Няръяна Ӈэрм
Харти’ мяти’ мяраӈгуху’
Тасу я’ вымна мюсерта мяд’ терха’ Степан Тэсида няби Венера Яр ненадо нядаӈгосэйм’, «чумовой капитал»м’ ня’’амӈаханзь. Пыди’ сидя ӈацекэмди’ вадабихи’. Ӈаркаюм’ хасава нюнди’ сидяхад вата пода. Нюдяюмди’ тандая’ лимбя’ ирыхына соясь.
Степан Чакувич — ты пэртя, СПК «Тазовский» нюбетахана манзара. Пэрта’’ тыда мюсерта ненэцяӈгана ӈули’’ та мась’’. Пыда выӈгы иламда тид’’ минреванда хавна Сянакова’’ ялэ’’ ёльцяӈгана хуркари’’ пирдырмаха’’на мэсь пэрӈа, сяни’’ мэва’ мэбе’’манда нид нерня’ ха’’морӈа.
Венера ӈацекэхэюда мание, мята манзаи пэрӈа, сэдора. Таддикахад воспитательӈэ тара, ӈэсыхынандо’ школан’ хэванда’’ нюдяко’’ ӈацекы тохоламби. Ӈавна Санкт-Петербург маркана Александр Иванович Герцен’ нюмам’ мэта университетхана ненэця’ вадам’ минренаӈэ тоходанась. Мале ӈамгэ’ пирт’ харта янда школахана манзарась. Мята тер’’ ӈадиво’’махад хой’ няна иле пэяць. Теда’ ӈарка таромда тэхэ’’на илена’’ ӈацекэхэ’’ ха’’аврамбида.
— Маня’’ хар’’на’’ сертавы балокаханана’’ илева’’. Мяд’ ея’ хоба мэядава нензел’’ ни ӈа’’. Нюдяко ӈацекы пэрма’ мальӈгана сабе таня’ ӈани’ нин тэворт’’. Ӈадьбята ӈу, ея, хорм’, хан ня’’амвами’ ёльце сава, — Венера Юрьевна тарем’ лахана.
2025 похона сидя нюсавэй ненэцяӈг’’ мипада няд’’мам’ нянди’ нюртейӈэ ми’’ӈадонзь. 2021 поход мяд’ ӈамгэри няхар’’, тет, тамна ӈокарка нюм’ ховэри’’ мяд’ тер’’ ня’’марпабто’ серо’’ӈась. Тюку поход нябимдей нюм’ соявэхэ’’ ӈани’ мипа пядонзь.
Автор: Анна Яптик’ падвы
Авторы
Няръяна Нгэрм
Темы