обновлено: 11:17, 10 мая 2023
Няръяна Ӈэрм
Ӈопой ныхым’ мэць ява’’ лэтрамбавы’’
Сайнорма’’ похо’’на ява’’ лэтрамба яна’’ тер’’ мал’’ варемдо’ мэ’’мы’’. Я’’влада сайнормахана хибяхартадо’ пыхыдамда нивэда сяй’’. Тамальӈгана теда’ сававна илевана’’ е’’эмня сямян таняна ныхымдо’ хаевы’’. Хусувэдо’ ява’’ ӈэдаба ӈарка таром’ ха’’авравы. Ӈока ненэця’ илм’ ханавы по яханана’’ нина’’ юрыбю’’. Сайнормы’’ иринана’’, хаданана’’ пилибт’’ тенейна’’.
Си’’ив ю’’ сидндет по’’ тяхана хибя пир’’ӈада мал’’ ява’’ лэтраванзь хэвы’’. Ӈэрм’ тер’’ ненэцие’’ поӈгад ӈобтарем’ сайнорта’’ ӈока’’ ӈэвы’’. Нюдяко’’ ӈацекэри’’, саць хаӈгурта’’, вэсако’’-пухуця’’ нивы’’ хань’’. Пыдо’ мякадандо’ нядаӈговы’’. Сэдоравы’’, халям’ хадабавы’’, сямян манзаям’ пэрмы’’, таӈгхад ӈоб’’ ехэравы’’. Ханяӈэхэна ӈормасипой’’ пэрмэдо’: пудана нянёто’ ютекэци тамна тэтнанарка няхато’ ӈэдарамбавыдо’.
Ненэй ненэця’’, хаби’’, ӈысма’’, туӈгос’’, тамна ӈани’’, таняна ёльце таравы’’. Пыдо’ енерць теневавы’’, ям’ сававна хамэдамбавы’’, мере’’мы’’, сэвдо’ па’’мя’’ ӈэвы’’. Машин, туни мэць мер’ тухурмы’’. Выӈгана вадёвы’’ пилютадо’ яӈговы. Ӈарка яхад хахая’ илена’’ тэсавэй хан’’мы’’. Ты’’ вэвако’’ по’’ ёльцяӈгана ӈани’ ӈарка манзаям’ минревы’’. Муӈго, сайнорць мэта ӈавори, ӈавро, ядаравы ненэцие лекар’’ мяк’’ тэволавы’’, вадам’ тэволанаӈэ таравы’’. Тэкоця’’ хуркари по’ паӈохона, нумгана ӈэдалёрць мэ’’мыдо’. Ханяримна хэсь пир’’мэдо’. Еся машинадрев’ тахара, ханимзь, муноць нивэдо’ пирас’’. Ӈопой’’, ӈаха’ ӈадьваридо’, харто’ ивнандо’ хэсь пир’’маридо’ вэва ӈэвы. Сян ты пэртя вадабавы ӈавкамда таняна хадарабтавыкы? Сян сэв’’ хаял’’ ха’’амвыкыд’’! Теда’ тарцям’ нивы манэ’’мэӈэ нянана’’ саць хамэдава’ пир вуни ӈа’’.
Яна’’ сямян нюдяко хардахад, маркад сайнорманзь хэвы’’ танявы’’. Ӈокаюм’ пелядо’ мякато’ нивыд’’ тэв’’, ямдо’ лэтрамба яӈгумы’’. Ӈанидо’ тенат’ ёховы’’, нюмридо’ хаёвы’’. Теда’ нюдо’ сайнормы иринадо’, хаданадо’ тюку’’ ялэ’’ ӈэсонд’ пюръядо’. Ханяӈы’’ ненэця’’ сайнормы’’ нито’ нюмгартахат ехэра’’. Нюбидо’ нивы’’ хаю’’, вэнзер’’ падвы’’. Тамальӈгы’’ похо’’на тэхэ’’на илена’’ поӈгана тохолковы’’ тянё ӈэвы’’.
Сайнорма — саць вэва сер’’
Сие’’ ниць ирыхына Сёяха хардан’ ӈэдалёрӈадамзь. Таняна Яптик Анатолийм’ лаханако ня’’ӈадамзь. Пыда сайнорма’’ по’’ ёльцяӈгана ёховы иринда нямна лаханась. Ханзер’’ хо’’мамдо’, сяха’, ханяна сайнормамда ваде’’ӈась. Тамна ехэрана ян’ ӈэдалёр’’мамда тензибтембись. Ихинани тарця лахарём’ намдава нянани ӈули’’ савась. Ӈадьбята ёльце инзеледамзь. Мань ӈод’’ паӈгани ӈани’ тикы сайнормы ненэцяӈгад пере’’. Теда’ Анатолий Николаевич нянда’’ харта вадетада:
— Няхар’’ по’’ тяхана ёховы ненэцие пюрта «Ямальский плацдарм» ерв Андрей Гуничев ся’’ны’’ ӈэбта ӈод’’ невхы падро манэсармы. Ӈамгэхэвм’ пюрманда’ сер’ ӈопой сидяӈгм’ манэ’’мы. Сайнорма по’’ мальӈгана сертавы ӈэвы. Тадта’’махана сидя ненэцяӈг’ мэвэхэ’, падарм’ толабавэхэ’. Тасикуна’ тарем’ падвы: «Сидяӈгахана мэнаха’ ӈобкана сайнортаха’, сава нясха’. Ненэй ненэць’ — Иван Яптик няби казах — Мухтар Кайшатаев. Письмом’ толабихи’». Пуна тамна’ тяха’ падрода манэсарць пявы. Лакри’ Яптик еркарм’ Ямалхана танявам’ тензибтевы. Тикы ненэцяӈг’ пюсь таславэхэюда. Пюрманда сер’ ӈудахата ӈавхы 1944 похона падвы статья’ лабсако еремы. «Красная Татария» газетахана ӈэвы. Тикахана толавэда: «Иван Яптик ӈули’’ сава ханена ненэць’, Ямал’ тер. Мухтар Кайшатаев Семей хардахана колхоз’ ервӈэ тарана. Ӈобкана сайнормэхэ’, ӈопой я’ ваӈгхана илевэхэ’». Ти, Казахстанхана сидяӈг мале ӈаха’’на ӈадимы. Маня’’ яханана’’ тандаяри’ ховэдо’. Таддикахад архиван’ хэвы. Таняна Иван Яптик 1943 похона сайнорманзь хэвамда, Ямальской РВК таня’ ӈэдаравамда, ханавандо’ нерцю’ Тамбейхана илевамда толавы.
Таӈок юнм’ намд’’махаданда Андрей Гуничев сайнормы ненэцие’’ ню хось идевы’’. Ихинанда мамы: «Нидо’ манэта’’ма, иринадо’ тензибтеӈгу’’ма. Ёльце тарана сер’’!» Нюдо’ ӈани’ пюрць пявы. Нюрте’’э казах’’ ё’’ няд вадам’ ӈэдаравы’’. Тет ю’’ поход нюдярка ненэцям’, Мухтар Кайшатаевм’ ховы’’. Сояванда мальӈгана хасава ӈацекэн’ иринда нюмам’ ми’’мы’’. Иринда ила’ сехэрым’ ӈод’’ нёдалмы, военнойӈэ хэвы.
Нябинда ня хо’’махаданда, Иван Яптик’ ня пюрць пявы. Сита Сергей Шулинин, невхы ненэцие’’ илам’ тохоламбада нядавы. Нядаӈгодада Интернет’ мутра’ сер’ Ямал’ терха’’ паднавы. Ӈопой’ мэва ВКхана ӈамдё еремэдм’. Хуркари юне манэ’’сартахани лакри’ сидяӈгм’ ходм’. Таминда пухуцяхани манэ’’лабтав. Ма’’нидам, тюкор ирини сидяӈг! Пыда хонарку: «Ненэся?» Мань мадм’: «Ӈаха’’». Ӈобкана телефонувна тадта’’мам’ ховэхэ’’ лахананинзь.
Тареюмгав’ ирими ӈаха’’на пюрць пявась, 80-90 по’’ мальӈгана. Ӈамгэхэртм’ нидамзь хомбю’’. Илебей ненэцяндамзь, си’’ми нядабаван харвана яӈгусь. Ӈадьбята тэри’ ет’ та мэйваць, пюрць ӈутми сусана то’’олхась. Тедахав’ ими ӈадя таӈгамъй’’. Ирими лимбя’ иры’ 14 яляхана 1945 похона Польшахана Глотово хардахана яӈгумы. Тад нерня’ няби нямда пюртадм’. Ӈобтарем’ нянда тотрев’ сайнорманзь хэвы. Таддикахад ёховы. Екар’’ ханяхавана яӈгумы, екар’’ ӈанисэй еркарм’ мэць пявы, тикаха ӈани яхана иле хаёвыкы, ехэрадм’. Ӈани’ хось тара…
Автор: Анна Яптик’ падвы
Сидяӈг’’: Анатолий Яптик’ тавы’’
