<div class="content-lead">Каԓпюԓкана диԓина’’ неша’’ специальный’ военный’ операцихина мэна хайму’’ нятапи’’. «Таньше нятакома хома шеԓ» — маньшту Каԓпюԓ чеԓ’’ нена’’. Манԓе ӈука ӈамыку’’ шеԓтаӈаш’’, тай’’ня чикитоӈ СВОхана мэна’’ няхатуӈ ӈайтаптайтоньш. «Харампуровские феечки» — таԓям нятакота’’ пы’татоӈ нимчидятоньш. Культурахана мансԓанна’’, школа — интернатхат мэна’’, Каԓпюԓ администрацина мансԓанна’’, пеншихина мэна’’ — чупей нятаку’’.</div>Ӈопшеԓ ӈупдяӈкня нешаӈ нятакоӈа’’. Каԓтантуӈ чеԓ’’ ӈупчики ши’читуӈ няташту’’. Каԓпюԓ чеԓ’’ ӈайвана нетуӈ нятапёш кукят вешай банки ташту’’, ныдит парафин, кататат (окопные свечи’’) шеԓташататуӈ. Ӈашкиуди’’ шана’кутуӈ ташту’’, тай’’ня чикехетоӈ нетоӈ хятпёчитуӈ пуԓтатутуӈ нянсат мэшту’’.СВОхана мэна’’ хайму’’ нятапёмаӈ дет ӈайта вивӈут Валентина Явид коӈаш. Пы’та нета’’ таньше нятакомантуӈ мэт Каԓпюԓкана ӈомтадяташ. Валентина Алексеевна волонтёрӈэ Гуманитарный Добровольческий Корпусхана мэӈа. Таӈичохона Ростовский’ область няна канӈаш, таньняна СВОхана хайноԓьш дятаԓамы’’ нятапиш. Четаӈ Каԓпюԓкана диԓина’’ неша’’ мансдянтуӈ пут каԓтантуӈ клубан ӈомшту’’. Хайму’’ панэт хайтуԓашту’’, лекԓу’’ мякна мэна’’, дятаԓёй хадям’’ панэт, пуԓтат шеԓташту’’. СВОхана мэна’’ хайму’’ ӈамԓат няню’’ матуԓкадяш касташту’’. Таԓьша’’ ӈамыку’’ хайноԓтахана’’ ӈупчики таԓаӈа’’.Чикиӈ камна кататат — окопные свечи’’ шеԓтапёшту’’. Хадям няна хайноԓта’’ таԓьша кататато’’ такԓаш мэчитуӈ мякнатуӈ мэштутуӈ. Мятуӈ дяԓымтампюмантуӈ камна, кэԓтуӈ мюӈ тавсташтутуӈ. Тай’’ня чикинтуӈ дямохат хынюй паныдётуӈ касташту’’, шайтатуӈ пиԓешту’’. Веша банка’’, картон’ патаԓ, парафин’ — таԓьшахат кататат шеԓташту’’. Хайтуԓана’’ неӈи’’ хайтулаш мэчитуӈ машинкетуӈ тахаԓап ши’читоӈ ДК «Снежный» клубхана мансԓана звукооператор Денис Фомин няташту. Пы’та ӈупчики куԓкаԓи’’ ӈамыдю’’ шеԓтапёш нятакошту.«Харампуровские феечки» манԓе ӈука ӈамыку’’ хайму’’ няӈ ӈайтаптаӈаш’’. Таньше мэма хома шеԓ. СВОхана мэна’’ дянтуӈ чеԓ’’ нятакош ӈайтаптамы’’ ӈамыку’’ няампатоӈ мадяштут. Хаймыхина мэна’’ нена’’ ӈопшеԓ хома шоньшахана нятапётдяна’’, чикехена хома ӈайты. Четаӈ ӈука тэмс неша’’ хадям няна мэӈа’’. Меԓ нэхэԓтаӈа’’, меԓ мяктуӈ туты’’.Андрей Пяк патмы

Хомана нятакоӈа’’

Сидяӈг: В. Окотэтто’ ӈэдабтавы

<div class="content-lead">Нядаӈгардахана мел’’ не’’ ма’’лёвы’’. Ненэцяӈг’’ сэдъидо’ манэ’’лабтамбавы’’. Ненадо яляхандо’ по’ ямбан’ хамековы’’. Сидто’ тидхалембадаӈэ культура’ мякана манзарана’’, «Ямал-нюна’’ я!» ассоциация’ тер’’ таравы’’.</div>Нядаӈгардахана ӈэрм’ ненэцие’’ тэнз мэта’’ ӈока’’. Ӈавнанда Наре’, Ӈыд’, Еръяха’ тер’’. Теда’ ӈарка маркана иле’’. Тарем’ ӈод’’ невхы паӈгодо’ нидо’ юрыбю’’. Неноховавна сейханандо’ харвабтана манзаидо’ пили’’ минрейдо’. Выставкан’ тэвравыдо’ хуркари’’: паны’’, пива’’, имбытад’’, ненэй ӈухуко’’, падко’’, ни’ иня’’, те’’эм’’, тамна ӈани’’.<div class="content-new-image"><img alt="pic" src="https://storage.yandexcloud.net/ym-sites-static/3cd1e47c-889.webp" style="width:100%" height="673" width="1195"/><div class="content-image_child">Сидяӈг: В. Окотэтто’ ӈэдабтавы. Тарця сава серм’ округна’’ соя’’ма’ яля ед’ тидхалевэдо’. Харад’ тер’’ паской сэдъидо’ манэ’’манзь тюӈгавы’’.</div></div>Сэдорана’’ нида «Ямал-нюна’’ я!» ассоцияхана мэна Вера Окотэтто ёльце саву’’яда:— Вэлло Валентина Маткалеевна, Канева Ксения Ивановна, Гребнёва Майя Антиковна сяхаӈгарт’ пуня’ нисеты’’ ӈа’’. Пыдо’ хавнандо’ тамна ӈока мел’’ нева’’ таня. Мал’’ — пэдава’’. Хусувэхэндо’ сейхад миндя вади мэ’’ӈадм’. Выставкан’ сэдъидо’ етри’ тэврамбасетыдо’. Тарем’ Ядне Лаура Анатольевна тюку по’ ӈани’ едэй ной паны, тюсяда’’ лад’ паны, имбытадо сэдвы. Любовь Филиппова нердена мэва’ манзаида ӈадимдембида. Харта сэдъита хавна Елена Тимовеевна Пушкарёва’ паӈгалмы’’ ни манэ’’лабтамбись.Мел’’ не’’ помнандо’ нидо’ мал’’ теневыдо’. Хусувэй по’ ӈобт’ тэворцеты’’. Культура’ мято’ харе’’ мятрев’ мэ’’ӈадо’. Таняна манзарана’’ нидо’ сидто’ ёльце тяхасовна ядабтамбасеты’’. Теда’ ма’’лёвандо’ мальӈгана сёётэй’’ некоця’’ е’’эмнандо’ хыно’’мы’’. Антонина Салиндер, Ольга Антипина, Галина Граблевская тодо’’ тэнз’’ вадавнато’ сёдо’ хайналтамбавы’’.Галина Окотэтто’ падвыСидяӈг: В. Окотэтто’ ӈэдабтавы

Нядэй я’ мадавы’’

Сидяӈг: Т. Сэротэтто’ тадтавы

<div class="content-lead">Санкт-Петербургхана Ямалхад тохолкода’’ Эрмитажан’ падтаӈго, ӈудахана ӈамгэхэвм’ серта ханаць пирӈадо’. Таняна сиддо’ тохоламбада’’ хусувэй ӈамгэхэвм’ ваде’’ӈа’’. Невхы’’ падта’’ма’’, сертавы’’ ӈамгэри’’ — мал’’ лекцияха’’на намдасетыдо’. Тикы’ нямна Оля Худим’ хонрадамзь. Пыда небой поход таня’ ядэрӈа, ваде’’мандада ӈока ӈэвысь.</div>Оля Худи тюку по’ Санкт-Петербургхы Государственной университетхана магистратурахана тохолко пэяць. Тикы’ тяхана А.И. Герцен’ нюмам’ мэта университетхад паӈгадёда Сё’’, театр’’, тарава’ Институтхана тохолкусь. Пыда тарем’ лахана:— Еркы Эрмитаж’ музей’ мякана тохолкоди’’ е’’эмня сава я таня. Школахана, университетхана, колледжахана тохолкодари’’ таня’ ханаць пирӈадо’. Хусувэй ӈамгэн’ тохолку’’. Ямал’ секциян’ хаця’ хан’’ӈадамзь, пуна таняд хаядамзь. 2023 похона сельбя’ няна ӈани’ тодамзь, ӈули’’ таня’ хан’’ман’ харвадамзь. Хусувэй секциян’ пыхыдами падавась. Ӈопой, пыхыдм’ падвари ни ӈа’’, сит харто’ ханда’’, ӈадьбята нюрте’’э’ си’’ми ниць хана’’. Тюку по’, лимбя’ иры’ ельцьӈгана си’’ми харто’ хаӈаць, тамальӈгана ёльце маидамзь. Тарця сава юнм’ намда’’махадани тарана падрони сертэйнась.Нюрте’’э’ то’’махадани’ сейми хаясь, падтаӈго, ӈамгэхэвм’ ӈудахана серта таравы. Тамальӈгана падтаӈго я’’амнисявав’’, ихинани’ тарем’ тасламбивась: «Си’’ми нёя’’ питар’’, падтаӈго я’’маваню’’». Ханяӈэхэна ӈамгэкоцяхав падтамбасетыдм’ — тикыни’’ тянё’’ ӈэдакы’’. Пуна, мале пон’ ядэр’’мадахани’, хамедавась, си’’ми тохолаӈгу’’. Хибяхарт вэнзер’’ нянд ни сырт’’. Сидна’’ тохоламбадава’’ ӈобтарем’ сава не ӈэвы, табекосеты, хусувэй ӈамгэхэна нядаӈгосеты. Нюмда — Наталия Владимировна Круглова.Нюртей’ мань таркад пэ’ хой’ картинам’ сертадамзь. Пуна хамедав, тамальӈгана ими Ямал’ нямна ядэрмы. Мале пон’ таня’ ядэр’’мадахани падтаӈго тухудм’, Эрмитаж’ мюйм’ ӈараханда тохоладм’. Мале сян теневана нями ӈадимя. Сяхаӈгава’ «Хоска’ яля» серм’ пэртяӈэ тарасадма, тамальӈгана ӈули’’ савась. Тикы ями ихинани ёльце харвабтав, ӈадьбяни ӈо’’ магистратуран’ тохолко хэсадама. Нерцюбт’ Салехардан’ илеванзь, манзраванзь хэвандадамзь.Тарем’ Ольга Худи сава ямда ваде’’ӈада. Еркы Эрмитаж’ мяд’ няна Ямалхад ӈэда’’ тохолкода’’ ӈока’’. Тарця’’ лекция’’ сава’’, хусувэй илебей ненэць’ Эрмитажм’ манэць пир’’ӈада. Тамна хибяхав сито’ тотрев’ тохолкован’ харвабцонда ӈадимб’’, нюрте’’э’ пыхыдамда падхая’’, пудана си’’ив яляхана таня’ хэбта тара.Татьяна Сэротэтто’ падвы

Ямал’ тохолкоди’’ сава я

<div class="content-lead">Яханана’’ мяд’ тер’’мана манзарана’’ община’’ ненэця’’ ӈобт’ ма’’люрӈаць. Няръяна маркана хусувэй по’ тарця тохолковамдо’ минресеты’’. Тюку мэвахана Ненэцие’’ округхана ӈэрм’ тер’’ семинаркана мэць.</div>Сидя яля’ ямбан’ Няръяна Маркана нина’’ ивъер’ тоходанаць, илаӈганандо’ тараванда ӈока сер’’ нямна несэй ӈамгэм’ намдаць. Хурка’’ няд’’ми ты пэрма’ серм’ тасламбада’’ ненэця’’ ня’’марпи’’, тикы’ нямна нертей яляхана лаханаць. Тамна я’’ нямна серодо’ таслаць, ты пэрмам’, ханевам’ ваде’’ӈаць. Пенсиято’, ӈани’’ няд’’ми’’ нямна тасалкуць. Харто’ яханандо’ илена’’ ӈэрм тер’’ ил’ нямна вадидо’ таняць.Товы’’ хибяри’’ нябимдей ялядо’ Красной ӈэсыхына ваерась. Пыдо’ «Тэмбойком’» нюбета мел’’мана сэдорана’’ ненэця’’ мят’ тюӈгаць, сэдорана’’ не’’ манзаравам’ манэ’’ӈаць. «Лимбя» общинахана мэна’’ нито’ ня’ хурка нядаӈгосэй ня’’марпавандо’ нямна тасалкуць.Тюку яля’ яханана’’ община’’ танява — ӈарка сер’’. Ӈэсыхына мэна’’ манзаядо’ таня, невхы’’ похот харто’ яханандо’ илена’’ ненэця’’ мюсермы’’ нито’ илам’ тю’’у’ минредо’. Серодо’ сававна мима’’ е’’эмня яханана’’ хуркари’’ няд’’ма’’ таня’’. Ӈопой тарцям’ округна’’ мюй’ политикам’ минрена Департамент тидхалембида. Ненэциена’’ ӈадимдембада’’ грант’’ есявна’’ таранадамдо’ тэмдабасеты’’. Палатка’’, бензопила’’, электрогенератор’’, поӈга’’, тамна ӈани’’ ӈэдакы’’. Ӈани похона округна’’ ерв’ ватовна бензиндамдо’, пядамдо’ тэмдабаӈгу’’.Ваеравы семинаркана Анастасия Засухина мэсь. Пыда сидя юкад’ вата по’’ ямбан’ «Некуця» община’ нермбэртя. Иландо’ нямна тарця’’ вади хэтась:— Варандей’ няна сидя общинава’’ «Яхако» няби «Некуця». Маня’’ халям’ пэрӈава’’. Маркад’ мале ӈахакуна илева’’, ханяӈэхэна тоенана’’ серона’’ тасламба тоенарка. Ил’ нямна нисетыва’’ хусарку’’, серона’’ янамбовна нерня’ миӈа’’. Округна’’ ерв’’ нядаӈгу’’, грант падыбасетыва’’. Теда’ тамна топливом’ тэмдабаӈгува’’. Тюку ма’’лёвахана ӈока таранам’ таслава’’, едэй ӈавэ намдава’’.Пудана яляханандо’ сававна серодо’ нерня’ миндя нидо’ ненадумдаць. Поӈганандо’ Геннадий Канев — «Северное сияние», Павел Талеев — «Вындер», Евдокия Пудкова — «Яхако», Анастасия Засухина — «Некуця» мэвы’’.Ӈарка яна’’ няна ӈэрм’ тер’’ община’’ 2002 поход ӈадиберӈа’’. Ӈокханда — 24 община, 11 — ты пэрӈа’’, 8 — халяда’’, тамна 4 — сэдора’’, мирӈа’’, ӈопойдо’ — ханева’’ серм’ минрена’’.Ю. Талеева’ падвы

Тарця тохолкова – тарана сер’’

Сидяӈг:  Г. Кинчина’ ӈэдабтавы

<div class="content-lead">Никита Александрович Анагуричи — паднана ненэць’. Тарем’ ӈод’’ пыхыдамда ненэйвана паднанаӈэ нида тасламбю’’. Тарця манзаямда сейнда харвабцоӈэ ваде’’ӈада. Хусувэй падвэда илаӈгананда харта хомбавэда, маниевэда.</div>Ӈарка пэвдей иры’ 6 яля’ Нядаӈгарад’ ӈарка толаӈгова’ мяд пан’’ӈась. Харад’ тер’’ паднана няхандо’ товы’’. «Стихия» нюбета книгада ялям’ манэ’’мы.Падвэхэната Еръяха’ тер’’ илам’ невхы’’ похот тюку’’ ялэна’’ ӈэсонд’ ваде’’ӈада. Теда’ едэйвана ӈадимы книгамда толаӈгова’ мякана хось пиртава’’. Хусувэй ненэць’ толаӈгованда сер’ ехэрана мят’ тюнараха ӈэӈгу. Намдувандада ӈока. Ханяӈэхэна тамна хибяхавм’ тумдаӈгу. Тамбирувна илека. Ӈэрм’ яна’’ нямна инда харвабцовна падна. Теневавы нида тензебтембадараха. Толаӈгода ненэцяӈгана лаханакурта то’’олха. Еръяха’ тер’’ нямна вадада ямб.Инзелевы’’ няхата тарця вади мэ’’мы: «Мань соя’’ма ями — пирцяка’’я хой’ нина ӈэда Еръяха харад. 1960 похона яра’ иры’ (февраль) сибимдей яля’ соявэдм’. Тамальӈгана ненэця’’ падродо’ Шугахана сертабавыдо’. Небяюни’, нисяюни’ таня’ сидя яля’ ваера’’махад тэввэхэ’. Ӈадьбята соя’’ма’ падарканани 9 яля пады».Пыда мале юкад вата самляӈг по’ ямбан’ падна. Вадавнанда, ӈобаӈгуна харта хамедавэда: «Нини’’ иле’’ми падарт’ падыбаӈгун. Тэри по’’ тяха’’на иландо’ сарпя ни ёход’’. Тикы’ хавна хадами ёльце ненадо сюдбала ненэцянзь. Нюдя ӈэвани мальӈгана няданда намдавэми толава’ техэ. Нисями ӈобтикы ӈока иле’’ми вадецеты. Маси’’ пыди’ сидти’ пыданакэдм’».Паднаванда мальӈгана сямянхат нюртей инзеленаӈэ, нядаӈгодаӈэ мята тер’’ тарасеты’’. Пухуцяда Нина Ходевна тарем’ тензебтембида:— Ханяӈэхэна падвэмда тола’’махаданда ихинани сяялада нямна лаханасетыдм’: «Хаця несэймдадва. Нёя маяндор’’. Илея». Тикад тамна мани’ илевани’ ямбан’ нядэнари’’ илам’ теневани’. Ӈадьбята ты пэрти’’ нямна паднабта, ӈарка нябакоходани хонаркосеты. Светлана Ходевна Окотэтто хусувэй ӈамгэм’ харакута сер’ табедасеты, нями тидхалесеты. Ӈадьбяни’ ӈадимы книгам’ нянда ӈобтикы ӈэдабтаӈгуни’. Еръяха’ няд сита нядабадаӈэ Александр Захарович Анагуричи тарась. Пыда невхы иле’’ми, сайнорома’ по’ мальӈгы ненэцие мал тенейдась.Иле’’мя’’, стихотворение’’ хавна сидндет падвы сёда таня. Ӈопой сёмда толаӈгова’ мякана намдавэдо’. «Еръяхан’ хэван харвадм’…» нюбе’’ӈа. Хасава нюда Михаил Анагуричи мутры няд’’мяць нисянда падвы вади сёӈэ сертавыда.Ӈарка пэвдей иры’ 21 яля’ пиркана паднана нява’’ Еръяхан’ тэваӈгу. Таняна янда тер’’ ма’’лёда’’. «Падыбавы’’ нини’’ ӈокамбой пелядо’ — соя’’ма’ яни тер’’. Ханяӈы’’ мале яӈгу’’. Маси’’ нюдо’, нюто’ ню’’ тута’’. Теда’ е’’эмнандо’ лаханаӈгудм’. Иринадо’, нисянадо’ ӈобкана сава иӈукана тензебтеӈгуна’’», — тад’’ ӈэванда’’ ялэта нямна тарем’ ибедорӈа.Галина Окотэтто’ падвы

Ӈэрм’ тер’’ нита нямна падна

Сидяӈг’’: Р.Окотэтто’ тадтавы’’

<div class="content-lead">Ӈарка пэвдей ирыхана округна’’ тодо’’ хардахат ӈэда’’ ненэй вадан’ ӈацекы тохоламбада’’ Саляӈгардахана ма’’люрӈаць. Пыдо’ тохолкурманзь товыць.</div>Ненэй ненэця’’, ӈысми’’, хабей’’ вади минрена’’ харто’ вадавнато’ ӈацекы тохоламбава’ курсаха’’на мэвы’’. Тад’’ тикахад вадамдо’ теневана’’ нюдяко ӈацекы школаха’’на тохаламабада’’ ӈани’ тохолковы’’. Ӈоб’’ яля’ ма’’лёваханандо’ маня’’ юндава’’ намда, теневана’’ нина’’ ядабтаванзь, ехэрана ненэцие торомдаванзь ханӈаваць. Самлянзимдей яля’ тохолковадо’ мимысь. Ӈамгэм’ пэрмахандо’ сырӈаваць, инзелеваць. Тохолкова’ серо техэ’’ паӈгахадандо’ тасламбада, ӈэрм’ тер’’ ӈацекы’ пяным’, ила’ саирм’ теневана — Валентина Нёлёковна лаханась. Ненэця’’ вадавна ӈэда’’ книга’’, методичка’’ танявам’ ваде’’ӈась. Ненэй ненэцие’’ ила’ саир’ нямна ваде’’мэда ӈокась. Инзелеб’’, ихиня савась. Некоця Ӈокдэтта вадада интернет’ мутра’ сер’ сертабада’ ӈамгэ’’ нямна ӈась.Урокамдо’ ӈэвадалаваханандо’ Мария Сергеевна Яптикым’ хонрамбидамзь. Пыда тарем’ лаханась:— Мань Саляӈгардахана нюдяко ӈацекы тохоламбадаӈэ тарадм’. Ямальской районхад Пэ Саля хардахад ӈадм’. Ненэй вадами сававна теневав. Мале ӈока’’ ӈацекы тохоламбада’’ тодо’’ хардахат товы’’, тарця серм’ тидхалембава ихиняни ӈули’’ сава. Ӈаромбой’’ няхатани ӈока тарана ӈамгэм’ намдадамзь. Пыдо’ манзаямдо’ саць теневадо’. Тохолковава’’ мале’’мяхадана’’ дипломам’ ня’’маӈгудм’. Сяхаринда школахана ненэй вадам’ тохоламбадаӈэ тара пиртав. Тюку похо’’на хардахана вадёдана’’ ӈацекы’’ вадамдо’ ехэрадо’’.Олег Александрович Лар Салемал’ школахана ненэй вадам’ пэрӈа. Курсаха’’на тохолковамда ваде’’ӈадась:— Теда’ няхаромдэй яля’ ма’’лёвава’’. Мань ихиняни теневобцони’’ ӈокамдаванзь товами сава’ то’’олха. Манзаяханани тараванда’’ хуркари’’ ехэрана’’ ӈамгэ намдадамзь. Интернет’ мутрам’ няд’’мяць гигачатм’, презентациям’ сертабавам’ тохоладамзь. Ӈацекыни’’ тохоламбаба’’ни тарця’’ ӈамгэри’’ тараӈгу’’. Ӈарка нини’’ табеко’’ пили’’ иенеӈгун: «Вадава’’ нёхова’’ юрыбю’’, нерня’ минрехэва’’».Харе’’ вадам’ теневава сямянхат тарана сер’’, ненэця’’ ӈока нито’ поӈгана тэнзадо’ нидо’ ёт’’. Тикы’ нямна школахана ненэй вадан’ ӈацекы тохоламбада’’ ёльце ӈарка таром’ ха’’аврамби’’. Сидто’ няд’’мяць теда’ ненэциена’’ толаӈго, падна пирӈадо’.Руфина Окотэтто’ падвы

Ӈацекы тохоламбада’’ тохолкуць

<div class="content-lead">Хэвы си’’ив яляхана Ямальской район’ ерв Андрей Кугаевский явнанда ӈэдалёрӈась. Пыда ханзер’’ яхананда факторияхана манзаравам’, ненэциета илевам’ вэдепись.</div>Танянанда Панаевск’, Яр-Саля’ няӈы самляӈг факторйм’ манэ’’мысь. Тикыта ирмня ты пэрти ядабтавысь. Нянандо’ лаханакурць тидпой’’ хонрамбавыдась, ханзер’’ лабкаханато’ тэмдормамдо’, тарана ӈавэ танявам’, яӈговам’намдавысь. Теда’ факторияханато’ спутниковой интернетм’ сертаць, тарцям’ няд’’мяць ненэця’’ карточкаханандо’ тэмдорць пирӈа’’. Тарана ӈамгэ’’, бензин’’ факторияхана сяхариндо’ танябато’ серо’’ӈа’’. Районханандо’ сямянхат сава факторияӈэ Тарко-Салям’ нюбета толы. Таняна хусувэй тарана ӈамгэдо’ тас.Тикы’ хавна Андрей Николаевич сайнорта’’ ненэцие’’ мяд’ тер лаханако ня’’мысь. Ӈамгэ’ то’’олха няд’’ми ӈадимдембавамдо’ ваде’’мысь.Юрибей факторияхана мэванда мальӈгана таняна манзарани ӈани’ лаханакурць ня’’мысь. Ханзер’’ манзаравандо’ хавна мале сяӈок хабармамдо’ намдавысь. Таня’ МОП «Ярсалинское» ты’’ хавна община’’, харе’’ илена’’ тыдо’ тэврамби’’.Районханандо’ ненэциедо’ няхар’’ хабарталван’ — Яр-Сален’, Сеяхан’, Юрибеян’ тыдо’ тэврамбидо’. Теда’ мале мат’’ юр’’ самляӈг ю’’ тонна ӈамзам’ ӈыдавыць. Тикахат сидя юр’’ самляӈг ю’’ тоннахад ӈавыдота ӈавар сертаби’’.Тыто’ ӈамзи районханандо’ мирдапавандо’ хавна Москва’, Санкт-Петербург’ няю’ тэмдарамбидо’. Тюку по’ округна’’ ӈэвахы ерв’ ватовна ӈамзам’ миреледонзь, хэвада сава ӈамзам’ — самляӈг юр’’ есявна ня’’марпидо’, нябим’ — сидя юр’’ самляӈг ю’’ есявна тэмдабидо’.Ӈарка пэвдей иры’ 25 яля’ ӈэсонд’ ӈоб’’ ёнар’’ тонна ты’ ӈамзам’ ӈыдаванзь ватора’’.М. Яр’ падвы

Ненэця’’ манзара’’

Сидяӈг: М. Ярой’ тадтавы

<div class="content-lead">Луци’’ яля’ падаркана пова’’ сусана, ӈадьбята тодо’’ яха’’на манзарана’’ ерв’’ по’ ямбан’ ханзер’’ манзара’’мамдо’ ваде’’ӈа’’. Ӈамгэ’ то’’олха ненадо’’ серо ӈадимдевамдо’ няна’’ тэвола’’. Хахаяда яля’ ты пэрти’’, халядани’’ серо тидхалембада департамент’ ӈэвахана мэна Андрей Рубашин вадамда мэ’’ӈась. Пыда округна’’ тиӈгывна ханзер’’ ты пэртя’’, халядана’’ помдо’ мадавамдо’ намдарабтась.</div>Тюку по’ сямянхат ӈока ты’ ӈамзам’ ӈыдаванзь тасламби’’. Няхар’’ ёнаркад вата тет юр’’ самляӈг ю’’ тонна ӈамзам’ ӈыдаӈгу’’. Тикадо’ 20% пирувна небой походанда ӈока. Вадавнандо’ ня’’марпада ӈамзам’ миреле’’махад ӈокавна тым’ ненэця’’ хабарталваха’’ тэврамби’’. Хэвада савам’ — самляӈг юр’’ есявна ня’’марпидо’. Хэвада вэварка — сидя юр’’ самляӈг юр’’мня ханӈа. Ма’’ним’’, хусувэй по’ тыто’ ӈамза’ саӈгом’ ӈокворӈа — 38,2 кг харва. Округханана’’ тарем’ сававна тына’’ лэтравана’’ няю’ ва ӈокамдамби’’. Тюку по’ тамна юкад вата мат’’ едэй вад’’ ӈадимда’’. Тарабата сулорпидо’.Теда’ юкад вата предприятийха’’на ты’ ӈамзахат хуркари’’ ӈавыдота’’ ӈавар сертаби’’. Пудана самляӈг по’’ сер’ тикамдо’ тамна ӈокамдавэдо’. «Ямальские олени» предприятияхана едэй ханибтеӈгосьм’ тэмдавыць. Манзаяханандо’ ёльце тарана няд’’ма ӈэӈгу. Тасу яв’ няна ӈэрё’ едэй цехм’ нэць. Таняна по’ сер’ си’’ив юр’’ тонна ӈамзахад ӈавыдота ӈавар серта пирӈа’’.Халядава’ нямна серона’’ ӈани’ ӈопой яхана ни’’ ну’’. Халям’ пэртя’’ ӈокханда ю’’ ёнар’’ тонна халям’ ватавы’’. Яханана’’ халяхат ӈобтикы ӈавыдота’’ ӈавар сертаби’’, тикы’ е’’эмня хуркари таславы’’ предприятий’’ таня’’. Ӈани похона тамна Новой Уренгойхана, Саляхардахана, Надымхана ӈадимда’’. Халэна’’ округрихинана’’ нидо’ мирдапю’’, ханяӈыдо’ тамна Казахстанан’, Белоруссиян’ ӈэдарамбидо’. Тамна Сербиян’, Узбекистанан’ ӈэдабтамбавандо’ няю’ тарана падро ма’’ламби’’. Тикы’ хавна Роскосмос’ ня’ падродо’ тидхалемби’’. МКСхана космонавтана’’ юкад вата сидя тэнз’’ консервахад ӈаврадамдо’ тэраба пирта’’. Нюрте’’э’ таняна консервына’’ 2022 похона ӈадимяць.Яханана’’ сертабада’’ ӈавыдота’’ ӈавар’’ я’ тиӈгывна тамна сававна теневавандо’ няю’ хуркари’’ фестивальха’’, конкурсха’’ ӈэдалёрӈа’’. Тикыто’ поӈгана хибяри’’ теневабто’ тара, я’ сяр’ ниня’ тарця ӈавормандо’ няю’ ӈэрм’ тер’’ таӈото’, сырито’ немам’ ни’’ мэс’’, таӈгм’ ни’’ хомбю’’.Марина Ярой’ падвы

Ꜧэрм’ тер” таӈото’, сырито’ таӈгм’ ни” хомбю”

Сидяӈг: А. Вануйто’ ӈэдабтавы

<div class="content-lead">Ӈэрм’ терӈэ тэнзана’’ хуркари’’. Толырманана’’ ӈобтикы яӈгава’’. Ханяӈына’’ ӈули’’ тянё’’. Ӈанина’’ ӈокамбоярка’’. Маня’’ мал’’ луци’’ поӈгана илева’’. Янамбовна хар’’на’’ вадина’’ е’’эйӈэ луца вадам’ мэ’’лава’’. Неноховавна хардаха’’на, ӈарка’’ марка’’на иленаӈэ тарцява’’. Ӈацекына’’ харто’ вадамдо’ ехэрадо’.</div>«Ӈамгэм’ вэнзер’ сертабива’’? Ханзер’’ нюна’’ тохолаӈгуна’’», — тэри васар’’ӈава’’. Ихинани ӈока нина’’ тюку’ тотрев’ ибедорпато’, саць вэва серт’ нива’’ ха’’ам’’, иринана’’ ила’ саирм’ тамна нива’’ юраӈгу’’. Тандаярка Санкт-Петербург маркана тарем’ вадамдо’ лэтраван’ харвана’’ ӈобт’ ма’’люрӈаць. Дом национальностей нюбета мякана лаханакурӈаць. Ханяӈыдо’ индо’ ядэрабцо интернет’ мутравна мэ’’эйдонзь. Учёной’’, ӈацекы тохоламбада’’, институтхана’’на тохолкода’’, сёётэй ненэця’’ помнандо’ сава’’ и’’ ӈу хомбиць.Хубта яхана мэнаӈэ няндо’ инзеле ӈобтикы пирӈаваць. Хэвханандо’ мэнадарев’ интернет’ сер’ намдоръянаць. Дальний Восток’ няд Василий Харитонов лаханась. Пыда школахана ӈацекы тохоламби. Урокаханата вадам’ ехэрана’’ нанайской вадавна вахалӈга’’. Харто’ тэнзадо’ — нанаец’’. Сидто’ тохоламбададо’ — луца. Нюдя ӈэдахандо’ нянандо’ манзара. Луца’ вадам’ ехэранадарев’ нянандо’ етри’ нанайской вадавна лаханакурӈа. Тикы’ хавна ӈани’ едэй табеком’ ваде’’ӈась:— Ханяӈэхэна мале ӈармы’’, вадамдо’ теневана’’ ненэцие хомбасетыдм’. Пыдо’ харто’ вадавнандо’ ӈока по’’ ямбан’ нивы’’ лаханакур’’. Тевабцудо’ сёнзито’ мюня хонёдарха’’. Мань ӈопой тарця нями таня. Нанайской вадам’ тохоламбавани мальӈгана етри’ сита хонрамбасетыдм’. Нерде’ луца вадавна табекосеты. Тадри’ ирината вадавна лахана пэй’’. Няданда ёльце ӈока ехэранам’ намдадамзь. Теда’ манзаяханани няд’’маӈэ мэ’’ӈав. Ӈацекыни’’ няданда ӈобтикы тохолкурӈа, тэри ӈобкана мэвана’’ сер’ теневабцудо’ мэйрамби’’, ехэрана’’ вади намдорӈа’’, тикыдо’ ихито’ ха’’морӈа’’.Чукоткахад Лариса Выквыргтыргыргына лаханась:— Нюни’’ ню’’ тет вада’ поӈгана иле’’. Небядо’ луца вадам’ мэ’’ӈа. Нисяханандо’ английскойхана лахана’’. Ӈарка хададо’ эскимосскойм’ тенева. Мань тэнзувнани чукчадм’. Ӈадьбято’ нядни невхы иринани сё намдасеты’’. Сямянхат нюдякоцяхани нюкубц мэцетыдм’. Ханяӈэхэна сянакултамбасетын. Ненадо табекоми ти: «Нядни невхы иринани’’ вадарим’ намдорӈая’’». Ханя саӈговос’’: хэвханана’’ мэна’’ нина’’ луца вадам’ мэс’’ ни’’им’’.«Ханзер’’ хой’ тер’’, харад’ тер’’ вадамдо’ лэтрамбидо’» — тарем’ Сёяха’ няд Меретя Григорьевна Тусида лахарёмда пядась. «Тохоламбада’’ ӈацекыни’’ ӈокамбой пелядо’ — вы’ тер’’. Нисянадо’ — ты пэртя’’. Помнандо’ пили’’ харто’ вадаримдо’ мэ’’ӈа’’.Хаданадо’, иринадо’ хэвханандо’ мэ’’. Нядандо’ невхы’’ сё, лаханако намдорӈа’’. Пыдо’ сидто’ няд’’маӈэ мэцетыва’’. Тараванда мальӈгана нядандо’ хонаркосетыва’’. Хардаха’’на илена’’ нина’’ ненэй вадамдо’ етри’ нидо’ мэс’’. Ӈацекыдо’ тикы’ е’’эмня луца вадаривна лахана’’. Ӈадьбяна’’ школахана тохоламбина’’. Небянадо’ ӈобтикы табедамбина’’. Тоенана манзаява’’ ӈобкана минрева’’.Некоча Степановна Окотэтто инзелена’’ ненэцяӈг’’ «Неко нядаӈгодакоця» проектм’ ӈадимдесь. Нюдя ӈацекы тохоламбада’’ е’’эмня сертавэда. Маси’’ сяхари’ манзаямда книгаӈэ манэтава’’.Ӈэрм’ тер’’ институтхана тохолкода’’ студент’’ нито’ помна хонарковы’’: «Ханзер’’ вадина’’ лэтра пиртына’’?» Ӈоб’’ сер’ таславэдо’: «Хусувэй ненэць’ харта инда сер’ илаӈгананда ваданда таравам’ хамедаванда пуд нерня’ ӈэӈгу. Табекодамда пюрць ӈарка няхата лаханаӈгу».Тарем’ тодо’’ тэнз’’ Россия’ тер’’ харто’ вадито’ лэтрава’ нямна ибедорӈаць.Галина Окотэтто’ падвы

Вадам’ лэтрамбава мяд’ терхат пере

Сидяӈг: dkmns.yanao.ru няд ханавы

<div class="content-lead">Мале танякуй похона Ямалханана’’ ӈэрм’ терӈэ вадина’’ лэтравана’’ е’’эмня саць тарана конкурс ӈадимясь. Харе’’ вадавнандо’ паднани’’ ӈэрм’ тер’’ помна минредо’. Тикахат сямянхат ва’’лёйвана паднанам’ тэраби’’. Нерня’ ха’’амвы’’ ненэця’’ тет ю’’ ёнар’’ есям’ ня’’марпи’’. Премиядо’ юнета’’ невхы’’ иринана’’, паднавы’’ нина’’ Леонид Лапцуй’, Прокопий Салтыков’, Сергей Ириков’ нюмам’ мэ’’ӈа.</div>Хусувэй по’’ округна’’ тиӈгы хардахат ненэця’’ харе’’ вадавнандо’ падвыдо’ ӈэдарамби’’. Конкурсхана мэвандо’ няю’ мале сян’ харада таня. Тикыдо’ нёдабато’ падвыдо’ пирдырман’ ӈэдара пиръядо’. Нюрте’’э’ газетахана, ӈани ӈамгэ падаркана ӈадиберпато’ серо’’ӈа’’. Пунари’ тамна ва’’лёй’’ хибяри’’ ӈока нито’ поӈгад ӈэвахы паднани тэраби’’.Тюку по’ ненэй ненэцяӈгат сидямбойри нява’’ падвыди’ ӈэдаравэхэ’.Ненэй ненэцяӈэ поӈгадана’’ Оксана Казымкина нерня’ ха’’мыць. Пыда Пяко’’ вади харам’ мэ’’ӈа. Падвэда ӈод’’ ӈани’ ваданда хэтыр’’мана ӈэвы.Тарця конкурсм’ округханана’’ хусувэй по’ минре’’. Пыдара’’ ӈод’’ ӈани’ харе’’ вадавнанда’’ падна’’ хорпира’’, ӈобтикы тюку нита’’ тотрев’ пиртара’’.✍ М. Яр’ падвы

Паднабциедо’ па’’мя’’ харраха’’

Сидяӈг: А.Яптик’ тадтавы’’

<div class="content-lead">Хусувэй по’ Саляӈгардан’ харто’ вадидо’ няби ява’’ сававна теневана’’ ӈацекы’’ ма’’люрцеты’’. Носиндалава’ иры’ 26-27 яляха’’на ӈобтикы ӈобт’ тэворӈаць. Ӈани’’ по’’ тотрев’ олимпиадан’ Ямал’ ханярина ӈэда’’ хардахат товэць.</div>Ӈарка’’ классаха’’на тохолкода’’ сиддо’ тохоламбадито’ ня’ «Региональный институт развития образования» нюбета мякана сидя яля’ ямбан’ теневабцудо’ манэ’’лабтамбавы’’. Нюртей яляханандо’ яханана’’ ӈэвы’’ ненадо’’ серо’’ нямна ибедормы’’. Невхы илаӈгана ӈадимы сер’’ теда’ илаӈгана’’ ӈамгэ таром’ ха’’авра’’ма’ нямна лаханавы’’. Пуна манзаидо’ мэ’’махадандо’ И.С. Шемановский’ няби Ю.В. Неёлов’ музейха’ ня’ ядэрмы’’.Тад хуняна пявандадо’ тоенаркась. Невхы ӈаво лэтамбада хардахана манэ’’мы’’ ӈавото’ нямна паднаць, мято’ терха’’, сава няхато’ письмом’ падыбада’’ то’’олхаць. «Родные языки Севера» пирдырмахана мэвы’’ хаби, тасу’ хаби, ненэй вадавна паднаць. «Арктическое краеведение» нюбетахана мэна’’ луца вадарим’ мэ’’ӈаць.Тамна ӈани’ ӈопойхана «Простоквашино» мультфильмхана мэна Матроскин ‘ няби Дядя Фёдор’ вадад падбато’ тарась. Тохолкода ӈацекы сита тохоламбаданда ня’ тикым’ ӈобкана вадепати’ серо’’ӈась. Няндо’ инзелеб’’ ёльце савась, лаханакодо’ тэри хайнаць. Таддикахад викторинадо’, мякы манзаядо’ танявысь, музейхана ӈэда ӈамгэри’ нямна видеом’ хамэдавыць.Пудана яляханандо’ нерня’ хэвыто’ нюбе’’ намдаваць. Яӈга ненадумда’’ми Толька харад’ тер Павел Баякин няби Аксаркахад ӈэда Марина Тайшина ня’’маӈаханзь.«Родные языки Севера» пирдырмахана няхаромдэй ян’ Ӈэдя’ тер Тамара Яр ха’’мыць. Белоярск’ няд товы Алексей Тайбери нябимдеясь. Сямянхат ва’’лёйдо’ Панаевскхана тохолкода — Ольга Яптик. Сиддо’ тохоламбадито’ нюв’’ ти’’: Надежда Хороля, Людмила Потапова, Альбина Хозова, Людмила Вуквутагина, Ольга Пандо. Пыдо’ хавнандо’ пяко’’ я’ тер Фёдор Айваседо поӈганандо’ танясь, сита Ольга Докучаева тэвравысь.«Арктическое краеведение» пирдырмахана Тасу’ яхад ядэрта Джульетта Тэсида няби Пэ’’ няд ӈэда Вера Окотэтто няхаромдэй няби нябимдей ян’ ха’’мыхынзь. Сямянхат ва’’лёй Си’’ив харв’ няна илена — Ева Кузьмина.Олимпиадан’ товы’’ ӈацекы’’ мал’’ варемдо’ мэ’’ӈаць, хусувэйдо’ харта пирувнанда пэдавась, ва’’лёясь. Сиддо’ тохоламбадидо’ ӈацекыдо’ тид’’ хамэдавандо’ няю’ ӈока сава вадам’ намдаць. Пирдырмахана мэвы’’ ненэця’’ ӈэрм тер’’ серо тасламбада департаментхад, «Ямал-ню’’на’’ я!» ассоциацияхад, тамна ӈанихит мядонзэй ня’’маць.А. Хорэли’ падвы

Вадам’ нерня’ минреванда’’

<div class="content-lead">Хусувэй по’ округна’’ соя’’ма яля’ няю’ ӈоб’’ ненадо серм’ минресеты’’. Тюку’ по’ ӈод’’ ӈани’ тарем’ сертадонзь. Тикава’’ — мирдаӈгурти’’ ярмарка ӈэсеты. Маня’’ ӈод’’ ӈани’ таня’ тэворӈаваць, тарця ӈавэ манэ’’ӈаваць, намдаваць.</div>Сидя сава не мирдаӈгурти’’ помна ниди’ ня’’амба ядӈаха’. Пыди’ помнанди’ ненэй вадавна лаханакурӈаха’. Тюкоховаюни’ ваданди’ харавна Тасу яв’ терӈэ таслаӈахаюн.— Ӈамгэдамди’ пюди’? — хонраӈахаюн.— Ӈамзадами’ пюни’. Тюку по’ тюкона ӈэрм’ тер’’ тянё ӈэвы’’. Сава ӈамзам’ мирдападам’ нини’ манэс’’. Халяхав ӈобтикы хамзана ӈэ’’нив’’. Ӈодя’’, тамна ӈани’ ӈэрм’ терха’’на таросяда ӈамгэхэв’’ ӈока ӈэвы’’, — нябиюм не манма.<div class="content-new-image"><img alt="pic" src="https://storage.yandexcloud.net/ym-sites-static/58d365e8-9aa.webp" style="width:100%" height="1440" width="2558"/><div class="content-image_child">Сидяӈг: М. Ярой’ тадтавы</div></div>Ненэсяри ярмаркахана тёр’’ я’’авлыць, сянакурта’’ ӈацекы’’ сянакуць, мирдаӈгурта’’ ненэця хардакуто’ мюд ядувнандо’ хантадамдо’ ӈатець. Ненэцяӈгав ӈокась, нито’ пуд мюддарев’ вэрнаць. Мань нини’’ помна ядэртахани буркы мирдапади’’ нимня ӈадимядамзь. Пыди’ Воркута’ няд товэхэ’ ӈэвэхэ’. Вылка Петр ненэй ненэця’ ӈэвами хамеда, харта вахалъй’’:— Нумда тецьхамя, буркадар тэмда’’, ӈэд ибета’’. Мани’ хусувэй по’ ярмаркаханда’’ турцетыни’, тюку по’ сэр’’ буркари тэвранинзь. Ӈопой пива мирця — сидя ю’’ самляӈг ёнар’’ еся, теда’ ханярина пенар саць мирерӈа, ӈылда тарава — ӈадьбята техэ яхананда саць миреӈа. Сидя яля’ ӈоб’’, сидям’ мирдатани’.Ланакурмани’ сер’ сидя сэр’’ буркам’ серадм’, ханяӈыдо’ нелкахана тыярка’’ ӈэвы’’, ӈанид нюдяри’’. Тикыта поӈгана тапочка’’ ӈани’ танявы’’. Тарем’ лаханакуртахана’’ сидя нехэв хонаркованззь нултади’. Нини’’ неры яханандо’ хаи’’.<div class="content-new-image"><img alt="pic" src="https://storage.yandexcloud.net/ym-sites-static/73b1a650-3a2.webp" style="width:100%" height="1440" width="2558"/><div class="content-image_child">Сидяӈг: М. Ярой’ тадтавы</div></div>Тикы няхавами’ — Людмила Талеева хусувэй по’ маниесетыв. Ярмарка ӈэдарамбадада ни ӈа’’. Тюку по’ юр’ мян’ тапочкида толянда ни’ ӈани’ ӈухукодрев’ ӈабтавыда. Хабт’ хобахад сэдвы’’ ӈэраха’’, таредо’ ханяӈы яхана пидвы’’. Хэвувнанда ненэця’’ тэри ни’’ ханас’’, ядханда нултаӈгабато’ манэ’’саръядо’, хонрамбидо’, ханяӈы тамна тэмдабидо’. Луцаха’’на тэри мэядавы’’ хобахарт таравы’’, ӈани’ манэ’’саръядо’.Сидндет потна Ярослав небянда ня тэри сянакованзь товэхэ’. Пыди’ нянанди’ хадамди’ тэвравэхэ’. Тарем’ няхарӈэ нито’ пумна мирдаӈгурти’’ помна яда’’. Пыдо’ ханя ми’’мамдо’ тенева’’, ӈадьбято’ ӈацекы’’ сянакулван’ паромбарка ензидо’ моёпи’’.Округна’’ соя’’ма’ ялян’ ярмаркам’ сидя яля’ сер’ тамна ӈока ненэця’’ манэ’’ӈадонзь. Ханяӈыдо’ маси’’ торомдавы’’ ненэй ненэцие няхатана’’ буркы, тапочка тэмдаӈгу’’. Ӈанидо’ сялато’ ӈылна мэядавы хоб лискуць ханаӈгу’’.М.Ярой’ падвы

Ямал’ соя’’ма’ ялян’

Сидяӈг: vk_ugai няд ханавы

<div class="content-lead">Тасу’ я’ нямна мюсерта сидя мяд’ терха’ «чумовой капитал» няд’’мам’ ня’’амвэхэ’. Тарця нядаӈгосэй хой’ няна нянандо’ саць тара. Тандая’ мяд’ терӈэ хэвы’’ ненэця’’ ӈу, хан, ея ня’’мавы’’.</div>Максим няби Дарья Тэсидаха’ няхар’’ ӈацекым’ вадабихи’, «СПК Тазовский» предприятийхана манзараӈаха’, Хальмер’’ Седе’’э’ вымна мюсерӈаха’. Мэча няби Хыну Яндохо’ ӈэсыхына нихи’ мы’’, пыди’ Ӈэдя’ выӈгана илеӈаха’, тет нюм’ пэрӈаха’.Ты пэрти’’ ед’ Ямалханана’’ 2021 похона округна’’ ӈэвахана мэна ервана’’ ватовна ненадо няд’’ма ӈадимясь. Теда’ ӈокханда тарцям’ 310 мяд’ тер’’ ня’’амвы’’: Ямальской районхана — 137, Пяко’’ яхана — 55, Пэ’’ няна — 52, Тасу’ яхана — 42, Нядэй’ я’ няна — 15, хаби’’ яхана — 7, Саляӈгардахана — 2. Ӈани похона 135 нядаӈгосэйм’ миць тасламби’’.«Та’ Дмитрий Артюхов Вануйто’’ мят’ тэворӈась. Тамальӈгана тасалковам’ мэ’’ӈаваць. Тад нерня’ лимбя’ иры’ 2025 поход сидя ӈацекым’ ховы’’ ӈобтикы мяд’ ӈамгэри ня’’ма пирта’’. Тамна ӈокарка’’ ненэця’’ няд’’мам’ ня’’марпаӈгу’’. Тэхэ’’на мэ’’на’’ нина’’ сенз’’ ӈэя’’, сававна илея’’, мядото’ мюй’’ ибе’’ӈая’’, мяка’’нато’ ӈацекыто’ письри’’ соя’’», — Тасу’ я’ серо минрена ерв Виктор Югай тарем’ лаханавы.Таддикахад ӈани’ ӈамгэда сава ӈэбта? Ненэся сэдоранаӈэ, миртаӈэ ӈэрм’ тер’’, выӈгы илам’ теневана’’, общинаха’’на мэна’’, харто’ индо’ сер’ манзарана’’ ненэця’’ тара’’. Ямална’’ тер’’ недбядамдо’, есядамдо’ нэкалць пирӈа’’.Автор: Анна Яптик’ падвы

Мюсерта нядаби’’

Сидяӈг: А. Ткачёв’ тадтавы

<div class="content-lead">Саляӈгардахана ӈэвы «Российский Север»м’ нюбета форумхана няхар’’ яля’ ямбан’ теневабцодо’ няхато’ ваде’’ӈаць, ембдяродо’ манэ’’лабтамбиць. Няхатато’ тохолкуць. Тикы’ хавна ява’’ лэтрамбада’’ нина’’ нидонзь юрыбю’’. Таняна мэвы’’ мяк’’ турӈаць. Манэ’’мыдо’, ӈамгэм’ пэро’’мамдо’ ваде’’ӈаць.</div>Марканана’’ хуркари’’ нядаӈгосэй таняна мэна’’ нина’’ е’’эмня сертаби’’. Тарем’ нядаӈгомидо’ тохолковаӈэ ӈадимдембидонзь. Илебей’’ ненэця’’ сэдораць, лыӈгаӈэ мэ’’манда’’ поӈг тохоцяха’’на сяропиць, лекарабтаӈговам’ ӈадимдембиць, тухуни манэ’’сарӈаць, хоб мэядамбадаха’’ сырӈаць.Мань ты’ хоба’’ мэядамбавам’ манэ’’лабтамбидамзь. Ӈамгэхэна сайнорта’’ няханана’’ таравамдо’ ваде’’ӈадамзь. Ява’’ лэтрамбадина’’ ты’’ хоб’’ ӈули’’ саву’’ядо’. Мяцяда яхана мэбато’ юдертандо’, пэӈадандо’, лыӈгадандо’, хутыто’ ӈылӈэ мэ’’эйдо’. Тецьда, са’’нюй я’’ ниня ни’’ хонёд’’. Тиртя’’ беспилотникха’’на, тепловизорха’’на хоба’ ӈылна мэна ненэць’ ни ӈадю’’. Вадини’’ пуд надорман’ харвана ӈокась. Хусувэдо’ хонаркусь, хаця’’ мэятаць. Мэятабця’’, надорця’’ нямна, хобам’ сяӈок яля’ мэядамбавам’ хонрамбиць.Тарем’ манзаравами’ нянани ӈули’’ савась. Хуркари’’ тэнз’’ ненэцие торомдадамзь. Пыдо’ харто’ ёто’ нямна лаханакурӈаць. Ӈавхы иринато’ минревы ила’ саирм’ нидо’ юрыбю’’.Руфина Окотэтто’ падвы

Мэятавам’ тохоламбавы’’

<div class="content-lead">Сяхаринда нянани сямянхат ненадо сер’’ — вадам’ нерня’ минрева. Яӈга «Россевер. Родные языки» трек танясь. Тарцям’ тэравы’’ вадам’ ханзер’’ лэтра пир’’ма’ нямна ибедорӈаць. Хэвувнандо’ ядэрмани сер’ ханярид тодо’’ тэнз’’ вабц намдорӈадамзь. Няхар’’ лаханакода ненэцям’ манэ’’ӈадамзь. Ӈопойдо’ хаби вадам’ мэ’’ӈа, нябихи’ ненэй няби китайской вадавна лаханаӈаха’. Харто’ вадавнандо’ сармик’’, тамна ӈани’’ ӈаво’’ нюбе хэтыбиць, ими майбтамбиць.</div>Форум’ ӈэва’ ямбан’ ехэрана’’ вада’’ ханярид соць. Сё мэта’’ таняць, тарана’’, стихотворения вадета’’ ӈэдакы’’. «Пушкинские чтения» нюбета пирдырма ӈась. Я’ сяр’ нимня юнета паднана ненэця’ падвы туӈгос’’, ненэй ненэця’’ харто’ вадавнандо’ ваде’’ядонзь. Сидя не ӈацекэхэ’ нерня’ хаяханзь, ӈуда’ терм’ ня’’амӈаханзь, пыди’ Москван’ ӈэдалёртӈаха’.Таддикахад МТС’ манзаям’ торомдаваць, тикым’ няна’’ Ольга Юркова ваде’’ӈадась. Пыда’ тарем’ мась: «Теда’ ханяӈы’’ вада’’ юхурӈа’’. Маня’’ «цифровой технология», «искусственной интеллект», «нейросеть» няд’’мяць вади лэтрамбива’’. Едэй мутратна’’ ӈаво ӈацекы’’, илебей’’ ненэця’’ харвабтэйдо’. Ӈамгэри тикым’ ӈадимдембабана’’ невхы, те’’ны, ӈэванда илма’’ тасламбабана’’ серо’’ӈа».Илна’’ саир’’ вадахадана’’ пере, вадава’’ ёхода, маня’’ ӈобтикы яӈгодава’’. Теда’ вадёданана’’, тю’’у’ минда’’ тикым’ хамэдамбидо’.Анна Яптик’ падвы

Харто’ вадидо’ мэ’’ӈа’’

<div class="content-lead">Илебей’’ ненэця’’ тохолко мале’’мяхадандо’ сёбар’’ ненэцие’’ мэлван’ ма’’лыць. Таняна Мирон Сэротэтто «Лучный бой» нюбета проектамда ваде’’ӈась. Ханзер’’ сянако таравам’ манэ’’лабтамбись. Тикан’ ма’’лёвы’’ ӈули’’ сававна инзелець, сырӈаць.</div>Нюрте’’э’ сянакованда’’ ханзер’’ муӈгам’, ӈынм’ ня’’амбавам’, ся’’ хунат енерць таравам’ тохоламбиць. Ӈынм’ мэць ехэрана’’ тэри пысаӈгаць. Сянакован’ харвана’’ ӈокаць.Тад пуна ӈарка лохо’ мюня сидя командаха’’на самляӈгаӈэ ӈынторӈаць. Малдо’ нюлак сеӈг’’на тебдевы муӈгаха’’на нидо’ ядпиць. Хаёвы’’ команда’ тер’’ тамна’ тяха’ сянакуць. Варемдо’ мэць пон тарем’ пирдырӈаць. Няхатато’ пэдава’’ ненандумда’’ми ня’’маць. Сянаковы Владимир Тусида енерма’ нямна тарем лаханась:— Маня’’ командава’’ нюртей ям’ хана. Теда’ ненадумда’’ми ня’’маваць. Нини’’ ӈынам’ мэць торомбэй’’ ӈэвы’’. Тикы’ сер’ нерняна хаява’’. Мань ӈод’’ ӈынм’ мэць теневадм’. Ӈадьбяни паромбарка сюрберӈадамзь. Няби няюна сянакоди сянамбой’’ ядъянась. Тюку сянакубц ӈули’’ нюрцямзь. Мирон сававна таславэда. Пунарка нянда, пирдырмы’’ няха’’ни сава вади вадетадм’.Сянакурта’’ хавна ханяӈыдо’’ ГТО’ нормативдо’ мипаванзь хан’’мыць. Таняна ныхыдо’ хорпавы’’.Руфина Окотэтто’ падвы

Ӈынхана енермы’’

Сидяӈг: yam.yanao.ru няд ханавы

<div class="content-lead">Россия яна’’ ӈардавна хусувэй ӈарка маркана, нюдя хардахана ӈацекы’’ тохолковандо’ хавна урокато’ пуд ихинандо’ харвабтана серодо’ тидхалемби’’. Тикы серканато’ небянадо’, нисянадо’ нядаӈгосеты’’. Ӈани’ ӈобт’ ма’’люрцеты’’. Тандая’ тарем’ нядаӈгода’’ мято’ тер’’ нерня’ тидхалембада серодо’ падарт’ падхая’’ яӈга таславы пирдырман’ ӈэдабтамбавыдо’. Сямянхат илека’’ манзаито’ е’’эмня еся няд’’мам’ ваторпавы’’.</div>Тарця сава пирдырмам’ «Знание» нюбета общество сертавэда. Тарем’ яля’ няю’ ӈэда’’ серо’’ е’’эмня 200 родительской комитет’’ есядамдо’ ня’’маӈгу’’. Тикы’’ — 78 ё’’ тер’’. Ямалхад сидя школава’’ нерня’ еремы’’. Ӈопой — Сёяха’ няби Тарко-Сале’ 2-й школа.Сёяха’ тер’’ 500 ёнар’’ есям’ мэта’’. Тикыдо’ «Мирти’’ мяд’ тер» проектханандо’ таром’ ха’’авраӈгу’’. Московской областьхана ӈэда Е.М. Примаков’ нюмам’ мэта гимназияхана ӈока проектм’ толабавы’’. Жюри’ вадавна, Сёяха’ школахана ӈацекы’’ небянадо’, нисянадо’ няць невхы иринато’ теневавы манзаи тохоламбаӈгу’’. Не ӈацекы’’ мяд’ мюй серо минре тоходанаӈгу’’, сэдораӈгу’’, парколаӈгу’’. Хасава ӈацекы’’ нисянато’ манзаи торомдамбаӈгу’’.Тарко-Сале’ школахана «Вместе с папой мы дружны, вместе с папой мы сильны!» проектандо’ няю’ 1 миллион есям’ недвомы’’. Пыдо’ хуркари’’ сянакубц мэ’’манзь тасламби’’. Ня’’амвы есьдо’ тэмдорць мэтыдо’, пуна сянаковандо’ сер’ пыхыдадо’ мэйрамбаӈгу’’, ныхыдо’ ӈокамдамбаӈгу’’.Автор: Г. Окотэтто’ падвы

Ӈарка ненадумда’’ми ня’’амвы’’

Сидяӈг: А.Ткачев’ тадтавы

<div class="content-lead">Носиндалава’ иры’ 20-23 яляха’’на Саляӈгардахана ненадо сер’’ миӈась, «Российский Север» ӈась. Маня’’ редакцияна’’ терӈэ мал’’ танямна ядэрӈаваць. Ӈамгэм’ манэцава’’, намдасава’’ нянда’’ вадетына’’.</div>Форуман’ товы’’ ненадовна округна’’ ӈэвахана мэна ерван’ маймбиць, сертавы’’ манзаидо’ нянда ваде’’ӈаць. Илебей ненэця’’ вадам’ лэтрамба, туризм серм’ нерня’ минре, ӈэрм’ тер’’ мэта’’ ембдяро манэ’’лабтамба, невхы паӈгадо’ нёдани’’ ила’ саир’’ нямна лахана таравам’ хэтаць. Тет яля’ ямбан’ едэй проект ӈадимдевэхэ’’ хуркари’’ серо ня’’амбада’’ ерв’’ инзелеванзь товыць.Ӈобт’ ма’’лёвы’’ ненэцяӈг’’ Ямална’’ ерв Дмитрий Артюхов тарця вади мэ’’ӈась:— Тюку по’ ӈэрм’ тер’’ мале юдимдей ма’’лёвадо’. Таӈок’’ по’’ ямбан’ яля’ ня’ ӈэда’’, харто’ невхы иламдо’ нёдана’’ ма’’люрӈа’’. Пыдо’ нерняри’ ӈа’’, ява’’ мэбемламби’’, тодо’’ яхана илени ӈоб’’ няю’ нятламби’’.Нерня «Россевер. Туризм» нюбетаха’’на лаханаць. Пыдо’ проектадо’ мядоманзь турти’’, хуркари ё манэсарта’’ ед’ ӈа. Ты пэрти’’ мяк’’ мядонди ядэлаван’, тецьда’’ яха’’на ӈэда хардо манэ’’лабтамбаван’ харва’’. Пудандо’ вадито’ тэнз лэтрамбада’’ вахалъядаць. Карточка, ненэй вадавна ӈэда «мафия» сянакубцм’, разговорник сертавы’’. Ембдяро тасламбада’’ ялэхэ’’ мэта ӈамгэри сэдыбаӈгу’’. Тикыдо’ мадавэсавэй’’, падтавы’’ ӈэӈгу’’. Интернет’ мутрам’ мэць ва’’лёй’’ ВК-клип харто’ вадито’ нямна тадтамбаӈгу’’. «Россевер. Сообщество»‘ тер’’ «ProРоссевер» юне тэволана платформам’ сертаӈгу’’.Хусувэй лаханавы ненэця’ вада’’ тид’’ ха’’морӈаць, таром’ яхандо’ тэвраван’ харвавадо’ ӈадись. Няндо’ сырта’’, инзелена’’ сава иӈудо’ намдаць.Анна Яптик’ падвы

Хусувэйдо’ пир’’ӈада

Сидяӈг: С. Зубков’ тадтавы

<div class="content-lead">Тюку пона’’ ваераварида хаи. Округна’’ марка’’на, нюдяко хардаха’’на илена’’ едэй пом’ ядабтаванзь хамеку’’. Саляӈгардахана салабахад хуркари’’ ӈамгэри сертаба пя’’.</div>Марад’’ поӈгы паской ӈамгэхэ’’на падтамбидо’. Харад’’ хэван’ хуркари’’ тэнз’’ тута ялякохо’’на, сянакохо’’на масеротавы’’ хады палпи’’. «Геолог»м’ нюбета харад’ хэван’ ер’’мы’’ салаби’’ ютеро тэвравыць. Тикыдо’ скульптураӈэ паркорпидо’. Ӈацекы’’ едэйкосянд, сянакулвад ӈани’ сертаӈгу’’. Тад пуна тикы мэлвам’ тодо’’ тэнз’’ ялякоцяха’’на ялэмдаӈгудо’, ӈарка’’я падтавы хадым’ палта’’.Саляӈгардана’’ тер’’ едэй по’ хэбидя ялям’ ӈатилта’’. Неноховавна ӈацекы’’ саць ӈатедо’’.Округна’’ марад’’ нямна, нюдяко харда’’мана Ямал Ирива’’ ӈэдалёрта. Носиндалава’ иры’ сидя ю’’ няхаромдэй яляхана Горнокнязевск хардахана резиденциямда нэвэда. Ханямна ӈэдалёро’’мамда ваде’’мэда. Таняна илена’’ ненэця’’ маркад товы’’ мядондидо’ няць сянаковы’’, концертан’ сырмы’’, хыно’’мы’’. Ненэй мядо’’ мюня нюто’ ня’ мел’’ ӈамгэри сертабавы’’. Тэсавэй ханхана ӈацекы ӈэдалёлтамбавы’’.Ӈопой не таня’ хансо’’манда нямна тарем’ лаханась:— Не нюни ня’ ныланава’ яляхана Горнокнязевскан’ хан’’ӈанинзь. Нюми Ирим’ манэ’’ман’ харвась. Тедахав ӈули’’ маямбись. Мядонзэйкодамда миӈаць. Ты’’ ханхана ӈэдалёро’’мамда тамна тенеда. Сита ӈар’’ нита ня’ сянакуць. Хадыця’ хэвхана хыно’’ӈаць. Едэй по’ хэбидя яля’ товарида хаёнив’’. Хардана’’ поӈгы ялэмдамбидо’, мале хамедамбидо’.Нюртейӈэ Надымской район’ нямна Ирива’’ ӈэдалёрта. Пыда вэде’’манда хардада ӈока. Ӈокханда сидя ю’’ сидя хардо’’ нямна ядэрта. Тохолкода’’, нюдяко ӈацекы’’ ӈуда’ терад минре.Автор: Руфина Окотэтто’ падвыСидяӈг: С. Зубков’ тадтавы

Едэй пон’ хамеку’’

<div class="content-lead">Носиндалава’ иры’ пудана яля’ пиркана Саля яв’ салаба’ нимня Пэ’’ хой’’ няд нердена мюд’’ ӈадимзеты’’. Пыдо’ — Пэ’ тер’’, хусувэй по’ явм’ салаба’ нимня маторпидо’. Янамбовна нито’ пуд сыв’ мэлвахато’ миӈа’’. Няби ня’ тэв’’махадандо’ таминдо’ помнандо’ тэраӈгурӈа’’.</div>Хэвы си’’ив яляхана Харсаим харад’ ядхана нердена’’ мюд’’ ӈадимяць. Ханзер’’ мюсермандо’ нямна серо теневана ненэцям’ лаханако ня’’ӈадамзь. Пыда теда’ ерв ӈэбата ӈод’’ ӈахат вымна мюсерӈась. Явм’ матопава нянанда ехэрана сер’’ ни ӈа’’. Лаханако нями Приуральской районхана, ӈэрм’ тер’’ серо тидхалембада отдел’ ӈэвахана мэна Юрий Вячеславович Лаптандер. Ханзер’’ яв’ тяха’ янда тер’’ мюсевам’ ваде’’ӈась:— Маня’’ яна’’ тер’’ илева’ ямбан’ тарем’ мюсерӈа’’. Сяхаринда тэри ханамаси’’ хибяхарт’’ яв’ тяха’ нида пяӈгу’’. Пили’’ нюрте’’э’ ненэциена’’ нум’ хурка ӈэвам’ тасламби’’. Вэва нумгана, синёхона, хадхана пыдо’ ни’’ ямданасету’’. Сава нумгана ямданаб’’нандо’ яля’ ӈэдаханда манзадаӈга’’. Небо’ ялян’ яноларавы’’, ӈоб’’ ӈэсы’ тер’’ сидндет ю’’ тэдо’ леввыць. Та’ мальӈгана пэвсюмзь, салтаӈэ пэраць сехэрэхэдандо’ хэвня’ пявэдо’, тыдо’ ихилт’ пакал’’мыдаць, ӈадьбято’ мюсена’’ етри’ яля’ ерь ирилемби’’. Ненэйвана нерденаӈэ яван’ ха’’амвэхэна тосакабты, мале няндо’ пумна мюсевандахав’’ таӈгасеты’’. Сяхаринда ненэця’ тэри нув’ ед’ салабан’ тыда нида ха’’авраӈгу’’. Пили’’ нердена ваць сехэрэмда таслаӈгуда, сава ӈэб’’нанда тикарихина мюселтыд’’. Сяни’’ по’’ ямбан’ салабанда хурка ӈэвам’ ӈани’ тасламбидо’. Ханяӈы’’ мяд’ тер’’ невхыто’ тотрев’ тэхэ’’на ни’’ мюсе’’, мюдадо’ мерета’’ еся’ ханото’ пуд солабидо’. Тарем’ лаха миндя’’ ты’’ тэри танетаӈгу’’. Нердена’’ ненэця’’ салаба’ нимня мюсе хэ’’мяхавахад пумнандо’ миндя нидо’ таӈга явм’ мадабасетыдо’.Пэ’’ тер’’ явм’ мада’’махад нердена тыдо’ Салехардахад вэӈгалёда талбэй сехэры’ хэван’ ӈадимя’’. Тосавандо’ нямна мюсерта’’ ненэцие хонрамбидо’. Тикы’ нямна ӈани’ лаха паднаӈгува’’.М. Ярой’ падвы

Няръяна Нгэрм

Публикации автора