Лух Авт
Тохлаӊ хапатна яӊхты пора щи ёхтас
Тохлаӊ хапат 26 межмуниципальной па 11 внутримуниципальной маршрутат хуват яӊхта питӆат. Там товы нэмоса хол ант хайлиты рейс пунсса, Пулӊават эваӆт Мужи моса, па Пуровской районна холам йиӆап рейс, щит Тарко-Сале эваӆт Самбург, Халясавэй, Толька па парта.
Тохлаӊ хап ӆатты харат мули ӆэщатман оллат. Алаӊ рейс ай тахайт патты тыӆащ ертъяӊмет хатӆ Пулӊават эваӆт Новый Порт пеӆа манас. Ӆорвош район похлат пеӆа ай тахайт патты тыӆащ ихощъёӊмет хатӆ эваӆт, щит Пулӊават — Питӆор — Мужи — Горки. Пулӊават эваӆт Белояр пеӆа па ай тахайт патты тыӆащ ярхосмет хатӆ эваӆт яӊхта питӆ.
Пулӊават — Ӆапатӊак — Пулӊават эваӆт тохлаӊ хапат Ас патты сыс яӊхта топ питӆат.
«Ямал мув хуват авиаотрасль сэӊк вантман тайӆа. Ай куртатна нэӊхэт хасам тахайна ӆайӆастэӆ ораӊна модульной аэровокзалат версайт. Билет онлайн тыныты щират па тохлаӊ хап хоща питты электронной регистрация верса». — Ямал мув ёс верат департамента ропытты Дмитрий Искричев лавас.
Ямал мув губернатор Дмитрий Артюхов мийм партапсы щирна, нийӆ ай похална — Антипаюта, Гыда, Овкурт, Ныда, Кутопъюган, Горки, Питӆор па Новый Порт — модульной аэровокзалат версайт.
Тохлаӊ хапат ропытты щир инщиста там телефон хуват рахал: 8 (34922) 2-52-51.
Вера Лонгортова хансам потар
Авторы
Лух Авт
Темы