Ӈобт’ ма’’лёвы’’

Яра’ иры’ пудана’’ яляха’’на яна’’ тиӈгэвна сянакова’’ яля’’ пэсетыд’’. Нерня’ Нядаӈгарад’ тер’’ ӈобт’ ма’’лыць. Ямал’ ханярид товы’’ ненэця’’ ёльце ӈокаць. Пыдо’ мал’’ нидо’ манэ’’манзь мяк’’ товыць. Тикы яляхана ты пэрти серо тасламбада’’ ерв’’ ӈани’ ӈобт’ тэворцеты’’. По’ ямбан’ сертабавы манзаидо’ вадецеты’’. Тамна мюсерта ненэцие лаханако няцеты’’.

Тандая’ ӈани’ ӈобт’ тэвормы’’. Сиддо’ Ямальской район’ Советхана мэна’’ ӈарка ненэця’’ Пензеръяха’ хэвхана ма’’лавы’’. Поӈгнандо’ тэхэт ядэрта’’, ӈэрм’ тер серо тасламбада департаментхана манзарана’’, округна’’ Законодательной Собрания’ тер’’, юне тэволана’’, тамна ӈани’’ мэвы’’. Нерня’ мал’’ ӈобанзер’ хэхэ’’ ян’ ӈэдалёрмы’’. Ненэй ненэцие’’ мэсы’’ сер’ ханондавы’’: тум’ пятавы’’, тым’ хадавы’’.

Ханондавандо’ пуд хардахана ямб толь’ тяха’ ӈамдвыд’’. Пудана похона ӈадимы серодо’ тасламбавы’’. Ты пэрмам’ нерня минрева’ нямна, ты’’ хадырць ё’’ нямна, я’ индадм’ нэкалпади’’ ня’ поё’’ сава ӈэва’ нямна лаханавы’’. Тикы’ хавна Ямало-Ненецкой, Ненецкой автономной округха’, Красноярской край хахаяда’’ похо’’на ӈобанзер’ манзара пир’’мамдо’ ваде’’мы. Хусувэдо’ инда ядэрабцо’ хэта пир’’мы. Сидяӈг: А.Салиндер’ тадтавы.

Вадидо’ мале’’махадандо’ ӈока по’’ тэхэ’’на сававна манзаравэхэ’’ ӈуда’ тер мипавы’’. Худи Елё Янковичм’ ненадумдавы’’. Лаханавы’’ ненэця’’ хой’ няна илена ненэцяӈг’’ сейхад минда вади ӈэдарамбиць: «Сензда’’ ӈада’’. Тыда’’ ӈай’’ӈая’’, тыта’’ хадырць я’’ сава’’ ӈэя’’. Тольнда’’ ниня сяхари’ халяра’’ таняя. Минрена иланда’’ нерняри’ миӈая».

А.Яптик’ падвы

Авторы

Няръяна Нгэрм

07:55, 06 марта 2023

обновлено: 08:01, 06 марта 2023

Темы