Няръяна Ӈэрм
Ӈокна нятакоӈа’’
Выӈу’шамна ӈайваӈа’’. Таԓкахай школа-интернатхана тохоԓкота’’ ӈашки’’ хайму’’ нятапи’’. Таньше нятакош манԓе куптат чепьӈаш’’. Урокатуӈ пут тохоԓкота’’ ӈашкиуди’’ школантуӈ музейхана кататат — окопные свечи’’ шеԓтапёшту’’.
Чикитоӈ СВОхана мэнаха’’ ӈайтапташтутуӈ. Хадям няна хайноԓтахана’’ таԓьша ӈамыку’’ таԓаӈа’’. Кататато’’ такԓаш мэчитуӈ мякнатуӈ мэштутуӈ. Мятуӈ дяԓымтампёш тавсташтутуӈ, шайтатуӈ пиԓипёш’’, кэԓутуӈ чудипёш мэштутуӈ.
Чики тунтуӈ дямохат хынюй паныдётуӈ, пемитуӈ — топԓотуӈ касташту’’. Таньше окопные свечи’’ шеԓтапёш ӈашкиуде’’ школа-интернат музейхана мансԓана Нина Топоева тохоԓымпита. Веша банка’’, картон’ патаԓ, парафин’ — таԓьшахат кататат шеԓташту’’. Неԓьчеэй няна парафинхана камтамантуӈ мэт шеԓтамайтуӈ катататутоӈ наӈича мят канаштутоньш, четаӈ каԓьтуӈ музейханантуӈ таньдет ӈайта ӈайвачетоӈ мэштутуӈ. Ӈупмэмахана шанат дют свечки’’ шеԓташту’’.
Няхаԓ пуӈ дямпан ӈашкиуде’’ манԓе шанат дюԓ’’ кататату’’ хайму’’ няӈ ӈайтаптаӈаш’’. Чикиӈ камна музейханантоӈ дяԓнас пускохот такԓаш мэта маскировочный’ шентми’’ паӈкаԓьшту’’. СВОхана мэна’’ нетуӈ маймаӈ мэты письмотуӈ паташту’’. Таньше мэматоӈ ӈаԓтана ӈашкяхена’’ хома. Каԓьтуӈ вимнянтуӈ хома шоньшахана нятаку’’. Ӈокна нятакош ӈука мансдям, хайноԓта’’ нетуӈ нятапёш, шеԓташту’’.
Автор: Андрей Пяк патмы
Авторы
Няръяна Нгэрм
Темы