Лух Авт
«Сорни най» хольмаӊ пеӆа ветмет таӆэӆ постасэӆ
Хащам щутщаты хатӆатан Ӆапатнаӊк вошан «Сорни най» ханты арат арыты нэӊӆув ишаксайт. Хольмаӊ пеӆа вет таӆа йис, хоты ӆув емаӊ хатӆат порайн мойӊ па вошаӊ хоятата ханты уӆапсаев эӆты арыӆат па монщ вантопсайт альӆат.
«Сорни най» нэӊӆув пиӆан уйтантыты, ӆув арыты арӆаӆ хуӆантты ван рут хоятӆаӆ, вошаӊ мохет па мойӊ хоятат, каш верты йи хотан арыты нэӊӆаӆ па куща ёхӆаӆ ёхтыӆысат. Хошам ишакты ясаӊан ястасайт, арыты нэӊӆув эӆты ханшам арат арысайт, мойӆапсаятан мойӆаптасайт. Арыты тумпийн, тус ёшаӊ вератты нэӊииӆув пормасат эӆты вантопса ӆэщатман ус.
Сам эӆты йиты мойӆапса ясаӊ
«Тамхатӆ муӊ, аӆ хун тый ёхатсув. «Сорни найӆува» хольмаӊ пеӆа вет таӆа щи йис. Щи сыс эӆты муй арат ар арысты, монщ монщсаты, потар потартсаты. Еӆӆы пеӆа няврэмӆуван ӆуӆан арӆув, потартӆув ат арыты питсайт.
Ешак нэӊиет, там ойӆы-йисӆы нупат ятан Турам Ащийн, Каӆтащ Антийн, Най-Уртӆанан ат шавиӆайты. Няврэмӆан па хот тыхаӆӆан, пиӆан тумтака уӆаты», ¬– арыты арӆаӆ ханшам нэ Валентина Петровна Першина (Лонгортова) тамащ мойӆапса ясаӊан ястас.
Ханты арӆам арыман, ӆыпем аматаӆ
Хоты арыӆат, емаӊ хатӆата ӆэщатыӆат, щит эӆты Лариса Ильинична Витрук (Рохтымова) каматса ясаӊ ястас:
«Ма Овкурт ашкуӆа етшамем юпийн, там вошема рупата пеӆа утаӆтыты ёхатсам. Еша уӆ няӆъяӊ таӆа йиӆ, хоты ма хот нёсытты рупатаеман рупитӆам. Ӆапатнаӊк вошеман ху сая мантсам, няврэмӆам тата энампсат, хиӆэт тайӆам. Арыты щиран яха актащмев эӆты, муӊ каматса нэ, щиты щи хольмаӊ пеӆа вет таӆ арыты яӊхӆув. Яӆпа ёхтам ай эвет па тайӆув. Муӊ хоӆыена арсыр тахаятан: ай няврэмат хатӆ сыс шавиты хотан, ашкуӆайн утаӆтаты нэӊа, хот нёсытман, нови тут нэпекат ӆуӊатман рупитӆув.
Ӆапат кат пуш рупата хатӆэв етшаты юпийн, каш верты хотан яха актащӆув па ханты арӆув арыӆув. Кутӆуван рут ясаӊан потартӆув. Валентина Петровна ханшам арат манэм мет кен арыты. Щаня ёхан ясӊеман ванта яха ёхатаӆ. Нопсэм мохты рут мувем пеӆа карэмаӆ. Каматса ар Ӆапатнаӊк вошева постаман уӆ. Емаӊ хатӆат порайн арыты арӆув, вошаӊ хоятӆув шеӊк самаӊа хуӆантӆат. Пумащипа ясаӊ ястаӆат. Вошев тумпийн, округ вошат па районат хуват арыман яӊхӆув, Карелия муван усув».
Ма ӆыпеман воӆӆы ханты хоят
Арыты нэӊӆув, ӆув пиӆэӆан рупитты куща па тайӆат. Рупата вераӆ самаӊа туты хоят Елена Петровна Делеган (Старкова), мет оӆӊа ӆувиӆаӆ арыты группая акатсаӆӆы. Хольмаӊ пеӆа кат таӆ ӆув пиӆэӆан рупитас. Ӆув уӆты муваӆ пеӆа манмаӆ юпийн, баянан ёнтты ху Евгений Фёдорович Веденькин ёша хащсат. Уйтантопсайн, нёхты хор хуват мойӆапса ясаӊ китсаӊан. Йи хоттэӆ мохет иты яха рупитсат. Ханты ясаӊан арыйм арӆаӆ хоӆна нумман тайӆаӆӆан. Наталья Сергеевна Ткаченко «Сорни най» нэӊӆув пиӆан йи таӆ туп рупитаӆ. Рупатайӆ яӆап щиран туӆӆы, каш альты порайн ястаӆат, щит мохты ныӆа.
«Ма рупата щиран «Народной хор» кущая утаӆтысам. Туп нэмоӆты порайн ант нумассам па мув мир ёх ясаӊ пиӆан рупитты. Рупатайн щит хоты шеӊк ям. Яӆпа утаӆтыӆан, яӆап щират-пищат уйтты питӆан. Арат арыман, ханты ясӊат оша пайтӆам. Арыты нэӊӆаман мохты вана усайм. Ма па ӆув эӆтэӆ утаӆтыӆам. Муй щиран мосты щира верты мосаӆ, иса инщасӆаӆӆам. Хащам таӆ яха рупитмев сыс, нэмоӆты порайн кашӆы номасан ант ёхтыӆысайм. Ма матты ки хув тэӆан ӆувиӆаӆ уйтӆаӆӆам. Ӆувиӆаӆ кащаӆатэман, самем ойн хувӆаӆ.
Каш туты амат хоятата мийман, рупатаев еӆӆы ат манаӆ. Валентина Петровнайн хоӆна ар хорам аратан ат ханшӆаюв. Арыты нэӊӆам тумтак ат уӆӆат. Няврэмӆаӆ, хиӆыӆаӆ яма энмаӆӆат. Муӊ пиӆэван арыты хоӆна аршак эви па ёх хоятат ат ёхатӆат».
Тамащ хошам, хорам уйтантопса ус. «Сорни най» нэӊӆув хоӆна ар таӆ хоятата амат ат туӆат. Ханты ясӊев щуняӊа, сыяӊа хува ат щащаӆ, еӆӆы манман мет юраӊа ат йиӆ.
Зоя Куртямова ханшам потар
Авторы
Лух Авт
Темы