обновлено: 05:41, 25 декабря 2024
Няръяна Ӈэрм
Ямална’’ ӈарка яляхана
Ӈарка пэвдей иры’ юдимдей яля — округна’’ соя’’ма’ яля‒ хасава юр’’ тет поданда хая. Тикы яляхана яна’’ тер’’ Ямална’’ ӈэвахана мэнахад, район’’ серо минренахатт хуркари сава ненадумда’’ми ня’’марпасеты’’. Тюку по’ ӈобтикы ненадо падро ня’’мана’’ ӈокаць.
Неновна ӈока ню вадавы саву’’ӈаць, Ямална’’ ӈуданданахад ненадумда’’ми ня’’маць. «Родительская слава» орденм’ Худи еркарм’ мэтаха’ Хэвко Тумбурович няби Валентина Николаевна ня’’амӈаханзь. Пыди’ ю’’ ню небяха’ нисяха’, самляӈг ю’’ по’’ пир’’ ӈопой ила’ сехэрым’ нёдаӈаха’. Нюди’ харто’ мяд’ терсавэй’’. Теда’ нюти’ ню пэрӈаха’.
«Материнская слава Ямала» медальм’ Яптане Таютовна Яптикы’ ня’’мась. Пыда вэсаконда ня’ мат’’ нюм’ вадавэхэ’. Ӈацекыди’ мал’’ выӈгана вадёданвы’’. Илеванди’ ямбан’ ты пэртяӈэ таравэхэ’. Нюди’ мал’’ харто’ иладамдо’ хо’’, ӈаркадо’ манзара’’, нюдякоридо’ школахана тохолку. Хой’ няӈы илам’ ӈани’ теневадо’, вадавнандо’ лахана’’. Хуркари’’ пирдырмаха’’на, конкурсха’’на мэсеты’’, нерня’ ереберцеты’’.
Медальм’ ня’’мавы не тарем’ лахана:
— Выӈгана иледм’. Ӈавнахавахананда мюсерӈаваць. Юд’’ по’’ тяхана сэрад похона тына’’ хаць. Теда’ нядэва’’. Медальм’ няни тавадо’ ихинани ёльце сава, ӈацекыни сава ненэцяӈэ вады’’, манзаидо’ тид’’ минре’’. Тикахад небяха’ нисяха’ табекорихид вуни пере’’, харе’’ ненэцяӈгад ӈани’ ӈэ’’нив’’, харта тайку’ ни ӈэӈгу’’, ӈамгэхэрт яӈгод’’нив’’, ня’ табекорихина иле вуни’’ пирас’’. Хой’ няна мэна’’ илдо’ тоена, поёрць, хубтахана мер’ юркорць, тэхэ’’ ханаць тара. Хобатнанд таняб’’, нерня юят’’нирав’’: тодаламбаӈгур, хасуй’’ нярцо’’ ни’ мэӈгур, ӈавлаӈгур. Мань невхы’’ иринани’’ табеку нёдадм’. Нисяени нися мята терӈэ мале сяндось, сидндет недонзь, сидя хасавадонзь. Няби ириени хасую’’ хасава нядась, ӈопой неридонзь, ӈокхандо’ юкад вата ӈопойдо’ ӈэвысь. Падрони ма’’ламба си’’ми нядабавы’’ няха’’ни, Панаевск няби Яр-Саля хардахана серо минренаха’’, тамна ӈани’’ нядаӈговэхэ’’ ӈарка вадам’ мэ’’ӈадм’.
Тарця ненадумда’’ми ня’’мавы няхато’ сыраць ненэця’’ ӈобтикы тарем’ харваӈгу’’. Хусувэй хибян’ ненадо падар’’, медаль мипада ни ӈа’’, сидя’ сянрихи’’, илам’ нерня’ пэртарихи’’ мипасеты’’. Ӈадьбята етри’ нерняри’ ӈэсь серо’’ӈа. Ӈацекы’’ сававна тохолкоя’’, харвабцодо’ индо’ ядэрабцо’ сер’ ха’’морӈая’’, хибя ханзер’’ манзараван’, илеван’ харва тарем’ илея.
Анна Яптик’ падвы
Сидяӈг: А.Яптик’ тадтавы
