обновлено: 12:01, 27 сентября 2024
Няръяна Ӈэрм
Тарана пэндъя’’
Тэхэна мэна ненэця’’ сяхаринда харад’ хэвхана ни мюсер’’. Ӈыхы ян’ мюселмандо’ нерня пыдо’ ӈокамбовна тарана ӈамгэдамдо’ тэмдаби’’. Тарем’ ӈод’’ техэ яхандо’ тэмдосэйдо’ ни’’ тэвор’’. Ӈадьбята ӈавнанда тамна няръяна луци’’ мальӈгэхэд пэндъя’’ таня’’. Тикыд мюсерта ненэцяӈгана тарана няд’’ма’’. Ханзер’’ манзаравамдо’ ервона’’ маниедо’, тарабата тидхалембидо’. Тандаярка’ таня’ Законодательной Собранияна’’ депутат, Эдуард Яунгад ӈэдалёрӈась. Маня’’ редакцияна’’ тер’’ ӈани’ ядэрӈаць.
Приуральской районхана еся сехэры’ ямб’ сер’ ненэцие’’ мюселаби’’ ниня мале сян пэндъя’’ ӈа’’. Луца’’ факторияӈэ ваде’’ядо’. Сехэрым’ мада’’махадандо’ тэри лабкаха’’ ядэрць пирӈа’’. Ӈопойдо’ «Стёпина»м’ нюбе’’ӈа. Тэхэна мэна ненэця’’ ервамда ёльце сававна теневадо’. Таӈота, сырита сехэрэдо’ таня’ ни тухур’’. Пэндъям’ Владимир Алексеевич Стёпин ня’’амбида. Невхы 2002 поход тидхалембида. Харта ӈавнанд Брянск мар’ няд илебей ненэцяӈэ товы.
Пэндъядо’ мале ӈарка, лабкадо’ таня. Ӈули’’ еся сехэры’ ядхана ӈа. Лабкаханандо’ сяхари тобат ӈод’’, хусувэй тарана ӈамгэ’’ таня’’. Саць ни’’ мирес’’. Фактория’ сидя хэвувна та’ нядэна’’ мяд’’ хаюрӈа’’. Тенева’’, лабкахана хусувэй ӈамгэм’ хоӈгу’’. Теда’ Приуральской районхананда сеӈгалава’ мята таня. Хусувэй яля хибяхав турӈа.
Владимир Алексеевич ненэцие сававна теневыда. Ты пэртя’’ няндо’ нямна яля’ ня’ ӈэда вадари мэ’’ӈа’’. Пыда ӈод’’ хибяхартм’ тэри ни ӈэдарамбю’’. Нюсавэй, иринасавэй теневыда.
Няндо’ тэвормана’’ мальӈгана Байдарацкий совхоз’ хасаваюдимдей ӈэсы’ тер’’ ӈаврандаць. Пыдо’ таня тэворпато’ лапкарин’ ни’’ мий’’. Пудана мале сян по еся хано мэта’’ хойхана ӈокама’’. Тикыд есяндо’ тахараб’’, тухуна пиремба серо’’ӈа’’. Тарцям’ факторияхана хомби’’.
Еся сэдыбада Михаил тарем’ мась:
— Сельбя’ няна хусувэй яля’ хибяхав турӈа, теда’ квадроцикл мэта ӈока’’ма. Тахаӈгабато’ ханяӈэхэна парадамба тара’’, хойхана тарцяр яӈгу, ӈадьбята пили’’ манзаями таня. Факторияхана мирци’’ сертабин, хибяхартад есям’ нидм’ ханла’’. Тикахад ты пэртя’’ тенева’’, сяхари’ тахарабто’, сидто’ етри’ тюкохона нядаӈгу’’.
Владимир Алексеевич тамна Ямальской районхана «Усть-Юрибей» факториям’ ня’’амби. Хахаяда яля’ сидя вездеходда ӈаварм’ тераць таня’ ӈэдалаванзь пэрӈась. Пыда тарем’ мась:
— Тюкона мюсерта ненэцие мал’ сававна теневын. Ханяӈэхэна нянандо’ ӈамгэ таравам’ таминдо’ няни тидпой лахана’’. Маня’’ тэврамбина’’. Ӈодь няд’’мадамдо’ пюнахав’’ няна’’ турцеты’’. Хибяхартамдо’ тэри нива’’ ӈэдарамбю’’. Тарем’ ӈобкана ӈока по’ сензувна илева’’, манзарава’’.
Еся’ сехэрэвна тамна тяха’ ӈэдаламахадана’’ ӈани’ ӈоб’’ факториям’ ховаць. Тикахав «Паюта» хабарталва’ хэвхана ӈэвысь. «Ензор-яха» пэндъяха’ хардада мале ӈока ӈэвысь. Таняна няньм’ ябцыби’’, ӈацекы школахана тохоламби’’, лекар’’ мято’ манзара. Тарабата мерета еся хан’ бензинад ӈани’ тэмда пирӈа’’.
Тев’ ёльцяӈгана ты пэртяха’’на тарця фактория’’ ӈули’’ тара’’. Пыдо’ ханото’ терсяло’’махад тарана ӈавэдамдо’ тэмдаби’’. Пуна’ тяха’ мюсел’’махадандо’ салабанда няӈоро’’ма’ ӈэсонд’ хардан’ ни’’ тэворт’’.
Марина Ярой падвы
Сидяӈг’’: М. Яр’ тадтавы’’
