Няръяна Ӈэрм
«Мядико»хона мядоʼʼмыʼʼ
Харп хардахана «Мядико» нюбета мяд таня. Тедаʼ таняна юркад вата ненэцяʼʼ илеʼʼ. Ханяӈыдоʼ — варючиʼʼ, ӈанидоʼ — ӈармыʼʼ ненэцяʼʼ, мяциʼʼ хаёвыʼʼ, хаӈгуртаʼʼ. Хусувэйндоʼ иландоʼ сехэры яӈга. Хибяхавʼʼ пилиʼʼ иле мятандоʼ мэʼʼӈадоʼʼ, нябидоʼ — лакамбойʼʼ сянхав ирыʼ ямбанʼ лекарʼʼ сэвхаʼʼна мэвандоʼ еʼʼэмня тикахана илеʼʼ. Сидтоʼ маниенаʼʼ — сёнзитоʼ мюй латаʼʼ ненэцяʼʼ. Ныхытоʼ пирувна нядабидоʼ, иламдоʼ савумдамбиʼʼ. Лабытнангиʼ, Салехардʼ терʼʼ ӈобтикы сидтоʼ вэдепасетыʼʼ.
Едэй поʼ товаʼ нерцюна «Мядико»нʼ ЮНАВИА отрядʼ терʼʼ ӈэдалёрӈаць. Нянандоʼ тамна нюдя нидоʼ, тетимдей классахана тохолкодаʼʼ мэвыʼʼ. Сидтоʼ тохоламбада Евгения Юрьевна Шевченко небянадоʼ, нисянадоʼ няць Харп нюбета харданʼ хэсь ӈахакуд хамековы.
«Ӈацекынаʼʼ нюдяʼʼ ӈэбтоʼ ӈодʼʼ хамедамбидоʼ — хэвхананаʼʼ мэнаʼʼ ненэцие нядаба тараʼʼ. Пухуцяʼʼ, вэсакоʼʼ сиднаʼʼ манэць ёльце маймбиць. Ӈаниʼ сяхариʼ нянандоʼ мядоʼʼмаваʼʼ хонрамбиць. Вадавнатоʼ, ӈатенаӈгуʼʼ. Ихинандоʼ ӈулиʼʼ маймбиць. Хыноʼʼманаʼʼ, тараванаʼʼ пуд ӈаркаʼʼя тольʼ тяхана ӈобкана сяйӈаваць, лаханакурӈаваць. Ядэрць яʼʼамнаʼʼ ненэцие ӈаниʼ нинаць юрʼʼ, хонё лохотоʼ мюʼ харʼʼнаʼʼ тюӈгаваць», — мядомамдоʼ таремʼ вадеʼʼӈадась.
Мядонзэйӈэ хуркариʼʼ ӈавыдотаʼʼ ӈавар тэмдавыʼʼ. Мале сян падмʼ маʼʼлавыʼʼ. Пухуцяʼʼ, вэсакоʼʼ ӈудаʼ терӈэ тамна хартоʼ падтавыʼʼ падракодоʼ мипавыʼʼ. Тикыдоʼ школаханандоʼ урокатоʼ пуд сертабавыдоʼ.
Ӈопой не ӈацекэця Дарья Грибова няхатата хаёвы. Ныланаваʼ яляхана хаӈгулавы. Мядонзэйсавэй падкомда ӈарка нябакохонда миʼʼмэда, «Мядико»хона иленахаʼʼ миць табедавэда. Ихинанда сяхариʼ классанда няʼ ӈаниʼ таняʼ мядоманзь хэванʼ харва.
Александра Рыбина небянда ня хабиʼʼ вадавна хыноӈаханзь. Небяʼ нямна ӈэда сёмʼ луца тэнзмʼ мэтахартʼʼ хамедана тоʼʼолхадонзь.
Таремʼ ӈацекыʼʼ пыхыдадоʼ сава серкана ӈадимдевыʼʼ. «Таняна иленаʼʼ ӈармыʼʼ, варючиʼʼ ненэцяʼʼ ихинанаʼʼ ӈулиʼʼ сяялыʼʼ. Иландоʼ сава ӈэбта ӈодʼʼ хартоʼ мятоʼ вуни ӈаʼʼ. Маняʼʼ еʼʼэмнандоʼ вареваʼʼ мэць хыноӈаваць, тараваць. Неноховавна сензʼʼ ӈэяʼʼ. Мядондидоʼ етриʼ таняяʼʼ», — таремʼ «Мядико»ʼ терʼʼ нямна ӈаркамбойʼʼ юнармеецʼʼ лаханаць.
Галина Окотэттоʼ падвы
Авторы
Няръяна Нгэрм
Темы