Лух Авт
Войт энмаӆтыйс, хоятата нётыӆыйс
Там ӆапатан ветмет хатаӆан Галина Егоровна Русмиленко 70-мет таӆаӆ постас. Ӆув Горка вошан уӆ. Аратаӆ хотаң хоятӆаӆан, рутӆаӆан сэма питам хатӆаӆан ям ясаңан ястаса, мойӆаптаса.
Галина Егоровна вуӆэң ёх семьяйн Куноватской нюраман сэма питас. Ащеӆ Егор Иванович Русмиленко па аңкеӆ Дарья Алексеевна Русмиленко (Нялимова) «Красный Север» нэмпи колхозан тащ шавиман яңхсаңан. 1959-мет таӆан аңкеӆ-ащеӆ Кушеват курта касаӆсаңан.
Ар няврэмаң семьяйн Галина уншак ус. Щишан апщиӆаӆ вантман па вопиман тайсаӆӆы. Щи тумпийн ёӆан ищи катӆантыйс, аңкеӆа па ащеӆа нётыӆыйс. Ӆов, мис па ошат юпийн яңхиӆыйс. Картопка омпсыӆыйс па нох вуйӆыйс.
Каман юр па щём маныӆыйс торан сэвартыя. Ванты, щи арат вой таӆ сыс ӆапатты мосас. Щишан ӆуңан, таӆаң хоттэӆан, торан сэварты харан уӆӆыӆысат.
1970-мет таӆатан Горка воша касаӆсат. Аңкеӆ-ащеӆ «Горковской» совхозан рупитсаңан, вой энмаӆсаңан. Щи тумпийн ёӆан ищиты ӆоват, мисат па ошат тайсат.
Галина ашкуӆайн утаӆтыты етшамаӆ юпийн «Горковской» совхозан рупитты питас. Щурни, картопка па па хорпи ӆэвпасат энамты харан рупитас. Щаӆта ай мисат шавиман рупитас.
1972-мет таӆ эӆты зверовода понтса. Щита норкайт энмаӆтас. Тамащ тахайн рупитам хоятат эӆты потартыса, «Норка хотан» рупитаӆ. Ӆаварт ус щи войт пиӆан рупитты, порэматы верытӆат. Юхат лэпкат пиӆан волкемас, ӆув пиӆэӆан кеншак ус. Амтатӆыман хухатӆысат.
Галина Егоровна шеңк яма рупитас, оӆаң тахая питыӆыйс. Там рупатайӆ тумпийн куртаң уӆапса хоща ищи нётас. Шеңк ар мойӆапса нэпек тайӆ, «За успехи в развитии сельского хозяйства СССР» меваӆ посан юкантса, «Ударник пятилетки и социалистических соревнований» посат тайӆ. Ветеран труда па Ямала нэм хоӆамтас. Каматса пуш куртаң, район депутата пирыӆыса. Профсоюз щиран рупатайӆ шеңк яма тусӆы, щишан рупитам хоятӆаӆан шеңк мосмаңа тайса. Куртаң хоятӆаӆан ванан тайӆа па ант ёрэмаӆа.
2002-мет таӆан щутщаты манас. «Горковской» совхозан хольмаң таӆ рупитас. Пенсияя манмаӆ юпийн, ёӆан аӆ ант омасаӆ, вошат хуват яңхиӆыйӆ, вантаӆ, хоты па мув суңатан хоятат уӆӆат, муй хорпи каш харата яңхиӆыӆат.
Ханты мир уӆапсайӆ ищи ант вощкасӆы, ханшаң сэвам вайт сэваӆ, хорамаң сак лопсат каратӆ, нуй па щашкан эӆты ханты сохат ёнтаӆ. Хиӆыӆаӆ иса ӆув хощайӆ ёхтыӆыӆат, хорамаң ернасатан ёхи маныӆыӆат.
Галина Егоровная сэма питам хатаӆан мойӆапса ясаң китӆув. Тумтак ёш, тумтак кур! Ойңа-пищаңа, йисаңа-нуптаңа!
Максим Русмиленко ханшам потар
Авторы
Лух Авт
Темы