Лекар'' манзаямда тенеда

Екатерина Николаевна Того’ нюмам’ Ямальской районхана ӈока хибя’’ теневадо’. Ненэйвана Новой Порт хардахана илена’’ тамна сава’’ вадаха’’на тензебтембидо’. Ханя тарця ӈа’’, тет ю’’ по’’ ямбан’ Новой портхана лекарась. Ила’ няю’ сибдавэда, едям’ таблавэда ӈокась. Сяхаринда яля’ ня’ тэяна не, хибяхартм’ маяндорць хаевэда яӈгу. Хахаяда яля’ Екатерина Николаевна ӈарка соя’’ма’ ялямда ядабтамбаӈгу, си’’ив ю’’ поданда ханда.

Пыда не нюнда ня’ ядэрманди’ сер’ редакцияхана’’ мядоманзь тюӈгаӈаханзь. Газетадамди’ хосаявэхэнзь, подпискам’ сертаӈаханзь. Лаханакурмана’’ сер’ ӈацекы ӈэ’’мамда, тохолковамда, лекар’’ манзаямда тэра’’мамда вадеӈадась:

‒ Мань илевани’ ямбан’ Порт хардаханани иледамзь. Нисями Саляӈгардахад ӈэвы. Нисяни нисям’ Иван Семёнович Шемановской ненэцие луца’ хэхэн’ пунралтаванзь Тамбей’ ня’ ӈэдаравэда. Ямальской район’ хой’ нямна ӈэдалёрмы. Тад пуна тарем’ Новой Порт’ хардан’ тэввы’’. Тикан’ илелмы’’. Ӈацекэӈэ тетва’’, мань няхатани’ нюдядм’. Тохолко ня’’мы’’ нини’’ саваркавна нин тене’’. Тены’’ похо’’на хаёдадо’ тянё. Новой Портахана школам’ маледамзь. Таня’ нюртей тохолкованзь тэвбани’ мякни ӈули’’ харвадамзь. Падна толь’ тяха’ ӈамда’’махадани’ мядикоми, небями сэв’’манани ӈадимяць. Школахана тохолковани мальӈгана ӈоб’’ мэкад иле’’мями танясь. Мале сян нядми ма’’лахая хуна таславаць. Няхарӈэ почтам’ минрена нюдяко ту ӈанохона хаяваць. Луцинеми ӈамгэрини’’ ӈэсялим’ ня’’амбахая нусь хаись, сидна’’ табла нись ерев’. Ӈано’ мюня тэри миӈаваць, сидна’’ ниць хонрамбю’’. Хардакохона’’ тэв’’махадана’’ салабада ханимясь, пуня’ ниваць хань. Ӈани похона несэйвана тохолкованзь тарем’ ӈод’’ тэвынаць. Ханзер’’ ӈэвнава’’, тохолко таранисяв’’.

Лекар’’ манзая

— Сибимдей классам’ мале’’мяхадани’ санитаркаӈэ манзарадамзь. Тикы’ пуд Саляӈгардан’ фельдшерӈэ тохолкованзь хэсь таславась. Тохолковами ёльце’’мяхадани’ 1976 похона Новой Портан’ манзараванзь тэвываць. Нюртей ненэцие лекарабтамба сидя по’ хой’ нямна ӈэдалёрӈадамзь. Харни яханани нисядам’ мы’’, серкат теневадамзь. Пуна хардан’ тана’’махадани юд’ по’ медсестраӈэ тарадамзь. Тарем’ манзара’’махадани’ скорой помощь’ манзаям’ минре пядамзь. Ӈопой тырами тет ю’’ по’ пир’’ ня’’амбивась. Хаӈгулась таняд хаядамзь. Ет’ илевани’ ямбан’ манэ’’мэми, намдавэми ӈока. Едемы’’ не ӈани’ манзаяӈадамзь, ӈаябэй ӈацекы ня’’марпидамзь. Тарця манзаям’ илни ямбан’ минревась. Ӈули’’ торомдавэми, нянани савась. Тедахав’ пенсияхана мэдм’, ныланадм’. Лекар’’ поӈгана ненэця’’ си’’ми’ теневаць. Та’ маляӈгана ненэй ненэцяӈгат лекараӈэ таравэӈэ мале сянваць.

Сэдорана не

— Сэдора теневадм’. Манзаяни сер’ ты’’ мякана илевани маляӈгана пиби, паны сыдыбидамзь. Та’’лий’’ похо’’на тёня’ хоба’ пенакоцяхат не нюни шуба панэцяд сэдадамзь. Тикы панэмда ӈули’’ харвобтасетыда, мале пон’ мэ’’ӈадась. Вадёдаванда ямбан’ мадавэхэ’’на падтамбивась, несэй пенаха’’на вэтабивась. Тамна ӈани’’ ӈамгэри сэдыбасетыдм’.

Теда’ Салехардахана илебата ӈод’’ ӈоб’’, сидя сэдом’ яля’ сертавдавэй ни мэсету’’. Тиканда хавна тэри индя ядан’ няданзюртаӈэ тарасеты. Хэвхананда мэна’’ нида’’ тенева’’ няд’’ма нямна хонраб’’нанд пыда сяхаӈгарт пуня’ ни ӈэӈгу.

Екатерина Николаевна’ таӈок поданда хэва’ нямна ни пунрю’’. Ма’’нисяв, ӈока поми ӈэвада ханзеркарт ни со’’. Ихинани тамна невхы пони’’ тотрев’ мывдана недм’, сидя ӈэни ни’ санабани хибяхарт си’’ми ни таблаӈгу’’. Соя’’ма’ ялянда няю’ маня’’ сава вади мэ’’ӈава’’, сенз ӈэя, таӈга илея. Нюда, нюта ню’’ сидта етри’ майбтамбая’’.

Руфина Окотэтто’ падвы

Авторы

Няръяна Нгэрм

04:39, 29 декабря 2024

Темы