обновлено: 07:53, 19 сентября 2024
Няръяна Ӈэрм
Пэ хоё’’ няна
Та’ ӈацекы’’ тохолковахадандо’ ныланасеты’’. Нисянато’-небянато’ ня’ ядембада я’’амна ӈэдалёрць пэрӈа’’. Ханяӈы’’ выӈгана нылана’’. Мань ӈод и’’лека лаханакурта нями Пэ хоё’’ нямна ядэрмы. Пыда нюртей тэворо’’мада.
Лаханако нями хонрав:
- Нюмл ӈамгэ? Сянимдей классахана тохолкун?
- Мань нюмми Ярослав. Нябимдей классахана тохолкудм’.
- Та’ ӈаво илекабтёда серо пэрцан? Ядембада ё’’ нямна ядэрцади’?
- Ядембада ё’’ нямна нидамзь ӈэдалёр’’. Тарем’ нись ерев’’. Саляӈгардахана та’ ямбан’ мэдамзь. Сянако нини’’ ня’ велосипедаха’’на марад’ помна ӈэдалёрцетыва’’. Ӈацекы’’ сянакулвахана мэсетыва’’. Ядембада нумгана яха’ лаӈгхана таб’ ниня сянакосетыва’’ма’’. Пилю’’ ирыхана небяни ня’ Пэ хойха’’ тэворӈанинзь.
- Ӈаа? Ханзер’’ таня’ тэвсяди’?
- Таня’ хэванда ненэць’ ӈока ӈэвысь. Нюдямбой автобусхана, пуна паромхана яха’ идм’ мадаваць. Си’’ив харв харад’ вокзалхад поездахана миӈаваць. Тэв’’махадана’’ мале пон мэлва’ яхана’’ ядаваць. Палаткина’’ яха’ лаӈг’ ниня ӈэвыць. Тад пуна нермпэртя’’ сянакубц манэлабтамбиць. Ӈацекы’’ ня сянакуваць. Ӈарка’’ ненэця’’ харто’ помнандо’ пирдырӈаць. Таняна сидя яля илеваць. Тябихутами яӈгусь.
- Нябимдей яляхана тамна ӈамгэм’ пэрцада’’?
- Нябимдей яляхана хоё’’ помна ядэрманзь хаяваць. Мале пон ядаваць. Халманана лохорта яхаком’ сидя’ ня’ маторпиваць. Ӈаре’ тякан’ манэць ясортана Пэ хой’’ ӈули’’ ӈарка ӈэвы’’! Мань тэри пысэйваць. Пуня’ ӈоб’ тикы сехэрэвнана’’ мэлвахана’’ тэвынаць. Тэва’’махадана’’ ӈаворина’’ ма’’лахая поезд’’ нулаӈгалаван’ хаяваць. Саляӈгардахана’’ поездахана ӈэдалэйнаць. Тикы ядэромами пон тенеӈгув.
Руфина Окотэтто’ падвы
Сидяӈг: Р. Окотэтто’, М. Яр’ тадтавы
