Лух Авт
Там йис няврэмат ун хоят ясаң пеӆа хуӆантӆат
Максаров Илья Никитович 1973-мет таӆ эӆты «Горковской совхоз» няӆмет бригадайн пастуха рупитас. Няӆъяң пеӆа вет таӆ вуӆы тащ шавиман яңхас. Ин па Никита похаӆ ветхощъяңмет моӆтас таӆ хотан рупитаӆ. Илья Никитович ӆапатъяң пеӆа ӆапат таӆа ювам юпийн хоӆна няврэмӆаӆ пиӆан хотан яңхаӆ.
Касты харан айӆат ёх юращтэӆ сыс ма ӆувеӆ инщассэм, хоты еӆпи тащ шавиты ёх рупитсат па кассат.
«Кашң емаң хатӆ манты порайн энамты ёх касӆат, юраңшак хоятат нох питӆат, мойӆапса шитӆат. Муң айшак уӆмеван ищи тамиты щи кассув. Хун рупитсув, ванта, иса куран, ӆохан ар километра шушӆув, мув лап ӆарытӆэв. Буранат щи порайн ант тайӆув, иса ухаӆан яңхсув. Там йис хоты па щиран. Щи такӆы ищи па няврэмат рупитӆат, ант лэнитӆат. Ун хоят ясаң пеӆа хуӆантӆат. Ӆувиӆаӆ ун хоят уӆ ки, ищи па ям. Каӆаңӆаӆ-вуӆыӆаӆ хоӆта эсаӆты, хоӆща касаӆты, ищи па ун хоят щи ищмаӆат. Катра порайн тащӆув унат, вуӆы аршак ус. Рупатаев щикуш ӆавартшак, ищи па яма маныӆыйс. Сохаптаты охаӆ па морткем ус. Ин хоты ӆапкая манӆан па тыӆащ рупитам охен антом. Хоят шоши каӆаң ант ки тайӆ, нэмоӆты хоятан ант нётӆа, ӆавӆапса антом.
Еӆпи рупитмеван, Георгий Яковлевич Саенко «Горковской совхоз» кущая ус. Ӆаңкар кущайӆаӆ пиӆан иса хота ёхтыӆыйс. Хоятат пиӆан потартас, хота муй вер ант тыйӆ, муй нётапса мосаң мосаӆ. Бригадират яха акатӆаӆӆы па рупата щиран инщасӆаӆӆы, иса йи номас понман рупитсув. Там йисан хоты куща ант вантыӆув, вуӆы шавиты ёх щиты щи уӆӆат, рупитӆат. Ям ясаң ястаты порайн, хоят ӆыпеӆ хошам руван ёхатӆа, ёшӆаӆ-курӆаӆ юраңа йиӆат, номпсаӆ еӆӆы ӆарпийӆ. Там емаң хатаӆан касты ёх еӆӆы па щиты каркама ат рупитӆат, войӆаӆ шавиӆӆаӆ, тумтак уӆӆат», — Илья Никитович ястас.
Зоя Куртямова ханшам потар
Авторы
Лух Авт
Темы