Пяванда манзаидо’ тохоламбаӈгу’’

Округханана’’ илебей ненэциена’’ тохолкулваханандо’ сяӈок, ханяна тохолковамдо’ ӈокдамда таславы’’. Тюку по’ Новой Уренгой’, Ноябрьск’, Саляӈгардахана ӈэда колледжха’’на тохолкованда сямянхат ӈока ӈэвы’’.

Тарем’ тасла 2 290 ненэця’’ мирци’’ Ямална’’ си’’ив тохолкулваха’’на тохолкода’’, тикахат манзаям’ тохоламбаван’ харвана’’ си’’ив ёнаркад вата падродо’ ӈэдаравы’’. Ӈока хибя’’ я’ тебтм’ нэкалпава’ няю’ тохолковандаӈэ манзаям’ тэравы’’. Яхана’’ турта’’ мядонди’’ манзаям’ тохоламбаван’ харвана’’ ӈани танявы’’.

Фото: М. Яр

Тюку по’ мирци’’ 57 тохолкованда — ява’’ лэтрамбади’ ня’ падродо’ толкованзь мимы’’. Тад пуна’ колледжхана тохолковамдо’ салдамба мэмы мирм’ пуня’ тамбаӈгудо’. Округна’’ тиӈгы колледжхана юкад вата сидя едэй тохоламбуванда манзаи мэвы’’. Тикыдо’ ваднандо’ яханана’’ мал’ тараванда’’ ӈэӈгу’’. Тарем’ тасла вэба’ иры’ нюртей яляхад мале ӈока студент’’ специальной няби технической манзаи тохоламбаӈгу’’.

Округна’’ ӈэвахы ерв’ ватовна ӈэрм’ тер’’ илебей ненэциена’’ ӈани’ няд’’масавэй’’. Пыдо’ е’’эмняндо’ выӈгад ӈэбато’, «тохолкова сертификат» нямарпаӈгу’’. Тарем’ баллдо’’ тянёлеревы’’ ӈацекы’’ сертефикат няд’’мяць тохолко ӈани’ пиртадо’. Ӈокханда округна’’ тиӈгывна си’’ив ю’’ самляӈг сертификатм’ ӈадимдевы’’. Тикыдо’ — Салехардаханана’’, Си’’ив Харв маркана, Новоуренгойхана, Нядаӈгардахана, Тарко-Саляхана ӈэда’’ колледжха’’на тохолко мэць пиртыдо’. Тохолкода’’ иле мядодо’ таня’’. Ембадиро, недбям’ сававна тохолкурпато’ ӈани’ ня’’марпаӈгу’’.

Тюку по’ ю’’ илебей ненэця’’ Ямална’ тохолкулвахана ТЭКхад тидпой (очно) тохолкурпато’ ирыхына сидндет ёнар’’ есям’ ня’’марпаӈгу’’. Вэба’ иры’ тетюмдей яляхана хибя ӈэвамдо’ нюбедо’ намдаӈгуна’’. «Новатэк» сававна тохолкодаха’’ недбяндо’ хавна тамна ю’’ ёнар есям’ мипаӈгу.

Школам’ малевы’’ илебей’’ ненэця’’ манзая’ няю’ тохолкобто’ тара. Луци’’ илам’, серо теневаӈгу’’, ӈока нито’ поӈгана манзара пиртадо’.

Солне Окотэтто’ падвы

Сидяӈг: М.Яр’ тадтавы

Авторы

Няръяна Нгэрм

04:40, 11 сентября 2024

Темы