Диԓмтуӈ ӈычимчеӈа’’

Выӈкай диԓмтуӈ хомана чедимяӈатуӈ. Нитуӈ таньдет тохоԓампёшту’’. Мат’ пиԓи ха’та’’, пимшата’’ неша’’ мятуӈчеԓ няш Таԓкахана шеԓтамайтуӈ конкурсхана «Кочующая семья» мянаԓяш’’.

Чики конкурс’ манԓе кашемдючимты пуӈ Пуровский’ районхана шеԓтаматуӈ. Мянаԓта’’ Таԓкаӈ кявхана ӈайта паркан «Северный очаг» ӈомаш’’, нянантуӈ тамытуӈ ӈамыкутуӈ ненэй мякна ӈычимчемантуӈ мэт. Мянаԓмантуӈ мэты шанат дяхат мэна’’, выӈкна диԓина’’, мансԓанна’’ неша’’, капи’’ ӈомаш’’. Чупей ненэй паныдётуӈ мэӈаш’’. Хампԓяӈк номинацихина мянаԓяш’’. Куняна, куше нитуӈ ватапё хомана диԓимамтуӈ, ӈамэхана мансԓамамтуӈ вачаӈаш’’. Мятуӈчеԓ куше ӈуп вив мэш диԓимам ӈычимчеӈаш’’.

Чупей хомана мунуӈаш’’, таԓям мэмытуӈ вачитуӈ шичитуӈ маныдемы жюри’’ вин каамдяташ’’. Иван Пяк кявхананта мэнанта Татьяна няӈ выӈкат томэхэн’’, ты’ падеԓьш Таԓкахай совхозхана «Верхне-Пуровский» мансԓаӈахаӈ. Мятчеԓ ӈука нешаӈӈэ тунԓыхиӈ. Нич’ ӈупчики шичеч нятапиш’’. Диламч’ вачаш, ӈыди тамэч ӈамыдёч ӈычимчимпёш каԓеч ватамананьч мунуӈаханьш. Нешаӈ ватам хомана чедимяӈахаӈ. Дмитрий Пяк пушанта Зоя няӈ Ханымейский выӈкат томэхэӈ. Пычи каԓиташтухуӈ, тыч падеԓьштухуӈ. Ӈупчики хомана мянаԓяханьш. Шичеч нич’’, няӈэч неч’’ нятапиш’’. Василий Айваседо кявхананта мэнанта Софья няӈ куптат Каԓясамэхэт томэхэӈ. Пыч’ ӈупчики нешаӈ дилм хомана чедимяӈач.

Таԓям конкурсхана мянаԓьш шаӈкмян ӈамыдёч хомана вачадяч, ӈычимчедяч. Андрей Кунин кявхананта мэнанта Любовь няӈ Пуровская Толькахана мэна’’ капиди’’ дилм ӈычимчимпихиньш. Пыта катаната, ниԓината таняна диԓимы’’ капехет тывсумы’’. Денис Айваседо мятчеԓ Каԓпюԓ няна выӈкна диԓиӈа’’. Апыдю’’ начеэй няӈат тоӈаш. Немямтоӈ Анжелам конкурсхана нита’’, катамтуӈ няш, нятапитоньш. Шанат номинацихина мянаԓьш дилмтоӈ хомана ӈычимчеӈатоньш. Мат’ты мятчеԓ, пытатуӈ конуԓпёмы — Самбуԓкахат мэна неша’’. Ольга Вануйто кайканата’’ няш мянаԓяш. Пытоӈ девакуӈэ кадюмахататоӈ тамна выӈкай нешаӈ дилм нётаӈатуӈ. Куԓкаԓи’’ ӈамыдю’’, выӈкай дилант таԓана’’, каԓьтуӈ ӈутаханатоӈ шеԓташту’’. Ольга дёԓьше меԓь ни, кайканата’’ шаӈкмян хятдян, выӈкай ӈайватан тохоԓамыта. Конкурсхана мянаԓта’’ дилмтуӈ вачаш дёԓьше хомана мунуӈаш’’.

Чики дяԓяхана шанкмян мятутуӈ таамна мянаԓта’’ неӈи’’ хятмайтуӈ ӈамыкутуӈ ӈычимчимпиш’’. Мымкат шеԓтамы’’ пема’’, паны’’, тувшаку’’, патку’’, нойхат, мымкат хятмы’’ матамы’’, ӈочакохот пытуԓмы’’ ниӈвидя’’, патку’’, куԓкаԓи шана’ку’’ — мякнатоӈ шанат хӭйман камуԓта’’ ӈамыку’’ тадяӈаш’’.

Чикиӈ камна куԓкаԓи’’ ӈамԓу’’ пиԓимай’’. Шанат тэмс ӈоча’’, ӈамсахат, каԓяхат пиԓимы’’ ӈамаԓ’’, ӈочи вит’’, шай’’. Дюԓпимы’’ нянь, кэм нянь. Мянаԓта’’ неӈи’’ писанатуӈ ниня куԓкаԓи’’ ӈамаԓ’’ тадяӈаш’’.

Конкурсан «Кочующая семья» томы’’ неша’’ маньшту’’, таԓям шана’кош мянаԓма нянатоӈ дёԓьше вильӈа, хома. Нетуӈ кошту’’, каԓьтуӈ ватаманантуӈ няханатуӈ мунушту’’, ӈокна ныптакошту’’. Чуки похона пиԓи хомана выӈкна диԓина’’ нешаӈ ӈайши Таԓкахат мэна Иван и Татьянаӈ Пяк мятчеԓ каамдят. Нимимты местам Ханымейхат томэхэӈ Дмитрий и Зоя Пяк канаӈач. Няхамты местан Каԓясамэхэт мэнахаӈ Василий и Софья Айваседо каамдихиӈ. Специальный’ мячисэм Самбуԓкахат мэна неша’’, Ольга Вануйто мятчеԓ няамӈатуӈ. Конкурсхана мянаԓмы’’ неша’’ чупей патԓу’’ диплому’’ няамӈаш’’, миԓита’’ мячисы’’, веш патаԓ — сертификат’.

Чикиӈ камна касама’’ няԓяӈ’паӈк вяԓкуԓпиш’’, неӈи ӈай ваԓам ваԓапё мяӈаԓяш’’. Маньшту, чики мансдям’ выӈкна диԓеш пон мэтатуӈ. Ваԓам ӈучи’’ тайшаӈэ, шун’ваԓамӈэ мэштутуӈ.

Чики конкурсым «Кочующая семья» ӈуп нэхэхана шеԓтаӈатоньш. Чупей нятакуш: Ӈэԓм ‘чел’’ нешади’’ дет тонԓюта управление’ КМНС, нешади’’ дет ӈайта общественное’ движение’ «Ямал-потомкам!», культурахана мансԓанна’’ — шанат тэмс нешади’’ дет тонԓюта ЦНК, парк’ культуры’ «Северный очаг». Таԓям ӈуп вин камоԓьш шеԓтамахататуӈ нешади’’ мянаԓьш мэта конкурс’ хомана хӭйман камуԓяш, вильӈаш.

Андрей Пяк патмы

Татма: А. Пяк таттамы

Авторы

Няръяна Нгэрм

05:22, 05 января 2025

Темы