Лух Авт
Вуӆы ёх кеша яӆап нётапсайт
Общинайн уӆты вуӆы ёх ураңан грант охат оленеводство направление хуват мийӆыӆайт. Си тумпийн сельской хозяйство сирн рупитты ёх па грант охат вуты верытӆат. Там таӆан эсӆам охат хуӆам млн эӆты вет млн унты эӆатсайт.
«Хасям таӆатан си направление хуват вуӆы ёх ар ох посатсат. Сишан сельской хозяйство министерствайн, антом туп муң округеван, хон мувев ӆоватан си ураңан охӆаӆ эӆатсайт. Си охат энамты войт, мув, коммуникацияйт, техникая («Бураната») па па мосты пормасата посатты верытӆат. Си нэпекат ИП па КФХ сиран ӆэсятты рахаӆ.
Вуӆы ёх Ямал форм хозяйствования грант хуват ох шитты верытӆат. Там таӆа хоӆна конкурс ант верыӆыса, сишан нэпекат рахаӆ ӆэсятты.
Муң хосяев арпелак вуӆы ёх хоятат рутӆаӆ рупатая вуӆат. Хой КФХ па ИП сирн нэпекӆаӆ ӆэсятты питаӆ, шеңк ар рупитты хоят вуты ант мосаӆ. Ар хоят рупатая вуӆан, охан сохаптаты мосаӆ, социальной отчисленияйт верты. Хун иса яха ӆуңатты, охаӆ ара хойӆ. Хой аршак ох вуты ӆытӆа, йи рупитты хоят туп ханшӆтыты рахаӆ», — сельскохозяйственной кооперация сферайн па ЯНАО фермерата нётты Центр компетенция куся нэ Ольга Борисовна Щербина потар тус.
Вуӆы ёх нёхи маты хоятат па субсидияйт вуты верытӆат. Ӆорвош район Унсыӆкурт эӆты Кузьма Григорьевич Возелов ус. Ӆув крестьянско-фермерской хозяйство сирн рупитаӆ, каматса ясаң ястас: «Ма КФХ сирн яң таӆ рупитӆам. Си еӆпийн Горковской рыбозаводан хольмаң таӆ хуӆ веӆман усам. Вушкурт шанш пелакан вуӆыӆам тайӆаӆӆам. Хольмаң пеӆа вет таӆа мувем арендая маса. Хольмаң вуӆы тайӆам, пушасан уӆӆат. Там мосванан ур мув эӆты хоӆна яң вуӆы тусам».
Альбина Тырлина ханшам потар
Авторы
Лух Авт
Темы