре’’. Пыдара’’ ӈобтикы харвабцонда’’ таняб’’, тохолкованзь тоида’’. Тодо’’ ӈэрм’ тэнз’’ нида’’ торомдаӈгуда’’. Тюкона сава теневабцо хоӈгуда’’».Автор: Галина Окотэтто’ падвы

Ӈарка март’ ӈэдалёрмы’’

Таттама: А. Пяк таттамы

<div class="content-lead">Чейня нум дюпямшту, дяԓя’’ димпумшту’’. Ӈэԓм’ чеԓ’’ неша’’ няматаԓакуԓма дяԓян ӈанаташтут. Четаӈ выӈкна, петаԓахана диԓина неша’’, каԓтыхина мэна’’ ты’’ падиԓьчи’’ дяԓям «День оленевода» ӈэта’’. Чики праздник’ шаӈкмян тэмс неша’’ хашаӈоӈатуӈ.</div>Касама’’ неԓьшут тытуӈ дянямташту’’, ӈайтаԓёш кан’ видян тытуӈ тохоԓашту’’. Каса ӈашки’’ вяԓкуԓоԓьш, нэхэԓумпёш, ха’’моԓьш — таньше мянаԓьш пытатуӈ конуԓпёшту’’. Ни’’ ӈупчики няматаԓакуԓма дяԓям ӈэтаӈа’’. Куԓкаԓи’’ патмы’’ паныдю’’, пеми’’ хайтуԓаӈа’’, ӈочакохот мэкатай’’ ниӈвий пытуԓпи’’, пеми’’ че’эм паӈкаԓпи’’. Таньдет ӈайта мансдетоӈ манԓе выйнуӈ шеԓтапёнԓаштутуӈ. Нум дячамаӈ неԓьня мэдяташту’’. Чикехет мэдямайтуӈ мымктатуӈ хайтуԓаш чепяшту’’. Праздникан шаӈкмян неша’’ каԓьтуӈ ненэй паныдётуӈ мэш тошту’’.Неԓьня Ямалхана диԓина’’ Ӈэԓм’ чеԓ’’ неша’’ поӈкнатуӈ мянаԓмантуӈ мэт Надым нимита каԓват няӈ ӈомшту’’. Маня’’ дяхатана Пуровский’ районхат мэна’’ ӈупчики таньняна мянаԓьшту’’. Татӈявта диԓихина Пюԓ дяханана диԓина’’ неша’’ Таԓкан ӈомтӈа’’. Няматаԓакуԓма дяԓям мэмантуӈ мэт шанат ӈисыхит, каԓтыхит мэна’’ туты’’. Ты’’ падиԓьчи’’ дяԓям непудянта шеԓ Пуровск’ дет ӈайта пуԓ ӈыԓна мэтӈатуӈ. Шича дяԓяӈ дямпан праздник’ минты. Мянаԓьчи’’ маныдемантуӈ мэты ӈука’’ тэмс неша’’ ӈомтӈа’’. Дяхаӈ мюӈ шича дюкат ва’та ненэй мяту’’ менӈа’’.Чуки похона непудянтуӈ шеԓ куԓкаԓи’’ вильта’’ мероприятии’’ шеԓтаны’’. Мянаԓмантуӈ мэт томы’’ неша’’ тыӈ канхана ӈайтаԓёш няматаԓакуԓты’’, нэхэмтуӈ, нюӈк ӈаймямтут ӈычимчемпёшь поӈкнатуӈ мянаԓьш шана’коты’’. Пюԓ дяхана ӈайта ӈыди каԓват’’ ӈупчики ты’’ падиԓьчи’’ дяԓян ӈанатадят. Каԓпюԓкана, Каԓясамэхэна, Ханымейхана, Толькахана, Самбуԓкахана нешади’’ хомана ныптакомаӈ мэты куԓкаԓи’’ вильта’’ мероприятии’’ шеԓтаны’’. Ӈэԓм’ чеԓ’’ нешаӈкна няматаԓакуԓма дяԓя — пиԓи хома дяԓя. Нетуӈ кошту’’, няханатуӈ дёԓимяшошту’’, шана’ко мяӈаԓьшту’’, шаӈкмян дяхат томы’’ куԓкаԓи’’ тэмс нешади’’ манэшту’’.Чики праздниктоӈ выӈкна, петаԓахана, каԓтыхи’’на диԓина’’ неша’’ пуӈ ченят ӈэташтутуӈ.Автор: Андрей Пяк патмы

Мянаԓма дяԓям ӈэта’’

<div class="content-lead">Новой Порт хардахана илена’’ не’’ хусувэхэт пэрта манзаядо’ саць ӈока. Пыдо’ культура’ мякана ма’’люрӈа’’, «Юсна» нюбета клубан’ ядэрӈа’’. Таняна ныланава’ яляха’’на хардандо’ тер’’ е’’эмня сава серо минре’’.</div>Ма’’люрмандо’ мальӈгана ӈаво пэрмамдо’ няни клубандо’ ӈэвахана мэна ваде’’ӈадась. Тарця проектм’ Явлода Худи ня’’амбида. Пыда тарем’ мась:— «Юсна» небой та’ ӈадимясь. Тикы’ нерцю’’ ӈани’ ма’’люрцетыва’’. Ханяӈэхэ’’на самляӈг-си’’ив ненэць’ тута, ӈанихи’’на тамна ӈокарка. Ӈамгэ’ пирт’ серона’’ тидпой’’ миӈаць, мярёйхад хуркари ӈамгэри сэдыбасетыва’’, падко’’, есь’’ няби карточки’’ ӈэся’’ ӈэдакы’’, паспорт’ синд’’мя’’. Пуна лакри’ сидна’’ ма’’ламбавы нява’’ хаясь. Мале пон’ тэри илеваць, тикахад небо’ ӈани’ яебтюрць таславаць. Проектм’ падава’’, сидна’’ саву’’ӈа’’, есяна’’ няд’’мад та’’. Тедахав’ ӈопойри мярёйхад ӈамгэри нива’’ сэдыбю’’. Хар’’на’’ илна’’ саирм’ нерня’ пэрӈава’’.Хардаханандо’ сиддо’ мале тенева’’, няндо’ турман’ няби нядандо’ тохолкован’ харванадо’ ӈока. Хэвняӈы’’ яхат туртидо’ ӈобтикы таня’’. Явлода лахарёмда тамна’ тяха’ ханадась:— Ӈобаӈгуна яхана’’ варан’ ӈарка ту ӈано нултадась. Россия’ тиӈгыхыд мядонда’’ товыць. Маня’’ сидна’’ вэде’’манзь ӈани’ тюӈгаць. Мякато’ ханаванда ӈудито’ терад сертаць, мярёйм’ ӈолепяхана падтамбиць. Ненэся хардаханана’’ ёльце сававна мядоӈаць, тэри маймба хаяць. Ехэрана’’ яхат ӈэди’’ хавна тохолкода’’ турцеты’’. Ӈуда’ тяхана мэта инякоцям’ сертабиць. Хасава’’ ӈацекы’’ мярёйм’ маторпада лазерм’ саць саву’’ӈаць. Ява’’ лэтрамбада’’ нина’’ ӈани’ нина’’ юрыбасету’’. Мал’’ ӈобнзер’’ нядаӈгосетыва’’. «Свеча солдату» мастер-классахана ӈармы ненэцие, ӈацекы линюй сертаба тохоламбасетына’’. Линюйна’’ саӈговота ларасм’ Салехардан’ ӈэдараваць. Таняд ява’’ ерамбада’’ нина’’ ӈэсонд’ тэврадонзь.Тандая’ ни’ иня паӈгалпа пявыць. Тарця сер’’ нянандо’ нюрцям’, тикахад таром’ минре’’. Паӈгалмы’’ нидо’ ӈамгэри’’ хэбидя’’ ялэ’’ ёльцяӈгана серыба пиръядо’. Хусувэхэт нерняӈы’’ ялэто’ нямна ӈахакуд ибедорӈа’’, ӈани яляхана ӈадимдеван’ харвана’’ серодо’ мале тидхалевы’’.— Клуб’ терӈэ маня’’ ненэй мятава’’ пал’’ман харваваць. Ӈадьбята небой по’ няд’’маӈэ тамна ӈани’ ӈопой проектм’ падаваць. Теда’ тикэва’’ саву’’ӈадонзь, есяна’’ няд’’мад таць. Хэбидя’’ ялэ’’ ёльцяӈгана ненэцие мядолабтамбаӈгува’’, хуркари яля’ ня’ ӈэда серо минреӈгува’’, — лаханако нята нями маймба ма.Нюдяко хардахана нерня’ ӈэда’’, нито’ нямна няркнана’’ ненэцие’’ танява ёльце сава. Илесь яндо’ илам’ харто’ савумдамбидо’, ӈудаха’’нато’ мэёвна ня’’амбидо’. Пыдо’ вадавнандо’ тэри хэвняд ӈатенахаваб’’, ӈамгэхэрт ни ӈадимд’’.Автор: Анна Яптик’ падвы

«Юсна» тер’’ нерняри’ ӈа’’

Сидяӈг: Анна Яптик’ тадтавы

<div class="content-lead">Тандая’ Салехард’ хэвхана ӈэда мяк’’ тэворӈаваць. «Минлей» ӈэсы’ нямна ядэрӈаваць. Таняна ненэй вадавна «Конёк-Горбунок» нюбета книгам’ толабиваць. Ма’’лёвы’’ поӈгана колледжхана тохолкода’’, ӈэрм’ тер серо тасламбада департамент’ тер’’, юне тэволана’’, тамна ӈани’ ханярина манзарана’’ мэць.</div>«Минлей» ӈэсым’ ня’’амбада Галина Ачембоевна Матарас мядондида мал’ толь’ тяха’ ӈабтэйдась. Пуна ма’’лёвэӈэ няна’’ инда ядэрабцом’ хэтась, тарем’ мась:— Маня’’ хар’’на’’ вадавнана’’ ӈэда книгава’’ мале ӈока. Нянани ханяӈы’’ толабаб’’, ӈули’’ тоенаркана то’’олха’’ ӈэсеты’’. Пётр Ершов’ падвы лаханаком’ ненэця’ вадан’ Светлана Ивановна Тусида тидхаледась, «Маха тюнд юноӈэ» нюмдедась. Пыда таӈга хамэдава’ пирувна падвэдась, тэри хайна. Тарця тарана ӈамгэм’ ханярина ӈацекы’’, ӈармы ненэця’’ мэнеӈгудо’. Манзаямда тид’’ пирдалеванда няю’ П.П. Ершов’ нюмам’ мэта премиям’ ня’’мась. Ненадумда’’мам’ 2005 похона Россияна’’ паднани’’ Союз няби Тюменской область’ няна ӈэда Ишим харад’ ерв’’ ӈадимдевыдонзь.Вадамда мэ’’махаданда хусувэхэна’’ книгадва’’ тась. Хибяна’’ ханяӈы вади толавам’ ӈобнзер’’ таславаць. Пуна ӈоб’’ пуд толаӈго пэйнаць. Лаханаконда сер’ вабцана’’ яӈгаворӈаць, хуркариӈэ хан’’ӈаць. Ханяӈы’’ луца вадавна ӈэдамда ваде’’ӈаць, вадамдо’ саваркавна теневана’’ ненэця’ вадавна толаӈгуць.Ненэй мяд’ мюня ханя’ савась. Ӈопой мяд’ тердарев’ ӈамдываць. Няна’’ инзелевы няби сырмы танявы ӈэб’’ мандась: «Тарси’’ пир’’ӈадо’, ӈобӈгэв’ тарем’ лаханаку вадець пэртакы’’». Неноховавна маня’’ нюртей ӈобт’ тэв’’маваць. Ненадо ялям’ мэ’’ӈаваць. Луци’’ юнета паднана Петр Ершов’ соя’’махад тюку по’ 210 поӈэ хаясь. Тикахад «Конёк-Горбунок» 190 поданда хэвысь. Сидя ненадо серк’ сидна’’ ма’’лаванди’ хавна мал’’ толаӈговам’ харвабтана ненэцямаць.Лаханако хуркари тэнз вадавна пады. Мале сян по’ тяхана хаби’’ вадавна ӈадимясь. Теда’ ненэй вадан’ тэврадо’. Таддикахад спектакльм’, видеом’ сертаван’ харвабцодо’ ӈадимясь.Автор: Анна Яптик’ падвы

Ханярина толабидо’

Сидяӈг: Р. Окотэтто’ тадтавы

<div class="content-lead">Саляӈгардахана ӈацекы тохоламбада’’ няхато’ теневабцодо’ манэ’’лабтамбавы’’. Поӈганандо’ ӈопой ненэй не — Дарья Саналиевна Вануйти мэвысь. Пыда падтаӈгурта илебей не. Яна’’ тиӈгэвна юнда мале со. Сертавы’’ манзаида ӈока манэцетына’’. Ӈэрм’ ява’’, ненэцие’’ сидяӈг падтамби.</div>«Надежда» нюбета ӈацекы тохоламбава’ мякана тарця’’ пирдырми ӈока по’’ ямбан’ сертаби’’. Тенкана «Педогогическая копилка-2025» нюбета конкурсадо’ ӈэвысь. Тикахана няхар’’ нем’ тэравы’’. Пыдо’ манзаидо’ саць сававна сертавыдо’. Няхаромдэйӈэ нита поӈгад Дарья Вануйтим’ тэравы’’. Ханзер’’ теневабцода ӈадимдемба’’мамда ваде’’ӈадась:— Мань ихинани тикы ялями тамна пон’ тенеӈгув. Сейми нярканась. Нюртей тарем’ тоенана манзаравами. Падтаӈговахавам’ саць сававна теневав. Тикахавахана таӈгасетыдм’. Тедахав’ ӈанисэй манзаям’ теневавами ӈадимдембидамзь. Ӈацекы’’ урокато’ нерня тюкон’ турцеты’’. Хуркари’’ ӈамгэри падаркад, ӈани’’ ӈамгэхэт сертаба, падтаӈго тохоламбина’’. Ӈобтикы ӈацекы тохоламбидм’. Ты’’ саполана иры’ нюртей яляха’’на конкурсава’’ ӈась. Иры’ пеля’ ямбан’ хамекудамзь. Хусувэй сертавэми, падвэми сававна манэсарьянась. Ханяӈэхэ’’на несэймдасетын. Тикы манзара’’мами тароси’ нись хань’’. Си’’ми няхаромдэйӈэ тэраць. Ёльце маиваць. Ненандумда’’ма’ падартава’’, ӈуди’’на’’ терад ня’’маваць. Тамна’ тяха’ вареми мэтадм’. Тюку конкурсхана ӈока тарана ӈамгэм’ намдадамзь, манэ’’ӈадамзь. Тад нерня’ манзаями саваркавна теневаӈгув.Дарья Саналиевна’ падтавэда ӈока, Саляӈгардахана выставкаха’’на манэ’’лабтамбасетыдо’. Школахана тохолкованда мальӈгэхэд падтаӈгу. Нюдя ӈэванда мальӈгэхэд харвабтана серта иланда сехэрэӈэ тэравэда. Теда’ харта ӈацекы тохоламби. Теневана нява’’ етри’ варемда мэ’’ӈая, паской ӈэрм’ ява’’ сидяӈгадарев’ падтамбая.Автор: Руфина Окотэтто’ падвы

Варемда мэ’’мы

Сидяӈг: Ю. Талеева’ тадтавы

<div class="content-lead">Индигахана Ледков’’ паӈгхат перена’’ мяд’ тер’’ таня’’. Тев’ ёльцянд’ пыдо’ «Индига» СПКхана иринато’, нисянато’ пэрмы серм’ минре’’. Тикы’’ ненэця’’ тэхэ’’на мэвадо’ Алексей Егорович Ледковхад миӈа. Пыда Тиман’ няӈы’’ ты пэртяхат паӈгды. Харта яхананда ӈока по’’ ямбан’ ӈэсы’ ервӈэ тарась. Ваеравы’’ юр’’ по’’ 70 — 80-ей похо’’на маня’’ округханана’’ пыда нюмда хусувэй хойхана сосеты. Манзаямда ӈани’’ яха’’на ты пэртя’’ пыдаван’ харвасетыдо’.</div>Алексей Егорович 1927 похона хор’’ ирийхана Тиман’ выӈгана соявысь. Выучейской’ ӈэсыхы школахана тет классм’ ёльцевысь. 13 похонанда мале ӈарка ненэцяндарев’ ты пэртяӈэ таравысь. 1944 похона Красной Армиян’ тэвыць, Курильской ӈохо’’на, Сахалин’ няна, Владивостокхана мэвысь. Пуня’ мяканда 1951 похона тэвыць. Пухуцяданда Ледков Евдокиям’ мэвысь. Хаюпа хэванда нерцюна пирибтя ёрмысь, нита ня халэдавысь. Хаюпа хэ’’мяхаданда хоян’ танавыць, вэсаконда хэвхана мята серо минревысь. Ледковха’ самляӈг нюди’ хойхана соявы’’, таняна вадёвы’’. Небяндо’, нисяндо’ хэвхана харто’ явнандо’ мюсермы’’.1956 похона Алексей Егорович партиян’ тэвыць, тамальӈгана «Тиманец» колхоз’ ӈэсыхына ервӈэ хэвысь. 1963 похона манзаямда теневана нерм’ пэртям’ «Индигской» совхоз’ хаюрта ӈэсы’ ервӈэ ханадонзь. Ӈэсым’ тю’’у’ иладась, манзаядо’ сававна нерня’ миӈась. Сита КПСС XX съезд’ делегатӈэ тэрадонзь. Алексей Егорович Ледков «За победу над Японией» медальда таня. Сававна ӈока по’’ ямбан’ манзараванда нямна тарця’’ хуркари’’ ненадумда’’ми ня’’амвысь. 1985 по’ ӈэсонд’ пили’’ ӈэсы’ ервӈэ тарась, ӈацембой’’ ты пэрти тохоламбасеты. Пуна ныланаванзь тарпыць, нисянда минревы ӈэсы’ ервӈэ хасава нюмда таслаць. Алексей Алексеевич тет юкад вата по’’ ямбан’ тэхэ’’на мэ. Ӈули’’ нерде’ нисянда хэвхана мэсеты, тараб’’нанда нюмда нядабасетыда. Вэсако ӈэбта ӈод’’ ненэциеда етри’ тидхалембасеты.Сяхари’ Алексей Алексеевич тарця’’ вади мэцеты:— Хойхана хусувэй хибяри мэсь нида пират’’, харвабцода хари’’ яхад турта’ то’’олха. Ты пэртя хусувэй ӈамгэда ӈарка няха’’тата миӈа — мел’’ ӈэвада, ямда’ сахарамбавада.Сян мэвна харад’ манзаи пэрманзь ханзетыдо’, хасава тарця’’ вади лэркабт’ мадасетыда:— Мань хантадм’, ӈанир’’ ханда. Хибя нисянана’’ е’’эйӈэ тараӈгу, хибя тэхэ’’нана’’ мэӈгу?Тенад’ выӈгана мэ, тыда мание, ӈэсында серо тидхалемби, тараванда мальӈгана хоян’ тэворта’’ ты’’ лекар нядабасеты. Пыда СПК «Индига» правленияхана мэ. Хусувэй серкана ирт’ ӈэда ненэць’. Ӈока по’’ ямбан’ иланд’ ивъер’ сырта, ненадумда’’мида ӈока’’. 2020 поход СПК «Индига» матдомдэй ӈэсы’ ерв’ Алексей Ледков Россияна’’ ненадо манзарана нювм’ минре. Пыда’ паӈгхаданда минда’’ ненэця’’ Тиман’ хойхана ты пэрма’ серкана ӈокханда манзаравадо’ сидя юр’’ поход ва’’ӈа’’. Ты’’ сехэрэдо’ тамна пон’ хайная. Тамна ӈока юр’’ по’’ ямбан’ Нум’ вэсако ябдамдо’ тэврамбая!Автор: Юлия Талеева’ падвы

Тиман’ мэбета’’

<div class="content-lead">Теда’ сэхэ’’ паӈохона сайнортина’’ нядаба яна’’ тер’’ таром’ ха’’аврамби’’. Хибя ханзер’’ пирӈада, мянувнанда ӈамгэхэби сертаби. Ханяӈы’’ хурка няд’’мам’ ӈадимдембавамдо’ нидо’ вадес’’, тарем’ ӈод’’ юндо’ няна’’ тэворӈа.</div>Тюку нява’’ ӈобтикы хэ’’ли’ лаханана ни ӈа’’, мунзипой’’ нида нядабасетыда. Теда’ ӈод’’ харвобта ӈани’ ехэраӈговакэва’’, сидна’’ янда тер’’ хонра’’. Тазовской районхана, Паюте хардахана, выӈгана Алексей Синчувичм’ Яптикм’ сававна теневадо’, пыда мирдаӈгурта ненэця’. Мале сян по’’ ямбан’ ты пэртя’’ няханата манзара. Вы’ тер’’ поӈгана сававна сидта тенева’’. Хардахана илебата ӈод’’ харта тэсавэй.Тюку по’ ты саполана иры нердена ялэ пиркана сайнорта’’ нита е’’эмня 7,5 тонна ты’’ ӈамзам’ ватормысь. Хальмер’’ Седе хардахана СПК «Тазовский» предприятийхана тушёнкаӈэ сертаӈгудо’. Тикыдо’ сайнорта’’ солдатха’’на’’ ӈэдараӈгудо’.Небо’ Алексей Синчувич ӈани’ тарем’ нида нядабидась. Та’ мальӈгана мат’’ тонна’’ пир’’ ӈамзам’ ӈэдаравысь. Тушенкаӈэ банкы’’ мю’ сертавыдонзь. Ӈамзи мипаванда хавна мале танякуна квадроциклм’, мотоциклм’ ми’’мысь.Сяхари’ нидо’ нядаван’ харвана’’ ненэця’’ тэри ӈэвандо’ сер’ ни’’ посан’’, мунзипой’’ манзаидо’ пэръядо’. Тарем’ тюку няна’’ тотрев сэсембада нина’’ янамбовна нядабахана’’. Пыдо’ саць ӈарка, тоенана манзаям’ минре’’, ӈодь мал’’ ӈэбана’’ сензава ӈэхэва’’.Автор: Марина Ярой’ падвы

Нида нядаби

Сидяӈг: А. Яптик’ тадтавы

<div class="content-lead">Округханана’’ тодо’’ марка’’на, нюдяко’’ хардаха’’на ӈэрм’ тер’’ ненэця’’, ӈацекы’’ паднаванзь ма’’люрӈаць. Ӈарка яна’’ тиӈгэвна ненадо яля миӈась. Хусувэй тэнз’’ харто’ вадидо’ саву’’ӈаць.</div>Ямалханана’’ тюку по’ хасаваюдимдей ӈарка паднавам’ мэ’’ӈаць. Тикы’ е’’эмня Саляӈгардахана толаӈгова’ мякана ненэй ненэця’’, хаби’’, ӈысма’’ ӈобт’ ма’’лыць. Тикахана тодо’’ лохохо’’на няхар’’ тэнз’’ вадавна диктантм’ падыбиць. Маня’’ «Няръяна Ӈэрм» газетам’ минреняӈэ ӈани’ паднаванзь хан’’ӈаваць. Илебей’’, ӈармбэй’’ ненэця’’ мале ӈокаць. Ханяӈыдо’ мяд’ терсавэй товыць.Тюку пова’’ «Год героев» нюбе’’ӈа. Ӈадьбята ненэй вадавна падна’’мава’’ сайнормы ненэця’ нямна ӈась. «Снаряд’ лабара’’ма»м’ нюбе’’ӈась. Ӈавхы ненэй вадавна ӈэда букварьм’ сертавы Анатолий Иванович Рожин’ падвы. «Осколок снаряда» нюбета падвэнда пеляхад ханавы.<div class="content-new-image"><img alt="pic" src="https://storage.yandexcloud.net/ym-sites-static/ccbd71b6-c1a.webp" style="width:100%" height="708" width="1260"/><div class="content-image_child">Сидяӈг: А. Яптик’ тадтавы</div></div>Падна мале’’мяхадана’’ Дарья Ӈокдэтам’ хонрамбидамзь:— Мань Санкт-Петербург маркана А. И. Герцен’ нюмам’ мэта университетхана тохолкудм’. Небо’ таняна паднадамзь. Тедахав’ Саляӈгардахана мэвани’ сер’ тюкон’ тодамзь. Небяхаюни-нисяхаюни, хадами нянани тоць. Ӈацекы ӈэвани мальӈгэхэд хардахана вадёдадамзь. Вадами лахана мэць теневаркав. Си’’ми хонрамбадам’ хамедаӈгув. Ненэй вадавна паднава нянани тоенарка. Хуркавна ӈод’’ падна тоходадм’. Тюку ялява’’ сававна мэ’’ӈава’’.Ӈани ӈопой нем’ лахана ня’’ӈадамзь:— Тарця диктант’ танява сава. Ненэця’’ вадамдо’ тензебтемби’’. Тад тикахад мань тарем’ тасламбив, ӈани похона хаця несэйвана серта тара. Ӈэрм’ тер’’ серо минрена’’ ханяримна юнм’ ӈэдарамбая’’. Тамна ӈокамбой’’ Ямал’ тер’’ теневава’ е’’эмня. Яна’’ тиӈгэвна ненэй вадам’ нерня’ тидхалембада’’ ӈока’’. Школаха’’на ӈацекы’’ поӈгана сававна ненэй вадавна тохолкода’’ таня’’, илебей ненэцие’’ поӈгана едэй’’ паднанина’’ ӈадибелыд’’. Сиддо’ ненадумдамба тара. Ӈудандо’ терӈэ ненадо падарм’ ня’’амбато’, ихинандо’ ӈарка таром’ минревадо’ соӈгу. Колледжхана тохолкоди паднаванзь етя ӈэдарамбабато’, сава ӈэӈгусь. Поӈганандо’ паднаван’ харвана’’ ӈока’’. Тохолку’’ ни’’им’’. Тикы’ сер’ тось я’’мадо’.<div class="content-new-image"><img alt="pic" src="https://storage.yandexcloud.net/ym-sites-static/065696a3-114.webp" style="width:100%" height="708" width="1260"/><div class="content-image_child">Сидяӈг: А. Яптик’ тадтавы</div></div>Округна’’ ӈардавна тамна хуркари’’ ненадо сер’’ ӈэвыць. Сёяха’ хардахана мяд’ мюня диктантм’ падыбавыць. Школа интернат’ тер’’, нюртей классаха’’на мэна’’ ма’’люрмыць. Тикахана ӈэрм’ яна’’ нямна стихотворения ваде’’мыць. «Язык моих предков угаснуть не должен» нюбета конкурсамдо’ ненэй няби луца вадавна мэ’’мэдо’.Маня’’ мал’ хамедамбива’’: хусувэй тэнз вадамда теневабта, невхы иринана’’ минревы ила’ саирм’ нива’’ юрыбаӈгу’’. Тяхад ӈэда’’ паӈгона’’, вадина’’ теневаӈгуна’’.Автор: Руфина Окотэтто’ падвы

Мэбета вадава’’ мэ’’ӈава’’

Таттама: А. Пяк’ таттамы

<div class="content-lead">Шаӈкмян хома ӈамэ’’ ӈашкиуди’’ дет ӈайты’’. Таԓям Каԓпюԓкай садик «Росинка», ӈашкиуди’’ хомана тохоԓкомаӈ, диԓимаӈ мэты’’, куԓкаԓи’’ проекта’’ тадя’’. Ӈоптоӈ «Ӈокна мэӈама’’» нимита консультативный’ центр’.</div>Няматаԓакуԓма дяԓяхана Каԓпюԓкай садик’ ненэй мят меӈаш. Выӈкат томы’’, каԓтыхина диԓина’’ ни’’, садикан канта’’ нитуӈ де’эмня ӈамы ватантуӈ тадяӈайпы, таняӈ кяштуш’’. Консультативный’ центр’ «Ӈокна мэӈама’’» нитуӈ тадямэна’’ выӈкна диԓина’’ нешади’’ нятапёш шеԓтамы. Каԓтыхина ӈайта группантуӈ камна, Росинкан канта’’ ӈашкиуди’’ ӈукадёмутуӈ ненэй мякна тохоԓкошту’’. Таԓям таԓьша центр таԓа, маньшту садикихина мансԓанна’’.Четаӈ, чуки ноптухуна деты мутԓамна’’ шеԓтамы’’ мэ’эмна’’ нюча ӈашкиуди’’ тохоԓкошту’’. Выӈкат мэна’’, каԓтыхина диԓина’’, нитуӈ тохоԓкомаӈ де’эмня куԓкаԓи’’ ватантуӈ тадяӈяп, чики консультативный’ центрхана мансԓанна’’ ни’’ конԓашту’’. Таньняӈ кяш ӈудюнтуӈ дякоп, телефонмана, интернетмана мунушту’’. Няматаԓакуԓма дяԓяхана «Ӈокна мэӈама’’» центрхана ӈука неша’’ консультацим’ няамӈаш’’. Немянатуӈ вачитуӈ тасԓампютан ӈашкиуди’’ шеԓнантуӈ мякна шана’куш’’. Пихиня шана’коман ха’та’’ ненэй мятуӈ кявхана кан’уди’’ ха’’муԓпиш’’, нэхэԓумпиш’’. Няматаԓакуԓма дяԓяхана ӈашкиудеэ’’ мячисы’’ «Единая Россия» партихина мэнахат’’ няамӈаш’’. Маня’’ дяханана ни’’ дет тонԓюта движениӈ мансдям’ минԓена Оксана Ермакова выӈкат томы’’ ӈашкиуди’’ поздравийӈаш, дилтуӈ нямна немяныхинатуӈ дюничаԓяш. Выӈкна диԓина’’ нешаӈкна, нитуӈ куше ненэй мякна тохоԓкомаӈ, ӈамы няӈтуӈ таԓамаӈ де’эмня, пон Росинкахана мансԓанна’’ мунушту’’. Мансԓаманта дямпан Каԓпюԓкай садик’ ӈука мэмаӈ хома патаԓт ка’амдяш.Росинкахана шанат инновационный’ проект’ шеԓтаӈаш’’. Маньшту’’, таньше нешаӈкна нитуӈ куше тохоԓампюмаӈ нямна дёԓимяшош хома. Четаӈ кочевой’ садик’ куптана каԓтыхит ӈа’’. Куше мансԓамамтоӈ ӈокна тасԓаш таԓа. Ненэй мятуӈ кявхана ӈайта кочевой’ группахана мэш, выӈкна диԓина’’ ӈашкиуде’’ ԓусан шеԓт меԓ тохошту’’, школан хомана ӈанаташтут, маньшту Росинкахана мансԓанна’’.Чикиӈ камна нешаӈ ватамана кынсу’’ тохоԓампёшту’’, шутпяԓсу’’ мэшту’’, каԓьтуӈ ватаманантуӈ мунушту’’, пихиня вяԓкуԓоԓьш, ха’’моԓьш тохоташту’’. Таԓьша выӈкна ӈайта садик’ ненэй нешади’’ ватам, диԓивсум ԓэтԓымпи’’. Таԓям Росинкахана пон нятапёштутуӈ. Садикихина ӈашки’’ тохоԓкомаӈ дет ӈайта вачи’’ камна, нехеэ’’ куше нюча нитуӈ веш шеԓтамамтуӈ де’эмня вачашту’’. Ӈокна мэма хома шеԓ.Автор: Андрей Пяк патмы

Ӈокна мэӈама’’

Сидяӈг: А.Яптик’ тадтавы

<div class="content-lead">Округна’’ марка’’на хусувэй по’ «Лыжня России» нюбета пирдырмам’ мэцеты’’. Тикан’ хибяри’’ ма’’люрцеты’’. Ненэця’’ мяд’ терсавэй’’ турцеты’’. Ламбаха’’на сюрберць сёбар’’ ӈани’ пирдырцеты’’.</div>Саляӈгардаханана’’ яра иры’ нюртей’’ яляха’’на ӈэбта тарась. Вэва нув’’ ӈэсь ӈани яляха’’на ты’’ саполана ирыхана ӈась. Ламбитава’ мэлвахана пирдырман’ харвана’’ ӈокаць. Ӈацекы’’, ӈармбэй’’, илебей’’ ненэця’’ ма’’лыць. Ӈокханда няхар’’ юр’ пир’’ харад’ тер ӈэвысь. Ханяӈы’’ мяд’ терсавэяць. Редакцияна’’ терӈэ ӈани’ ядэрӈаваць. Сянакованзь товы’’ нина’’ падарт’ падыбинаць.Турта’’ ся’ хунат сюрамба пир’’мамдо’ харто’ тасламбидонзь. Сидя сехэры: 500 метр’, 2025 км’ ӈэсонд’ ӈаханзь. Сидна’’ падыбавандо’ сер’ ӈудана’’ терад тамбиць. Сави, ненадумда’’ми’’ падро, значок ня’’маваць. Ядэр’’мани’ сер’ ӈоб’’ ненэй нем’, Виктория Хоролим’ ядабтадамзь. Ханзер’’ тэвманда нямна, ся’ хунат сюрамбаванда нямна хонрамбивась. Пыда тарем’ лаханась:— Тюку яля’ хасава нюни ня ламбита ядэртани’. Мя’’ни тер’’ няць хусувэй по’ турцетыдм’. Тэри тарця мероприятия’’ ӈэва’ нерня манзаяханани си’’ми’ хонрамбасеты’’. Мань пуня’ нидм’ ӈэсету’’. Ламбаха’’на едейковам’ харвобтав. Ханяӈэхэ’’на ныланава’ яляха’’на тюкона ламбиторцетыдм’. Тедари’ нюми нюдя. Ӈарка сехэрэвна нини’ пирдырт’’. Самляӈг юр’’ метр’ ӈэсонд’ сюрамбаӈгуни’. Ненэцяӈг’’ мэ’’манда’’ вадини’’ тарця’’: «Пирдырманда’’ сехэромдо’ сававна сюртемдо’. Мал’ ялява’’ маямба мэкава’’».Сянаковам’ хэтвандо’ сер’ лаханако нями хасава нюнда пумна паромбарка пин’ тарпыць. Маня’’ ӈод’’ тарпынаць. Нюртейӈэ 2025 км’ пяванда’’ нулъядаць. Тад пуна самляӈг юр’’ метран’ едейкованда’’ нито’ пумна хамедыць.Редакцияхадна’’ Ӈанине Яптикы ямб сехэрэн’ сюрамбись. Пыда ва’’лёй сёбар’’ ненэй не. Хусувэй по’ пирдырманзь хан’’ӈа. Тикы серм’ тяхасовна теневада. Сехэрэмда ханзер’’ пирдалевамда хонрамбивась.— Мер’ сюртев. Нерняна ламбитани’’ мандал’ поӈгана миӈадамзь. Сюрамбаб’’, сырада савась. Нумда ӈопой тецярка. Ӈудини’’ ханимяць. Сянимдейӈэ товами ниркав хамэда’’. Мань мале школахана едейкосетыдм’. Нянани ёльце нюрцям’. Олимпиадаха’’на, конкурсха’’на мэвани няю’ ня’’амвы’’ есяха’’нани нюртей ламбини’’ тэмдэйнась. Пыхыдами мэбеламба етри’ едейкованзь ханцетыдм’. Тарця серкана торомбэй’’ нини’’ мание тоходадамзь. Соревнованияха’’на пирдырцетыдм’. Тюку ялями ихинани сававна хая.Тарем’ хардана’’ тер’’ ныланава’ ялямдо’ ӈобанзер’’ пирдырць мэ’’ӈадонзь. Ихинани ӈули’’ саву’’ян: «Маси’’ ӈани’’ похо’’на тамна ӈокамбой’’ ненэця’’ ма’’люрта’’. Нюдо’ сиддо’ мание ӈани’ турта’’».Аватор: Руфина Окотэтто’ падвы

Ламбитава’ яляхана

Сидяӈг: Н. Худи’ тадтавы

<div class="content-lead">Не ӈацекы пин’ тарпота, нё’ сим’ вареката сидя ӈудакохонанда наволпида. Ирмнянда тецьда’ ямбя мят’ хална. Небяда пумнанда ма’’нив:</div>— Пихина мы’’! Нён мят’ тюӈг’’! Яля’ ямбан’ нён нямдана’’. Нид тута’’, ханя’ ханда’’! Мято’ хэвувна ни’’ ханд’’!Нё’ си’ панм’ пихид тан’’ӈада. Яля’ ямбан’ нямданана Саване нида ӈате. Пэвдя ирыхына ӈэдалё сидя ханм’ ханахая нисяда няхар’’ Саване’ некам’ хосаясетыда. Школахана ныланава’ ялэдо’ ӈэсеты’’. Няхар’’ некада тоб’’нандо’ хамбетка тамбасеты’’. Манзеты’’:— Таняна ӈэрм’ сянаковам’, едэй по’ товам’ мэ’’ӈава’’. Яплык тасеты’’ — ёльце ӈавыдота’’ ӈамгэ’’.Саване мат’’ пода. Ӈани похона школан’ ханда, тохолкован’ ӈули’’ харва. Некыда яля’ ямбан’ ӈатейда. Нисяда хонёдаханда ӈэдалавы’’. «Ханяю’ ӈэдалавыкы!?», — ӈацекэця ханяри’ вэдерӈа. Хибяхарт ӈэдалёда яӈгу. Пихина тецярка, сякна сянзибейӈэ со, пэвсюмарида хаи. Саване ӈани мят’ сы’’ӈата, нё’ си паддевы — ни нэӈг’’. Ӈобата’’ нё’ симда нэкалпида. Небяда тёрей’’:— Пихина мы’’! Нид ӈате’’!Саване ярм’ ӈэдабтаван’ харва, лакри’ ӈэдалёдам’ намда. Сеӈга’ мун’’ со’’, маханяю’ сылы’’ — ӈэдалёда’’ миӈа’’. Вэнеко’’ мадарць пэяд’’. Тикахавахад маймба санарць пэй’’: «Мама, такыд’’ то!»Нерняӈы ханхана нисяда миӈа, хэвхананда ёнэй хасава нюда ӈамды. Пумнанди’ ӈарка хасава нюда, сибимдей классахана мэна ӈэдалы. Ӈани похона школам’ малеӈгуда, нисямда нядабадаӈэ хаёда. Ӈэдалёда’’ хахая то’’. Небядо’ пин’ тарпы’’. Не ӈацекэхэв нита нерня сюрамби, мальцянда сеӈгари’ мун’’ со’’. Небяда ма:— Хан’ ӈыл’ нёрва ерев’’! Ханя’ сюрамби! Ӈамгэда ханзер’’ ӈа!Небяда пумнанда сюрамби, варета ня’’мада. Ӈэдалёда’’ нултадо’. Некыда хан’ нид санэйд’’. Саване нита хэвхана санарӈа. Ёнэй некада ӈобанда мюд хамбетка ӈадимде. Няханда ми’’ийда, ядембада ӈоба’ мюня ӈэсь, ӈули’’ няхато’ тадвы’’. Не нянда ибцекад ӈоб’’ладвана мипи.Ӈарка нека ханамда ипра, тыда подеро’’ӈа. Ханото’ тер ня’’амхая мякандо’ пядо’. Ӈацекы’’ мят’ тю’’. Мякна ядемби, мальцидо’ ека’’. Ӈарка нека паданда мюд ӈамгэхэвм’ тюхулӈа. Не няханда миӈада:— Ти! Яплык. Ӈамд’’!Харто’ ва’’ав’ ни’ ӈамдыд’’. Не ӈацекы ӈудахананда сэр’’ ӈарка мандалюй ӈаварм’ ня’’амби. Ӈабтада ханзеркава’’ ӈа. Ӈарка нека ма’’нив’’:— Сякалт’’! Яплыкан’ харванаси’’, ёльце ӈавыдота! Манэт’’.Саване сякалӈада, тавабида. Ёльце ибцяда ӈэвы, нянда си’ мюй ёльце парана. Хоракасавэй’’ ибци. Сэвта хаял’’ харто’ ихиндо’ тяныд’’. Няхар’’ некада ханерцяда нямдо’ мание’’, ёльце письӈа’’. Писяӈгадандо’ ва’’ав’ нина лясэрӈа’’, ӈэсавэй’’ енедарӈа’’, ӈопой сярнадо’. Не нядо’ лукм’ ӈабдамби. Некада покос ӈэвы. Писяндахандо’ сэвто’ хаял’’ лата’ ни’ тэса’’. Пихид небядо’ мят’ тю. Лук’’ям’ не нюхуданда марӈада, сея’ паханд’ мода. Не нюнда сэв’ хаял тэӈа:— Ханзер’’ папакомда’’, някоцямда’’ пэрӈара’’! Сидта’’ сяхаринда манзая’’манда.Хасава нюда нисямдо’ нядаванзь пин’ питаръяда. Не нюхунда ма:— Нисяр яплык тэврась, харт ӈоръид’’, хибяхартан’ нёд мипю’’.Паданда мюд яплыкм’ тюхулӈа, не нюхунда миӈада. Ӈарка нярьяна мандалюй ӈэвы. Ӈабтахавада ё’’якабты. Ӈавыта ёльце сава. Ӈацекы тэри яплыкм’ ӈабдамбида. Харта худ нярмавы’’ — падуда нярьяна яплык’ пир’’. Ӈарка сэвда тэри ялкардарӈа’’. Пуна сяй’’махадандо’ Саване нисяханда ма’’нив’’:‒ Ӈамгэ мараӈгына’’ яплык’’ ӈар’’ ни ӈа’’? Ӈавыдодо’ ӈули’’ сава’’ ӈэӈгу’’! Ӈопой мараӈгахад малеӈгуваць.Ненэся ӈод’’ небянда вадавна нида манзаятаӈэ тарась. Лук’’ям’ тенат нида харвабта’’, ӈабтсавэй’’ тодкабты.Автор: Наца Худи’ падвы

Харад’ ӈуда’ тер’’

<div class="content-lead">Сянакова ялян’ сырманзь товы’’ евэйхана, тамна ӈани’’ ӈавор’’ тэнзахана ӈавламбидонзь, хуркари’’ конкурс’’ ӈаць.</div>Ханюй халэ ӈаябадӈэ ясьпади едтедамзь. Сянакоди’’ поӈгад Виктор Аникевич Худим’ ядабтадамзь, пыда мась:— Пухуцяни ня’ Сюнай-Саляхад тонинзь. Нянани халям’ ясьпава нензел’’, халя ялэхэ’’ ӈаворта ӈаврава’’ ӈэ’’нив’. Теда’ тарця конкурсахана нюртей сянаковами. Есьмы’’ халэни ӈули’’ савамбовна хыдя’ мю’ мэйнинзь. Ӈоди, горчицам’, сэрм’ яӈга хыдякоци’’ мю’ вабтэйнинзь.Тасу’ явхад Павел Яр не мяӈганда Арина Вануйти ня’ товэхэнзь. Пыди’ халямди’ хобамда хаврахая, тодо’’ ютекаха’’ маторкая, хыдя’ мю’ мэвэдинзь. Выӈгана илена’’ ты пэртя’’ тарем’ халям’ сертабасеты’’.Приуральской районхад Марта Ивановна Ӈокэй тарця вади хэтась:— Нисяни ня’ тонинзь. Конкурс’ нямна няхатани’’ намдадамзь. Нисями халям’ сертаба ӈули’’ пир’’ӈада. Пуня’ нись ӈа’’. Есьмы’’ халэни ямб хыдяко’ мю’ мэйнинзь. Пэ’ терӈэ тарем’ ӈаворць тохобэва’’.Ӈамгэ’ пиркана хамедавы ӈаврадо’ хыдя’ мю’ мэ’’хэя тольто’ ни’ ӈабтэйдонзь. Жюри’’ ӈули’’ саваркавна хусувэндо’ сертавы хорпиць. Падродо’ ня’’амба, тасалко ядэрӈаць. Тарем’ таславэдо’: Шурышкарской районхад ӈэда сямянхат ва’’лёйха’ ӈэвэхэ’, Виктор Аникевич пухуцянда ня’ нябимдейха’, Павел Тэтакучавич не мяӈганда ня’ няхаромдэйӈэ тэравэхэюдо’.<div class="content-new-image"><img alt="pic" src="https://storage.yandexcloud.net/ym-sites-static/ec304022-893.webp" style="width:100%" height="545" width="969"/><div class="content-image_child">Сидяӈг: Руфина Окотэтто’ тадтавы</div></div>Нябимдей яляхана халя’ евэй пирембиць. Харад’ тер’’ пирдырӈаць. Тикы нито’ поӈгана «Ямал-ню’’на’’ я!» Ассоциация’ терха’ Владимир Морозов няби Данил Худи мэ’’ӈаханзь. Вадади’ тарцясь:— Теда’ халя’ евэйхана ненэцие ӈавламбаӈгува’’. Пыдо’ сямянхат ӈавыдотам’ тэрабаӈгу’’. Хусувэдо’ евэйто’ тахара’’ми харто’ тасламбидо’. Пиревына’’ хусувэндо’ ӈавыта яӈга.Евэйм’ хорманзь товы’’ ӈокась. Ненэця’’ тодо’’ хибяри’’ пиревы хорпиць. Мал’ сававна ӈаврадо’ пиревыдонзь. Ненадумда’’ми ӈудито’ терӈэ ня’’маць.Ты пэрти’’ сянакова яляхана хуркари тэнз’’ ӈавар’’ ӈаворӈаваць.Автор: Руфина Окотэтто’ падвы

Няръяна Нгэрм

Публикации автора