Няръяна Ӈэрм
Пэдава мяд’ ерв не
Санкт-Петербургхана А.И. Герцен’ нюмам’ мэта университетхана тохолкода’’ ӈэрм’ тер’’ пирибтя’’ помнандо’ пирдырмы’’. Хусувэй по’ таняна «Лучшая хозяйка очага» пирдырмам’ мэ’’ӈа’’. Тюку по’ ӈарка пэвдей иры’ юкад вата сидндетимдей яляхана толаӈгулава’ хардахана ма’’лёвы’’.
Мале сян по’’ тяхана Ӈэрм’ тер’’ институт тохолкода’’ е’’эмня конкурсм’ минре пясь. Тарем’ тасламбавэдонзь: ӈобт’ ма’’лёхоя тодо’’ тэнз’’ не ӈацекы’’ выӈгана, пэдарахана илена’’ не’’ минрена’’ манзаи ӈарка маркана илена’’ ненэцяӈг’’ вадета’’, манэ’’лабтаӈгу’’. Похо’’ ӈадимдембада серто’ нерняри’ миӈа, недамда мале сававна падартада. Сяхаӈгав’ харто’ тохолкулварихинандо’ сертабасетыдо’, тедахав’ ӈанисэй’’ яха’’на мэ’’ӈадо’. Тев’ ёльцянд’ ня’’марпада’’ ӈудато’ тер’’ несэймы’’: еся, кубок мипа пявы’’. Ӈэрм’ тер’’ институт’ ӈэвахана мэна Софья Унру пирдырман’ сырманзь товэхэ’’ тарем’ лаханавы:
— Ӈобт’ тэвава’’ ёльце ӈарка сер’’. Ненэй ненэцие’’, туӈгос’’, хаби’’, чукча’’ вади намдаӈгуда’’. Ехэрана’’ ненэцие’’ илам’ хаця торомдаӈгуда’’, невхы’’ иле’’ми намдаӈгуда’’. Мяд’ ерв не ӈока манзаям’ пирпата серо’’ӈа. Ӈадьбята сямянхат ва’’лёймдо’ тэраӈгува’’.
Пирдырмамдо’ тарана’’ нэвэдо’. Пеӈгабцяӈга’’на пензеродо’ тоибавы’’, няха’’нато’ тороватнарха’’, нидо’ майбтамдарха’’ ӈэвы’’. Тадхав’ сянакованда тет не ӈацекым’ хамы’’. Чукотка’, Якутия’, Югра’, Ямал’ няд ӈэвамдо’ хэтвы’’. Некоця’’ пыхыдато’ нямна лаханавы’’, таравы’’, лаханаком’ ваде’’мы’’, сянакубцм’ манэ’’лабтамбавы’’. Хусувэйдо’ варемда мэ’’мы, харто’ иландо’ саирм’ мал’’ теневадо’, мэнедо’. Харе’’ невхы’’ паӈго нёда, лэтрамба таравам’ ёльце сававна хамэдамбавэдо’.
Не ӈацекы’’ мал’’ пир’’мэдонзь, сиддо’ маниевы’’ пон’ помнандо’ тасалковыць. Сямянхат ва’’лёйӈэ Софья Яндом’ тэравыць. Пыда Тасу’ я’ няд ӈа, мята тер ӈули’’ сававна ваде’’мысь, тикы’ няю’ сита ненадумдаць. Харта пыхыданда нямна лаханаванда мальӈгана мась:
— Мань «Сэхэряв» нюбета яхана вадыдамзь. Таняна ханесетыва’’, халям’ хадабасетыва’’. Не нини’’ ня’ небями сэдора нядабасетыва’’. Небяна’’ табекохо’’ инзелесетыва’’, ӈадьбята сита тотрев’ невхы илма’’ нерня’ минрева’’. Мяна’’ тер’’ сяӈок ӈэвам’ сяхаӈгарт’ нисетыва’’ вадес’’, хэвы. Небява’’ тэрихив манзеты: «Нина’’ сядо теневэйна’’».
Софья тохолкованда хавна таравам’ мэне. Ӈадьбята харта сертавы «Ватане» тарабцомда «Едэй Яля» ансамбль’ ня’ манэ’’лабтавы. Лаханакода хабэвко няби хохорэй’’ нямна ӈэвы. Мядондида тыранийко сянакубцхана сянакултавыда.
Ненэй ӈарка хэбидя ялярахам’ сертавы’’. Конкурсам’ минревы’’ вададо’ тарця ӈэвы:
— Сидна’’ майбтамбавы’’ нина’’ иламдо’ тид’’ нёдадо’, сямян ӈамгэм’ теневавадо’ мякадандо’ миӈа. Ӈэрм’ тер’’ нямна ӈока ехэрана ӈамгэм’ намдава’’. Хусувэй нядаӈговы ненэцянд’ ӈарка вадам’ мэ’’ӈава’’.
Анна Яптик’ падвы
Авторы
Няръяна Нгэрм
Темы