Няръяна Ӈэрм
Диламч хомана минԓеӈач
Ӈаԓка Россия дяханана чуки 2024 пома мятчеԓ’’ дет тонԓюта поӈэ тасԓамы. Шанат тэмс неша’’ ниԓинатуӈ, катанатуӈ минԓемы дилм нётамаӈмэт шеԓтамы. Пуровский районхана хомана, чиԓьниймана нитуӈ ватапëш диԓина’’ неша’’ ӈука. Николай Иликович, Римма Николаевна Пяк чет’дю’’ хампԓяӈк пуӈ чиԓьниймана, хома шоньшахана неч’ няш диԓиӈахаӈ. Пычи диланч’ дямпан ты’’ падеԓьш «Верхне — Пуровский» совхозхана мансԓаӈаханьш.
Николай Иликович Пяк таӈичохона 1957 похона дяԓяманымы. Таԓкахай школа-интернатхана тохоԓкомай. Школахана тохоԓкош хитамахатата вынт каймай, ты’’ падеԓьш мансԓана нешамта нятапёманта мэт. Таньдёԓьшкана нешадём Илику Пяк совхозхана «Верхне-Пуровский» ты’’ падеԓьш мансԓаӈаш. Николай Пяк неԓьчеэй совхозан нешанта няампёта ӈисын мансԓаш чепьмахананта хампԓяӈк’дяӈкня пота ӈаймай. 1973 похона март’ диԓихина «Верхне-Пуровский» совхозан мансԓаш чепьмай. Неԓьчеэй няна, понта нюча ӈайтан, тэхэна мансԓани’’ нятапёта ученик’ӈэ мэмай. Ты’’ падеԓьш пастух’’ нета’’ нятапёштомай, ӈисым ԓэтпёш пиӈ вештомай. Ӈуп пуӈ каймяхат манԓе оленеводӈэ совхозан няаммайтуӈ. Тэхэна’’ мансԓанна’’ таньдёԓьшкана мансдятоӈ дёԓьше шеэммай.
Шиниӈкуй дилта вачаш Николай Иликович маньшту: «Таньдёԓьшкана тэхэна’’ мансԓанаӈайши мансдяма шеэмӈаш. Хыԓаӈ чешчахана’’, таӈичохона дячапётахана’’ тына’’ халаку’’ падиԓтан, ӈисыма писамэй веԓаштумаш. Халаку’’, ненымана ты’’ канунта’’, ӈуп похона шанат дю’’ ты’’ каташтуш’’. Тына’’ нёташ пон мюшаԓьштумаш’’». Николай Пяк чет’ дю’’ пуӈ «Верхне-Пуровский» совхозхана мансԓаӈаш, няхаԓ дю’’ пуӈ бригадир’ӈэ ӈисым няампиш. Ӈутахананта ӈайта тэта’’ ӈисы пу’’ тахана хома патаԓт камаштуш. Мансԓаманта камна шан поӈ депутатӈэ мэӈаш. Выӈкна, петаԓахана диԓина’’ нешади’’ дилыӈ нямна ӈайта вачи’’ веԓву’’ каха’’ тэвԓаманта мэты, куԓкаԓи’’ мыԓхана’’ — съездхана’’, конференцихина’’, собранихина’’ ӈаԓка’’ каԓват’’ няна канаштуш. Хомана мансԓаманта де’эмня куԓкаԓи’’ награда’’ патԓота’’ тадя’’. Николай Илекович ветеран Ямала, «Заслуженный оленевод ЯНАО». Мансԓаманта дямпан ши’та кявхананта мэнадюм няташтуш.
Римма Николаевна понанта веԓкԓата Агичева ӈаймай. Нючаӈаймяхананта Часелькаӈ няна диԓимай. Нета’’ каԓиташ мансԓамай’’. Ши’та вcкодюм Николай Иликович ӈявтоԓьш косыдямай. Маньшту, неԓьчеэй ши’та канамаханантоӈ мяктуӈ мимантуӈ дямпан пон хcмтавит’’ камтупямай’’. Чикехет мяктуӈ тxвмахататуӈ нета’’ тоԓумтамахатта, вита неншамай. Тэхэна мансԓанна’’ дилтоӈ каԓитани’’ дилхат ӈинԓи ӈаймай. Таԓям неԓьчеэй няна ӈамыԓим пяпта, катадюм ши’та тапаташтомай, няташтомай. Чикехамахат тэхэна мэни’’ дилант тохомахатата, шаӈкмян ӈайвачета’’ каԓьта падеԓьштомыта. Римма Николаевна нючаӈэпдянта хайтуԓамам чедимямай. Ӈамыԓим хятпата, шеԓтамайта паныдёта’’, пемита’’ дёԓьше меԓь ӈяштомай’’. Мя’’кай ӈайвачета’’ камна ты’’ дёԓкахана вяԓкуԓана’’, ты’’ ваткана тонԓапёта нета’’ няташтомай. Дилмта вачаш Римма Пяк маньшту: «Таньдёԓьшкана пастухӈэ мэна’’ пон мюшаԓьштуш, няхаԓ дяԓя кайны — ӈай дямтанадят. Ты’’ падиԓта неша’’ мансдятоӈ дёԓьше шеэмӈаш, куԓкаԓи’’ чешчахана’’, дячапётахана’’ мюшаԓты’’. Тытоӈ писамэй веԓаштутоньш, писамэй мансԓаштуш’’».
Римма Николаевна «Верхне-Пуровский» совхозхана чет’дю’’ хампԓяӈк пуӈ мансԓаӈа, 1979 похона мансԓаш чепьӈаш. Хомана мансԓаманта де’эмня куԓкаԓи’’ патԓота’’, веԓву мимы, тадя’’. Николай Иликович, Римма Николаевна чет’дю’’ мат’ пуӈ чиԓьниймана, хома шоньшахана неч’ няш диԓиӈахаӈ. Дю’’ нюч, мат’туӈ касама, чет’туӈ — ни’’. Ничи’’ тотуӈ вивӈутута’’, хомана мансԓанна’’, чиԓьниймана дилмтуӈ минԓена’’ неша’’. Вӭкохоӈ пушахаӈ нич’’ куԓкаԓи’’ ӈайватаха’’, выӈкай дилант таԓана’’, тохоԓамэч’. Каса нич’’ выӈкна тэхэна’’ мансԓаӈа’’. Ӈаԓка каса нюч Лев Пяк манԓе шичадю’’ шитчет’ пуӈ нешанта мансԓама ӈисыхана ты’’ падеԓьш «Верхне-Пуровский» совхозхана мансԓаӈа. Лев Николаевич мансдямта хомана минԓеӈата. Дёԓьше пимшата, чиԓьний нешаӈ. Непоӈ ӈупчики званим «Заслуженный оленевод Ямала» няамӈаш. Нита де’эмня мунуш Николай Илекувич маньшту: «Выӈкна диԓиман хаш четаӈ тэхэна’’ мансԓыниив. Тэӈи нешаӈкна диԓивсу. Ты нешаӈ дилхана — ӈамаԓ, мя’’, паны’’, кан’. Ты’’ хусанаӈа’’, выӈкай дил диӈкумты. Таԓям четаӈ нешаӈи’’ тыувдетоӈ ԓэтԓампёштутуӈ’’».
Четаӈ Николай Иликович манԓе пеншихина мэӈа, чикехена ӈотнаӈ мансԓаш тохомы вcко ӈучита’’ шема ниш’ту ӈымчу. Пон ты’’ падиԓта’’ нита’’, кайканата’’ нятапёшту. Римма Николаевна тамна совхозхана мансԓаӈа. Нештахаӈ нюча каса нюхудёта тум чудипи. Панытач хайташту, ӈамԓатач пиԓешту. Вcкохоӈ пушахаӈ нич’’ хомана ватамахатач, четаӈ нич’’ нюувдехе’’ майпёштухуӈ. Куԓкаԓи ӈамыдю’’, чувы диԓант таԓана’’, шеԓтапёш тохоԓаштуч, нешаӈ ватамана нянатуӈ мунуштухуӈ. Таԓьша хомана мансԓанна’’, чиԓьниймана выӈкна дилмтуӈ минԓена’’ нена’’ тадямэнан, ненэй нешаӈ диԓивсу, нешаӈ вата ни диӈкумт.
Андрей Пяк патмы
Авторы
Няръяна Нгэрм
Темы