Няръяна Ӈэрм
«Хэйро» ямдо’ ялэмдамби
Ензя’ няна илена’’ нина’’ «Хэйро» нюбета ансамбль’ соё’’ма’ ялям’ мэ’’мы’’. Мале 55 по’’ ямбан’ ненэця’’ нядандо’ ӈока сомбой сём’ намдавы’’, ӈэрм’ ненэцие’’ тарабцо манэ’’мы’’.
Ненадо’ яляндо’ ед’ наӈэдя няхар’’ яля’ ямбан’ нито’ сэв майбтамбавы’’. Харад’ тер’’ ёльце саву’’мыдо’. Пыдо’ тенева’’: «Хибяхарт сито’ тотрев’ нув’ сармик, я’ сармик ни ӈадимдеӈгу’’».
«Ханярина мэб’’на’’ ӈод’’, сидна’’ маниеванзь товы’’ ненэця’’ ӈули’’ маймбасеты’’. Красноярской край’ няна маня’’ сидна’’ хавна Ӈэрм’ яна’’ ила’ саирм’ хибяхарт нида ӈадимдембю’’. Таймырханана’’ невхы’’ похот тодо’’ тэнз’’ иле’’. Ӈокхандо’ — самляӈг’’. Тикы’’ — ненэй ненэця’’, мандо’’, туӈгос’’, тавыс’’, эвенк’’», — Галина Чернышева, нермбэртядо’ лахана.
«Маня’’ ӈопой мяд’ тер’ то’’олхава’’. Ныхыва’’, мэйрёвава’’ тикахад пере. Сцена’ нина мэбна’’ иленархава’’», — Михаил Клещин «Хэйро» ансамбльхана тарана манзаянда нямна ибедорӈа.
«Ансамбльна’’ тер’’ мал’’ нюдя хардахат товы’’. Выӈгы илам’ теневадо’. Невхы иландо’ саирм’ нидо’ юрыбю’’. Теневабцудо’ таняд паӈгды’’. Ӈадьбято’ хусувэй ӈамгэм’ ӈадимде пирӈа’’», — Даяна Воробьёва, балетмейстердо’ ӈули’’ саву’’яда.
«Няръяна Ӈэрм» газета’ паднана’’ е’’эмнандо’ ӈобтикы сава вади мэ’’ӈа’’. Сяхари’ Ямал’ няна сидто’ ӈатеӈгува’’.
Елена Ямкина’ падвы
Сидяӈг: Е.Ямкина’ тавы
Авторы
Няръяна Нгэрм
Темы