Няръяна Ӈэрм
Едэй по’ ед’
Салехардаханана’’ школахана тохолкода’’ ӈацекы’’ ӈарка пэвдей’ иры’ пудана яляхана едэй пом’ ядабтавам’ ӈате’’. Школаханато’ хуркари’’ тарабцо, сянакубц няндо’ ӈадимдембасеты’’.
Ӈоб’’ яля’ Обдорской гимназиян’ ханӈадамзь. Тикахана тохолкода’’ ӈацекы’’ едэй пон’ хамековыць. Тохолко мэлвито’ мюй хуркари’’ падвы’’, саламӈгана’’ сянакохо’’на, мишураха’’на падтавыдонзь. Коридорто’ мюй ӈобтарем’ ялэмдавыдонзь, падвы’’ хадыци палмыць.
Ӈарка пэвдей иры’ юкад вата хасаваюдимдей яляхана нюдямбой’’ классаха’’на мэна’’ хэбидя ялямдо’ мэ’’ӈадонзь. Хусувэдо’ падвы ембадирм’ сервы. Сидто’ тохоламбада’’ луци’’ нето’ ня’ ӈарка лохо’ мюня ма’’лыць. Няндо’ тарабцо, сянакубц манэ’’лабтамбиць. Ӈэрм сей иримдо’ няць сё хынобтамбиць. Ӈацекэко’’ маямба тарарка хыно’’ӈаць. Иридо’ няндо’ сава вади ваде’’ӈась, ӈудандо’ терад миӈась. Тикы’ поӈгана ненадовна няхар’’ хасава ӈацекым’ сэвтедамзь. Пыдо’ ӈоб хэвсахана мэць. Лаханакурмито’ сер’ хамэдэян’, пыдо’ ненэй ненэця’’ ӈэрха’’. Ӈани’’ няхато’ хамеда — ни’’ палмана’’, ядбато’ ензидо’ таӈга, мэёвна ха’’морӈа’’. Ӈоб’’ нядо’ Тусида еркарм’ мэ’’мы. Нябимдей классахана мэна Илья ӈамгэм’ пэрмандо’ нямна хонрамбивась. Пыда тарем’ мась:
‒ Тюку яля’ ихиняни ӈули’’ сава. Паской имбытадм’ серадамзь. Тараваць, сём’ мэ’’ӈаваць, сянакуваць. Тецьда Ири турӈась. Ӈудана’’ терад тась. Нер’’ урокм’ ӈэвандаӈэ тосадамзь. Луци’’ нева’’ мась: «Теда’ нида’’ тохолкод’’, хадыцям’ манэманзь хандава’’. Тикы’ пуд тохолко мэлвахана’’ тутава’’».
Илья лаханакуро’’махаданда паромбарка нита пумна ялъяць. Хэбидя ялямдо’ мэсо’’махадандо’ ӈацекы’’ урокахато’ хаяць. Няхар’’ сава нями нито’ хэвхана ӈуда’ тер ня’’амба ӈока нито’ пумна пядонзь.
Тадри’ сырэй’’ ныланава’ ялэдо’ пэӈгуд’’, мядото’ тер няць Едэй пом’ мэта’’.
Руфина Окотэтто’ падвы
Сидяӈг: А.Яптик’ тадтавы
Авторы
Няръяна Нгэрм
Темы