обновлено: 07:41, 06 марта 2023
Няръяна Ӈэрм
Нядаӈгардахана мядо’’мы’’
Нядаӈгарад’ няна ты пэртя’’ ӈобт’ ма’’лыць. Ненэця’’ сидя яля маймбиць. По’ ямбан’ нивы манэпавы нидо’ манэ’’ӈаць. Таӈго ядэлава’ мюмня ядэрта’’ тахаравы тэрхаць. То’ сэркана сярда’’ хан’’ ӈопой ӈарка ӈэсы’ то’’олхаць.
Манэ’’манда пирхата ӈокась. Ӈобкарт ӈобтолас мальця, паны, пива, сава яӈгусь. Ӈэрм’ тер’’ не’’ тотрев’ сэдорана не ӈани я’ ханяхартана яӈгу. Пыдридо’ тарем’ пир’’ӈадо’! Сёбар’’ ӈацекы’’, хасава’’ ёльце мэбе’’ӈаць, мере’’ӈаць. Таротаха’’, ныхыдартаха’’ сырта’’ нидо’ тёрха’’на нядабидонзь. Помнандо’ нерня’ пакалма’ пир’’ нись ӈа’’, самьнелевырахаць.
Тайку’ тирцькутхая, нерня’ тэвыв’’. Хэвханани хасава ӈацекы нусь. Пирдыртаха’’ ёльце сомбоковна сырӈась, хусувэй ӈамгэм’ ихинда пэмбись. Тарем’ нувани сер’ лаханакулыни’.
— Мани’ небяни’ ня’ Яр-Саляхад тонинзь. Сяхаӈгарт’ тюку хардан’ тэвор’’мами яӈгусь. Тюкохона тарси’’ сава ӈэвы. Хардада пирця’’. Хадэс’’ мирци’’. Ни тецю’’, пэдара хахаи. Тикахад хуркари ва’’лёй ненэцие манэ’’ӈадм’. Сяхари’ ӈани’ тарем’ сянакован’ харвадм’, — Виктор Сэротэтто, самлянзимдей классахана тохолкода лахана.
Тарем’ ибедорта ӈацекы’’ танява им’ савумдамби. Ӈэрм’ тер’’ сянакубц’’ етри’ я’ ниня таняӈгу’’. Мале ӈока’’ по’’ хэ’’мяхад теда’ пирдыртит е’’эйӈэ ханда’’. Ти, тюку по’ нито’ нерня’ Ямальской район ха’’мыць, Яр-саля’ тер’’. Нябимдейӈэ МОП «Ярсалинское» хаясь. Няхаромдей’’ Приуральской район’ тер’’. Тадхав’ яна’’ тиӈгэвна сянакова’’ яля’’ минзь пэӈгуд’’.
