Няръяна Ӈэрм
Тарана няд’’мадамдо’ ня’’амвы’’
Ямал’ терна’’ «Президентский фонд культурных инициатив» нюбета конкурсахана мэвы’’. 2025 похона ӈадимдеванда’’ серото’ няю’ си’’ив грант’ еси’’ няд’’ми ня’’амвы’’. Ӈокханда юкад вата си’’ив миллион есям’ нэкалмы’’.
Индо’ харвабцо тодо’’ харад’’ няна, Приуральской няби Пуровской районха’ няна ялян’ ӈадимдеӈгудо’. Нерня’ хэвы’’ поӈгана няхар’’ НКО, тет муниципальной культура’ учреждения. Сямянхат Данила Степанов сертавы «Северный винил. Поколение НУр» проектм’ саву’’мы’’. Новой Уренгой’ тер’’ нямна, Ямал’ нямна ӈэда сё’’ «аранжировкад» виниловой пластинкаха’’ падаӈгу.
«Минлей» нюбета ӈэрм’ тер’’ организация сидндет миллион’ пир’’ еси’’ няд’’мам’ ня’’амвы. Тикы’’ есяха’’нато’ «Мяд’ паӈг’’» («Очаг», «Корни») фильмам’ серта тасламби’’. Ӈэрм явна мюсерта мяд’ тер’’ илам’ манэ’’лабтаӈгу’’. Ненэй ненэцие’’ нямна ӈанисэй тэнзам’ мэта’’ ненэця’’ намдаӈгу’’. Тикы’ серо’’ Галина Ачембоевна Матрас минрейда. Ӈэсыдо’ Салехард ядхана ӈа, организациядо’ мале пон манзара.
Аксаркахана «Легенда в стихиях тундры» спектакльм’ сертаӈгу’’. Пуровской район’ няна «Путешествие в мир ненецких игр и игрушек» комикс ӈадимда.Ноябрьск’ няна Ӈарка Победа’ сидндет ю’’ по’’ няю’ «Маленькие герои большой войны» тарана’’ спектакльм’, хусувэй хибя таром’ ха’’аврамба’’мам’ манэ’’лабтаӈгу’’.
ПФКИ тасалкоди’’ комитет’ ӈэвахана мэна ерв Сергей Кириенко тарем’ лаханавы: «Тюку по’ манзаяндо’ няю’ харто’ есядо’ салдамбада нерня’ пэрӈаваць. Ямалхад грант’ еси мато’’мы’’ ненэця’’ организациядо’ няби партнёрдо’ ӈобанзер’’ 18,5 миллион’ пир’’ есявна нядаӈгу’’».
Россияна’’ сидндет ю’’ мат’’ яхад ӈэда 1016 проектам’саць саву’’мы’’. Ӈокханда няндо’ 5 млрд 730 млн есям’ ми’’мы’’. Нерня’ хэвдавэй нидо’ юраӈгу’’. Пыдо’ е’’эмняндо’ яра’ иры’ 6 яля’ ӈэсонд’ ӈани’ ӈобтикы тарця яӈга конкурс минда.
Анна Яптик’ падвы
Авторы
Няръяна Нгэрм
Темы