Няръяна Ӈэрм
Ирината вадам’ мэ’’ӈа
Нямэхэна ва’’лёй’’ ӈэрм’ тер’’ ӈацекы’’ олимпиадам’ падыбиць. Тюку по’ няхар’’ вы’ тер ненэй ненэцясь. Ӈопойдо’ Тасу’ я’ няд товэсь. Пирдырма мале’’мяхад мядоманзь тюӈгана’’ таняць.
Ӈэдя’ тер не ӈацекы Тамара Ярой турӈась. Сита ненэй вадан’ тохоламбаданда — Людмила Ивановна Потапова’ ня’ редакцияхана’’ товэхэнзь. Сяхаринда ӈахат ядэрта’’ нина’’ ваде’’ман’ харванадо’ ӈокарка ӈэвы ӈэсеты. Ӈояк’’ тэворта ненэця’ няндерм’, несэй вада’ хэтырм’ намдавахав, ненэся тарси’’ сава. Вадета’’ иле’’мяхабида сит ӈаха’’, нивы манэпавы яха’’ тэвраӈгу’’. Тарця нянд тоб’’, манзаид хэвняку нензалаӈгуд, тэрихив ихинанд манд’’нинав’’: «Пунарка мэбцакын». Тикахад ӈобт’ ма’’люрць ян’, тасалкулава’ ян’ лаханакованзь хандан. Теда’ ӈани’ лахарюна’’ таняна мэ’’эйнаць.
Тамара тамна паской париденя ной панэмда серась. Паныда невхы хаданата сэдыр’’мана сэдвы, тасехэй’’ мадавэхэ’’на падтавы. Нохо икдаквада ёльце ливра. Ӈэванда масер’’ тэри ябере’’. Ӈэванда таркав’’ ямбакоко’’, нямдъяхая’’, ӈэбтота. Ненэй вадамда ӈани’ сававна теневада. Сертаванда’’ манзаида мал’’ таӈга пирдалевыдась. Олимпиадахана няхаромдэй ян’ ха’’амвыць, ненадо падарм’ ня’’амвысь. Пыда инда ядэрабцо няни ваде’’ядась:
— Си’’ни то’’олха’’ няха’’нани пирдырма илека ӈэвы. Хусувэва’’ ихинянда нерня’ ереман’ харвась. Мал’’ ва’’лёйваць, тикы’ няю’ хуркари ӈуда’ тер няна’’ таць. Ӈани’’ хардахат ӈэда’’ нини торомдадм’, ехэрана марадм’ манэ’’ӈадм’. Няха’’ни тарем’ маман’ харвадм’: «Ӈацекыей’’, вадара’’, невхы ирината’’ ила’ саирм’ пили’’ нёдара’’, хуркари’’ сава’’ серка’’на пыхыдада’’ нерняку’ пэрӈада’’».
Ненэй вадам’ тидхалембадада, минренада ӈока хибям’ вадан’, ненэцие’’ ила’ саирт’ тохолавы. Сяхаӈгав’ Саляӈгардахана санаторно-лесной школахана манзарась. Теда’ Ӈэдяӈгана иле.
— Тамара школана’’, районана’’ олимпиадаха’’на пирдырӈась, мале сянхана нерня’ ха’’мыць. Варемда мэта, пэдава не ӈацекы. Пяна манзаямда техэ яханда тэволада, я’ еркана ни мацядар’’, етри’ тэваданамда тэвада. Мань теда’ нянда манзетыдм’: «Ханзер’’ манзаравахани, ханзер’’ ненэцяӈгат хонарковахани сомбоковна сыр’’, сяхари’ минрена серми пыдар пявандар». Тэри мэвани сер’ невхы вади падыбасетыдм’, ма’’ламбасетыдм’. Неновна Тасу’ я’ выӈгана илена’’ вадито’ хэтыр’’ яӈга’’. Маня’’ вадана’’ хэтыркана «ӈ» буквам’ нива’’ хэтыбю’’, «ӈамгэ» вадам’ «амгэ»ӈэ ваде’’ӈава’’. Ханяӈы’’ вадина’’ хэбиворӈа’’: хибяхав манда «тикахана ӈа», маня’’ тарем’ мандава’’ «кана ӈа». Тецьда выӈгана илевахад перена сер’’, мерцясавэй хадхана хараси’’ вунин лаханакод’’, индатамд нэкалкарта я’’маӈгу’’нинав’’, ӈадьбята вадид ӈархандо’ нинякыд вадет’’. Тохоламбада ӈацекыни литературной вадавна падна табедамбасетын, — Людмила Ивановна лахана.
Мядондахаюна’’ лахарёди’ яха’ ендатарев’ хайнась, ваданди’ хэтыр’’ хаця яӈгась, нянахавани тэри инзелебцось. Тарем’ таслаб’’, Ӈэдя’ школахана юнета’’ тохолкода’’ тохолку’’, манзаям’ пирта’’ ӈацекы тохоламбада’’ манзара’’. Мяк’’ турмэхэ’ ня’ савари вади ӈэдарамбидм’. Вадамди’ тамна’ тяха’ минремди’, нёдана сехэрэнди’ ний таӈго ӈэя.
Анна Яптик’ падвы
Авторы
Няръяна Нгэрм
Темы