Юш сохаптаты тынаӆ туняӆ эӆты нох ант эӆӆас. Хор: Зоя Куртямова

<div class="content-lead">Там ванан Ӆорвош район эӆты айкеӆ ёхтас, муй щиран куртат кутан хоятат тутӆыты Трэкол машина яӊхты питаӆ. Юш сохаптаты тынаӆ туняӆ эӆты нох ант эӆӆас.</div><p>Яӆап таӆ тыӆащ яӊмет хатаӆан оӆаӊ рейс Ӆоркурт, Горка вош па Овкурт пеӆа верса. Ӆоркурта мантыйн, Мужи вош эӆты машина аӆаӊсахат 08:00 щёсан этаӆ. Кутан Горка вошан ӆойӆыйӆ. Ёхӆы пеӆа 11:30 щёсан манаӆ.</p><p>Овкурта 09:00 щёсан манаӆ. Манман, Яӆап Кевавта йирэмаӆ па Ямкуртан ӆойӆыйӆ. 13:30 щёсан Мужи вош пеӆа ёхӆы йиӆ.</p><p>Куртат пеӆа мантыйн, Мужи кутопан уӆты вош харан машиная омасӆа.</p><p>Трэкол машина, маты хатаӆан мата курт пеӆа манаӆ, юш тынаӆ муй арат соӆкувая хойӆ, ӊttps://admmuji.yanao.ru/activity/37175/ Ӆорвош район утхот сайт хоща вантты рахаӆ.</p><p>Зоя Куртямова ханшам потар</p>

Куртат кутан машинайт эсаӆсайт

Матрёна Ивановна Ким (Попова) Поӆнават куртаӊ ими. Хор: Людмила Шульгина

<div class="content-lead">Щиты ястас Матрёна Ивановна Ким (Попова) — Поӆнават куртаӊ ими. Там таӆ ӆув Ас потты тыӆащ 16-метан 81 таӆа йис. Ма ӆув пиӆэӆн Поӆнават куртан уйтантыйсам, мойӊа яӊхсам.</div><p>Шай йинщман ӆув уӆапсайӆ эӆты потартас:</p><p>– Ащем Иван Абрамович Попов — Касум куртаӊ саран ху, антем Марфа Егоровна (эви опращ нэмаӆ Артеева ус), ӆув Коми АССР мув эӆты ус. Ӆын Касум совхозн вуӆы тащ ӆаваӆсаӊан. Муӊ семьяевн 13 няврэм ус, ма — 12-мет, ин туп ма па мет ай апщем Георгий хащсамн, ӆув Ярославль вошн уӆ. Муӊ хоӆыена касаӆман сэма питсув. Ёӆн туп саран щирн потартсув.</p><p>Ун яйӆам па опиӆам ашкуӆайн утаӆтысат, щишн манэм рущ щирн потарты утаӆтасэӆ. Ма 9 таӆа ювмемн туп ашкуӆая масайм. Щит 1952-мет таӆ ус. Оӆаӊмет утаӆтам нэӊем Фаина Лаврентьевна Кауртаева яма нумӆэм. Ӆув нявлак сампи имия ус. Муӊ саран мир, Касумн интерната уӆты-хоӆты ант вусаюв, щишн антем-ащем Касума касаӆсаӊан, куртан нюки хот омассаӊан. Нюки хотн усув, щиты ашкуӆая яӊхсув. Щаӆта ащем Касум колхоз эӆты йира манас, па муӊ вуӆы ухӆатн Поӆнават курта касаӆсув. Щит ун кер тыӆащ 1954-мет таӆ ус. Ма шеӊк ищкийн потсайм, хув лекщитсайм. Ащем кат щёрас соӆкува союмная ох вус, хот па мис ӆутас.</p><div class="content-new-image"><img alt="pic" src="https://storage.yandexcloud.net/ym-sites-static/24ca1c62-113.webp" style="width:100%" height="1440" width="2560"/><div class="content-image_child">Муӊ хоӆыена касаӆман сэма питсув. Хор: Василий Петров</div></div><p>Матрёна Ивановна ясӊаӆ щирн, щи порайн ашкуӆа куща Иван Федотович Пермяков ус, ӆув имеӆ Августа Фёдоровна няврэмат рущ ясӊа па литературая утаӆтас. Щи порайн няврэмат ашкуӆа кур аӆты ураӊан ун ёх хоятата тут юх сэварты нётсат. Нови тут антом ус, щишн класс хоща и керосин лампа ус, контрольной рупатайт ханшсат ки, кат-хуӆам керосин лампайн мийӆысайт. Щаӆта нови тут тыйс, туп иӆ оӆты унты нови тут маты станция рупитас.</p><p>1962-мет таӆн Матрёна Попова яӊ класс етшаптас. Еӆӆы Омск вошн утаӆтыты нумасас, туп еӆӆы Топоӆ воша манас, ванты, щий ӆуӊан тутаӊ хоп яӊхас, таӆн — ай тохӆаӊ хоп. Тата пединститут хоща яма экзаменат мас па няврэмат математикая утаӆтаты вер оша верты питас. «Ма яма утаӆтысам, щишн 22 соӆкува 50 копейка стипендия ох ёша вусам. Ванты, муӊ семьяев ар няврэмаӊ ус, антем чумработницая рупитас, щи рупата ураӊан нэмоӆты ох ант сохаптаса. Щаӆта Поӆнават куртан аӆ рупатайт верас, шеӊк ай тыӆащ ох тайс. Ащем щи порайн щутщас — туп 19 соӆкува пенсия ох ёша вус. 1972-мет таӆн ащем антома йис, антема ӆув урӊеӆан 19 соӆкува юкана туп 11 соӆкува маса. Щиты щи ӆаварта усув», — Матрёна Ивановна нумаӆмасӆы.</p><p>Пединститутн утаӆтымаӆн айӆат Матрёна икеӊа йис. Икеӆ Олег Иванович Ким ищи щи институтн няврэмат физикая утаӆтаты вера рупитас. Ӆыв семьяеӆн Павел пох сэма питас. Еӆӆы нэпекаӊ катӊан Ёмвош район Луговой курта рупитты китсайӊан, туп Поӆнават курт ашкуӆая математика па физика урокӊан туты хоят антом ус, щишн ӆыв айӆат семьяеӆ Матрёна рут куртэӆа ёхтас. Щит 1967-мет таӆ ус. Ашкуӆа куща ху Иван Федотович Пермяков шеӊк амтас, хоты ӆув утаӆтам эвеӆ нэпекаӊа йис па ёхӆы рут ашкуӆаеӆа рупитты керӆас.</p><p>Матрёна Ивановна потартас, Поӆнават куртан мет оӆаӊан няврэмат Турам хот хоща утаӆтысат. Щаӆта советской лащ порайн ашкуӆа хот омасса. Ӆув потартаӆ: «Уйтӆэм, 1938-мет таӆн тый ар мир нартамӆы китса, щишн яӆап ашкуӆа хот омасса. 400-кем няврэм кат сменайн, етн ун ёх утаӆтысат. Ма ашкуӆаевн куща ӆаӊкар нэӊа уӆмемн нумӆэм, хоты 450 няврэм утаӆтысат, щит эӆты 150 шоши мир эви-пох интернатн усат. Ашкуӆа хотэв ай ус, щишн итухӆ ишн па хотатн, интернатн муй па экспедиция эӆты хащам сохат пусты хотн утаӆтаты верат ӆэщатсув. Иван Федотович Пермяков яӆап ашкуӆа омасты ураӊан ун кущаята пищмайт ханшиӆыйс, иса муй верас, ӆуӆн сорашак ат омасса. 1977-мет таӆн яӆап ашкуӆа пуншса, туп ӆув щи еӆпийн антома йис».</p><p>Щиты Матрёна Ивановна Ким 36 таӆ Поӆнават куртаӊ няврэмат математикая утаӆтас, куща ӆаӊкар нэӊа ус. Щи мосты рупата тувмаӆн ар ишакты нэпек тайӆ. 2002-мет таӆ вуш эӆты щутщаӆ. «Щутщатэмн хот рупата верӆам, ӆуӊ порайн арсыр овощат, аня лыптат энмаӆӆам. Икем па Павел ун похем антома йисӊан. Там Поӆнават куртан Александр кимет похем уӆ, ӆув ван кутн мояӊа ёхтыӆыйӆ. Хуӆам хиӆы тайӆам, ӆыв уна йисат», — ёхи хащам артан Матрёна Ивановна ястас.</p><p>Людмила Шульгина ханшам потар</p>

Ма нюки хотн сэма питсам

Муй хорпи яӆап нётопсайт Овс мув шимӆаӊ мир хоятат ураӊан па постаӆайт, муӊ па ишан па ханшӆув. Хор: Геннадий Кельчин

<div class="content-lead">Хащам таӆан муӊ ханшиӆысув, муй хорпи верат яӆап таӆ кеша постасайт. Ин па ханшӆув нумты ураӊан. Нумастэман, щи порайн кашӊ хоят нумты питаӆ, па моӆты вер сахат утхота яӊхиӆыйӆ.</div><p>Яӆпа питам таӆ вуш эӆты «Чумовой капитал» тащан яӊхты ёх кимет няврэм сэма питтаӆ вуш эӆты вуйӆыты питӆат. Мет оӆаӊан там нётопса туп ар няврэмаӊ хоттэӆат вуйӆыты верытсат. Там нётопсая ӆоӊаӆман уӆӆат нюкет, парщин, улат, ухӆат, кур, хотхар сохӆат па па мосты пормасат. Ӆорвош районан уӆты мохет хот омасты пормасатан ортӆайт, сохӆат, картӆуӊкат, нови тут маты хошапатан, юх эватты картэтан, куран маӆайт.</p><p>Касӆыман яӊхам мохет, хой уншак куртата па вошата манӆат, кочевой охан сохаптаӆайт, ин 5000 соӆкува яӊ моӆтас щёрас хоят вуйӆыйӆ.</p><p>Ветеринарной хошапат яӆап портунатан понман уӆӆайт. Щи веран вуӆэт па ампат тумтакат питӆат. Тови па сус леп кашӊ пуш портунаӊ хошапат мийӆыты питӆайт.</p><p>Тащан яӊхты мохиӆув няврэмат, хой ашкуӆа юпийн ун тахая утаӆтыты манас, йи пуш 80000 соӆкува нётопсайн маӆайт. Щи охӆаӆан ӆув верытӆат ӆувиӆаӆа мосты ӆуматты сохат па утаӆтыты кеша мосты пормасат ӆутты.</p><p>Ямальской колледж яма етшам няврэмат 100000 соӆкува ёша паятӆат. Щи веран сот балл шитты мосаӆ. Ӆувиӆаӆ утаӆтам нэӊат па ёхат ищиты мойӆаптаӆайт.</p><p>Мис йиӊк ин куртаӊ хоятат ищи ёша паятты верытӆат молочной сертификат онтасан. Ӆув куртэӆан ки антом, па курта яӊхты верытӆа па щита вуты. Там еӆпийн верытысат леккар хотатан вуйӆыты.</p><p>Ай куртат эӆты, хота 500 хоят эӆты шимаӆшак уӆ, ӆувиӆаӆа рахты курта па воша манты верытӆат. Соцнайм щиран уӆам хоятат ищи хорпи уӆты хотан маты верэӆ уӆ. Кашӊ хоят вер атэӆ вантӆа. Касаӆты порайн 100000 соӆкува нётопсайн маӆайт.</p><div class="content-new-image"><img alt="pic" src="https://storage.yandexcloud.net/ym-sites-static/1592d393-e9b.webp" style="width:100%" height="1440" width="2560"/><div class="content-image_child">Хой хольмаӊ таӆ унты няврэм тайты ки питаӆ, щи нэ хуӆам миллион соӆкувайн маӆа. Хор: Аллина Тоярова</div></div><p>Леккарат, няврэмат утаӆтыты нэӊат-ёхат, ТЭК хоща рупитты мохет, хой колледжан рупитаӆ яӆап таӆ оӆаӊмет хатӆ эӆты йи миллион соӆкува нётопсайн маӆайт.</p><p>Вой леккарат ищи нётопса вуты питӆат. Ветеринарный фельдшер 500000 соӆкува нётопса вуӆат, ветеринарной врач — 700000 соӆкува.</p><p>Хащам ятан округ губернатор Дмитрий Артюхов постас, хой хольмаӊ таӆ унты няврэм тайты ки питаӆ, щи нэ хуӆам миллион соӆкувайн маӆа, хольмаӊ таӆ моӆтаса ювам нэӊат йи миллион соӆкувайн маты питӆайт.</p><p>Няврэм сэма питты порайн леккар хотан мойӆапса ӆаращат мийӆыӆайт, щи порайн ант мосаӆ нумасты, няврэм муйн ӆуматтаты. Оӆаӊ сыс сохан тарамӆайт. Щит, ма нумастэман, шеӊк ям вер.</p><p>Муй хорпи яӆап нётопсайт Овс мув шимӆаӊ мир хоятат ураӊан па постаӆайт, муӊ па ишан па ханшӆув.</p><p>Аллина Тоярова ханшам потар</p>

Яӆап таӆан этты яӆап верат

Муӊ орӊиӆуна, ханты маса – щит олапсы. Хор: Маина Серасхова

<div class="content-lead">Муӊ тус ясаӊ ныӊӆу тун каратӆат, щищкан па ной эваӆт йинтасӆат, сох эваӆт верӆат. Ӆув ропатайӆаӆ пеӆа вантман сам аматӆ. Маина Серасхова ай тэӆна верта хасӆ, ӆув верты ропатайӆаӆ пеӆа ки вантта, лавта рахал — сарнеӊ яс тайты ныӊ. Итта ӆув Охсар похална ол, верта хасапсэӆ ропатайи тайӆаӆӆы.</div><p>Маина Ягиевна тамиты лаваӆ: «Ма энмам мувам Пуӆъёхан овс мув, щита энамсам. Ащем Яги Александрович Серасхов, амэм па Татьяна Михайловна, олман хуват тащ савиман па хуӆ веӆман осӊан, ӆын эваӆтыӆан вантман муӊ тамащ ищки мувна олта онттысу.</p><p>Ма «Мастер декоративно-прикладного искусства» нэм тайӆам. Мала эваӆт аса йинтта веритӆам, каӆаӊ сох ат ол, ной ки ной, щищкан. Йинтаста ай тэӆна питсу, амэв мала верӆ, муӊ па щит пеӆа вантман самӆу ӆытӆат. Ай итам иты ищи тун каратӆам, йинтасӆам. Яйӆам па ащеӆ пеӆа вантман и охал, и нымаӆ, и сатап верта хасӆат. Йиӆап энамты нявремат ораӊна итта щит сэӊк щёкат. Муӊ орӊиӆуна щит щёкат ропата ант ол, муӊ щиты онӆаман оллу.</p><div class="content-new-image"><img alt="pic" src="https://storage.yandexcloud.net/ym-sites-static/bf3cc6bb-f2e.webp" style="width:100%" height="720" width="1280"/><div class="content-image_child">Муӊ орӊиӆуна щит щёкат ропата ант ол, муӊ щиты онӆаман оллу. Хор: Маина Серасхова</div></div><p>Муӊ округу хуват мастерат ораӊна каман сот уйтантопсайт верӆайт, щи порайна мин итам пиӆна верам пормасӆаман пиӆна ярмаркайна ёхтыӆыӆман, тынэсӆаман. Щиты актащиман йиӆап лохсат верта рахал, йиӆап ропатайт вантта, наӊ верам пормасӆан эттада. Аӆ порайна ма пормасӆам вантапсайтна китыӆыӆӆам».</p><p>Муӊ орӊиӆуна, ханты маса — щит олапсы. Йис тэӆна этам щират-пищат верта хасты ныӊат савиман тайӆаӆӆаӆ па ищиты алӊищ ат туӆаӆӆ. Муӊ мувувна хонты харты ханты мур ӆув олапсэӆ ант ат ярэмаӆэӆ, нявремӆаӆ ат онттаӆат. Тумтак яс, тумтак кур!</p><p>Вера Лонгортова хансам потар</p>

Ай тэӆна верта хасӆ

Муӊ щирӆу-пищӆу савиман тайӆаӆӆу, нявремӆу ищи муӊ итыӆу мала аса верта ат хасӆат, муӊ олапсэвна-хоты муӊ осув олта ат веритӆат. Хор: Ирина Серасхова

<div class="content-lead">Муӊ мувув сэӊк тащаӊ тус ясаӊ ныӊатна. Йи щимащ ныӊ Приуральской районна ол, нэмаӆ Ирина Ягиевна Серасхова, ӆув Охсар похална ол. Маина Ягиевна апэӆ пиӆна похална ор хат тайӆаӊан.</div><p>Щита ӆын вуӆ пелак нэӊхэт па нявремат эӆты ханты нэӊхэт олапсы пущщи лаваӆӆаӊан, эттаӆӊан, сайна енщтаӆӆан. Ирина апэӆ пиӆна ай тэӆна йинтаста хасӆаӊан. Касаӊ ӆын верты масайӆан хоща, ялӆаӆ туӊ ёс иты манӆат.</p><p>Ирина ниӆ няврем тайӆ, мет вуӆ эвеӆ ниӆхощъёӊ таӆаӆ. Аӆ олты хатӆатна йинтасӆ, нявремӆаӆ тун каратта, сувенират верта онттаӆ, вуӆӆы йитэӆна ищи верта ат хасӆат.</p><p>Ӆуӊан Ирина хаттэӆаӆ пиӆна Охсарка хощаӊа ор хатна хуӆ веӆман оллат, таӆ пеӆа хуӆ сараӆӆат, соӊх верӆат, рэх акатӆат.</p><p>«Муӊ щирӆу-пищӆу савиман тайӆаӆӆу, нявремӆу ищи муӊ итыӆу мала аса верта ат хасӆат, муӊ олапсэвна-хоты муӊ осув олта ат веритӆат. Муӊ хоты? Ай тэӆна хат ӆыпи ропата верта хассу, мала верта парӆайн, аса верӆан. Юх сэварта, йиӊк туда, вас сохата, ӆытыт каварта, щит аса ныӊ ропата. Итта там йис нявремат самӆаӆ щимащ ропата пеӆа ант хойӆат. Хасам хатна олта онӆам атат, ӆувиӆаӆ щёкат. Вуӆсак ныӊ нявремӆам итта ханты сох соматта яӊатӆайт, щиты хонт олта масӆ. Онттада масӆат, ханты олапсы савиман тайта. Ӆув ротэӆ алӊищ тута», — Ирина Ягиевна лавас.</p><p>Тампус ӆуӊан Ирина Ягиевна «Ямалица» хоща верам масайӆаӆ эттас, верта хасты ныӊат пиӆна кутӆаӆна кассат. Ӆув «Коллекция летней традиционной национальной одежды» номинация хоща заявка китыӆыйс, нийӆъёӊ заявка кутна пирыса.</p><p>Вера Лонгортова хансам потар</p>

Приуральской район тус ясаӊ ныӊ

Пулӊават вошан туп, сот молтаскем хоят сай верты хоӆпат сэвты ёхтыӆыйӆ. Хор: Альбина Тырлина

<div class="content-lead">Катра пора эӆты ляль манты порайн, хон мув ёх лялян уӆты хоятата иса нётыӆыйс. Ин ляль манты тахайн, СВО хося уӆты хоятӆува, кашӊ унэв, аев нётапсайт ӆэсятаӆ. Муйн верытаӆ, ситан нётаӆ.</div><p>Там мосванан округ хоятат вет миллион сёрс соӆкува акатсат. Си охӆаӆан мосты пормасат ӆутсат. Кашӊ хоят моӆтыйн нётаӆ: паркан эӆты сэвам вайт сэвӆат, венш сайӆаты милат ёнтӆат, портун, ӆэтот па мосты пормасат ӆутӆат. Нёхи, хуӆ ӆэсятты хотатан рупитты хоятат, хуӆ, нёхи эӆты ӆэсятты хошапат китӆат.</p><p>Ляль пора манты сыс кашӊ куртан, вошан уна ювам хоятат, ашкуӆаятан утаӆтыты няврэмат, энамты ёх, рупитты хоятат там хатӆ унты хоӆпат сэвӆат па па нётапса верӆат. Пулӊават вошан уна ювам хоятат си вер верман, кашӊ ӆапат уйтантыӆат.</p><p>«Пулӊават вошан туп, сот молтаскем хоят сай верты хоӆпат сэвты ёхтыӆыйӆ. Ашкуӆайн утаӆтыты, энамты ёх эӆты уна ювам хоятат унты.</p><p>Муӊ пиӆэван рупитты куся нэӊев ястаӆ: «Хантэт па урат мет сора сэвӆат, ай пора эӆты ёнтасты, вератты хошты хоятат».</p><p>Си вер верты ураӊан ар рупата па юр мосаӆ. Каматса сёс куран ӆойман па уӆаса хуӊхман, хоӆап хушӆа. Ныра нох хоӆпаӆ тахарты, лакки таӆты, щашкан эӆты вет сантиметр утата эвтам щашкан схема хуват щашкан ӆэрат тохи ярты.</p><p>Арсыр ольпаӊ хоӆпат сэвӆув: хойм лыпат, мув, юх нув па восты ванши хорпет ат усат. Хоӆап паӆатаӆ кат метра моӆтас, вутатаӆ — вет, хут метра хуват. Щаӆта ӆувеӆ иӆ понты, лакки таӆты, щуӊ кеӆӆаӆ такан ярты, яма яха ёварты. Щи юпийн хира понты.</p><p>Там хатӆатан хуӆамсоткем верам хоӆпа ванамасув. Хой таӆаӊ хатӆ рупитаӆ, тухӆат каматса сёс. Ма ӆапат хуӆам пуш ёхтыӆыӆам. Хой муйкем верытаӆ. Лялян уӆты ёхӆув хося манты хоятат пиӆан хоӆапӆув китӆаӆӆув, торӆы мосты тахая туӆайт. Щиты Пулӊават вош хоятат ляль харан уӆты хоятат шавиты па ляль сора етшаты ураӊан нётӆат», — Валентина Сергеевна Тыликова потар тус.</p><p>Альбина Тырлина ханшам потар</p>

СВО хося уӆты хоятӆув ант ёрэмаӆайт

Геннадий Павлович Кельчин. Хор: Альбина Тырлина

<div class="content-lead">Яӆап таӆан хутмет хатаӆан, воӆӆы хольмаӊ пеӆа няӆ таӆа йиӆ, хоты муӊ округеван мет оӆаӊ газетаев ханты ясаӊан этас. 2001-2017-мет таӆ унты няӆ лопсаӊ питы-нови ольпаӊ ус. Ун кер тыӆащ 2017-мет таӆ эӆты газетаев хорам ольпаӊа йис.</div><p>Кен ӆуӊатты ураӊан, ханшты потарӆув аяшак верӆаӆӆув, катра щиран аршак хор понӆув, ханты хоятӆув иса ат уятӆайт. Оӆаӊ тыӆащ 2020-мет таӆ эӆты газетаев кат пуш уна йис. Ин там хатӆ унты нийӆ лопасан этаӆ. Аршак хоят газетаев ӆуӊатты ураӊан ӆорвош ясаӊ тумпийн Кев сыӆ мув па Хаӆэват Пелак хантэт ясаӊан ханшты питсув.</p><p>Кашӊ ӆапат потрат хоятат эӆты поныӆыӆув, хуӆам оӆаӊ лопасан хон муван уӆты айкеӆат эӆты потар туӆув. Щи юпи лопсатан ай няврэмат па ун хоятат кеша ӆуӊтараӊ, монщаӊ, хораӊ лопсат этӆыӆат.</p><p>Там таӆ муӊев потар версат, газетайн нётсат Людмила Тихоновна Гурьева, Владимир Егорович Енов, Галина Пенчакувна Кечимова, Герман Егорович Наков, Людмила Емельяновна Рочева.</p><p>Геннадий Павлович Кельчин «Ӆух Авт» газетаев мет оӆаӊ главный редактора ус. Ӆув анта туп округеван уятӆа, мув керытман па хон муватан нэмаӆ па хуӆӆыса. Корреспондент, ӆуӊатты нэпек ханшты ху, монщат толмащаӆ па хорам хорат вераӆ, член Союза писателей России хоща ӆоӊман уӆ. Хоты оӆаӊ сыс газетаев тыйс, Геннадий Павлович китам ясаӊ ӆуӊтаты: «Оӆаӊ кут ӆаварт ус рупиттыя. Редакций хоӆна, оӆаӊ сёс рупата хот ант тайс. Камн тахайн рупитты места митаӆыса. Ям хоят уӆ — нётсаюв. Хор верты иси воӆаӊ ант хошӆув. Си порайн Иван Иванович Сычёв шуӊат хоӆна ӆыӆаӊ. Ӆув хор мийӆыйс. Сяӆта па Хабэча Хываревич Яунгад шуӊат, «Няръяна Нгэрм» газета кусяя рупитас, шеӊк ун нётап верас. Хор маӆ, си кут утаӆтаӆӆы хоты газетаев туӊа-сира вертыя.</p><p>Ханты мир, ма нумастэман, хув ӆайӆасас хун тамась газета тыйӆ. Евгений Ильич Ямру си порайн миран округев Государственной Думая пирыман ус. Ӆув мосты сиран нэпекат ӆэсятас. Округ мет ун кусяев Постановлений ёш посна понтсаӆӆы. Си юпийн ханты хоятат айкеман ханты ясаӊан газета ӆуӊатты питсат.</p><p>Мет оӆаӊан, Мужи вошан специальной корреспондента рупитты питас Николай Никитович Нахрачёв шуӊат. Касам-Нёӆ эӆты уӆам ху. Ханты ясаӊан яма потрат ханшас, русь ясаӊан иси ёхӆы ант ӆойс. Си хорпи ясӊаӆ юраӊ. Яӊ моӆтаскем таӆ рупитас ӆув муӊ газетаеван. Касьтыӆэв.</p><div class="content-new-image"><img alt="pic" src="https://storage.yandexcloud.net/ym-sites-static/a3b3a777-5ca.webp" style="width:100%" height="1343" width="2388"/><div class="content-image_child">Николай Никитович Нахрачёв шуӊат. Хор: Аллина Тоярова</div></div><p>Газет пуншам уш эӆты Аллина Кирилловна Яковлева (Тоярова) рупитаӆ. Ӆопхары вош эӆты уӆты нэ. Ханты ясаӊан яма потартаӆ па яма потрат ханшаӆ, хор вераӆ. Яма рупитам тахаяӆан камн сир мойӆапса нэпек тайӆ. Ун местайн утаӆтыйс, верытаӆ юриста рупиттыя.</p><div class="content-new-image"><img alt="pic" src="https://storage.yandexcloud.net/ym-sites-static/0bdf0954-40b.webp" style="width:100%" height="475" width="846"/><div class="content-image_child">Зоя Николаевна Куртямова па Вера Алексеевна Лонгортова. Хор: Альбина Тырлина</div></div><p>Ответственной секретарь рупата Клавдия Павловна Макарова тайс. Ӆув русь ясаӊ па ханты ясаӊ утаӆтаты нэӊа утаӆтыйс. Сишна куш русь ёх сиран, куш ханты сиран яма ханшас. Ӆув ханшты потарӆаӆ умась ӆуӊатты, муӊ ханшты ясаӊӆув иса вантман тайсаӆӆы, парта сиран ханшты ясаӊ туӊапӆаӆӆы, мосты сиран ханшӆаӆӆы. Ханшты потарӆув, верам хорӆув вёрсткайн верӆаӆӆы. «Щущие» лопас эӆты ищи ӆув номас мас.</p><p>Тус ӆуӊтарат ханштыя Надежда Николаевна Конева шуӊат ус. Прокопий Ермолаевич Салтыков шуӊат ӆуӊтарат иси поныӆысув. Хоӆна па ар ям хоят газетаеван рупитас, хоӆыена нумӆаӆӆув.</p><p>Ин этты «Ӆух Авт» нэпекев еӆӆы ат этаӆ, ханты уӆапсаев эӆты потрат туӆ. Нын па ханты мир хоятат еӆан аӆ ӆояты, моӆты айкеӆат китаты, ханшаты.</p><p>Яӆап таӆ пиӆан! Тумтак уӆапса па яӆап хатӆ».</p><p>Зоя Куртямова ханшам потар</p>

Хольмаӊ пеӆа няӆ таӆ «Ӆух Авт» этӆыйӆ

Ин там вераӆ хиӆыӆаӆан еӆӆы туӆа.  Хор: vk.com/mariy_queen

<div class="content-lead">Ван хатӆап тыӆащ хольмаӊ пеӆа хуӆмет хатаӆан Иосиф Никифорович Куртямов сэма питам хатӆаӆ постас. Там хащам 2024-мет таӆан ӆув ярсот пеӆа вет таӆа йис. Там хоятэв айӆат ёх эӆты куща ёх унты иса ям ясаӊан нумман тайӆа.</div><p>Ханты куртан уӆман, ай тэӆан хуӆ-вой веӆпасӆаты хошас. Хутхощъяӊ таӆ эӆты вуӆы хотан тащ шавиты хоята рупитты питас. Ар таӆ хутмет тащ хот кущая ус. Рупитмаӆ пораяӆан, тухаӆ таӆ вуӆэӊ тащаӆ няӆ щёрас унты энмиӆыйс. Ин там вераӆ хиӆыӆаӆан еӆӆы туӆа.</p><p>Зоя Ивановна ийимеӆ пиӆан щутщаты манман юпийн, Мужи воша нык охаӆсаӊан. Иосиф Никифорович рупатайӆы куртан па ант опсас: хоӆпат хушас, ӆохат, ӆупат, хуванат верас. Веӊӆаӆа па хиӆыӆаӆа веӆпасӆаты нётас.</p><p>Рупитмаӆан, ар пуш ишакты нэпекатан юкантыса, меваӆ посат тайӆ. Сэма питам хатӆаӆан, Ӆорвош район утхот эӆты, совет ветеранов, район па совхоз кущайӆаӆан ар мойӆапса ясаӊан ястаса, мойӆаптаса. Сама мосты ям хоятэӆ шавиман, няврэмӆаӆ па хиӆыӆаӆ иса ӆув пуӊӆаӆан уӆӆат.</p><p>«Аспохие, сыстам турам еша па еӆӆы пеӆа ватаӆты, уӆты нопсэн так ат уӆ, ясӊен торӆы ошаӊа тайи, эвиӆана еша кум, тамащ ям уӆапсайн еша па верита», ¬– Наталья Александровна Горшкова асэвеӆан мойӆапса ясаӊан ястаса.</p><p>Муӊ па газетаев хуват Иосиф Никифорович мойӆапса ясаӊан китӆэв. Уна ювам юпийн, тумтак уӆа, ёшӊаӆан, курӊаӆан щём ат тайӆат. Ван рут хоятӆана амат тувман, Турам Ащийн постам таӆӆан, Каӆтащ Аӊкийн партам юшен, патэӆ унты шуши.</p><p>Зоя Куртямова ханшам потар</p>

Сэма питам хатӆаӆ постас

Ханты мир потрат, арат, монщат ищиты еӆӆы Тамара Александровна эӆты ат хуӆӆыӆув. Хор: Зоя Куртямова

<div class="content-lead">Хащам ӆапатан Овс мув шимӆаӊ мир хоятат верат туты щиран уӆты департамент «Мастер фольклорного жанра» касапсая пиӆтащийм хоятат нэмат ястас. Ханты мир кутан няӆ хоят нэпек китыӆыйс. Ӆув кутэӆан Тамара Александровна Пырысева нох питас.</div><p>Тамара Александровна ханты мирэван шеӊк яма уйтӆа. 2005-мет таӆан ӆув ёра потарӆаӆ па ӆуӊтарӆаӆ ханты ясаӊан ханшты питсаӆӆы. Ай вош нэ ясаӊ эӆты, ӆув мет оӆаӊан няврэмат ураӊан ай ӆуӊтарыет ханшиӆыйс. Юхат и вантман уна йиты питсат, щаӆта ара понты питсаӆӆы.</p><p>Усть-Войкары куртан ван хатӆап тыӆащ 3-мет хатаӆан 1949-мет таӆан сэма питас. 1966-мет таӆан Ващъёханов нийӆ таӆпи ашкуӆа, 1970-мет таӆан Пулӊават педулища етшаптасӆы. Утаӆтыты етшамаӆ юпийн Ямкурта рупитты китса, щи юпийн Овкурт ашкуӆайн рупитты питас. Ванты, ай куртаӊ ашкуӆа лап пентса. 1981-мет таӆан номас понас Ӆорвоша касаӆты па щита еӆӆы рупитты. Щи ашкуӆайн 29 таӆ рупитас. Аратаӆан няврэмат утаӆтыты щираӆа 43 таӆ мас.</p><p>Мата куртан ант ат рупитас, кашӊ тахайн няврэмат па ун хоятат яха актыӆысӆы, араӊ па монщаӊ харата вохиӆысӆы. Ияха куртат па вошат хуват яӊхиӆысат, ханты арат па монщат мира этаӆтысат. Тамара Александровна юр па номас араӊ нэпека понас. Ӆув ёра ханшам арӆаӆ ин там хатӆатан кашӊ куртаӊ па вошаӊ емаӊ хатӆатан щащӆат. Мужи вошан уӆты «Ай Ас ёх» фольклорной коллектив ураӊан инты унты арат ханшаӆ.</p><p>2012-мет па 2024-мет таӆатан «Душа народов Ямала» нэман юкантса. Ванты ӆув арӆаӆ аратаӆ мира шеӊк мосмаӊа йисат. Арӆаӆ сухтатыйн, имохты таӆаӊ потар па уӆапса щир этаӆ. Матты ки ӆув Ай вош куртаӆан уӆӆыӆысан, щита уӆам хоятат пиӆан уйтантысан.</p><p>Ханты мир потрат, арат, монщат ищиты еӆӆы Тамара Александровна эӆты ат хуӆӆыӆув. Ӆув утаӆтам па утаӆтыты няврэмӆаӆ кашӊ пуш касапсаята пиӆтащиӆат па мойӆапсайт мощатыӆат. Ма нумастэман, тамащ хоятэв онтасан муӊ ханты мир ясӊев, ар совев ант хурӆаӆ па еӆӆы Ас йиӊк иты оваӆ, Кев вот иты поӆаӆ.</p><p>Аллина Тоярова ханшам потар</p>

Тус монщаӊ па араӊ хоятат нэмат ястасайт

2013-мет таӆн ай няврэмат яӊхты садик кутоп ашкуӆаева маса. Ин Образовательно-воспитательной центра йис. Хор: Наталья Тарасова

<div class="content-lead">Кашӊ хатнэху ашкуӆая утаӆтатыя яӊхас. Ма ищиты катра Асов куртаӊ ашкуӆайн утаӆтысам. Щиӊанща щи вер вушат эӆты няӆъяӊ моӆтас таӆ ёхи щи хащас. Мосванан ма рут муван усам па щи ашкуӆаема ӆоӊтысам, ӆув куща нэӊаӆ Галина Алексеевна Новикова (Енова) пиӆн ияха уйтантысман па няврэмат утаӆтаты верат эӆты потартсаман. Газетая потрэв ӆэщатмев порайн, ям айкеӆан ёхатсаюв — «Почётный работник сферы образования Российской Федерации» нэман юкантса.</div><p>Галина Алексеевна ар няврэмаӊ хоттэӆэн сэма питас. Хоӆ уна йисат, энапсат, арсыр тахаятн утаӆтысат. Санкт-Петербурган, Пулӊаватан, Асов куртан уӆӆат. Хоты там рупатая питас, щит эӆты ясӊев еӆӆы туӆӆы:</p><p>– Ма там куртаӊ ашкуӆаеман 32-мет таӆ рупитӆам. Ёхатмеман, ашкуӆа куща нэӊа Ольга Геннадьевна Жернакова шуӊат ус. Ӆув манэм няврэмат хатӆат сыс ӆаваӆты нэӊа тый рупиттыя вохсаӆӆы. Юхат ма ай классатан няврэмат утаӆтаты питсам. Еӆӆы утаӆтысам па похат-эвет рущ ясӊа па литературая утаӆтаты нэӊа йисам. Щиӊанща 2011-мет таӆ вуш эӆты утаӆтаты нэӊӆаман Асов ашкуӆа куща нэӊа пирысайм. 2013-мет таӆн ай няврэмат яӊхты садик кутоп ашкуӆаева маса. Ин Образовательно-воспитательной центра йис.</p><p>– Муй арат хатнэху тамхатӆ нын хощайн няврэмат утаӆтаӆ?</p><p>– Ин муӊ хощаев няврэмат утаӆтыман аратаӆн 23 хатнэху уӆ. Ар таӆ сыс похат-эвет утаӆтаты хоятат ищи уӆӆат. Хув вуш эӆты Вера Филипповна Ильина рупитӆ. Ӆув рупата таӆӆаӆ 40-мет таӆа ванамасат. Щаӆта Екатерина Михайловна Ганюгина па рупитӆ. Педагогической рупата вераӆ таӆаӊтэӆн 46-мет таӆ хувата щи йиӆ. Щит шеӊк вещката муӊ няврэмӆув пиӆан рупитты хатнэху. Алла Александровна Ильина ар таӆ сыс ашкуӆаевн биология верата ай ёхӆув утаӆтас па 16 таӆ сыс ашкуӆа куща лаӊкар нэӊа ус. Там пуш ӆув щутщатыя манас. Социальной педагога муӊ хощаев Светлана Владиславовна Халиулина уӆ. Щаӆта Михаил Валерьевич Новиков няврэмат юх эӆты арсыр пормасат вертыя утаӆтаӆ. Светлана Александровна Маклакова физкультура верат муӊ ай ёхӆува япсыена кашӊ хатӆ сыс ванӆтаӆ. Щиӊанща няврэмат утаӆтаты ёх па уӆӆат, мата хоятат Асова ёхи хащам таӆатн рупиттыя ёхатсат.</p><p>– Галина Алексеевна, муй арат няврэм там пуш нын ашкуӆайн етшаптас?</p><p>– Там пуш 10-мет па 11-мет классатн утаӆтаты ай ёх ант па тайсув. Яртъяӊмет класс етшаптам вет няврэм муӊ ашкуӆаев юпийн еӆӆы утаӆтатыя Пулӊават вош многопрофильной колледжа мантсат.</p><div class="content-new-image"><img alt="pic" src="https://storage.yandexcloud.net/ym-sites-static/4f1ed001-56f.webp" style="width:100%" height="1440" width="2560"/><div class="content-image_child">Еӆӆы муӊ ищиты верытты кеман рупиттыя питӆув. Хор: Наталья Тарасова</div></div><p>Там таӆн Асов куртаӊ кутоп ашкуӆаевн 52 ай ёх утаӆтаӆув. Щаӆта 26 ай няврэм садик хотэва ёхтас. Колледж етшаптаты арпелак пох па эви Пулӊават вошевн хащӆат па щита уӆты-хоӆты щирӆаӆ ӆэщатӆат. Муӊ хощаев тата ищипа рупата антом.</p><p>Там йисн Асован туп куртаӊ куща хотэв, кутоп ашкуӆаев, нови тут вущитты па хотат хошмаӆты тахайӊан рупитӆаӊан. Щикуш хуӆ веӆпасӆаты тахаев уӆ па ӆый хощаеӆ там кутн рупитты хоятаӆ ар.</p><p>– Муйсыр нопсат няврэмат утаӆтаты щирн па тайӆаты?</p><p>– Ма щирэман, муӊ шеӊк мосты па умащ рупата верат кашӊ таӆ пораятн ӆэщатӆув. Муй арат хатнэху ашкуӆаев юпийн воӆаӊ хоята йис. Щи вер ураӊан тата хонна «Ими гордится школа» нэмпи сохаӆ ӆэщатсув па щимащ ёхӆув нэмат нох ханшсув. Еӆӆы муӊ ищиты верытты кеман рупиттыя питӆув.</p><p>– Галина Алексеевна, нын мосты вер верӆаты, ищиты еӆӆы тумтака па яма уӆаты! Шеӊк ар юр па номас муӊева катра па там йисн няврэм утаӆтаты хоятат маӆат.</p><p>Нумаӆмаӆув щимащ Асов куртаӊ 8-таӆпи ашкуӆайн муӊев япсыена па вещката утаӆтам нэӊӆув: Е.Г. Елескина, З.Д. Новикова, Л.А. Ковалёва, Р.Т. Завьялова. Шеӊк такан тайсаюв па туса рущ ясӊа утаӆтасаюв. Мосаӊ, щи ураӊан муӊ тамхатӆ еӆӆы уӆты-хоӆты щирӆув там нови туром иӆпийн туса верӆув!</p><p>Владимир Енов ханшам потар</p>

Ашкуӆа куща нэ верам айкеӆ

«Сыра’сэв» хоща якты питсам, щита хольмаӊ пеӆа йи таӆ щи рупитсам. Хор: Юрий Нензелов

<div class="content-lead">Там таӆ сыс округ каш верты хот сот таӆаӆ постаты вераӆан, кашӊ пуш турамсот каш харат пуншиӆыйс. Ханты мирэв кутан ищи щита хоятат рупитысат, па ин рупитӆат. Там потрэм Юрий Германович Нензелов эӆты туӆэм, хоты ӆув там тахайн рупитты питас.</div><p>Тампуш хольмаӊ таӆа йис, хоты Юрий Германович аратаӆ мира каш тувман рупитаӆ. Щи тумпийн хонна хутъяӊ пеӆа ветмет таӆаӆ ищи мосванан постас. Ӆув рут муваӆ, аӊкеӆ-ащеӆ эӆты щиты ястыӆыйс:</p><p>– Ма Ващъёханов куртан сэма питсам, щита утаӆтысам. Ащикем па аӊкаӊкем касӆыман яӊхсаӊан, хуӆ веӆӆыӆысӊан. Аӊкем Марина Николаевна Нензелова Ващъёханов куртан уӆам кирпащ верыӆыйм заводан рупитас, ащем Куртямов Герман Митрофанович спортсмена ус. Няврэмат пиӆан рупитас, ӆохан касты щира утаӆтасӆы.</p><p>Ма ашкуӆа етшамем юпийн Пулӊават вошан педагогической колледжан начальной класс няврэмат утаӆтыты щира утаӆтысам. Щаӆта Ващъёханов куртэман ашкуӆайн рупитсам.</p><p>– Хоты сахат наӊ номас понтсан, якты щира уӆапсаен кератты?</p><p>– Айӆат ху усам, па нумасӆам, мосаӊ Пулӊават воша манӆам, щита рупата уйтӆам. Щаӆта, Вячеслав Озелов шуӊат, ӆухсэм манэм ястас, «Ямал» нэмпи якты хара ёх хоятат мосӆат. Щишан щи вуш эӆты ма Пулӊават вошан уӆты питсам. Юхат «Сыра’сэв» хоща якты питсам, щита хольмаӊ пеӆа йи таӆ щи рупитсам. Хон мувев аратаӆан яӊхсэв, па хон мувата ищи яӊхиӆысув. Овс мув шимӆаӊ мирӆув, муӊ шоши хоятӆув якат якиӆысӆув, алиӆысӆув. Кашӊ мув суӊан умащӆыман тайсаюв.</p><p>– Муй ӆуӆан наӊ там йис няврэмата ястасан, муй ураӊан ханты мир уӆапса еӆӆы туты мосаӆ?</p><p>– Там йисан ар рупата верӆа, шоши мир уӆапса па мирата альты ураӊан. Щишан, ун хоятата па няврэмата туп ӆаӊхаты мосаӆ, ханты верат еӆӆы туты ураӊан. Щи порайн муӊ аратаӆ мир кутан ант ӆыӆӆаӆув, ант ушӆув.</p><p>– Муӊ наӊена там таӆа питам ар емаӊ хатӆэн кеша мойӆапса ясаӊ аратаӆ ханты мирэв эӆты китӆув. Тумтака уӆа, Юрий Германович! Верытты кеменан ищиты рупита, муӊев амтатӆыя!</p><p>Аллина Тоярова ханшам потар</p>

Ханты якан якемиӆув, ёшев-курэв тувемиӆув

Вера Ивановна потартас, муй щиран аӊкаӊкеӆ эӆты хуӆӆыйм арат арыйӆ. Хор: Зоя Куртямова

<div class="content-lead">Пулӊаватан, ОЦНК хот сотмет таӆаӆ постаты хатӆат кеша ун вантопса ӆэщатса. Каш ӆэщатам якты, арыты ун хоятат па няврэмат кутан кат мойӊ нэ усӊан. Ёмвош эӆты ёхтам ханты нэ ¬– Вера Кондратьева па Чукотка мув эӆты Олит Тевлянаут.</div><p>Каш вантопса етшамаӆ юпийн, ханты хоятӆув шай йинщты пасан суран ханты арат арыты хорам ай нэӊиев пиӆан уйтантысат.</p><p>Вера Ивановна потартас, муй щиран катра порайн, аӊкаӊкеӆ эӆты хуӆӆыйм Лямин ёханан уӆам нэ ар, антеӆ арыйм арат, Мария Кузьминична Вагатова ханшам ӆуӊтарат хуват ара понам потрат арыйӆ. Хорам сыйт яӆап щиран ёнтты тумпийн, катра нарысӆыты верат ёрэматы па ант мосаӆ. Хоты ӆув, рупитты мохиӆаӆ пиӆан, арсыр сыйт яха ӆыӆатман паӆа умащ хуӆантты арат верӆат.</p><p>Нётапса верты вер номасан па тайӆ. Щи вераӆ патэӆ унты туты утщиӆӆы. Югра мув интернататан уӆты няврэмат хуӆантты, хорам тур сый тайты па яма арыты эвет-похат пирыты. Ашкуӆа етшатэӆ юпийн, еӆлы утаӆтыты нётты. Кум шиттаӆ кеман, ун хоятӆаӆ уӆты сыс, катра арат, потрат акатты па ханшты.</p><p>Арыты нэӊев пиӆан щи уйтантопса Татьяна Ивановна Енова ӆэщатсаӆӆы. Тохи ёхтыӆыйм хоятӆув ищи потартсат, муӊ мувеван муй хорпи каш ӆэщатты верат маныӆыӆат. Муй щиран няврэмат нарысӆыты утаӆтаӆайт. Рут ясӊев шавиман па еӆӆы тувман муй хоӆна верӆув.</p><p>Тамащ уйтантопсайт верты мосаӆ. Хоты уӆапсаев манаӆ, рут мув хоятӆув хоты уӆӆат иса уятты питӆув. Моӆты порайн, тамащ потрапсайн ястам ясаӊ ӆэр, щаха ун емаӊ хатӆа мосаӊ па нётапса вера тыйӆ.</p><p>Зоя Куртямова ханшам потар</p>

Югра мув эӆты ёхтыӆыйм мойӊ нэ

Хошам ишакты ясаӊан ястасайт, арыты нэӊӆув эӆты ханшам арат арысайт, мойӆапсаятан мойӆаптасайт. Хор: Зоя Куртямова

<div class="content-lead">Хащам щутщаты хатӆатан Ӆапатнаӊк вошан «Сорни най» ханты арат арыты нэӊӆув ишаксайт. Хольмаӊ пеӆа вет таӆа йис, хоты ӆув емаӊ хатӆат порайн мойӊ па вошаӊ хоятата ханты уӆапсаев эӆты арыӆат па монщ вантопсайт альӆат.</div><p>«Сорни най» нэӊӆув пиӆан уйтантыты, ӆув арыты арӆаӆ хуӆантты ван рут хоятӆаӆ, вошаӊ мохет па мойӊ хоятат, каш верты йи хотан арыты нэӊӆаӆ па куща ёхӆаӆ ёхтыӆысат. Хошам ишакты ясаӊан ястасайт, арыты нэӊӆув эӆты ханшам арат арысайт, мойӆапсаятан мойӆаптасайт. Арыты тумпийн, тус ёшаӊ вератты нэӊииӆув пормасат эӆты вантопса ӆэщатман ус.</p><p>Сам эӆты йиты мойӆапса ясаӊ</p><p>«Тамхатӆ муӊ, аӆ хун тый ёхатсув. «Сорни найӆува» хольмаӊ пеӆа вет таӆа щи йис. Щи сыс эӆты муй арат ар арысты, монщ монщсаты, потар потартсаты. Еӆӆы пеӆа няврэмӆуван ӆуӆан арӆув, потартӆув ат арыты питсайт.</p><p>Ешак нэӊиет, там ойӆы-йисӆы нупат ятан Турам Ащийн, Каӆтащ Антийн, Най-Уртӆанан ат шавиӆайты. Няврэмӆан па хот тыхаӆӆан, пиӆан тумтака уӆаты», ¬– арыты арӆаӆ ханшам нэ Валентина Петровна Першина (Лонгортова) тамащ мойӆапса ясаӊан ястас.</p><p>Ханты арӆам арыман, ӆыпем аматаӆ</p><p>Хоты арыӆат, емаӊ хатӆата ӆэщатыӆат, щит эӆты Лариса Ильинична Витрук (Рохтымова) каматса ясаӊ ястас:</p><p>«Ма Овкурт ашкуӆа етшамем юпийн, там вошема рупата пеӆа утаӆтыты ёхатсам. Еша уӆ няӆъяӊ таӆа йиӆ, хоты ма хот нёсытты рупатаеман рупитӆам. Ӆапатнаӊк вошеман ху сая мантсам, няврэмӆам тата энампсат, хиӆэт тайӆам. Арыты щиран яха актащмев эӆты, муӊ каматса нэ, щиты щи хольмаӊ пеӆа вет таӆ арыты яӊхӆув. Яӆпа ёхтам ай эвет па тайӆув. Муӊ хоӆыена арсыр тахаятан: ай няврэмат хатӆ сыс шавиты хотан, ашкуӆайн утаӆтаты нэӊа, хот нёсытман, нови тут нэпекат ӆуӊатман рупитӆув.</p><p>Ӆапат кат пуш рупата хатӆэв етшаты юпийн, каш верты хотан яха актащӆув па ханты арӆув арыӆув. Кутӆуван рут ясаӊан потартӆув. Валентина Петровна ханшам арат манэм мет кен арыты. Щаня ёхан ясӊеман ванта яха ёхатаӆ. Нопсэм мохты рут мувем пеӆа карэмаӆ. Каматса ар Ӆапатнаӊк вошева постаман уӆ. Емаӊ хатӆат порайн арыты арӆув, вошаӊ хоятӆув шеӊк самаӊа хуӆантӆат. Пумащипа ясаӊ ястаӆат. Вошев тумпийн, округ вошат па районат хуват арыман яӊхӆув, Карелия муван усув».</p><p>Ма ӆыпеман воӆӆы ханты хоят</p><p>Арыты нэӊӆув, ӆув пиӆэӆан рупитты куща па тайӆат. Рупата вераӆ самаӊа туты хоят Елена Петровна Делеган (Старкова), мет оӆӊа ӆувиӆаӆ арыты группая акатсаӆӆы. Хольмаӊ пеӆа кат таӆ ӆув пиӆэӆан рупитас. Ӆув уӆты муваӆ пеӆа манмаӆ юпийн, баянан ёнтты ху Евгений Фёдорович Веденькин ёша хащсат. Уйтантопсайн, нёхты хор хуват мойӆапса ясаӊ китсаӊан. Йи хоттэӆ мохет иты яха рупитсат. Ханты ясаӊан арыйм арӆаӆ хоӆна нумман тайӆаӆӆан. Наталья Сергеевна Ткаченко «Сорни най» нэӊӆув пиӆан йи таӆ туп рупитаӆ. Рупатайӆ яӆап щиран туӆӆы, каш альты порайн ястаӆат, щит мохты ныӆа.</p><p>«Ма рупата щиран «Народной хор» кущая утаӆтысам. Туп нэмоӆты порайн ант нумассам па мув мир ёх ясаӊ пиӆан рупитты. Рупатайн щит хоты шеӊк ям. Яӆпа утаӆтыӆан, яӆап щират-пищат уйтты питӆан. Арат арыман, ханты ясӊат оша пайтӆам. Арыты нэӊӆаман мохты вана усайм. Ма па ӆув эӆтэӆ утаӆтыӆам. Муй щиран мосты щира верты мосаӆ, иса инщасӆаӆӆам. Хащам таӆ яха рупитмев сыс, нэмоӆты порайн кашӆы номасан ант ёхтыӆысайм. Ма матты ки хув тэӆан ӆувиӆаӆ уйтӆаӆӆам. Ӆувиӆаӆ кащаӆатэман, самем ойн хувӆаӆ.</p><p>Каш туты амат хоятата мийман, рупатаев еӆӆы ат манаӆ. Валентина Петровнайн хоӆна ар хорам аратан ат ханшӆаюв. Арыты нэӊӆам тумтак ат уӆӆат. Няврэмӆаӆ, хиӆыӆаӆ яма энмаӆӆат. Муӊ пиӆэван арыты хоӆна аршак эви па ёх хоятат ат ёхатӆат».</p><p>Тамащ хошам, хорам уйтантопса ус. «Сорни най» нэӊӆув хоӆна ар таӆ хоятата амат ат туӆат. Ханты ясӊев щуняӊа, сыяӊа хува ат щащаӆ, еӆӆы манман мет юраӊа ат йиӆ.</p><p>Зоя Куртямова ханшам потар</p>

«Сорни най» хольмаӊ пеӆа ветмет таӆэӆ постасэӆ

Ямал хуват 800 молтас студент ИТ-специальностят хуват онттыӆат. Хор: ЯНАО губернатор пресс-служба

<div class="content-lead">Там таӆ Ямал хуват округ губернатор Дмитрий Артюхов Няврем таӆӆы постасӆы, щи онтасна ашкоӆа нявремат па студентат йиӆап знанияйт па навыкат мощатта веритсат, ропытты пеӆа питтэӆна кон олта питӆ. Ямал «Урок цифры» федеральной проект хоща ветхощъёӊ мет активной участник лоӊас.</div><p>Тампус хос молтас образовательной уйтантопса ӆэщатыса, каман рот профессиональной ориентация хуват. Мет такан нявремат эӆты ИТ- профессия пущщи лаваӆса. Щи ораӊна мет вуӆ Хон мув компанияйт, щит VK, Сбер, Яндекс, Ростелеком, Касперской Лаборатория, «Росатом», «РедСофт», ИнфоТеКС па 1С хоща ропытты ведущий специалистат пиӆна уйтантопсайт версайт, щи онтасна ӆув ИТ-сфера хоща олты мет масты тенденцияйт пущщи ощта питӆат.</p><p>«Ямал мувна Няврем таӆӆы постам таӆ онтасна муӊ цифровой экономика пеӆа мет ям специалистат онттада веритта питсу. Ямальской нявремат ораӊна, мета маса муниципалитетат эваӆт, экспертат пиӆна верты уйтантопсайт, мет такан нятӆат ӆувиӆаӆ самна рахты профессия пущщи холта, онттыда. Щимащ образовательной уйтантосайт, энамты нявремат ораӊна цифровой технологияйт пиӆна йи курна соста нятӆат», — щи направление хуват ропытты окружной департамент отдел коща Дмитрий Сухов лавас.</p><p>Холам таӆӆы йис, хоты Ямал мувна образовательной форум верта питса, щита анта топ онттыды верат, холна «Ярмарка вакансий» лоӊал, щи онтасна нявремат мохты ропата маты нэӊхэт пиӆна уйтантыӆат па потарӆат. Касаӊ таӆ энамты нявремат кутна ИТ пеӆа мет такан самӆаӆ таӆта питсайт: студентат кутна мет ар нэӊху ИТ-направление пирыты нэӊху мет арры йиӆ па энмаӆ.</p><p>Ямал хуват 800 молтас студент ИТ-специальностят хуват онттыӆат. Тампус щи направление хуват холна 310 алаӊ курса онттыды студент мантсат. Муӊ региону хуват щи направление мет такан вантман тайӆа. Новый Уренгой, Пулӊават па Ноябрьск васатна опорной ашкоӆайт верман оллат, щита нявремат ораӊна мет такан физика, математика па информатика онттаӆа, щи томпына олимпиадайт, конкурсат па конференцияйт хоща ӆэщатӆайт.</p><p>Вера Лонгортова хансам потар</p>

Ропытты пеӆа питтэӆна кон олта питӆ

Нох питты нэӊхэт нэмат курк тыӆащ 2025-мет таӆна лавӆайт. Хор: ЯНАО губернатор пресс-служба

<div class="content-lead">Ямал мувна, тампус, волонтёр ропата верты нэӊхэт ораӊна День добровольца олты хатӆна грантовый конкурс пунсӆа. Заявка яӆап таӆ тыӆащ ветхощъёӊмет хатӆ маса китта рахал. Мет вуӆ ох нятапсэӆ холамсат щёрасы хайта веритӆ.</div><p>Щи конкурса Хон мув нэӊхэт нийӆхощъёӊ таӆ эваӆт питта веритӆат. Мет волаӊ условие — Ямал мув прописка тайта масӆ, Добро.рф па Созидатели.рф федеральной платформайӊан хоща хансантман олта па йиӆап йиты таӆ пеӆа ӆэщатты социальной проект пущщи лаваӆтта.</p><p>Щи конкурса таром верты ропата кутна хут тематической направление: нуса па незащищённой категория нэӊхэт, добровольчество развитие, нампар акатты, благоустройство па ваят савита. Щимащ грант ясна пайтта веритӆат нэӊхэт хой социокультурный проектат, ляльна яӊхам нэӊхэт ораӊна верты нятапсэт ӆэщатӆ, па Ямал мувна лавам Год героев хоща уйтантопсайт верта нятта питӆ.</p><p>Конкурсной заявка камантсы раздел эваӆт олта масӆ, проект верты коща нэм па хой ӆув командайӆ хоща лоӊал, календарный план па мала арат ох щи ораӊна масӆ.</p><p>«Щимащ таром верты ропата конкурс хоща уйтантыты порайна, нэӊхэт йи ёр понты верты ропата технология ямас мастата питӆат, хоты щит ропытӆ. Щи онтасна, тамхатӆ, добровольцат хонты кепа общественной организацияйт хоща кощайи йита веритӆат», — АНО «Гранты Ямала» коща Хизри Алхаматов лавас.</p><p>Мет ям конкурсной заявкайт ар регион эваӆт яха акатты независимой экспертатна вантыта питӆайт. Нох питты нэӊхэт нэмат курк тыӆащ 2025-мет таӆна лавӆайт. Ун кер тыӆащ алаӊмет хатӆ эваӆт па верта питӆаӆӆаӆ.</p><p>Щи конкурс олты хуват ямальской добровольцат 423 социальной проект щи китсат.</p><p>Вера Лонгортова хансам потар</p>

Мет вуӆ ох нятапсэӆ холамсат щёрасы хайта веритӆ

Ӆуӊатты нэпекаӆа хутъяӊ пеӆа хуӆам потар шупие ӆоӊаӆман уӆ. Хор: Зоя Куртямова

<div class="content-lead">Ван хатӆап тыӆащ ветмет хатаӆан Пулӊават вош нэпек ӆуӊатты хотан Зинаида Викторовна Лонгортова «Узоры оленьих троп» яӆап ӆуӊатты книгайӆ этаӆтасӆы. Еӆпи ӆув «Свадебный аргиш» потар ханшиӆыйс. Там книгаяӆан потраӆ еӆӆы манаӆ.</div><p>Уйтантопсая тэӆые хоят ёхтас: хоттэӆ мохиӆаӆ, рут мув хоятӆаӆ па вошаӊ ёх, яха рупитам па нэпекаӆ ӆэщатам нэӊӆаӆ. Мет оӆӊа ёхтам хоятата «Свадебный аргиш» нёхты хор альса. Мохиӆаӆан мойӆапса ясаӊан ястаса. Хоты потарӆаӆ книгая акатӆаӆӆы, муй арат рупата щи кеша верты мосаӆ иса инщасса.</p><p>Книгайӆ еӆӆы ханшты понам вер эӆты потармаӆан Зинаида Викторовна Хабэча Хываревич Яунгад нумаӆмасӆы: «Там нови охпи ун икем пиӆан рупата хуват иса уйтантысман. «Поры онас» нёхты хорэм этмаӆ юпийн, хота кащаӆаӆӆы иса манэм инщасӆаӆӆы: «Зина, потрэн еӆӆы хун ханшӆэн? Хоран, нэӊа тувам ай эвиен уӆапсайӆ еӆӆы хоты манас?» Щи пора эӆты тухаӆ отӆам ханшман усат. Туп нэпекӆам ӆуӊатты щира ӆэщатты мосас па хащам потарӆам ханшты. Пора йи хащаӆ. Ин хоты, кушкепа таӆаӊа йис па па рупата верты, еӆӆы номас понты рахаӆ.</p><p>Ханштэман иса нумасӆам, муӊ ай уӆмеван, муй хорпи уӆапса тайсув, муй вантсув, муй хуӆӆысув, там йис няврэмат нэмоӆты порайн ант хуӆӆэӆ па ӆув сэмӆаӆан ант вантӆэӆ. Щит ураӊан ханшты мосаӆ, щаха моӆты порайн мосаӊ ищи па ӆуӊатӆэӆ».</p><p>Ӆуӊатты нэпекаӆа хутъяӊ пеӆа хуӆам потар шупие ӆоӊаӆман уӆ. Тамиты ӆуӊатты каш па кен. Потарӆаӆ рущ ясаӊан ханшман уӆӆат. Щиты ванта, мет ар хоятан ӆуӊатты верытӆа. Там нэпек ӆуӊатман, муй хорпи ханты уӆапсаев еӆпи уӆӆыйс, па мув мир ёх нопса вуӆэӆ па уйтты питӆат.</p><p>Зоя Куртямова ханшам потар</p>

Яӆап ӆуӊатты нэпек этас

Ма «Этно-кузница» ӆэсятам проект тайӆам. Ма па симась таха Казым вошан пуншты утсиӆам. Хор: Альбина Тырлина

<div class="content-lead">Ефим Александрович Вагатов форума Ёмвош округ Белоярской район Казым вош эӆты ёхтыӆыйс. Теневой театра ханты монсят ураӊан хорат ханшаӆ. Хоӆна «Касам ёх» музей хоятата емаӊ хатӆат ӆэсятты нётаӆ: ханты йис уӆапсайт этаӆтаӆ, якаӆ, арыйӆ.</div><p>Ефим каматса ясаӊ ӆув эӆтэӆ ястас: «Ма ма сирэман рупитӆам, дизайн сирн рупатайт вуӆам. 2015-мет таӆ кеман няврэмат ураӊан оӆаӊ монсь ӆэсятсув па этаӆтысув. Си порайн си вер нопса ёхтас, исхор пиӆан ёнтты.</p><p>Оӆӊа ма хорат нэпекан ханшӆам. Си юпийн компьютеран мет ай сюӊкиет ӆэсятӆув па лазерной станок хуват эватӆаӆӆув. Сяӆта си хор картон нэпек юпийн ӆонсьӆа, фонарик тутан хутӆыӆа па хот питара ющтам нови сохан этаӆтаӆа.</p><p>Там форуман имидж харан рупитсам. Ты проектӆы ёхатсам, нэпекӆам китты кум ант шитсам. Ма «Этно-кузница» ӆэсятам проект тайӆам. Муӊ округеван каматса симась хар уӆ. Ма па симась таха Казым вошан пуншты утсиӆам. Кешет, ай хопат верты ӆаймат, кепӆат ёталты пормасат, ханты нэӊат сэватан, тутсяӊатан, ёх хоятат — антапкеӆатан тайты лыптат верты утсиӆам. Ёрэматы ханты верӆув ӆэсятты».</p><p>Альбина Тырлина ханшам потар</p>

Тусаӊ ханты пох

Йиты таӆ Ямал мувна герой Таӆ олта питӆ. Хор: ЯНАО губернатор пресс-служба

<div class="content-lead">Касаӊ таӆ Ямал мув губернатор Дмитрий Андреевич Артюхов нэӊхэт пиӆна «Прямой линия» верӆ. Тампус, щит ӆапатмет щимащ уйтантопса ус. Нэӊхэт прямой трансляция хуват инщасапсайт китсат, щит — социальной обслуживание, хат, онттыды, леккар па ёс верат пущщи. Там таӆ муӊ хощев хаттэӆ па няврем Таӆӆы лавман ос, йиты таӆ Ямал мувна Герой таӆ олта питӆ. Щитна таӆ хуват Волаӊ ляльна лялесам, итта СВО хоща олам па олты нэӊхэт, Ямал мув ораӊна ар верам, алӊищ ёхтам-геройт пущщи лаваӆта питӆа.</div><p>Лялесты ях ораӊна</p><p>Герои — муӊ кутӆуна оллат. Муӊ ӆувиӆаӆ юхы лаяӆӆаӆӆу, ляль эваӆт ёхтам нэӊхэт, хой па парта итта ант манӆ — нятӆаӆӆу, хой нэӊхэт ӆыӆ пиӆна ропытӆ, ляль манам тахайтна хощ сукатам хатат верӆат, округ развитие хоща нятӆат, ат ощӆат, муӊ ӆув пущщиӆаӆ номлу. Алӊищ холна ар мероприятие ӆэщатман ол. Топ итта щит волаӊ вер ант ол, волаӊ, щит хонты энамты нявремат ӆув пущщиӆаӆ ощта питӆат», — Ямал мув губернатор Дмитрий Артюхов лавас.</p><p>Тамхатӆ Герой таӆ сайт ропытта питас, щита нэӊхэт веритӆат айкеӆ китта, хой пущщи ӆув номастэӆна лаваӆтта масӆ. Хой пущщи нэӊхэт ат ощӆат, йи герой харты сансна ант ат хыщӆ.</p><p>Мет такан йиӆап йиты таӆ СВО хоща олты нэӊхэт па ӆув хаттэӆӆаӆ вантман тайта питӆайт. Волаӊ патриотической форум «Герой уӆапса» верӆа. Пулӊаватна олта питӆ, ловатӆна Ямал эваӆт 150 молтас нэӊху ияха акатӆа, ӆув кутӆаӆна СВО хоща олам нэӊхэт хаттэӆӆаӆ пиӆна, волонтёрат па федеральной экспертат. Тамхатӆ Ямал — ӆув орӊиӆаӆна верты нятапсэтна мет алӊищ манӆ. Муӊ региону хуват хутъёӊ мера ропытӆ.</p><p>Няврем тайты ныӊат эӆты</p><p>Ямал мув ныӊат хольмаӊ таӆ маса тайты алаӊ нявремӆаӆ ораӊна хуӆам миллион соӆкувайна сохаптаты питӆайт «Молодая семья» программа хуват. Ныӊат, хой мули 36 таӆ эваӆт мантсат па кимет, маса холмет няврем тайӆат, ох нятапсэӆ йи миллиона хайӆ. Иволап кат няврем тайты ныӊат ораӊна ох нятапсэӆ кат пус ар олта питӆ, щит пущщи губернатор ищи «Прямой линия» вермаӆ порайна лавас.</p><p>Щи мера 2025-мет таӆ эваӆт ропытта питӆ. Щиты Ямал мув кощайт муӊ хощев няврэм сэма питты вер таӆ сыс ӆапат щёрс моса эӆатта ӆытӆэӆ.</p><p>«Щимащ цифра муӊ хощев камантсы хыщам таӆ сыс ос, иӆ ант питас, итта па Ямал ищипа алӊищ кепа манӆ, топ щи цифрайт йи аямата питсат. Ма номастэмна, щимащ нятапсэт верман, нэӊхэт эӆты кон питӆ няврем энмаӆта», — Дмитрий Артюхов лавас.</p><p>Щёхар тыӆащна айкеӆ ёхтас, Ямал мувна 2024-мет таӆна ертъяӊ тыӆащ сыс 560 хаттэӆ маткапитал, хат тын хоща тайсаӆӆаӆ.</p><p>Вутн яӊхты нэӊхэт ораӊна</p><p>Ямал мувна вутн яӊхты нэӊхэт эӆты верты нятапсэт эӆатта ант волытӆайт. Ӆув аса шоши мир нэӊхэт ораӊна верты дорожной карта хоща лоӊлат па лоӊта питӆат.</p><p>«Онттыды верат ораӊна муӊ сэӊк ар нятапсы верӆу. Энамты нэӊхэт, хой вузатна онттыда манӆ, подъёмныйт ӆэщатӆайт — нийӆъёӊ щёрс, ӆувиӆаӆ масты щирна пасатта веритӆаӆӆаӆ», — Ямал мув губернатор Дмитрий Артюхов лавас.</p><p>Колледж етсаты выпускникат хат митаӆаты тынӆаӆ сохаптата питӆайт. Яӆап таӆ тыӆащ эваӆт каӆаӊ нэӊхэт йиӆаптан партонна понам ветеринарной аптечкайтна маӆайт. Санавиация пиӆна сэӊк такан лайм инщасапса ӆырамса. «Чумовой капитал» кимет няврем тайты юпина мата питӆа. Дошкольникат ораӊна подготовительной классат пунсӆайт.</p><div class="content-new-image"><img alt="pic" src="https://storage.yandexcloud.net/ym-sites-static/73e183e0-fe3.webp" style="width:100%" height="1440" width="2560"/><div class="content-image_child">Вутн яӊхты нэӊхэт эӆты верты нятапсэт эӆатта ант волытӆайт. Хор: Вера Лонгортова</div></div><p>Мув вантман яӊхты нэӊхэт</p><p>«Ямал мувна туризм сэӊк ямас ропытӆ, энмаӆ. Муӊ региону ораӊна щит ун онтас туӆ.</p><p>«Мув вантман яӊхты нэӊхэт ораӊна муӊ региону сэӊк ар хорамат тайӆ. Йи пелак эваӆт щит — такан энмам вуӆ васат, хата уӆапсайӆ ӆащкам, кимет па — ар таӆ акмам уӆапса щир», — губернатор лавас.</p><p>Мойӊ хоятат ёхтыӆыты онтасна ар йиӆап ропытты таха нэӊхэт ораӊна этӆ.</p><p>«Айӆат ёх хаттэӆ»</p><p>2025-мет таӆ эваӆт «Айӆат ёх хаттэӆ» программа йиӆап щирна ропытта питӆ.</p><p>Йиӆап йиты таӆ эваӆт щимащ ох нятапсы няврем тайты юпина топ мата питӆа, карра щимащ ант ос. Хой 2025-мет таӆ яӆап таӆ тыӆащ эваӆт няврем тайс па Ямал мувна ол, щимащ нятапсына мата питӆайт. Щи томпына, «Айӆат ёх хаттэӆ» программа хоща лайты ораӊна нэӊху молтас хат ант тайта масӆ.</p><p>Карра щирн маты нэпек 2027-мет таӆ ван хатӆап тыӆащна иӆ лайӆӆа. Хой мули щимащ нэпека ӆоӊаӆман уӆ, ӆув орӊиӆна олмаӆ щирна хыщӆ.</p><p>Вера Лонгортова хансам потар</p>

Ясаӊ китыӆыйс, еӆӆы питты верат постыӆыйс

Кашӊ порайн ханты няврэмат ёхтыӆыӆат па ӆув ӆэсятам проектӆаӆ этаӆтыӆат. Хор: Альбина Тырлина

<div class="content-lead">Там порайн энамты няврэмӆув шеӊк ханты ясаӊан ант потартӆат, туп самӆаӆан рут ясӊеӆ утаӆтыты па ханты уӆапсаев еӆӆы туты ӆытӆайт. Симась уйтантопсаята кашӊ порайн ханты няврэмат ёхтыӆыӆат па ӆув ӆэсятам проектӆаӆ этаӆтыӆат. Тата форуман оӆаӊ пуш уӆам ханты ёх эӆты потрэв еӆӆы туӆэв.</div><p>ЯНАО Правительство хося стажировкайн уӆ</p><p>Муравленко вош эӆты си форума Семён Мултанов ёхтыӆыйс. Ин ӆув Пулӊават вошан «Я молод» ЯНАО Правительство ӆэсятам яӆап проект хуват стажировкайн уӆ.</p><div class="content-new-image"><img alt="pic" src="https://storage.yandexcloud.net/ym-sites-static/e65c2962-6de.webp" style="width:100%" height="1107" width="1969"/><div class="content-image_child">Семён Мултанов ЯНАО Правительство ӆэсятам яӆап проект хуват стажировкайн уӆ. Хор: Альбина Тырлина</div></div><p>Хоты рупатая па форума питас, потар тус: «Ма няӆ пуш «Российский Север» форума нэпекӆам китыӆысӆам. Няӆ пуш ант вуйӆысайм.Там таӆан унт ӆор тыӆасян «Я молод» проект этас. Хон мув эӆты ярсот кат заявка нэпек ар направление хуват китман ус. Туп ветхосьяӊ хоят пирыса. Си хоятат кутан ма па Антон Русмиленко, Горка вош эӆты, ханты похӊан питсаман.</p><p>Там таӆан Сургутской государственной университет етшасэм, экологической право специальность хуват юриста утаӆтысам. Сишан природной ресурсат хося округ департамента пирысайм. Практикаев ван хатӆап тыӆась хасям  хатӆат унты манаӆ. Сяӆта каматса ӆувеӆ мет яма этаӆтам хоят округ правительствая рупитты вуӆа. Яӆап таӆ тыӆась хольмаӊ пеӆа ӆапатмет хатӆ эӆты па яӆпа пирыйм хоятат стажировкая ёхатӆат.</p><p>Рупитты еӆпийн актыӆысаюв, инщассаюв, муй рупатаев тумпийн верӆув. Ма аӊкем-асем эӆты потартсам. Ӆув ёрая тайты вуӆыӆаӆ Муравленко па Надым вош кутопан тайӆаӊан. Муӊ няӆ няврэм, хоӆ ханты ясаӊан потартӆув. Там уйтантопса эӆты ястасам. Си юпийн телефон хуват каншсайм па мохты ты вохсайм.</p><p>Там йисан рут ясаӊӆув шавиты вер мет мосман тайӆа. Рут ясӊем ма уятӆэм. Ханты ясаӊан сургутской диалектан потартӆам. Сишан рут ясаӊ пиӆан рупитты хара ханшӆтантысам. Ханты ясӊем еӆӆы туты ураӊан, муй верты мосаӆ, хуӆты утсисам».</p><p>Альбина Тырлина ханшам потар</p><p></p>

Ханты верӆув еӆӆы туты энамты ёх

Манэм каш энамты ёх пиӆан рупитты. Хор: Альбина Тырлина

<div class="content-lead">Стелла Валерьевна Тришкина Ёмвош округ Белоярской район эӆты ёхтыӆыйс. Симась тахайн оӆаӊ пуш ус. Каш верты хотан няврэмат, ун хоятат пиӆан рупитаӆ.</div><p>Муй там вантопсайн вантас па хуӆас айшукие ястас: «Нэмоӆты порайн заявка нэпек там уйтантопсая ант мийӆысам, проект ант ӆэсятысам. Ты участник сирн ёхатыӆысам.</p><p>Ванзеват куртан сэма питсам па энапсам. «Овс хорамат» якты группайн куся нэӊа уӆӆам. Ханты якат якӆув. Историка утаӆтысам. Сишан рупатаем тумпийн, законодательство верат, исследовательской рупатайт сирн рупитӆам.</p><p>Ёмвош округ эӆты яртъяӊ хоят ёхтыӆыйс. Тата ма сообщество харан усам. Манэм каш энамты ёх пиӆан рупитты. Сишан, хоты рупатаем ӆув пиӆэӆан еӆӆы туты, хуӆты утсисам. Ма шеӊк ӆаӊхаӆайм, муӊ куртэван уӆты энамты хоятӆув иси тамась касапсаята ат ёхтыӆыӆат. Нэпекат ханшты па касапсаята китты ат хошсат. Ат ант еӆэмтысат. Сит муӊ няврэмӆув кутан шеӊк ныӆа.</p><p>Хоӆна потрэв тусэв, хоты ёхи ёхаттэв юпийн, рупатаев туты. Тата рупитты хоятӆув пиӆан потар версув, яха уйтантыты, верты рупатайӆув яха еӆӆы туты».</p><p>Альбина Тырлина ханшам потар</p>

Лух Авт

Публикации автора