Няръяна Ӈэрм
Нядаӈгосэй'' ӈадимя''
Несэй пом’ пявана’’ сер’ ӈамгэхэв едэй вади намдасетыва’’. Тюку по’ юд’ мян’ едэй серм’ ӈадимдевы’’. Хурка ӈаво несэймам’ теда’ падвэхэдани намдаӈгура’’.
•Мале сян по’’ тяхана ӈэрм’ тер’’ е’’эмня сава няд’’ма ӈадимясь. Ӈока нюсавэй мяд’ терха’’ мяд’ пелярахам’ мипа пяць. Тамальӈгана няхар’’ нюм’ ховы’’ ня’’ма пир’’ӈадонзь. Теда’ сидя ӈацекым’ соявы’’ ӈани’ ня’’марпабато’ серота.
•Нюртей по’ тохолко пэвы ӈэрм’ тер, мюсерта ӈацекы нядабаӈгудо’, няндо’ сидндет ю’’ ёнар’’ есям’ мипаӈгу’’. Ӈопой’’, мякатато’ тохолкобто’ ӈамгэхэртм’ ня’’ма ни’’ пират’’.
•Ты пэртяха’’ ты’’ лекар’’ яӈга ты’’ пардон’ ӈэсяӈо мипа пяць. Мюсерта’’ тикыдо’ ня’’марпа пя’’махадандо’ тид’’ манэ’’ядонзь, ма’’нисям’’: «Ӈани’’ пардонха’’на нядарка тара’’». Нара’, та’ мале тердевы ларас ня’’марпа пяӈгу’’.
•Ямална’’ тиӈгывна ӈэда колледжхана тохолкода тохолковамда малебаванда мальӈгана экзаменда юр’’ баллан’ падбата, нянда юр’’ ёнар’’ есям’ мита’’. Сита тохоламбадада ӈобтикы таӈок есям’ ня’’маӈгу.
•Лекар’’, ӈацекы тохоламбада’’, ТЭК предприятияха’’на манзарана’’ лимбя’ иры нюртей яля’ пуд колледжхана манзара пэбто’ ӈопой яӈорэй’’ миллион есям’ ня’’маӈгу’’. Ма’’ним’’, тарця нядаӈгосэй ӈацекы тохоламбади томдаӈгу.
•Хардахананд самляӈг юркад тянё ненэця’’ илебто’, тикахад харт мяцавэй ӈэбат ӈамгэри Ямална’’ март’ илеванзь хэсь пиртар. Мят ӈар мядм’ ня’’мабат ӈод’’, есяӈэ ханабат ӈод’’, ханзели’’ серота. Мят харт тэмдавэр нибат ӈа’’, ӈарка хардан’ ӈани’ илелпат сава ӈэӈгу. Ӈопой’’ нянд ӈахат мят то’’олхам’ тата’’. Таддикахад несэй хардан’ ямдавы’’ юр’’ ёнар’’ есям’ ня’’маӈгу’’.
•Ты пэртя пенсиян’ хэвы ненэць’ хардахана иле пэбта ня’’марпавы есьда, «кочевой» нюбетида ӈахатанда сер’ ня’’марпаӈгуда. Лимбя’ иры’ нюртей яляхад ӈадимы сер’’. Тикы’ нерцю’’ хардан’ ха’’амвы таминда есь ня’’марпа ӈэвадаламбидонзь.
•Тандая’ манзара пэвы’’ ты’’ лекар’’, ветеринарной фельдшер’ манзаям’ пявы’’ самляӈг юр’’ ёнар’’ есям’ ня’’маӈгу’’. Вузм’ ёльцевы’’ ты’’ лекараӈэ, ненэцяӈга’’на илени сармико савумдамбада лекараӈэ таралпату’’ си’’ив юр’’ ёнар’’ есям’ ня’’маӈгу’’.
•Варючи’’ ненэця’’, Ӈарка сайнормахана мэвы’’, ӈавна’ сайнорта нядабавы’’, варючи ӈацекэсавэй’’ мяд’ тер’’, ява’’ лэтрамбада’’ няби мядото’ тер’’, тикахад тамна ӈани’’ хибяри’’ вэнекудо’, хоскидо’ мирци’’ хабтамбаӈгудо’.
•Электронной сертификатм’ нюдяко’’ хардаха’’на илена’’ ӈобтикы мэтадо’. Малакам’, малакахад сертавы ӈавар’’ несэй хардахад тэмдаба ӈани’ пиртыдо’. Тикы’ нерцю’’ тарцям’ харто’ лекарато’ мя’’лихина ня’’ма пир’’ӈаць.
Анна Яптик’ падвы
Авторы
Няръяна Нгэрм
Темы