обновлено: 04:47, 12 апреля 2023
Няръяна Ӈэрм
Ламбидо’ мере’’мы’’
Сие’’ ниць иры това’ сер’ Саляӈгардан’ ламбитана’’ ма’’лёсеты’’. Тюку по’ ӈобтарем’ 3-7 яляха’’на хуркари’’ маркат, районхат ламбаха’’на едейкурта’’ ма’’лыць, помнандо’ ӈарка пирдырмам’ мэ’’ӈаць. Тарця серм’ мэнена’’ мал’’ тось идевыдаць. Поӈганандо’ ӈацекы’’, илебей ненэця’’ таняць. Саць варемдо’ мэ’’мэхэв’’ — ӈарка ненэця’’. Нюдякорка’’ нидо’ нядандо’ тэри хаюрӈаць. Похо’’ едейкурмандо’ нид тарем’ мере’’ма’ сер’ ӈа’’.
Мань ӈани’ пирдырӈадамзь. Нини’’ ня’ Ямальской районм’ нерня’ минреваць. Ӈокханда хасава ю’’ ненэцяваць. Нюбедо’ ти’’: Станислав Лаптандер, Валерий няби Едэйко Сэрпиваха’, Иван Худи, Екатерина Якубова, Леонид Сэрпива. Сидя нява’’ Яр-Саля’ школахана тохолкодаха’: Алексей Худи няби Александр Сэротэтто. Пыди’ сидти’ ӈар’’ няханати’ чемпионатхана сюрберӈаханзь. Сибимдей классахана мэнаха’ ёльце харбёхо’ ӈэвэхэнзь. Ламбитавамди’ маниедамзь. Яд’’, танаба’’ ӈамгэхэртаӈэ пэрта то’’олхиди’ ниць ӈа’’. Сяхари’ маня’’ минрена серма’’ сидти’ то’’олха’’ ӈацекы’’ ӈудаха’’нато’ ня’’амбаӈгудо’. Ӈадьбята теда’ ӈахакуд сиддо’ ёльце ламбита тохоламба тара.
Тюку по’ Валерий няби Едэйко Сэрпиваха’ ня’ Шурышкарской, Тазовской, Красноселькупской район’’ терха’’на пирдырӈаваць. Небой поход яӈгаркась, ӈопой мандалкана няхар’’ ненэцярись: сидя хасава, ӈопой не. Нюртей яля’ классикам’ пирдалембиваць: не’’ — 3 километран’ сюрамбиць, хасава’’ — 5 километран’. Нябимдей яляхана коньковой стиль ӈась. Мань самляӈгм’ пэрӈадамзь, няхаюни’ си’’ивхад ватам’. Тет сюдбяко танабавна тантанахани ӈэни ӈоб’’ хацядаць ен’’. Ламбини харто’ хайна миман’ ниць харва’’, ӈока ныхы тарась. Тарем’ ӈод’’ сава, сидя яӈорэй’’ няхаромдэйманзь. Тикы яляхана Валера нябимдей ян’ ха’’мыць. Небой нертембавы няда сита ӈодькоця нертевысь.
Саць пэдаваӈгадана’’ ӈопой ялява’’ нылана мэ’’ӈава’’. Хубтахана мер’ юркына’’, таддикахавахад эстафетам’ пява’’. Нерцюй яляхана нини’’ няни лаханаць: «Хуняна Тазовской район’ няд ӈэда нехэд ӈоб’’ нён хаюр’’, варемд мэ’’ин». Сидна’’ нулта’’, ханзер’’ минзь таравам’ ваде’’ӈа’’. Сомбовна нулкая, тад хэвани. Сидя нерни няна минда нехэ’ ӈоб’’ нихиюн ӈэдарамбю’’, няданди’ перенадрев’’ миӈадм’. Пудана танабахана ӈэни выдараванзь пядонзь, пуна лакри’ тензибтев: «Тайна няхаюни’ си’’ми ӈатеӈаха’. Ханзер’’ таӈга миӈадм’. Саць ӈавэды ни хаю’’, мер’, мерэй’’. Теда’ пэдабцоми тэв’’махадани сохорта ни соӈгу’’». Пудани Едэйко хаясь. Тикы нянда пуд Валерий нэкалӈадась. Тарем’ пирдырць торомбэйха’ я’’авла миӈаханзь. Эстафетахана нябимдей ян’ ха’’мынаць. Няхар’’ яля’ ямбан’ пирдырмина’’ ӈобт’ толахая, маня’’ ӈобанзер’ нябимдейӈэ хаяваць, няхаромдэй’’ Тазовской район’ тераць, нюртейхав’’ Шурышкарской район’ тер’’.
Ламбитава’ по’ паӈом’ «Полярная лыжня» марафонхана малеваць. Мани’ Екатерина няри нининзь сюрамбю’’. Нями мяканда хаясь. Мань нини ӈавламбадаӈэ тарадамзь, си’’ми нядабададани не нями хаӈадамзь. Ламбитани’’ сехэры ядхана нунинзь. Нер хыдяко’ мюня ид’’, ӈодя’ ид’’, сяй’’ ӈаць. Хусувэдо’ ӈамгэн’ харва тарцям’ мипининзь. Ӈопой яхана нуб’’, ламбитана’’ ӈули’’ янамбовна минда то’’олхаць. Валера, Станислав, Иван 50 километрм’ пирдалебиць. Едэйко — 30 км, Леонид — 15 км. Хасава ӈацекэхэ’ минзь яди’ тянёркась, мер’ тэвъяханзь. Хуркари’’ ва’’лёй’’ хэвувнани хан’’ӈаць, сэврини мэ’’ӈадамзь. Лариса Куклина биатлонм’ пирта не тикахана мэсь. Пыда нензел’’мана едейкусь, тирта пирась. Ихинани ма’’нисядам’, сяхари’ ӈани’ сита тотрев’ ламбита тохо сава ӈэӈгусь. Тарця вырэй ненэцие манэ’’махад ныхы ӈокворӈа, нерня’ миман’ харвабцо турӈа.
