Тыдо’ хабарпи’’

Хахаяда яля’ ӈэрёй хабартава’ нямна сава юнм’ падыбиваць. Ма’’ним’’ округханана’’ хабартавахана ня’’марпада тыто’ ӈамзам’ мирелевэдо’. Хэвада сава, хадерцяда ты’ ӈамза мирта — самляӈг юрӈэ хэвысь. Нябимдей категориян’ таславы — сидя юр’’ самляӈг ю’’ еся ӈэӈгу. Ты пэртя’’ тарця сава юнхат ихиня маяӈгудаць. Тарця ӈэвамда, нивамда хар’’на’’ сэвханана’’ манэць таславаць.

Приуральской районхы «Паюта» хабарталаван’ мале вэба’ иры’ нюртей яляхана тыдо’ тэврамбасетыдо’. Тюку по’ ӈод’’ ӈани’ тарцясь. Нердена хабарманда хасаваюр’’ тым’ мэтава’’ ирына’’ нердена яляхана танэйдонзь. Тюку ялэ’’ пиркана ненэця’’ ӈокам’ яхавыць.

Сидяӈг: М. Яр’ тадтавы’’

Хэвы си’’ив яляхана ӈани’ таня’ тэворӈаваць. Тамальӈгана харе’’ тыда пэртя Степан Лаптандер хасаюр’’ си’’ив тым’ тэвравысь. Тикахатата ӈэвахы ӈамзаӈэ си’’ив ю’’ тэнда ӈамзам’ таславы’’. Ӈанидо’ мал’ нябимдейӈэ хэвы’’. Тыда Константин Иванович Лаптандер ня’’амбада КФХам’ няд’’мяць мипида. Степан ӈамгэ’ пиркана тамна самляӈг ю’’ тым’ тэвраван’ харва. Тыто’ ӈамзи невхы мирето’ сер’ ня’’марпавыдо’. Ӈамза мирелева’ нямна юнм’ намдаванда мальӈгана ты пэртя идя вомдарахась. Ервона’’ вадам’ ӈадимдебато’ ӈод’’, ты’’ ӈамзам’ тедари’ тамна невхы мирмнанда ханлавэдо’. Тарем’ ӈобт’ тасалко’’махадандо’ тарця иӈут’ ха’’мыдаць. Ервона’’ ватондо’ ӈадиво’’махад пэ’ тер’’ тыдо’ ихиня тэврамба тедари ӈэвадаӈгуд’’. Вато’ ныхын’ ха’’амвам’ ӈатеӈгу’’. Теда’ ненэциена’’ ӈока есям’ ёпи’’. Степан ма’’нисяв:

— Тикада вэва, тына’’ ӈамза’ мирм’ тикаривна нидо’ тамбю’’, вадамбой’ ӈэдарамбидо’. Еся’ тарабцо пили’’ со.

Яля’ еркана хабартана’’ ненэця’’ Степан тэвравы ты мал’ хабармыдонзь. Сеӈгалава’ мякато’ ядна’’ поӈгана ненэй ненэцие нини лаханако ня’’ӈадамзь. Вячеслав Ламдо ма’’нисяв:

— Тюку яля’ хасаваюр’’ тым’ тэвраць. Тикадо’ саць ӈока ни ӈа’’. Нянана’’ яля’ вэс манзая. Сямянхат ӈока — сидя юр’’ мат’’ ю’’ тым’ хабарпасетыва’’, та ёльцяӈгана ненэсянда пэдасетыва’’. Тикава’’ сававна тохолавы серма’’, ӈадьбята тамна сэвна’’ хая серта пиртава’’.

Таняна манзарана’’ ненэця’’ илесь ёдо’ сава ӈэвы. Тэврамбада ты’’ яӈгоб’’, тэри ни’’ ӈамдю’’, сёбар’’ сянакубц мэ’’ӈа’’, хоювна ядэрӈа’’, ханяӈы’’ тэри нылана’’. Недбядо’ сава. Хабартанаӈэ тарана’’ ӈокадо’ ӈавнандо’ пон’ тэхэна мэвы’’, серо сававна теневыдо’. Тюку по’ предприятияханандо’ мат’’ юр’’ тонна ты’ ӈамзам’ ӈыдабато’ серо’’ӈа.

Пырдари’ ӈэдалёвана’’ мальӈгана юнм’ толаваць, округна’’ ӈэвахы ерв ма’’мысь, мале тюку поход хабарталвахана тына’’ ӈамзи едэй мирмня ня’’марпаӈгудо’. Теда’ тыдо’ мале хабармы’’ ненэцяӈг’’ ня’’амвы есьто’ ирмня маси’’ ӈани няд’’ма’ есям’ салдаӈгу’’.

М. Ярой’ падвы

Сидяӈг: М. Яр’ тадтавы’’

Авторы

Няръяна Нгэрм

11:38, 23 сентября 2024

Темы