Лух Авт
Вуӆэӊ ёх емаӊ хатӆат манӆат
Курк тыӆащ вуш эӆты ун кер тыӆащ соханты унты мув суӊев ӆоватан Вуӆэӊ ёх емаӊ хатӆат манӆат. Кашӊ вошан, кашӊ куртан тащан яӊхты мир яха уйтантыӆат, кущайт пиӆан потрэмиӆат, леккаратан вантӆайт, Овс мув шимӆаӊ мир хоятат пиӆан рупитты ёхатан нётопсайн мийӆыӆайт.
Там ӆапатан аратаӆ мир Ӆорвош района манас. Ванты щита Ханты-Мужи куртан касапса, якаӊ-араӊ харат манты питӆат. Щи ёхатты мойӊ хоятат верытӆат антом туп вуӆэӊ ухӆа ӆэӆамтыты, щи тумпийн ӆоваӊ ухаӆан ищи хорӊаӆтыӆайт, еша тутӆыӆайт.
Емаӊ хатаӆан кашӊ хоят нэпекан маӆа, хота ханшман уӆты питаӆ, мата харатан муй манты питаӆ. Щи тумпийн, щита рахаӆ ёнтопсаята пиӆтащты, хота нох питам хоят Волгоград воша манаӆ. Ищи хатаӆан иса ӆэр питаӆ, хой ойн ёхатса. Ванты, там пуш 80-мет таӆэв постаӆэв Воӆаӊ Ляльн нох питам эӆты.
Ноябрьск вошан там ӆапатан ищи хоӆ «Авка» нэмпи емаӊ хатӆа актащӆат. Ханто нэмпи ӆор шомая верӆа. Овс мув шимӆаӊ мир хоятат касапсайт манты порайн кашӊ хоят верытаӆ «Юбилейный рекорд» постаты. Ӆув эӆтайӆ туп юраӆ па щёмаӆ мосаӆ, щаӆта па ям номас. Вератты ӆаӊхаты хоятат ураӊан мастер-кӆассат манты питӆат, щий ищи пиӆтащияты, ант хошам верата утаӆтыяты.
Пулӊават вошан па ӆапатан постаты питӆа. Мосванан нэпек уйтса, хота ханшман уӆӆа, хун там воӆаӊ вошеван оӆаӊ пуш Вуӆэӊ ёх емаӊ хатӆ манас — щит курк тыӆащ 2-мет хатӆ 2004 таӆ. Там еӆпийн туп тащ хотатан верыӆыса.
22-23-мет хатӆатан Полябта ёхан каӆнаӊан манаӆ. Турамсот касапсайт верӆайт, мет шопаӊ щит вуӆэӊ ухаӆан хой сорашак ёхатаӆ. Аратаӆ миран щи касапса шеӊк мосман тайӆа. Ванты щи порайн ныӆа хой хонна, турамсот ӆонщхоп этам вуш эӆты, ухаӆан яӊхты хошаӆ. Хоты вуӆыӆаӆ утаӆтаман тайӆаӆӆы.
Щи тумпийн мойӊ хоятат хошъйиӊкан йинщаӆтаӆайт, хуӆан ӆапатӆайт. «Хошъйиӊкаӊ фестиваль» онтасан нэмоӆты хоят ӆэӆӆы ант хащаӆ. Щаӆта кашӊ нюки хота рахаӆ ӆоӊтыты, щита каврам шай йинщематы.
Щи юпи ӆапатан па хоӆ Аксарка воша сонтамаӆат. Щий аратаӆ мира умащ яӊхты. Ванты аршак вуӆэӊ ёх ёхтыӆыйӆ. Ӆувиӆаӆа куртан ӆащкамшак уӆты.
Тата мосванан тащан яӊхты мохиӆув Новый Уренгой па Тарко-Сале вошӊанан уйтантысат. Кашӊ вош ӆув ямаӆ па яӆап вераӆ аляӆ. Ванты щи порайн умащшак. Кашӊ хоят моӆты вер сахат ӆаӊхаман щи воша манаӆ, ант вантыӆыйм вер нопса понаӆ.
Хонна кашӊ щищки, вой там тови хатӆата аматаӆ. Хоятэв ищиты, хошам па найӊ хатӆата. Щи веран емаӊ хатӆата яӊхаты па ищи амтатӆыяты. Рутӆан-сырӆан пиӆан уйтантыяты, няврэмӆан пиӆан шушиӆыяты.
Аллина Тоярова ханшам потар
Авторы
Лух Авт
Темы