Лух Авт
Тащ хотна яңхсув, мохиӆув уӆапса вантсув
Мин тащ хотна яңхсаман. Щи хатӆ, щи хорпи наяң хатӆ ус. Юс щикем порантең па так ус. Лоньщ лоңал, най антасна, волияӆ. Сэм нох ант эӆӆаӆ. Тови вотна, кер пувиям. Юс эваӆт, ел ки пурамӆа, кур иӆ манаӆ, лоньщ ӆэпатты ювмаӆ.
Ур хотна ёхатсув. Юх кут эваӆт и ур хот этас, муң щиящ иремасув. Каман энамты ның лояӆ, ӆув юх сэврас. Муңев сыяӆас, мохты ищаӆт йис. Щит Кристина Никитична Серасхова. Щикем кунтат, юх эватты курты няремияӆ, юхат аӆ суппи рыйӆат. Итта хоты, там йисна, энамты ныңат, ур хотӆаӆ хоща, йиӆап щирна уллат. Хот ӆыпина нави рущ тут, лампочкаят кий лоңална лойӆат. Телевизорат муӆ тахайна омасӆат. Каман хорпи, аккумулятор заряжаятты поталэт. Ныңат хосам рущ верам сопекат тайӆат, икет ищи. Лойтантыты таха пела, хотэӆ ӆэӆтэӆ юпина, «Ямахайна», нярематэӆ онас ухлат. Щиӆта хопты йирты ван, сора ухал киртэӆ. Марина Гавриловна Серасхова, манэм потарсаӆӆы, хоты ӆув луң порайна, квадроцикл нэмпи хопна, рэх вонщты яңхмаӆ. Щимащ хопна ёхат калаң савитэӆ. Ӆытат лутты яңхтэӆ, курты юс пеӆа. Кимет ур хотна, Лидия Степановна Серасхова, ищи касӆыты щирна ӆэщатыяӆ.
Таӆ таям нюки, йикаӆ пилна, ухална ӆэӆсаӆӆан, халэват тови ухал хийӆат, ям тахайна, итта ямас кулна хуссаӆӆан. Ма ур хотна улмемна, нары хоща сахат усат, ӆаңкасыты. Итта одеялайна асат ӆаңкасыӆат. Кевна яңхтэӆна, куур тайлат. Пиӆңа пусаң ант понтэӆ, рущ портун вущитӆат. Йиңк, пластмас ведрайна тутэӆ, курты щукат. Ур ёх хоща, алак кулат ищи пластмас, пащаккет. Там ёх ухал алакат, ант артаӆасам, ӆув курты ухална манмеӆ па тащна, кораль хоща.
Товина хот ӆыпина муяккув тайӆат, лоңална паращен нюки понлат. Щитна каман ищки кепа, хот ӆыпина хосам. Кристина ниӆ няврем таяӆ. Ӆув сах вермаӆ, унтпаӆна, Марина Гавриловнайна, нётам сах ӆаңкар эватты. Ямас хоты сах верӆа, щиты нистыман, полтна нэрман. Кристинайна елащ ёнтам. Щимащ щир, щи мосаӆ. Унтпаӆ, меняӆ пиӆна, и щирна уллаңан. Туп нявремӆаӆ пиӆна, омет-ащет, рущ ясаңна потарӆат. Нявремӆаӆ ищи. Нявремӆаӆ ищи телефон пиӆна омастэӆ, щикем ямас, каман таха пеӆа понамтытэӆ. Мохты ныӆа, ханты улапсэв, па таха пеӆа, керӆаты питас. Ясңев туп ант ат устаӆэв. Щи.
Антонина Сязи (Серасхова) хансам потар
Авторы
Лух Авт
Темы