Няръяна Ӈэрм
Хабейманзь ха’’мормы’’
Невхы похо’’на выӈгана илевы’’ иринана’’ хабейманзь тэхэ’’на ӈэдалё хардан’ ханмы’’. Те’’ны похо’’на тарем’ хабейнда’’ тянё ӈэсеты’’. Пилю’’ иры’ хэвы’’ яляха’’на ӈопой выӈгана илена ненэць’ хардан’ тэхэ’’на тэвормы.
Невхы похо’’на выӈгана илевы’’ иринана’’ хабейманзь тэхэ’’на ӈэдалё хардан’ ханмы’’. Те’’ны похо’’на тарем’ хабейнда’’ тянё ӈэсеты’’. Пилю’’ иры’ хэвы’’ яляха’’на ӈопой выӈгана илена ненэць’ хардан’ тэхэ’’на тэвормы.
Сойко Яптик Сёяха’ ёльцянд’ сидя яля ӈэдалёвы. Саць тарана ӈаворидамда хосаявы. Пыда илеванда ямбан’ хой’ няна илена ненэць’. Ты пэрма’ серм’ ӈули’’ савовна теневада.
Тюку по’ танда ӈули’ хасуй ӈэвы. Сарёсявы. Тэхэна ӈэдалеб’’ яда сы’’ӈавы. Ӈадьбянда пыда пон мимы. Тыда нылабтаванзь теневана нита ӈысыхына сеӈгавы. Тад пуна хардан’ ӈани’ ӈэдалавы’’. Ӈамгэ хадкэпяси’’ тэвадана яханда тэввы’’. Хананда тер’’ саӈгово’’маӈгад, тэмдавы ӈаворита пеля и’’мня еся ӈанохона ӈысыханда ӈэдаравыда.
Я’ мал’ тер’’ вадавнанда, ӈэрм яханана’’ танда саць нивы ядембю’’. Тарем ӈод’ выӈгана иленя’’ ненэця’’ мэванда хасёдадо’ ӈока’’. Епади’’ яля’’ ёльцяӈгана мале сян ӈэсы’’ тыдо’ ӈобт’ ӈомдавыдо’. Пилю’’ ирыхана ты пэртя’’ тэхэ’’нато’ евы’’. Нибярё’’, неняӈг’’, пилю’’ пи’ ямбан тирць пэрӈа’’. Хадырти ты пэдакабтамби’’.
Вы’’ илаӈгана илена’’ ненэця’’ ӈэрё’’ няна таӈгамдыд’’. Сырэй мэлвахато’ мюселтыд’’.
Р. Ӈокдэтта’ падвы
Сидяӈг: А. Серасхова’ тадтавы
Авторы
Няръяна Нгэрм
Темы