Лух Авт
Ветъяң таӆа ювам ики хуӆ веӆпасӆаты верн ой уйтас
Йистэӆн Ас пуңаӆн уӆты хантэт хуӆ веӆпасӆаман уӆӆат. Щита мет оӆаңан хуӆ артелят тыйсат. 1898-мет таӆн Ӆорвош мувн купец ху М. Плотников Питӆор куртан хуӆ консервайт верты питас. Щаӆта Кушеват куртан хуӆ комбинат тыйс — щитат еӆӆы «Горковской» нэмпи хуӆ завода йис, щит лыпат энамты тыӆащ 12-мет хатаӆан 1930-мет таӆн Горки (ханты щирн Яӆап вош) вошн верса. Артемий Гудков — оӆаңмет кущая ус. Воӆаң Отечественной Ляль порайн хуӆ веӆпасӆаты ёх мет ар хуӆ масат. 1941-мет таӆн — 17 960 центнер, 1942-мет таӆн — 33 082 центнер, 1943-мет таӆн — 36 646 центнер, щиты 1951-мет таӆ унты ус. Щи порайн кущая Фёдор Дрожжин ус.
«Горковской» тахайн ар таӆ Илья куртаң Шульгин рут икет рупитӆат: Семён Степанович Шульгин — ӆув похӆ Алексей Семёнович Шульгин («Ӆорвош район Почётной ханнэху» нэм тайс) — ӆув похӆ Николай Алексеевич Шульгин — ин 30 моӆтас таӆ Асоваң хуӆ тахайн ӆув похӆ Станислав Николаевич Шульгин веӆпасӆаӆ.
Станислав — ма яем, щишн ма яма уйтӆам, муй щирн ӆув айтэӆн энмас па хуӆ па вой веӆпасӆаты вера утаӆтыяс. Ӆув ай порайн аӆаңа нох киӆас, ащеӆ пиӆн хоӆпат вантты яңхас, щитат Ай Ас посӆат хоща омассат. Туп хатӆ кутоп порайн керӆыӆысңан. Щи тумпийн Илья курт пуңаӆн Няр хуӆ посӆ хоща ищи ӆув хоӆпеӆ омсас, щитӆ ӆув ай хопн вантты яңхас. Иса порайн ащеӆа моторат, хоӆпат яӆпитты нётас. Щиты айтэӆн опращеӆ па ащеӆ эӆты хуӆ па вой веӆпасӆаты утаӆтас. Еӆӆы атэӆт хоӆпат омасты па мотор хопн вантты яңхты питас. Нумӆэм, Станислав па Игорь яйңаӆам хоӆна, мосаң, 15 таӆ ӆоват усңан, туп щащев ӆын эӆтэнан потартас: «Ӆын щи юраң икеңана йисңан, ун ху хоятңан иты хуӆ веӆӆаңан, щишн ӆынана аршак ӆэтот понты мосӆ».
Ашкулайн утаӆтымаӆн Станислав номса ёхтас — еӆӆы Шульгин рутэӆ вер туты питӆ. Щиты 30 моӆтас таӆ Станислав Шульгин Асов хуӆ веӆты тахайн мет ям рыбак, кашң пуш план тарматтаӆ. «Ёхи хащам таӆатн ай йиңк ус, щишн план ая верса, туняӆ таӆ сыс ма 17 тонна арат хуӆ масам», — яем ястаӆ.
Шульгин рут веӆпас тахайт Илья курт пуңаӆн уӆӆат, щит Асов курт эӆты 30 верста хуваттыйн уӆ. Илья курт — щит Ӆорвош район мув кимаӆн уӆ. Тата ӆув Игорь яем пиӆн уӆ, яӆап хотңан, певаӆтхот па па мосты хотат омассаңан. Там рут куртэвн ияха уйтантыӆув, арпелак рутӆув Асов куртан, итухӆ хоятат па вошатн уӆӆат. Тата муң хуӆ веӆпасӆаты, воньщамотат акатты яңхӆув, щутщаӆув.
Станислав Марина Ивановна (эви опращнэмӆ Муркина ус) имеӆ пиӆн вет няврэм энмаӆсаңан. Мет ай эвеӆ сэма питам вер эӆты щиты нумӆаӆӆы: «И пуш ма иӆ воямсайм па аньтем Валентина Прокопьевна (эви опращнэмӆ Талигина) уӆмисэм. Нох киӆсам па имохты нумассам, эвема ӆув нэмӆ маӆэм, щишн Валентина нэмн масэм». Туп ӆув семьяеӆа шук ёхтас — яӆап коронавирус муш эӆты имеӆ антома йис. Ун няврэмӆаӆ уна йисат — еӆӆы утаӆтыӆат па рупитӆат, щишн Станислав утща эвеӆ энмаӆтаӆ, опиӆаӆн нётӆа. Станислав па Валюша ай эвеӆ пеӆа шеңк умащ вантты — ӆын кутэнан нявлака потартӆаңан, ӆув ай эвеӆ шеңк самаңа тайӆаӆы, Валюша ащеӆа нётӆ, ӆув пиӆэӆн хопн муй «Буран» ухаӆн яңхты мосман тайӆ.
Ям арат таӆ ёхӆы Асов куртаң яӆап Озёрной нэмпи курт хулыйн Станислав Николаевич яӆап хотн маса. Ин хот ӆыпийн иса мосты отат верас, хот пуңаӆн мосты хотат омасӆ, ӆуңан опиӆаӆ огород хоща арсыр овощат омасӆат.
Станислав сэма питам хатӆаӆа, ропхаң курк тыӆащ 5-мет хатӆа, рутӆув, ӆухасӆаӆ актащсат, ӆув ӆувеӆа ар хошам ясңат ястасат. Ма ищи яема ястаӆам, ӆуӆн ӆув еӆӆы мир пеӆа самаң ханнэхуя ат уӆ, опращев вер еӆӆы тувман ям арат хуӆ па вой ат веӆпасӆаӆ па хув йис нупат ойңа-щуняңа, тумтака ат уӆ!
Людмила Шульгина ханшам потар
Авторы
Лух Авт
Темы