обновлено: 07:15, 26 мая 2023
Лух Авт
Вой-хуӆ веӆпасӆаты кеша мосты нэпекат иса ёшан ат уӆӆат
Ущ тыӆащ хутхощъяңмет хатаӆ унты Асан хуӆ веӆпасӆаты ант рахаӆ. Щи веран там ӆапатан ма «Коллегия адвокатов ЯНАО» НП адвокат Ришат Ренатович Вагапов пиӆан уйтантысам, потрэмасман, муй верат сахат Овс мув шимӆаң мир хоятат арпелак щиран ёварӆаӆат.
– Ришат Ренатович, каматса ясаң яста, муй верат пиӆан наң хощаен муң шоши хоятӆув атма питам верӆаӆ эӆты ясаң верыӆыӆат, нётопса вохиӆыӆат?
– Арпелак хоятат Ӆорвош, Приуральской, Ямальской район эӆты ясаң верыӆыӆат. Ванты, хун ант эсӆыты порайн хуӆ веӆпасӆаты яңхиӆыӆат па щита мощатыӆыӆайт. Муй па эсӆыты порайн яңхтэӆан, щи кеша мосты нэпекат ант ӆэщатман уӆӆат. Вер тыйты порайн ӆув сам ки ӆарпитыты ант верытӆат, ӆувиӆаӆа мохтышак адвокат хоща ясаң верты мосаӆ. Арпелак верат сахат ветхощъяң щёрас унты штрафан поныӆыӆайт, ант омасӆайт. Вер тыйм юпийн, ӆэрапты щиран иса ки туңмаӆаӆ — щи порайн судебной штрафан маӆайт, иск ант ханшӆа.
– Муй хорпи нэпекат ӆэщатты мосаӆ?
– Шеңк такан нумасты мосаӆ лицензия па квота нэпекат ёшан тайты. Щи тумпийн рахты хоӆпатан ноптаӆтыты, хопан яңхты вер ищи ӆэщаӆаман ат уӆ. Там порайн Асан ант эсаӆӆа хуӆ мощатты, тухӆат ӆоран веӆпасӆаӆат. Щишан нэпекат ищи ӆэщатты мосаӆ. Щита ищи заявительной принцип щёхар тыӆащ 1-мет хатаӆ унты рупитаӆ. «Традиционной рыболовство» щиран утхота, ЯНАО АПК департамента, сайт мохты нэпекат китты. Кашң хоят ӆув нэмаӆ тумпийн ханшаӆ, муй арат хуӆ мосаӆ, муй рут, хота веӆпасӆаӆ. Щи веран муң ищи нётӆув. Туп мосаӆ аӆаңшак ясаң вертыя, нэпекат ищи морт хатӆ унты маты мосӆат, тыӆащ кеман. Щи юпийн хуӆ веӆпасӆаты Федеральной агентство хоща манӆат.
Кашң хоята мосаӆ туңа щира ФЗ-166 «О рыболовстве и сохранении водных биологических ресурсов» ӆуңатты, щита мосты верат иса ханшман уӆӆайт. Ин уголовная ответственность щира кашң хоят питты верытаӆ, щишан нумасты мосаӆ хуӆ веӆпасӆаты манты еӆпийн. Овс мув шимӆаң мир хоятат реестра ӆоңаӆтыман ат усат, щи нэпек иса вантман тайӆа.
Матты хоята нётопса ки мосаӆ, верытӆат 89044539558, 89581663176 телефон хуват ясаң вертыя, нётопса вохтыя.
Аллина Тоярова ханшам потар
