Паднаӈгува’’

Яра иры’ 21 ялям’ тодо’’ тэнз’’ ненэцие’’ помна ненадо яляӈэ мэ’’ӈава’’. Тикы’ няю’ яна’’ тер’’ харто’ вадамдо’ лэтравандо’, ся’’мандо’ няю’ диктантм’ падыбаӈгу’’.

Время для чтения ~ 2 минуты

Ӈыхы 2000 поход ЮНЕСКО’ ватовна иринана’’ вадам’ лэтрава’ няю’ наӈэдя таславы ялява’’ таня. Ӈарка яна’’ тиӈгэвна таӈок по’ ямбан’ хуркари’’ илека’’ серо минресетыва’’. Ямална’’ ӈардавна ӈани’ варева’’ мэцетыва’’. Тадри’ ӈобт’ ма’’лёдава’’. Хусувэй ӈарка, нюдя харад’ тер’’ диктанм’ падыбаӈгу’’.

Салехард’ тер’’ е’’эмня ненэй вадавна диктантм’ толабадаӈэ «Няръяна Ӈэрм»‘ газетана’’ ӈэвахана мэна Яр Марина Тэтакучевна тараӈгу. Ӈамгэ’ нямна паднаӈгува’’, ханяна паднаӈгува’’ — тикы’ нямна няна’’ лаханась.

— Тюку по’ падыбавандава’’ Ӈарка сайнорма’ по’’ нямна ӈэӈгу. Салехардахана ненэця’’ толаӈгова’ мякана ма’’лёда’’. Тодо’’ лохохо’’на паднаӈгу’’. Теневабцудо’ хорпавандо’ хавна пон’ нивы манэ’’мы нидо’ хоӈгу’’. Неноховавна ӈопой яхана ӈока ӈэрм’ яна’’ вабц намдаӈгува’’, паской ембдяродо’ манэтава’’.

Тарем’ харе’’ вадина’’ лэтрамба ненадо ялява’’ мэтава’’.

Автор: Галина Окотэтто’ падвы

Авторы

Няръяна Нгэрм

05:37, 18 февраля 2025

Темы