Лух Авт
Хоты ай куртатна олапсы манӆ
Щиты ки номасман, мала ай курт олапсы пущщи йиӆап ясаӊ лавта рахал. Касӊ хатӆ йи щирна манӆ: щёс иӆ лайм хорпи, ныӊат хат ӆыпи ропата верӆат, яхат хатхощаӊна веемаӆат, ӆысӆаӆ вантта яӊхлат, хой юн пеӆа хуӆ нисыта яӊхал. Топ пора порайна йи матты хатна вуӆ вас эваӆт рут хоятӆаӆ ёхтыӆытэӆна, щи порайна, ищирна манты хатӆӆаӆ еса па ёс хуват манӆат.
Курт олапсы — мет ям олапсы. Щит топ щи порайна мастата рахал, хонты нэӊху ӆув сэмӆаӆна сыяӆаӆӆы. Щи порайна топ мастата рахал, холна хыщсат нэӊхэт, хой аӆ, сытам олапсына ол. Па щирна мули олта ант веритта питӆ.
Зелёный Яр курт Приуральской район пеӆа ӆуӊтасӆ, Пулӊават эваӆт хутъёӊ километрайна лайӆ. Хонты кепа нэӊхэтна там пухар курт верты тахайи пирыйм. Паӆ рэп эӆты, Пуӆъёхан сыӆна, вуты киӆӆан па хорам похлыйи ор сыӆна лайӆ.
Алаӊсахат ким эттэнна, сытам, йи паляӊсый антам. Товына, хонты холна ланщ хойӆ, камн нэӊху антам. Ӆув ланщ лалты лаяӆӆаӆат, щи порайна щи ар ропата этӆ, хой хатхощӊаӆ осыта питӆ, хой картошка аматта, яхат хаплаӆ ӆэщатта пинтщаӆат. Яхат холна сэӊк вас ёхатты пора лаяӆӆат.
Хонты кепа Зелёный Ярна мус хат ос, щи порайна нэӊхэт ораӊна ропытты тахайт осат: хой мусат вантман тайӆ, мус посты ныӊат, пам сэварсат. Ӆуӊан нэӊхэт Ас пеӆа хуӆ веӆта тотлисайт. Хой хувви манта ант ки ӆытас, Тайпохална ӆуӊ сыс осат, щита хуӆ сараӆсат, рэх ванщсат. Сэӊк ям порайт осат. Иттам кепа нэӊхэт аӆ ант оллат, ӆытысук хуӆ веӆӆат, ищиты орна рэх ванщта яӊхлат, веӆпасӆаӆат. Топ похална олман пора айӆта манӆ, ант тэрмаӆаман.
Вера Лонгортова хансам потар
Авторы
Лух Авт
Темы