Няръяна Ӈэрм
Ӈавыдота ӈавар’’
Сянакова ялян’ сырманзь товы’’ евэйхана, тамна ӈани’’ ӈавор’’ тэнзахана ӈавламбидонзь, хуркари’’ конкурс’’ ӈаць.
Время для чтения ~ 2 минуты
Ханюй халэ ӈаябадӈэ ясьпади едтедамзь. Сянакоди’’ поӈгад Виктор Аникевич Худим’ ядабтадамзь, пыда мась:
— Пухуцяни ня’ Сюнай-Саляхад тонинзь. Нянани халям’ ясьпава нензел’’, халя ялэхэ’’ ӈаворта ӈаврава’’ ӈэ’’нив’. Теда’ тарця конкурсахана нюртей сянаковами. Есьмы’’ халэни ӈули’’ савамбовна хыдя’ мю’ мэйнинзь. Ӈоди, горчицам’, сэрм’ яӈга хыдякоци’’ мю’ вабтэйнинзь.
Тасу’ явхад Павел Яр не мяӈганда Арина Вануйти ня’ товэхэнзь. Пыди’ халямди’ хобамда хаврахая, тодо’’ ютекаха’’ маторкая, хыдя’ мю’ мэвэдинзь. Выӈгана илена’’ ты пэртя’’ тарем’ халям’ сертабасеты’’.
Приуральской районхад Марта Ивановна Ӈокэй тарця вади хэтась:
— Нисяни ня’ тонинзь. Конкурс’ нямна няхатани’’ намдадамзь. Нисями халям’ сертаба ӈули’’ пир’’ӈада. Пуня’ нись ӈа’’. Есьмы’’ халэни ямб хыдяко’ мю’ мэйнинзь. Пэ’ терӈэ тарем’ ӈаворць тохобэва’’.
Ӈамгэ’ пиркана хамедавы ӈаврадо’ хыдя’ мю’ мэ’’хэя тольто’ ни’ ӈабтэйдонзь. Жюри’’ ӈули’’ саваркавна хусувэндо’ сертавы хорпиць. Падродо’ ня’’амба, тасалко ядэрӈаць. Тарем’ таславэдо’: Шурышкарской районхад ӈэда сямянхат ва’’лёйха’ ӈэвэхэ’, Виктор Аникевич пухуцянда ня’ нябимдейха’, Павел Тэтакучавич не мяӈганда ня’ няхаромдэйӈэ тэравэхэюдо’.
Нябимдей яляхана халя’ евэй пирембиць. Харад’ тер’’ пирдырӈаць. Тикы нито’ поӈгана «Ямал-ню’’на’’ я!» Ассоциация’ терха’ Владимир Морозов няби Данил Худи мэ’’ӈаханзь. Вадади’ тарцясь:
— Теда’ халя’ евэйхана ненэцие ӈавламбаӈгува’’. Пыдо’ сямянхат ӈавыдотам’ тэрабаӈгу’’. Хусувэдо’ евэйто’ тахара’’ми харто’ тасламбидо’. Пиревына’’ хусувэндо’ ӈавыта яӈга.
Евэйм’ хорманзь товы’’ ӈокась. Ненэця’’ тодо’’ хибяри’’ пиревы хорпиць. Мал’ сававна ӈаврадо’ пиревыдонзь. Ненадумда’’ми ӈудито’ терӈэ ня’’маць.
Ты пэрти’’ сянакова яляхана хуркари тэнз’’ ӈавар’’ ӈаворӈаваць.
Автор: Руфина Окотэтто’ падвы
Авторы
Няръяна Нгэрм
Темы