Няръяна Ӈэрм
Ханярина нерняна мэ’’
Ямална’’ тер’’ сюрамбабто’ саць мере’’мы’’. Тандая’ Анадырь’ няби Тюмень’ няна пирдырмаха’ ӈэвэхэ’. Маня’’ ненэциена’’ ӈани’ таняна мэвы’’.
Нюртей мэва «Чукотка Х run: Бегу по Арктике» сюрберма ӈэвы. Сёбар’’ 42 км, 21 км, 3 км хунат’ мимбато’ серо’’мы. Тикахад нюдяко’’ ӈацекы’’ 1,3 км пирт’ ӈэдарамбавыдо’. Ненэця’’ Дионисия нюбета пэ хой’ хэвувна, таб сехэрэвна нидо’ нертембавы’’. Сямянхат нида ваць хаевы — Юрий Лаптандер. Ёльце торомбэй, 42 километрм’ няхар’’ час няхар’’ ю’’ минутари пэрмэда. 21 км пирт’ сюрамбада’’ не’’ поӈгана Мария Куртямова ва’’лёй ӈэвы. Ӈобкарт нем’ неранда ня’ нивы ӈэдара’’. Ӈобтикы таӈгунат’ минда’’ хасава’’ поӈгана Филипп Тайбери мере’’мы, пыда нябимдейӈэ товы. Пыдо’ мал’’ харто’ ямдо’ Приуральской районм’ нерня’ пэрмы’’.
Тамна ӈопой нява’’ Владимир Тусида Ялуторовск’ няна пирдырмы. Таняна мяд’ тер’’ е’’эмня «Сингуль» фестивальм’ ӈадимдембавы’’. Тикы’ ирмня полумарафон мимы. 3,10, 21 километр’ пирт’ Сингуль то’ хэвувна сюрамбавы’’. Мале сян Ямал’ тер’’ ныхыдо’ манэсармы’’. Сёяхахад ӈэда нява’’ нябимдей ян’ ха’’амвы’’. Нянанда ӈопой час’ вата пирари мась ӈэвы. «Yӈmӈl Running» нюбета страницахананда тарем’ паднась: «Нерняна сидярининзь, 17 км пиркана нями нерня’ ӈэдарабтав. Теда’ ӈани’ хамекодадм’. Пуна Омск’ няю’ хандадм’.
Та’ пудана’’ яляха’’на саць тоенана пирдырмамдо’ мэта’’. Минандо’ ниня хуркари’’ пэ’’, сабол’’, илена’’ я’’ таняӈгу’’. Ӈадьбята ӈахакуд пыхыдадо’ высылпи’’, ялэхэ’’ пин’ тарпорӈа’’, сюрберӈа’’.
Автор: А. Яптик’ падвы
Авторы
Няръяна Нгэрм
Темы