Ӈэрм’ мерцяхат ныхытарка

Сидяӈг: Ю. Талеева’ тадтавы

Ненэцие’’ толаӈгова хардахана Прокопий Явтысой’ несэй сертавы книгам’ «Ненэця’ вадам’ тохолабидм’» манэ’’сарӈаць. Маркана илена’’ Ӈэрм’ тер’’ отделкана ма’’люрӈаць. Тамальӈгана Няръяна маркана ненэцие’’ паднава’ ялэ пяць. Тикыдо’ ӈарка пэвдей ирий’ 20 яля’ ӈэсонд миманда’’. Яханана’’ ваераванда’’ сер’’ ханярина таняванда’’.

Тандая’ сертавы книгавна хари’’ вадам’ хибяри харта тохоламба пиртада. Нюдяко книгаця — сеп’ мюня минарма’ пир’’. Округна’’ толаӈгова’ харад’ фондхана 2011 поход Прокопий Андреевич Явтысой’ хаевы’’ падар лэтамби’’, тарця падар’’мана Ӈэрм’ тер’’ отдел манзаям’ хамадась. Несэй ӈадимы книга Прокопий Явтысой’ падвэвна сертабэй, хуний фондхана сюрысь. Паднана’ не ню Лариса Латышева мась:

— Тикы нисяни пудана падвы, илеванда мальӈгана сертавэда. Небями мякдана’’ библиотекахадана’’, ненэця’ вадам’ толабава’’ е’’эмня хамадавы рукописьм’ толаӈгова’ харад’ ӈэрм’ отделан’ тэврадась. Прокопий Андреевич вадамда сахарамбидась, манзеты: «Мань ненэця’ вадами — ӈэрм’ сата’’ мерцяхат ныхы’’та». Пыда тарем’ тасламбидась: «Ненэй ненэця’ ил’ хари’’ вадахад тебды. Вадава’’ илеӈгу — ненэця’ ӈэвава’’ таняӈгу. Тарця книга илебей’ ӈацекы вадамдо’ тохоламбаван’ тэвраб’’нанда тара.

Толаӈгова’ хардахана ваеравы ма’’лёвахана ӈацембой хибяри’’ ӈокаць, поӈганандо’ маркы А.П. Пырерко’ нювм’ нюбета школахана тоходанана’’ ӈацекы’’ мэць. Пыдо’ ненэця’ вадава’’ нерня’ минреванда’’. Сидяӈг: Ю. Талеева’ тадтавы

Пуда падвэмда манэ’’мана’’ е’’эмня ӈули’’ ӈока ӈамгэ серта тарась. Книгам’ хамадамбавы нява’’, округна’’ толаӈгова’ харад’ ӈэрм’ отделкана мэна Зоя Ивакилева ваде’’ӈадась:

— Маня’’ отделканана’’ сидя рукописьм’ лэтамбива’’. Тикы округханана’’ теневана хибярихи’ — Людмила Бобрикова няби Прокопий Явтысой. Няна’’ падвы’’ книгаӈэ сертава’ е’’эмня департаментан’ вадами’ мэ’’ӈадамзь: «Сборникм’ ӈадимде тара. Тэри фондхана ӈэб’’то’ ни серос’’, хибярихи’’ манэ’’лабтамба тара’’. Ненэця’’ маниебто’, толабабто серо’’ӈа. Прокопий Андреевич илеванда мальӈгана тарем’ харвась». Си’’ми ервона’’ намдаць, сер’’ нерня’ нензахалъядаць, сидя по’ пэрӈавась. Тюку яля’ «Ненэця’ вадам’ тохолабидм’» книгам’ ӈудаха’’нана’’ ня’’амбива’’…

Падна’’мида’’ мал’ электронной форматан’ сертавыдась. Зоя Степановна ма’’нисяв, ӈули’’ нерде’ лапцевани’ нерцюна сейми пинаркась, тосакабтёрхась. Янамбовна пявась. Рукописьм’ несэйвана манэ’’сарӈавась, хусувэй вада’ саирм’ таславась, ханяӈыдо’ тидхалейнась.

Сидя по’ ямбан’ Зоя Степановна книгам’ ма’’ламбидась, ӈокханда 320 книгам’ ӈадимдевы’’. Падтавы паской книга’ ханяӈы падта’’ми Надежда Выучейской сертавыда, Светлана Талеева вади тидхалембавы.

— Мань нянани мэкадась, ӈули’’ нерде’ ненэця’ вада’ тохолкодадм’. Прокопий Андреевичм’ сававна теневавась, урокханани нямнанда ӈацекэхэ’’ лаханасетыдм’, падвыда толабасетыва’’. Ваданда харам’ манэ’’ӈадм’, мэкад, паской, яӈганя’ то’’олха. Илаӈгананда манэ’’мыда мэкадавна манэ’’лабтамбида. Теневана хибяри ӈэвы. Тарцям’ сертабавами ихинани сава.

Ненэцие’’ паднава’’ ялэ нэмбава’ ма’’лёвахана округна’’ депутат’ Матвей Чупров мэсь. Тарця вади мэ’’ӈась:

— Книгако нюдякоця’ ӈэбта ӈод’’, саць тара, мэбе’’ӈа. Ненэцие’’ вадамда’’ тохоламбава’ няю’ ӈарка еӈгам’ сертада’’.

Книга округна’’ мюй политикам’ минрена Департамент’ ватовна сертавы, ӈэрм’ тер’’ нямна ӈэда программавна таславы.

Юлия Талеева’ падвы

Авторы

Няръяна Нгэрм

05:20, 27 декабря 2024

Темы