Няръяна Ӈэрм
Хубта ян’ тэвавы’’
Нямыхы минда Ямал Ири округна’’ тиӈгывна ӈэдалёрӈа. Хуркари марк’’, нюдяко хардаха’’ тэворӈа. Сита яна’’ ханярина ӈате’’. Нянанда парнэко, Сыра’ не ӈацекы, тадтаӈгода ядэрӈа’’. Пыдо’ мал’’ ӈобанзер’’ Едэй по’ ед’ ӈэда серм’ минре’’, ӈацекы сянакултамби’’.
Тандая’ Сёяха хардан’ тэвавыдаць. Хэвы’’ похо’’на Ямал Ири сяхаӈгарт’ таня’ нись тэвор’’. Тюку по’ тадхав’ ӈаха’’ тэвавы’’. Таняӈы я’ тер’’ ненадо мядондахандо’ ёльце майвыдаць. Ӈэдалёро’’мида няна’’ ваде’’ядась, телефонувна вабцамда намдадамзь:
— Тюкохона си’’ми ӈули’’ ӈатевыць. Ӈавнанда Сёяха’ хэвувна тэри ӈэдалёрцетыдм’, ихинани товахаван’ харвасетыдм’, мядо’’мана ядэртахани ӈопой ирыми тянёлеӈгасеты. Ява’’ ӈарка ӈэ’’нив’’. Интернатан’, нюдяко’’ ӈацекы’’ мэлаван’ хан’’ӈадамзь, няни хуркари мэкад стихотворения ваде’’ӈаць, сё мэ’’ӈаць. Нерня’ луца вадавна тороватадамзь, пуна ненэця’ вадавна. Нядани хонаркурӈаць: «Ненэй вадавна теневан?» Ма’’нисядам: «Я’ сяр’ ниня сян вада таня, мал’’ теневын». Ӈока ям’ сюртебни ӈод’’ пэдаӈганарахадм’ ӈоб’’ нидм’ ӈа’’, ханяцей’’ ныласетыв’’. Носиндалава’ ирыхына пирдырмами миӈась. Сёяха’ тер’’ ӈацекы’’ хадыкоця’ сянакод ӈобтикы сертавыць. Ӈопойдо’ Тусида еркарм’ мэтадо’ ябдавысь, мядонзэйхана ми’’ӈавась.
Ямал Ирим’ манэ’’ман’ харвана’’ культура’ мякана ма’’лёвыць. Тохолкода’’ сиддо’ тохоламбадито’ ня’ ядэрмыць. Антонина Серасхова’ класс’ тер’’ сянакованзь ӈани’ хан’’мыць:
— Ӈацекыни ня’ ирива’’ манэ’’манзь ӈобкана хаяваць. Теда’ падарт’ тохоламбадини нябимдей классахана мэ’’. Небой поход тохолко пэвы’’ мале ваӈурӈа’’. Ямал Ирим’ манэ’’ма нянандо’ ёльце савась. Сямян таняна сёдо’ тензибтець, сёдо’ тэри хайнаць. Ненэця’ вадавна, луца вадавна падна стихотворения ваде’’ӈаць. Ханяӈы’’ етя’ тохоламбидонзь. Таремгав’ Едэй по’ ед’ ӈэда тедари’ няндо’ сабе ниваць мипю’’, тандая’ пэйнаць, ӈадьбята ӈамгэм’ тензибте’’, тикым’ ваде’’ӈаць. Хороводм’ мэ’’ӈаваць, сянакуваць. Парнэко, Сыра’ не ӈацекы тикахана мэць. Няна’’ иле’’мям’ ваде’’ӈаць. Мань нянахартани мэкадась. Ямал Ири сяхаӈгарт’ турмада яӈгунив’’, тарцям’ манэць ехэра’’нисява’’ам’’, тэрихив ха’ малхана намдормэкэва’’, ханяӈэхэ’’на ваде’’мэкэва’’. Луца’ Тецьда Иририм’ сававна тенев’’нивам’’. Мал’’ маймбицей. Няндо хамбеткаци мипись. Пуна школан’ тэв’’махадана’’ ядэро’’мава’’ пон’ ваде’’ӈаваць. Иле’’мина’’ урокахана тензибтембинаць, ныланава’ ёльцяӈгана. Небо’ ӈани’ ӈатеваць, тамальӈгана тамна ӈуда’ тер сертабиваць, тюку похов таня’ ниваць тэвор’’, манзаява’’ ӈокась. Теда’ янамбовна хой’ ня’ хэванзь хамекува’’, контрольной манзаи падыбива’’, оценкына’’ ӈабтамбива’’.
Ти, тарем’ ӈэрм яхана мядомы, ненэцие майбтавы. Маня’’ ӈод’’ редакцияхана ӈобтикы ӈатева’’. Нянда подпискам’ сертаӈгува’’, ненэй вадавна толаӈгода, сямян юнхат теневаӈгу.
Анна Яптик’ падвы
Авторы
Няръяна Нгэрм
Темы