Лух Авт
Тус монщаӊ па араӊ хоятат нэмат ястасайт
Хащам ӆапатан Овс мув шимӆаӊ мир хоятат верат туты щиран уӆты департамент «Мастер фольклорного жанра» касапсая пиӆтащийм хоятат нэмат ястас. Ханты мир кутан няӆ хоят нэпек китыӆыйс. Ӆув кутэӆан Тамара Александровна Пырысева нох питас.
Тамара Александровна ханты мирэван шеӊк яма уйтӆа. 2005-мет таӆан ӆув ёра потарӆаӆ па ӆуӊтарӆаӆ ханты ясаӊан ханшты питсаӆӆы. Ай вош нэ ясаӊ эӆты, ӆув мет оӆаӊан няврэмат ураӊан ай ӆуӊтарыет ханшиӆыйс. Юхат и вантман уна йиты питсат, щаӆта ара понты питсаӆӆы.
Усть-Войкары куртан ван хатӆап тыӆащ 3-мет хатаӆан 1949-мет таӆан сэма питас. 1966-мет таӆан Ващъёханов нийӆ таӆпи ашкуӆа, 1970-мет таӆан Пулӊават педулища етшаптасӆы. Утаӆтыты етшамаӆ юпийн Ямкурта рупитты китса, щи юпийн Овкурт ашкуӆайн рупитты питас. Ванты, ай куртаӊ ашкуӆа лап пентса. 1981-мет таӆан номас понас Ӆорвоша касаӆты па щита еӆӆы рупитты. Щи ашкуӆайн 29 таӆ рупитас. Аратаӆан няврэмат утаӆтыты щираӆа 43 таӆ мас.
Мата куртан ант ат рупитас, кашӊ тахайн няврэмат па ун хоятат яха актыӆысӆы, араӊ па монщаӊ харата вохиӆысӆы. Ияха куртат па вошат хуват яӊхиӆысат, ханты арат па монщат мира этаӆтысат. Тамара Александровна юр па номас араӊ нэпека понас. Ӆув ёра ханшам арӆаӆ ин там хатӆатан кашӊ куртаӊ па вошаӊ емаӊ хатӆатан щащӆат. Мужи вошан уӆты «Ай Ас ёх» фольклорной коллектив ураӊан инты унты арат ханшаӆ.
2012-мет па 2024-мет таӆатан «Душа народов Ямала» нэман юкантса. Ванты ӆув арӆаӆ аратаӆ мира шеӊк мосмаӊа йисат. Арӆаӆ сухтатыйн, имохты таӆаӊ потар па уӆапса щир этаӆ. Матты ки ӆув Ай вош куртаӆан уӆӆыӆысан, щита уӆам хоятат пиӆан уйтантысан.
Ханты мир потрат, арат, монщат ищиты еӆӆы Тамара Александровна эӆты ат хуӆӆыӆув. Ӆув утаӆтам па утаӆтыты няврэмӆаӆ кашӊ пуш касапсаята пиӆтащиӆат па мойӆапсайт мощатыӆат. Ма нумастэман, тамащ хоятэв онтасан муӊ ханты мир ясӊев, ар совев ант хурӆаӆ па еӆӆы Ас йиӊк иты оваӆ, Кев вот иты поӆаӆ.
Аллина Тоярова ханшам потар
Авторы
Лух Авт
Темы