Няръяна Ӈэрм
Нядма ня хыно’’ӈаваць
Тандая’ Сале’ хардхана сёётэй няна’’ концерт ӈась. Ныланава’ яляхана едэй сё намдаваць. Нядма Няруй ня хар’’на’’ вадавнана’’ хыно’’ӈаваць, ӈопой час’ ханзер’’ хэвам’ ниваць хамада’’.
Время для чтения ~ 3 минуты
Ненэй сёхо’’ инзелеванзь товы ӈокась. Юрёда ханярид сита манэ’’манзь товэць. Вануйто мяд’ терха’ Сёяха’ выӈгад товэхэнзь. Концерт пэва’ нерцю’’ няданди’ хонаркудамзь. Юлия Сёёновна няби Павел Париденявич тарем’ лаханаӈаханзь:
— Мани’ то’’мами’ мале хубтемя, сидя ирыӈэ хая. Салехардан’ ӈояк’’ тэворцетыни’. Тюкон’ тур’’мами’ сидя по’ техэ ӈэӈгу. Сёётэй’’ ма’’лёвам’ намда не нюми сидни’ тюкон’ тэврась. Хынотаха’’ инзелевам’ харвабтасетыми’. Нядма Няруй’, Елена Лаптандер’, Надежда Сэротэтто’ (Евай) сёхо’’ инзелесетыни’. Хар’’на’’ мякаваханана’’ сё, ярабц мэтава’’ сабе яӈгу. Танякуна’ таняса’’ма, едэй’’ мутра’’ ӈадиво’’махад тарць мэць ӈэвадэйна’’. Теда’ хой’ няна лаханакохорт вуни’’ мэс’’. Ӈавна хэвняд тона таняӈгу, таминда лаханакум’, ярабцм’ мэ’’манда ӈэ’’нив.
Ёльцянда томзь яӈга ӈарка лохо’ мю’ тюваць. Няхаюни’ тарана, хынота сававна маниеванди’ е’’эмня нерняку’ ӈамдыхынзь. Ненэцие’’ мал’’ ӈамда’’махад Нядма’ «Ядэрта» нюбета сёмда хэӈгабтась. Пуна лакри’ «Яберена Нумги»‘ тер’’ ӈадимяць, сянэрта суюкоци’’ то’’олхакоць. Пудандо’ Елена Уфимцевам’, «Вы’ сей» ансамбль’ тер, Матрёна Ивановна нюбета группам’, Екатерина Салиндерм’, Масне Няруйм’, Олит Тевлянаутм’ манэ’’ӈаваць.
Елена Хабиевна тарця вади хэтась:
— Мань Семён Николаевич’ хасава нюм’ ӈахат нюдя ӈэдаханда теневав. Хайна хыно’’мада нянани сава, сёда няд’’мяць мале сян тарабцом’ сертадамзь. Не нюми няби не нюни не ню ня ӈэбтм’ ня’’амба тараваць. Тарем’ илна’’ ӈобкад перевам’ манэ’’лабтаваць. Тад нерня’ тамна ӈока манзаям’ ӈобнзер’’ серта тасламбини’.
Чукотка’ няд товы Олит Тевлянаут хыносо’’ма ӈани’ тид’’ ӈась. Пыда тарем’ мась:
— Нядма’ сёхо’’ инзелесетыдм’. Ямалхана пыда сита то’’олха сёётэйнда’’ танява ӈули’’ сава. Ямда хынабтамби, янда юнм’ ӈарамдамби. Ӈобкана хыно’’махани’, яхананда’’ мядомахани маймбидм’.
Ӈули’’ пуданаӈэ Масне ня едэйвана падвы «Ёльце» хынабцамди’ мэ’’ӈаханзь. Не нюди’ Ейнеди’ нянанди’ нюртей мэва сцена’ ниня нусь. Тандая’ сё мэ’’манзь пяванда’’ няхата вади ӈэдарамбись: «Нерняри’ ӈада’’, ӈамгэхэртан’ сейда’’ нёя’’ пин’’!»
Концертм’ маниевы’’ ёльце маймбиць. Пыдо’ ма’’нисям’’: «Иланда ямбан’ нерняри’ ӈэдалёя, инда ӈылан’ хыно’’ӈая, саць маймбая».
Автор: Анна Яптик’ падвы
Авторы
Няръяна Нгэрм
Темы