Лух Авт
Вуӆэӊ па хуӆ-вой веӆпасӆаты ёх емаӊ хатӆэӆ постасат
Хащам ятан Русскинской куртан Сорханӆ районан рут щирн мув тайты хантэт «Вуӆэӊ па хуӆ-вой веӆпасӆаты ёх емаӊ хатӆэӆ» хорасаӊа постасат. Тамащ уйтантопсайн вантсэв, хоты туӊа-щира па ошаӊа-щащаӊа уӆты ай унт куртатан уӆапса щирӆаӆ ӆэщатты хантэт Туром ёхан хуватан ӆый кутэӆн кассат.
Сорханӆ районаӊ арсыр куртат па вошат эӆты хоятат ёхтыӆысат. Щи воӆаӊ вер ураӊан ямкем ар мойӊ хатнэху Сорханӆ, Тюмень, Екатеринбург ун вошат эӆты там хорамаӊ емаӊ хатаӆн па усат.
Мет оӆаӊан тый актащам хоятат еӆпийн Ас-угорской «Хатӆые» нэмпи якты па потрат ванӆтаты таха ай ёх ханты мир якат туӊа-щира альсат. Ӆый юпеӆн па «Ёмвош ёх» арыты хотаӊ нэӊат мир еӆпийн сыр-сыр ай па ун арат шеӊк умща арысат. Кашӊ ай муй уншак хоята тата шеӊк умащ ус ӆыеӆ ванттыя па хуӆанттыя.
Ияха актащам хоятат еӆпийн муӊ Югра мув округев вуӆы тащат тайты куща ху Степан Кечимов тамиты потартас:
– Там хатаӆн «Вуӆэӊ па хуӆ-вой веӆпас ёх емаӊ хатӆэв» 55-мет пуш постаты питӆув. Щимащ воӆаӊ вер ураӊан кашӊ ай па ун хоята ям ясӊат ястаӆам, ӆуӆан нын иса вещкат номасн ат ёхатсайты, касты муй тынасты па щутщаты верӆан туӊа-щира, туса еӆӆы ат мантсат. Ванта, Сорханӆ районан ёхи хащам таӆатн ханты ёхӆув мет ун тайты вуӆы тащат энмаӆӆат. Нын касапса юшӆан иса пайӆыя ат йиӆат. Ям емаӊ хатӆ нынана!
Аӆаӊсахат вушат эӆты касапсайт еӊта ӆорэв хоща мантыя питсат, и тухаӆ нэӊат па ху ёх касты верӆаӆ етшаптасат. Тухаӆ ёх сора ӆохатн хухаӆсат, кимет отат тынщаӊ сува ёваӆсат муй ухӆат шоппи наварсат. Хащам ёх юращсат па катӆасысат.
«Мув-ават па хатнэху» сыр-сыр унт войт, хуӆ хорасат шавиты А.П. Ядрошников нэмпи хот еӆпийн ханты ёхӆув тынасты хар версат. Щита вуӆы, кураӊ вой нёхи, арсыр ёхан хуӆат муй унт вой сохат па вонщамотат ёша пайттыя кашӊ хоят верытас.
Тамащ емаӊ хатӆат Русскинской куртан Сорханӆ районан иса 1970-мет таӆ вуш эӆты вертыя питсайт. Мет ун па воӆаӊ касапса хантэт кутатн — щит, хун ӆый вуӆыйн кирам ухӆатн касӆат. Там пуш щи вер ураӊан 40 хатнэху вуӆэт касты щира ӆэщатас. Щиӊанща щи касты верн нох питам па оӆаӊмет тахая ёхтам хоятат «Буран» нэмпи лонщхопан мойӆасайт. Тампуш ищи щимащ мойӆапса ӆыеӆа мув иӆпи тащ каншты тахайт эӆты мийм нётапсайт онтасн куща ёхӆаӆ ӆэщатсат.
Там кутатн Сорханӆ район унт куртаӊ рут муватн аратэӆн кат щёрас моӆтас хатнэху уӆ. Ӆый юкан вуӆэт тайӆат, хуӆ-вой веӆӆат па вонщамотат акатӆат.
Вуӆэӊ ухӆатн касты нэӊат кутн хуӆмет тахая тата Алёна Вылла ёхтас, ӆув «Зубр» нэмпи унт юх эватты картыйн маса. Кимет таха Елена Ренгова вус, ӆув па хон пелак хоп сэвас моторн юкантса. Оӆаӊ тахая Нина Тэвлина питас, ӆув «Буран» ӆонщхопан мойӆаса.
Щаӆта ху ёх кутан хуӆмет тахая Дмитрий Тэвлин ёхтас, ӆув «Зубр» нэмпи унт юх эватты картыйн маса. Кимет таха Виталий Вылла вус, ӆув па хон пелак хоп сэвас моторн юкантса. Оӆаӊ тахая Денис Комтин питас, лув «Буран» ӆонщхопан мойӆаса.
Щиты Русскинской куртан Сорханӆ районан «Вуӆэӊ па хуӆ-вой веӆпасӆаты ёх емаӊ хатӆэӆ» рут мув щирн уӆты хантэт сохнаптасат.
Владимир Енов ханшам потар
Авторы
Лух Авт
Темы