Лух Авт
Вещката па каркама рупитас
Тата ма ащикем шуӊат эӆты каматса ясаӊ ханшсам. Илья Ефимович Лонгортов — ляль порайн рупитам няврэм, Овс муван хув рупитам хоят. Ветеран труда па ветеран Ямала, Ӆорвош район ям хоят (Почётный гражданин Шурышкарского района) нэматан юкантса.
Ащикем вуӆы хотан 1927-мет таӆан ункер тыӆащ ветхощъяӊмет хатаӆан сэма питас. Ащеӆ — ханты, Ефим Никитич Лонгортов, антеӆ — охаль, Анна Степановна Новьюхова. Ефим Никитич па Анна Степановна ӆапат няврэм энмаӆсаӊан, ӆув кутӆаӆан Илья няӆмет няврэма ус. Энамтаӆ хуват, ӆув ащеӆа вуӆы шавиты нётас. Илья Ефимович няврэм порайн ун хоятат кеман рупитас.
Хоты ащикем потартыйс: «Воӆаӊ Ляль порайн няврэма уӆмеман, ёх пиӆан Пулӊават вош унты хуӆ, нёхи вуӆэӊ ухаӆн таӆсув. Ёхӆы мантэван, вош мохет ураӊан нянь верты ӆант тусув. Ӆуӊ порайн Кеван вуӆэт шависув. Хоӆна ляль таӆатан вой веӆман усув».
Ныйем Любовь Ильинична Рохтымова каматса ясаӊ ащеӆ эӆты ястас: «Ащем 1950-мет оӆаӊ таӆатан колхоз «Верный путь» яртъяӊмет тащ хотан вуӆэт шавиман рупитты питас. 1961-мет таӆан совхоз «Мужевской» верса. 1960-мет таӆ эӆты 1985-мет таӆ унты яртъяӊмет тащан кущая рупитас. Щита кущая уӆмаӆан, ӆув тащ шавиты ёхӆаӆ иса яма рупитсат, тащаӆ кашӊ таӆ норма хуват яма манас. 1977-мет таӆан яртъяӊмет тащ шавиты ёх кат щёрас пеӆа хольмаӊ няӆ вуӆы хорсат. Нёхеӆ няӆъяӊ пеӆа хуӆам тонная хойс. Тащ шавиты ёх ӆаварт уӆапсайн, щит шеӊк ям рупата. 1985-мет таӆ эӆты 1988-мет таӆ унты ӆапатмет тащан вуӆы шавиман ус. Ащем вуӆы шавиты рупата верат шеӊк яма уятсаӆӆы па энамты ёх вуӆы шавиты утаӆтасӆы. Щи юпийн пенсияя манас.
Нык охаӆмаӆ юпийн, Илья Ефимович Овкуртан хот верас па Хорьер куртан паварт хот опсас. Хорьер куртыеӆан уӆты питас. Кашӊ таӆ вуӆыӆаӆ утщая катӆысӆы. Куртаӆ пуӊаӆан вуӆы хот ӆонщиӆыйс па щи лепан таӆ хуват каӆаӊӆаӆ шавиӆыйс. Ӆуӊан куртаӆан хуӆ веӆман ус.
Ащем вещката па каркама рупитмаӆ ураӊан, яртъяӊ меваӆ посан па ар ишак нэпекан мойӆаптаса».
Ащикем Илья Ефимович па антимем Елена Андреевна Лонгортовӊан (эви опращ нэмаӆ Тогачева) хут няврэм энмаӆтсаӊан: хуӆам эви па хуӆам пох. Няврэмӆаӆ кутан, вет хоятаӆ вуӆы шавиты рупата пеӆа мантсат. 2013-мет таӆ щёхар тыӆащ хус ветмет хатаӆан ащикем антома йис.
Илья Ефимович Лонгортов хув, ӆаварт уӆапса ус, щи юкана ӆув иса нопсаӊа па вещката ус. Муӊ — ӆув няврэмӆаӆ, хиӆыӆаӆ па хиӆы няврэмӆаӆ иса ӆувеӆ ям ясаӊан нумты питӆэв.
Валентина Рохтымова ханшам потар
Авторы
Лух Авт
Темы