Няръяна Ӈэрм
Поӈгадо’ халяхат пан’’ӈая
Яна’’ тиӈгывна неняӈг’’ ирыхына халям’ хадабада’’ хэбидя ялямдо’ ядабтамбасеты’’. Маня’’ яханана’’ ёртя’’ ненэця’’ ӈока’’. Ӈадьбята неняӈг’’ иры’ нердена ныланавахана халям’ пэртя’’ округна’’ ӈэсыхына ӈобт’ ма’’люрцеты’’. Хуркари’’ таӈоцяӈгат мяд’ терсавэй’’ хардаха’’ турцеты’’.
Нерденаӈэ Тасу’ явхана Сэхэряв’ няна ёртя’’ ма’’люрмыць. Ӈухукодрев’, ной панытана не’’ нюкцидо’ вадарць таславы таӈоцянд’ вэрнаць. Хубтыхы ю’’ час’ пиркана, сёбар’’ хасава няби не’’, пирдырманзь хамекулыдаць. Харванидо’ мякнандо’ таранадамдо’ тэмдабиць. Неняӈг’’ ӈока ӈэб’’ ӈод’’, хибяхарт пуня’ нись ӈа’’. Пирдыраць пэвандо’ мальӈгана сырта ненэцие’’ поӈгана ӈобкад тёрӈэ хаясь.
Выӈгана илена не’’, мяд’ манзаямдо’ пэраць пирдалевэдо’. Пыдо’ ӈамгэртан’ выдаӈгана’’ ни’’ ӈа’’. Поӈганандо’ ӈод’’ ӈани’ сёбар’’ танявыць. Сюрберць пирдырӈаць.
Товы ӈацекэця’’ ӈани’ ниць таӈг’’. Сидя ян’ тяро’’махадандо’ меретидо’, ныхытидо’ ӈобт’ еремыць. Ёльце’’мяхадандо’, хибяхартамдо’ мядонзэйсипой’’ ниць юр’’. Хусувэдо’ мэкад сянакоцям’ мяканда тэврась.
Автор: Марина Яр’ падвы
Авторы
Няръяна Нгэрм
Темы