Лух Авт
Вуӆ Ляль питам порайна
Там пуш нийӆъяӊ таӆа йис хоты Вуӆ Ляль етшас. Муй арат таӆ кепа хащаӆ, щи шук пора хун мурэван ёрэмаӆа. Ин там унты эвиӆаӆна, похӆаӆна па хиӆыӆаӆна номасна шавиӆайт, самӆаӆ хошиӆат, сэм йиӊкӆаӆ щёрыӆат, хун Ляль эваӆт хуӆӆат па вантӆат.
Там йис энамты няврэмата мосаӆ потарты па ханшты хой лялясас, ёхи ант ёхтас, хой ляль харан век тапас. Любовь Петровна Ендырева муӊ Овс мувевна яма уйтӆа. Там иса ӆувеӆ рахты ясӊат: вератты, арыты, монщты, ханшты нопсаӊ, вещкат, самаӊ хоят.
Любовь Петровна ястаӆ: «Ащем ант ӆытас, ант кашащас ляль эваӆт потарты. Тухаӆ ишан моса потар шупиет лавас.Ащем Пётр Эндович Ендырев 1942-мет таӆан ляля вуса. Вер щиты ус: ӆув Лаборовой куртыя соӆ ураӊан манас, па щи порайн щита ху ёх ляля акатсайт па китсайт. Щиӆта щи ляля манас. Кирам ухӆаӆ щиты щи куртан хащас. Муй сохан ус па щитан щи манас. Ӆув ханты сохӆаӆан щита хув уӆмаӆ, пора хащман военной формайн миямат. Оӆаӊ ёхатмеӆан утаӆтасайт пошкан эӆты орытты, ӆув щи вер яма хошсаӆӆы. Ай пора эваӆт веӆпасӆаты яӊхас.
Ащем уӆмаӆна шеӊк ант ӆытас потарты. И порайна потартас, хоты ӆув мушмаӆтыса: «Мув уӊхат хирты мосаӆ, шанш охан омасман мув хирӆув, нох ӆойты ант рахаӆ. Щиты хирастэв сахат, аӊкармасам па шияӆасам, моӆты ма лепем мола хататлияӆ. Итта нумасман, щит похатты мутра уӆмаӆ. Ма вантман тайӆэм. Моӆты порайна сэмӆам пентсат. Хомта хуйӆам па, щи арат кур каӆтам шияӆасам. Отща хуйӆам. Каӆаӊ каӆтам вантты хошӆам. Тупа нёӆ тайӆаӆ холащ пеӆа уӆӆат, артаӆаты питсаӆӆам. Па ваӊкты питсам. Сэмӆам па лап пентсат. Щаӆта моса пораятан па ма таӆӆайм».
Щиты таӊха хотащ госпиталя ёхтаптам. Ин там унты ащем мойӆапса нэпекӆаӆ шавиӆӆам, хиӆыӆам эӆты этаӆтыӆӆам. Еӆӆы уӆапсаев туӊащ ат манаӆ».
Любовь Возелова ханшам потар
Авторы
Лух Авт
Темы