обновлено: 09:38, 10 апреля 2023
Няръяна Ӈэрм
Мюселъядʼʼ
Нараʼ Пэʼʼ терʼʼ ты пэртяʼʼ пырдариʼ мюселӈгаʼʼ. Сывʼ паӈомʼ пэдариʼʼ поӈгана мэʼʼӈадоʼ. Сие ниць ирыʼ пиркана марыʼʼ яӈговаʼ нерняʼ Саляʼ явмʼ мадаванзь пырдариʼ паромбиʼʼ. Хахаяда яляʼ Законодательной Собраниянаʼʼ депутат Эдуард Яунгад ты пэртиʼʼ ӈэсыхыʼʼ тэворӈаць. Таняна ӈэдалёроʼʼмамда таремʼ тензебтембидась.
Мерета еся ханхана ӈэдалёрӈаваць. Пэдариʼʼ помна ӈэдалёрць няхарʼʼ яляʼ серʼ ӈока мядмʼ манэʼʼӈаваʼʼ. Сидя юрʼʼ луцаʼʼ ӈэдалавамʼ пон ниваць мадабюʼʼ.
Таняд Леонид Тайшинʼ «Байдарацкой» совхозʼ сиднтетимдей ӈэсынʼ нэкалӈаваць. Тикы ӈэсыʼ терʼʼ пилиʼʼ нерняʼ ереберӈаʼʼ. Сава юнда етриʼ со. Тамальӈгана вадмʼ мэʼʼмыць. Иван Тысияʼ ты пэрмыць. Вакана хареʼʼ тыдоʼ пэртяʼʼ, Салехардагроʼ предприятийʼʼ ненэцяʼʼ ӈаниʼ танявыць. Вамдоʼ сидя поʼ тяхана тарабʼʼцонда таняваʼ нид мивэдонзь. Тедаʼ хартоʼ сулорпидоʼ. Леонидʼ вадавна, ӈодʼʼ харванахав хибяри ваʼʼамʼ мэць пирӈада, ӈодь пуданда сававна хаемда.
Хусувэй ӈэсыхына мандалави мэʼʼӈаваць. Ӈэрмʼ терʼʼ серо тасламбада департаментхад ядэрмы Федор Вануйто ӈамгэʼ тоʼʼолха нядʼʼми танявамʼ ненэцяӈгʼʼ вадеʼʼӈась. Приуральской районхад ӈэда «Ямал-нюʼʼнаʼʼ я!» ассоциацияʼ отделениемʼ няʼʼамбада Андрей Харючи районханандоʼ ӈамгэʼ тоʼʼолха нядʼʼмаʼʼ программа танявамʼ хэтась. Ӈопой — тандаяʼ округнаʼʼ ерв ӈадимдевы. Тохолкоʼʼмахадандоʼ колледжмʼ ёльцевыʼʼ илебей ненэциеʼʼ еʼʼэмня ӈа. Пыдоʼ манзара пэʼʼмяхадандоʼ хартоʼ мятоʼ яӈгобʼʼ, иле мятоʼ мирʼ есямʼ округхад няхарʼʼ поʼʼ ямбанʼ салдамбаӈгудоʼ. Сидя юʼʼ самляӈг ёнарʼʼ ӈэӈгу. Ихиня тарця ӈулиʼʼ сава серʼʼ.
автор: М.Ярʼ падвы
