Няръяна Ӈэрм
Тына’’ пили’’ ӈэрм’ явнана’’ хадырта’’
Ваеравы по’ пудана яляхана Иван Поликарпович Латышев «Канин» общинахана манзарана ненэць’ ӈарка ненадумда’’мам’ Россияна’’ Президент’ Почётной грамотам’ ня’’мась.
Иван Поликарпович илеванда ямбан’ хойхана мюсерта, ӈока по’’ ямбан’ тэхэ’’на мэ. Ивъер’ иланд’, манзаян’ сырӈа. Ненэйвана харта ныхыта ена. Пухуцяда’ ӈод’’ вэсаконда’ хэвхана сава нядаӈгода, хой’ илам’ теневана. Пыди’ мале’ пон ӈобкана илеӈаха’, нюди’’ ӈарка хибяри’’. Александра Анатольевна вэсакомда хусувэй серкана нядабида, ӈока по’’ ямбан’ мяд’ манзаи пэрта не. Хоювна мюсермам’ нюдякоходанда теневада. Нисяда, небяда ӈобтарем’ тэхэ’’на мэвэхэнзь. Небо’ сидта ӈани’ ненадумдаць. «Почётная чумработница НАО» нагрудной знакм’ ня’’мась.
Округна’’ ерв тандая’ «Канин» общинахана ты пэртя’’ сывыдава’ ян’ тэворӈась. Хоювна мюсертаха’’ ихид минда’’ вади тэврась. Тикы’ поӈгана ӈобкана пяванда серодо’ тасламбиць.
— Хойхана иланд’ мэёвна сырта’’ хибяри’’ манзара’’. Вадёдана’’ ӈацекы’’ сиддо’ мание нерня’ миӈа’’, пыдо’ хусувэй серт’ ивъер’ пэрӈадо’, — тарця вади округна’’ ервота хэтась.
Латышев’ тэнзм’ мэта’’ харто’ явнандо’, Канин’ выӈгана сян юр’’ по’’ ямбан’ мюсерӈа’’. Пыдо’ невхы’’ паӈгхат перена’’, тэта’’ ненэця’’. Александра Анатольевна, Иван Поликарпович Латышевха’ хойхана мюсерӈаха’. Пыди’ нисянати’, небянати’ серм’ нерня’ минреӈаха’. Ӈавнанда тарем’ ӈэвандарха нись ӈа’’. Иван Латышев школамда ёльце’’махаданда Санкт-Петербург маркана Полярной академияхана тоходанась, 1996 похона ёльцедась. Александра тамальӈгана ӈани’ ӈарка маркана Герцен’ нювм’ нюбета университетхана тоходанавысь. Пуна’ мале сян’ по’’ ӈацекы тохоламбавысь. Валакада, харад’ манзая ивнанди’ хадри’’ нивакы ӈа’’. Хойхана соявы, вадёвы няхаюна’’ иринати’, нисянати’ сер’’ нэкалӈась. Пыди’ харад’ илм’ хаединзь, мюсерць пядинзь. Теда’ ӈока по’’ ваера’’. Ивнанди’ ӈэда иламди’, харти’ явнанди’ мюсерць, нюди’ вадабась мэ’’ӈади’. Хусувэй минрена манзаян’ ивъер’ сырӈаха’. Александра мяд’ серм’ минрена, мел’’мана сэдорана неӈэ хая. Иван Поликарпович ӈэсы’ ервӈэ тара.
Манзаидо’ сававна пэрта’’ хибяри’’ иланд’ вадёданана’’ ӈацекыдо’ табедамби’’. Ненэй ненэця’’ ватовна иле’’, харто’ вадамдо’ мэ’’ӈа’’, хари’’ тэнзандо’ ила’ саирм’ тенева’’, лэтамбидо’. Ямдо’ ёльце мэнедо’, тыдо’ сяӈа’’. Нюдо’ тарцям’ маниесь вадёвы’’, пыдо’ тадри’ ты пэрма серм’ нерня’ минреванда’’.
Тарем’ ӈэб’’нанда тына’’ пили’’ ӈэрм’ явнана’’ хадырта’’, серм’ теневана’’ ненэця’’ сиддо’ маниеӈгу’’.
Юлия Талеева’ падвы
Авторы
Няръяна Нгэрм
Темы