Няръяна Ӈэрм
Тохолкова’ похондо’ хамеку’’
Пилю’’ иры’ пудана ялэда миӈаць. Мань таӈы ныланавами мэ’’мани сер’ Ӈыд хардан’ тэвыдм’. Ӈавнанда тюкона тохолкурӈадамзь. Тикы’ хавна нини’’ таняна иле’’. Ихинани школам’, интернатм’ манэ’’ман харвадамзь.
Харад’ поӈгы несэймы
Советской нюбета ядэлава’ сидя хэвхы хаця терсялмы. Невхы ӈарка школа мядэхэртада яӈгу. Е’’эйданда ӈацекы’’ ныланава’ ям’, футболхана, волейболхана сянакова’ ям’ манэ’’ӈадм’. Сюрберта’’, тэри сянакурта’’ ӈока’’. Нянани ядэрмы нями хибя’ ню ӈэвамдо’ ваде’’ӈа. Небянадо’, нисянадо’ теневавын, тохолковани мальӈгана нядни ӈаркавна нюдяць. Тамна сомбовна манэць мале сян невхы мяд’’ яӈговы’’: клуб, почта, совхоз’ контора, палытани’’ харад. Яха’ лаӈг’ някуна «Нумги» лапка’ мядырма ӈувэйӈэ вадёвы. Хэвувнани машинаха’’на ӈэдалёрта’’ тэри вырнэрӈа’’. Тосарка ядэць таравы. Неноховавна ӈацекы’’ лэтрёбто’ сава. Ненэця’’ паромба ту ӈано’’ нулаӈгалаван’ миӈа’’. И’’мана ӈэдалёрта лапка товы. Харад’ тер’’ тэмдорць варемдо’ мэ’’ӈа’’. Ӈавыдота ӈавар’’, имбытад’’, тохоця’’, мяд’ мюй ӈамгэри’’ саць нивы’’ мирес’’. Хардаханандо’ ӈэда лапкахат саварка, саць ӈокавна есям’ нин мит’’. Звероферма, хорови’’ мяд, сэдорани’’ не’’ манзаралва’ харад мале ӈаха’’на яӈгу’’, ӈомаридо’ ядо’ хаёвы’’. Ехэрана ненэцяӈгав нида хамедаӈгу’’, ханякуна ӈэвакы’’.
Едэйвана мивы хардадо’ ӈани’ таня’’. Сёбар’’ ненэця’’, ӈацекы’’, тэри пыхыдадо’ высылпаван харвана’’ спортивной комплексхандо’ ядэрӈа’’. Ныланава, ненадо ялэдо’ мэць Культура хардаха’’на ма’’люрӈа’’. Невхы лекар’’ мято’ хэвхана мирта’’ манзара’’, едэй харадм’ мимба пявы’’. Тедари’ нусь ямда салмаравы, мирць ӈаворидо’ тэвравы’’, тикыдо’ ӈарка’’я ӈонерӈэ ӈади’’. Хуримна трактор’’, талбэй таб сехэрым’ сертабада’’ машина’’ ӈэдалёрӈа’’. Теневана няни вадавна, няхар’’ по’ ямбан’ харад поӈгым’ ӈарханда ненэй мэё сехэрэӈэ сертаӈгудо’. Тарця ӈэбта ӈули’’ маймбаӈгудм’, тедахав хурина сэр’’ таб, ӈэл’’ сыра’ то’’олха, таӈга ядва’ сер’ ни ӈа’’.
Иле, тохолко хардадо’ хамеды’’
Едэй школадо’ — няхар’’ яӈор’’ ӈэда харад. Хэвхэда ёльце сомбой. Хуркари’’ ӈамдэд’’ вадёда’’. Е’’эмнани школамдо’ ӈадимдембавы Лилия Юрьевна Артеева лахана: «Тюку ӈамдэдо хар’’на’’ ӈацекына’’ няць вадабинаць. Нара’ ямбан’ ядембада харад’ мюня нюдякоця ӈамдэд’’ лэкоцяхат вадавына’’. Теда’ я’ нийм’ тэри савумдамбидо’. Паской’’».
Школаханандо’ таӈго, яля. Теневабцудо’ ӈокамдава’ няю’ хусувэй ӈамгэдо’ таня. Ненадовна тохолковандо’ ирманя 9-11 классахана мэна’’ нерняӈы илаӈганандо’ тараванда манзаи тохоламба пирӈа’’. Не ӈацекы’’ няхар’’ — мат’’ потна нюдя нидо’ маниенаӈэ тохолку’’. Ханяӈыдо’ сэдора’’, ӈавар пиремба тоходана’’. Хасава ӈацекы’’ «сантехник» сертабада манзаи торомдамби’’. Тарем’ тикы теневабцудо’ няд’’маӈэ мэтыдо’.
Музейханандо’ яӈга 1941-1945 похо’’на ӈэвы сайнорома’ нямна ӈэда лоходо’ танявы. Сайнормы иринато’ сидяӈг манэ’’ӈава’’. Того Евгений Григорьевич, Докучаев Виктор Виссарионович, тамна ӈани’’. Нянани ядэрмы не ӈацекы Окотэтто Юлиана ӈарка иринда сидяӈгм’ ӈадимде: «Терентьев Василий Михайлович — небяни ири. Сайнорма’ пуд мяканда товы. Пыда сита пили’’ тенева’’. Е’’эмнана’’ ӈарка таром’ ха’’авравы». Афганистанхана мэвы’’ нямна ӈани’ паднавы’’. «Жизнь героя» уголокхана СВО’ няна ява’’ лэтрамбада’’ нито’ сидяӈг ӈыдавы’’. Теда’ ӈока Ӈыд’ тер’’ таняна мэ’’. Ӈацекы’’ мал’ теневыдо’.
Библиотека’ ёльцянд’ тэвыни’. Ӈавэдана сидя хасава ӈацекым’ манэ’’ӈадм’. Пыди’ сямянхат нерденаӈэ книгадамди’ ня’’муванзь товэхэ’. Женя Нядонги няби Сергей Семенихин лаханаӈаха’: «Тюку по’ учебникни’ ӈокарка’’. Саӈговоӈа’’. Ханзер’’ школан’ минартыни’? Ӈэё, тохолко тараӈгуним’’». Лилия Юрьевна’ вадавна тикы хасава ӈацекэхэ’ ӈули’’ пэдавакохо’ ӈэсетыхы’, няд’’маӈэ тарасетыхы’. Тюку по’ Женя самлянзимдей классахана тохолкода, Сергей тетимдей классан’ ханда. По’ ямбан’ намдувандади’ ӈока.
Интернатханандо’ ӈобтикы едэй пон’ хамеку’’. Хонё лохото’ мюй’’ мале ӈанэды’’. манзарана’’ не’’ варемдо’ мэць пудана серодо’ тасламби’’. Поӈганандо’ теневана нини’’ танявы’’. Мале ӈока по воспитательӈэ тара’’: Ирина Васильевна Яптунай, Ядне Надежда Пыеривна, Соловьёва Светлана Ивановна, Витязева Зинаида Николаевна, Марианна Ильинична Терентьева, Того Антонина Ивановна. Си’’ми «Няръяна Ӈэрм» газетана’’ нямна хонра’’. Ӈудахато’ ӈобкартм’ нивы’’ ня’’ам’’. Ӈобкана таслава’’, почта’ манзарана е’’эмнандо’ ӈэдабтамбада газетыдо’ вэня’ мипавыда. Салехардан’ тэввани сер’ пили’ нерде’ тикы серм’ тидхаледм’: тет иры’ ямбан’ газетава’’ мякто’ тэваӈгу.
Ныланава’ ялэни мэ’’ян, пилю’’ иры’ сидя ю’’ самлянзимдей яля’ ту ӈано’’ нулаӈгалаван’ Виктор Черномырдин нюбета сэр’’ мерета ӈано нултада. Салехард’, Яр-Сале’ ёльцянд’ хэванда’’ паромба ту ӈано’ мю’ тю’’. Ӈэдалэйва’’. Ӈыд’ харад пуна’’ хаи. Яха’ лаӈгхана нуна’’ нина’’ пон сидна’’ маниець.
Автор: Галина Окотэтто’ падвы
Сидяӈг’’: Г. Окотэтто’ тавы’’
Авторы
Няръяна Нгэрм
Темы